title
title
ܬܘܒ ܐܓܪܬܐ ܕܩܕܝܫܐ ܐܘܓܪܝܣ: ܕܠܘܬ ܡܠܢܝܐ:
1
section
1
ܝܕܥܐ ܗܝ ܒܣܝܡܘܬܟ ܡܪܝ: ܕܐܝܠܝܢ ܕܪ̈ܚܝܩܝܢ ܡܢ ܚܕ̈ܕܐ ܡܛܠ ܡܬܚܗ ܕܛܘܪܐ ܡܦܪܫܢܐ: ܕܡܢ ܥܠ̈ܠܬܐ ܣܓܝ̈ܐܬܐ ܘܡܫܚ̈ܠܦܬܐ ܕܡܥܕ̈ܢ ܩܪܝܢ ܡܫܬܟܚ܆ ܐܡܬܝ ܕܨ݁ܒܝܢ ܕܢܕܥܘܢ ܐܘ ܕܢܘܕܥܘܢ ܨܒ̈ܝܢܝܗܘܢ ܘܪ̈ܐܙܝܗܘܢ ܟܣܝ̈ܐ. ܚܕ ܠܚܕ: ܗܢܘܢ ܕܠܐ ܗܘܐ ܟܠ ܡܢ ܕܗܘ ܘ݁ܠܐ ܕܢܪܓܫ ܒܗܘܢ: ܐܠܐ ܪ̈ܥܝܢܐ ܕܡܚܝܢܝܢ ܠܩܢܝ̈ܝܗܘܢ. ܒܝܕ ܟܬܝ̈ܒܬܐ ܗܠܝܢ ܣ݁ܥܪܝܢ. ܘܟܕ ܪ̈ܚܝܩܝܢ ܩܪ̈ܝܒܝܢ. ܘܟܕ ܡܒܥܕܝܢ ܚ݁ܙܝܢ ܘܡܬܚܙܝܢ. ܘܟܕ ܫܠܝܢ ܡܡܠܠܝܢ ܘܫ݁ܡܥܝܢ. ܘܟܕ ܗܢܘܢ ܟܒܪ ܕܡ݁ܟܝܢ ܥܝܪ̈ܝܢ. ܒܗ݁ܝ ܕܨܒܝܢܗܘܢ ܒܥܒܕܐ ܡܬܓܡܪ. ܘܟܕ ܟܪܝܗܝܢ ܚܠܝܡܝܢ. ܘܟܕ ܝܬܝܒܝܢ ܪܗܛܝܢ. ܐ݁ܡܪ ܐܢܐ ܕܝܢ ܕܐܦ ܟܕ ܡܝܬܝܢ ܚܝܝܢ. ܒܗ݁ܝ ܕܠܘ ܐܝܠܝܢ ܕܩܝ̈ܡܢ ܡܨܝܢ ܟܬܝ̈ܒܬܐ ܕܢܘܕ̈ܥܢ ܒܠܚܘܕ. ܐܠܐ ܐܦ ܕܥܒܪ ܐܦ ܕܥܬܝ̈ܕܢ.
2
section
2
ܘܗܪܟܐ ܡܬܚܙܐ ܚܘܒܗܘܢ ܫܘܝܐ ܕܪ̈ܓܫܐ ܐܝܟܢ ܟܠ ܚܕܚܕ ܡܢܗܘܢ ܡܚܘܐ ܚܝܠܗ: ܘܡܡܠܐ ܕܘܟܬ ܚܒܪܗ. ܚܠܦ ܓܝܪ ܠܫܢܐ ܐܝܕܐ. ܘܚܠܦ ܐܕܢܐ ܥܝܢܐ. ܗܘܐ ܕܝܢ ܚܠܦ ܐܪܥܗ ܕܠܒܐ ܟܪܛܝܣܐ. ܕܒܝܕ ܚܛܘ̈ܛܐ ܕܣܘܪ̈ܓܕܘܗܝ ܡܩܒܠ ܨܒ̈ܝܢܐ ܕܐܙܕܪܥܘ ܒܗ. ܥܡ ܫܪܟܐ ܕܥܘܕܪ̈ܢܐ ܣܓܝ̈ܐܐ ܘܕܢܝ̈ܫܐ ܡܫܚ̈ܠܦܐ: ܘܕܦܘܪ̈ܫܢܐ ܘܕܚܝ̈ܠܐ ܕܫܟܝܚܝܢ ܒܗܝܢ. ܕܠܘ ܙܒܢܐ ܗܘ ܗܫܐ ܕܥܠ ܟܠ ܚܕܚܕ ܡܢܗܘܢ ܢܡܠܠ.
3
section
3
ܘܒܗܠܝܢ ܡܬܒܣܡ܆ ܐܝܢܐ ܕܡܦܣ ܒܗܝܢ ܒܟܬܝ̈ܒܬܐ. ܐܡܪ ܐܢܐ ܕܝܢ ܕܐܦ ܐܝܢܐ ܕܠܐ ܡܦܣ܆ ܡܬܥܕܪ ܐܝܟܐ ܕܐܠܨܐ ܡܢ ܗܘ ܕܡܦܣ. ܗܢܐ ܡܢ ܡܢ ܚܙܬܐ ܐܬܥܕܪ. ܗܘ ܕܝܢ ܡܢ ܫܡܥܐ. ܠܐ ܕܝܢ ܪܒ ܥܘܕܪܢܗ ܕܫܡܥܐ ܘܫܪܝܪ ܐܝܟ ܕܚܙܝܐ. ܡܦܣ ܐܢܬ ܗܘ ܓܝܪ ܒܕܐܝܟ ܗܠܝܢ ܦܘܪ̈ܫܢܐ.
4
section
4
ܘܥܠ ܐܦ̈ܝ ܗܠܝܢ ܟܠܗܝܢ܆ ܡܢܘ ܣܦܩ ܕܐܝܟ ܡܐ ܕܘܠܐ ܢܘܕܐ ܠܝܗܘܒܗ ܕܗܕܐ ܟܠܗ̇ ܡܘܗܒܬܐ. ܕܐܝܟ ܣܒܪ ܐܢܐ ܝܬܝܪ ܡܢ ܣܘܓܐܐ ܕܡܘ̈ܒܬܗ ܪܒܐ. ܒܗܝ ܕܗܝ ܝܬܝܪܐܝܬ ܡܒܕܩܐ ܥܠ ܚܝܠܐ ܕܚܟܡܬܐ ܘܚܘܒܐ ܕܝܗܘܒܗ. ܘܐܬܚܙܝܬ ܕܐܝܢܐ ܕܪܚܝܩ ܡܢ ܚܒܪܗ܆ ܒܝܕ ܐܝܕܐ ܘܨܒܥܐ ܘܩܢܝܐ ܘܕܝܘܬܐ ܘܟܪܛܝܣܐ ܥܡ ܫܪܟܐ ܕܥܠܠ̈ܬܐ ܐܚܪ̈ܢܝܬܐ ܕܡܫ̈ܡܫܢ: ܡܪܓܫ ܒܨܒܝܢܐ ܕܚܒܪܗ. ܐܝܢܐ ܕܝܢ ܕܩܪܝܒ ܠܐ ܣܢܝܩ ܥܠ ܗܠܝܢ ܟܠܗܝܢ. ܐܠܐ ܐܘ ܥܠ ܦܘܡܐ ܗܘ ܕܒܗ ܡܠܬܐ ܘܪܘܚܐ ܐܟܚܕܐ ܡܫܬܡ̈ܫܢ: ܘܡܫܡ̈ܫܢ ܠܐܕܢܐ ܘܠܠܒܐ܆ ܐܘ ܥܠ ܐܝܕܐ ܘܨܒܥܐ ܒܠܚܘܕ. ܕܡܫܡ̈ܫܢ ܠܥܝܢܐ ܘܠܠܒܐ. ܚܙܝ ܕܝܢ ܕܢܝܚܐ ܫܪܝܪܐ ܠܐܝܢܐ ܕܪܚܝܩ ܡܢ ܚܒܪܗ܆ ܒܝܕ ܚܙܝܐ ܗܘܐ. ܠܐܝܢܐ ܕܝܢ ܕܩܪܝܒ ܒܝܕ ܫܡܥܐ.
5
section
5
ܘܗܠܝܢ ܟܠܗܝܢ ܕܒܝܕ ܟܬܝ̈ܒܐ ܗܘ̈ܝܢ. ܛܘܦܣܐ ܐܢܝܢ ܥܕܟܝܠ: ܕܐܝܠܝܢ ܕܒܫܪܪܐ ܡܣܬܥܪ̈ܢ ܨܝܕ ܐܝܠܝܢ ܕܪܚܝܩܝܢ ܡܢ ܐܠܗܐ. ܐܝܠܝܢ ܓܝܪ ܕܪܚܝܩܝܢ ܡܢ ܐܠܗܐ: ܡܛܠ ܥܒܕ̈ܝܗܘܢ ܡܣܠܝ̈ܐ ܕܦܪܫܘ ܒܝܬ ܠܗܘܢ ܠܒܪܘܝܗܘܢ: ܗܘ ܐܠܗܐ ܡܛܠ ܚܘܒܗ ܨܝܕ ܡܨܥܝܘܬܐ ܕܒܪ̈ܝܬܐ: ܗܠܝܢ ܕܐܬܩܝܡ ܐܝܟ ܟܬܝܒ̈ܬܐ ܒܝܕ ܚܝܠܗ ܘܚܟܡܬܗ: ܗܢܘ ܕܝܢ ܒܝܕ ܒܪܗ ܘܪܘܚܗ ܐܬܦܪܣܘ ܕܢܪܓܫܘܢ ܘܢܬܩܪܒܘܢ ܨܝܕ ܚܘܒܗ ܕܠܘܬܗܘܢ.
6
section
6
ܘܠܐ ܗܘܐ ܒܚܘܒܗ ܕܠܘܬܗܘܢ ܕܐܠܗܐ ܐܒܐ ܡܪܓܫܝܢ ܒܝܕ ܒܪ̈ܝܬܐ ܒܠܚܘܕ. ܐܠܐ ܐܦ ܒܚܝܠܗ ܘܒܚܟܡܬܗ. ܐܟܙܢܐ ܓܝܪ ܕܐܝܢܐ ܕܩܪܐ ܒܟܬܝ̈ܒܬܐ: ܡܪܓܫ ܗܘ ܒܝܕ ܫܘܦܪܗܝܢ: ܒܚܝܠܐ ܘܒܣܘܟܠܐ ܕܐܝܕܐ ܘܕܨܒܥܐ ܕܪܫܡܬ ܐܢܝܢ: ܥܡ ܨܒܝܢܐ ܕܟܬܘܒܗܝܢ. ܗܟܢܐ ܗܘ ܕܚܐܪ ܒܒܪ̈ܝܬܐ ܝܕܘܥܬܢܐܝܬ܆ ܒܐܝܕܗ ܘܒܨܒܥܗ ܕܒܪܘܝܗܝܢ ܡܪܓܫ ܥܡ ܨܒܝܢܗ. ܗܢܘ ܕܝܢ ܚܘܒܗ.
7
section
7
ܘܐܢ ܬܐܡܪ ܠܝ ܕܐܝܟܢ ܡܫܟܚܐ ܐܝܕܐ ܘܨܒܥܐ: ܒܕܘܟܬ ܚܝܠܐ ܘܚܟܡܬܐ: ܗܢܘ ܕܝܢ ܒܕܘܟܬ ܒܪܐ ܘܪܘܚܐ ܢܬܬܣܝ̈ܡܢ܆ ܫܡܥܝܗ̇ ܠܪܘܚܐ ܕܐܠܗܐ ܕܐܡܪܐ. ܕܝܡܝܢܗ ܕܡܪܝܐ ܥܒܕܬ ܚܝܠܐ ܘܝܡܝܢܗ ܕܡܪܝܐ ܐܪܝܡܬܢܝ. ܘܝܡܝܢܟ ܡܪܝܐ ܗܕܝܪܐ ܒܚܝܠܐ. ܥܡ ܫܪܟܐ. ܗܐ ܝܡܝܢܐ ܘܚܝܠܐ ܒܪܐ. ܘܡܛܠ ܪܘܚܐ܆ ܗܘ ܒܪܐ ܐܡܪ ܒܣܒܪܬܗ. ܕܐܢ ܐܢܐ ܒܪܘܚܐ ܕܐܠܗܐ ܡܦܩ ܐܢܐ ܕܝ̈ܘܐ. ܟܕ ܒܐܘܢܓܠܣܛܐ ܐܚܪܢܐ ܐܡܪ ܒܨܒܥܐ ܕܐܠܗܐ. ܗܐ ܨܒܥܐ ܘܚܟܡܬܐ ܪܘܚܐ ܕܐܠܗܐ. ܘܐܬܚܙܝܬ ܕܐܝܕܐ ܘܨܒܥܐ ܕܐܠܗܐ܆ ܚܝܠܐ ܘܚܟܡܬܐ ܕܐܠܗܐ. ܗܢܘ ܕܝܢ ܒܪܐ ܘܪܘܚܐ ܕܐܠܗܐ.
8
section
8
ܘܗܕܐ ܡܢ ܬܫܡܫܬܐ ܟܠܗ̇ ܗܘܝܐ ܒܝܕ ܒܪ̈ܝܬܐ܆ ܨܝܕ ܐܝܠܝܢ ܕܪܚܝܩܝܢ ܡܢ ܐܠܗܐ. ܕܡܢܗܘܢ ܒܚܙܬܐ ܡܬܒܣܡܝܢ ܡܢܗ܆ ܘܡܢܗܘܢ ܒܝܕ ܫܡܥܐ. ܐܝܠܝܢ ܕܝܢ ܕܡܛܠ ܕܟܝܘܬܗܘܢ ܘܥܒܕ̈ܝܗܘܢ ܡܩܒ̈ܠܐ: ܩܪܝܒܝܢ ܠܘܬ ܐܠܗܐ. ܠܐ ܣܢܝܩܝܢ ܥܠ ܟܬܝ̈ܒܬܐ ܕܐܝܬܝܗܝܢ ܒܪ̈ܝܬܐ: ܕܒܐܝ̈ܕܝܗܝܢ ܢܪܓܫܘܢ ܒܨܒܝܢܗ ܘܒܚܝܠܗ ܘܒܚܟܡܬܗ ܕܒܪܘܝܗܘܢ. ܐܠܐ ܡܢܗ̇ ܕܡܠܬܐ ܘܕܪܘܚܐ: ܐܘ ܡܢ ܐܝܕܐ ܘܨܒܥܐ ܡܫܬܡܫܝܢ: ܕܠܐ ܡܨܥܝܘܬܐ ܕܡܕܡ ܡܢ ܒܪ̈ܝܬܐ.
9
section
9
ܐܟܙܢܐ ܓܝܪ ܕܗܘ ܕܡܡܠܠ: ܠܐ ܡܫܬܡܥܐ ܡܠܬܗ ܒܠܥܕ ܡܢ ܪܘܚܗ: ܘܠܐ ܪܘܚܗ ܡܘܕܥܐ ܥܠ ܨܒܝܢܗ ܒܠܥܕ ܡܢ ܡܠܬܗ. ܕܗܘ ܕܪܡܙ ܠܐ ܪܡܙ ܒܨܒܥܐ ܕܠܐ ܐܝܕܐ: ܐܘ ܒܐܝܕܐ ܕܠܐ ܨܒܥܐ܆ ܗܟܢܐ ܠܐ ܥܒܕ ܒܪܐ ܕܐܠܗܐ ܡܕܡ: ܕܐܝܬܘܗܝ ܡܠܬܐ ܘܐܝܕܐ ܘܚܝܠܐ: ܒܠܥܕ ܡܢ ܪܘܚܐ ܕܐܝܬܝܗ̇ ܚܟܡܬܐ ܘܨܒܥܐ. ܐܡܝܪ ܓܝܪ. ܕܒܡܠܬܗ ܕܡܪܝܐ ܐܬܥܒܕܘ ܫܡܝܐ. ܘܒܪܘܚܐ ܕܦܘܡܗ ܟܠܗܘܢ ܚܝ̈ܠܘܬܗ. ܘܫܡܝܐ ܡܫܬܥܝܢ ܫܘܒܚܗ ܕܐܠܗܐ. ܘܥܒܕ ܐܝ̈ܕܘܗܝ ܡܚܘܐ ܪܩܝܥܐ. ܘܡܛܠ ܕܚܙܘ ܫܡ̈ܝܟ ܥܒܕܐ ܕܨܒ̈ܥܬܟ. ܗܐ ܡܠܬܐ ܘܪܘܚܐ܆ ܘܗܐ ܐܦ ܐܝܕܐ ܘܨܒܥܐ.
10
section
10
ܘܠܐ ܐܬܬܒܥ ܕܥܠ ܡܢܐ ܨܒ̈ܥܬܐ ܣܓܝ̈ܐܬܐ ܐܡܪܬ. ܪܘܚܐ ܕܝܢ ܚܕܐ ܗܐ. ܠܝ ܠܐ ܬܫܡܥ. ܐܠܐ ܫܡܥ ܠܐܫܥܝܐ ܕܐܡܪ ܕܪܘܚܐ ܕܚܟܡܬܐ ܘܪܘܚܐ ܕܣܘܟܠܐ. ܥܡ ܫܪܟܐ ܕܪ̈ܘܚܐ. ܡܕܝܢ ܣܓܝ̈ܐܬܐ: ܘܠܐ ܠܢ ܕܢܪܢܐ ܡܢ ܗܕܐ܆ ܫܡܥܬ ܡܢ ܠܗܘ܆ ܫܡܥ ܬܘܒ ܐܦ ܠܦܘܠܘܣ ܕܐܡܪ. ܕܫܘ̈ܚܠܦܐ ܕܡܫܟܚܐ ܠܪ̈ܚܝܩܐ:
11
section
11
ܒܕܡܘܬ ܐܬܘ̈ܬܐ ܨܒܝܢܐ ܘܚܝܠܐ ܘܚܟܡܬܐ ܕܒܪܘܝܗܝܢ. ܗܘ ܚܘܒܐ ܘܚܝܠܐ ܘܚܟܡܬܐ ܡܫܡܫܝܢ ܠܐܝܠܝܢ ܕܩܪܝܒܝܢ. ܕܐܝܬܝܗܘܢ ܐܦ ܗܢܘܢ ܒܪܝܬܐ ܕܟܝܬܐ ܘܡܠܝܠܬܐ ܘܡܬܝܕܥܢܝܬܐ. ܘܒܕܡܘܬܐ ܐܬܘ̈ܬܐ ܚܝ̈ܠܬܢܝܬܐ ܘܪ̈ܝܫܝܬܐ܆ ܐܦ ܗܢܘܢ ܢܗܝܪܐܝܬ ܡܒܕܩܝܢ: ܥܠ ܚܝܠܗ ܘܚܟܡܬܗ ܕܒܪܘܝܗܝܢ.
12
section
12
ܐܝܟܢܐ ܕܝܢ ܕܚܝܠܐ ܘܚܟܡܬܐ: ܗܢܘ ܕܝܢ ܒܪܐ ܘܪܘܚܐ: ܐܝܬܝܗܘܢ ܕܒܗܘܢ ܡܬܝܕܥ ܚܝܠܗ ܘܚܟܡܬܗ ܕܐܒܐ. ܒܪܐ ܕܝܢ ܘܪܘܚܐ ܐܬܘ̈ܬܗ ܐܢܘܢ ܕܐܒܐ ܕܒܗܘܢ ܡܬܝܕܥ. ܒܪܝܬܐ ܕܝܢ ܡܠܝܠܬܐ܆ ܐܬܘ̈ܬܐ ܐܢܝܢ ܕܒܗܝܢ ܡܬܝܕܥ ܒܪܐ ܘܪܘܚܐ. ܡܛܠ ܗܝ ܕܒܨܠܡܢ. ܘܐܬܘ̈ܬܐ ܕܝܢ ܕܝܠܗ̇ ܕܒܪܝܬܐ ܡܬܝܕܥܢܝܬܐ ܘܠܐ ܡܓܫܡܬܐ܆ ܒܪܝܬܐ ܡܬܚܙܝܢܝܬܐ ܘܡܓܫܡܬܐ ܐܝܬܝܗ̇. ܐܝܟ ܗܝ ܕܗܠܝܢ ܕܡܬܚܙ̈ܝܢ ܛܘܦܣܐ ܐܢܝܢ ܕܐܝܠܝܢ ܕܠܐ ܡܬܚܙ̈ܝܢ.
13
section
13
ܡܕܝܢ ܐܠܨܐ ܠܢ ܠܐܝܠܝܢ ܕܐܝܬܝܢ ܒܪܝܬܐ ܡܠܝܠܬܐ: ܡܛܠ ܥܠܬܐ ܐܝܕܐ ܕܗܫܐ ܠܐ ܐܠܨܐ ܕܢܡܪܝܗ̇: ܐܬܟܕܢܢ ܥܡ ܒܪܝܬܐ ܗܕܐ ܡܬܚܙܝܢܝܬܐ܆ ܕܢܐܨܦ ܕܒܝܕ ܗܠܝܢ ܕܡܬܚܙ̈ܝܢ. ܢܥܘܠ ܘܢܪܓܫ ܒܐܝܠܝܢ ܕܠܐ ܡܬܚܙܝܢ. ܘܗܕܐ ܠܡܣܥܪ ܠܐ ܡܫܟܚܝܢ ܚܢܢ: ܟܕ ܥܕܟܝܠ ܦܝܫܝܢܢ ܐܦ ܡܢ ܕܢܕܥ: ܚܝܠܐ ܟܠܗ ܕܡܬܪ̈ܓܫܢܝܬܐ.
14
section
14
ܐܝܟܢܐ ܓܝܪ ܕܓܢܝܙ ܣܘܥܪܢܐ ܕܟܣܐ ܒܟܬܝ̈ܒܬܐ: ܡܢ ܐܝܠܝܢ ܕܠܐ ܝܕܥܝܢ ܠܡܩܪܐ ܐܢܝܢ܆ ܗܟܢܐ ܗܘ ܕܚܣܝܪ ܡܢ ܣܘܟܠܗܝܢ ܕܒܪ̈ܝܬܐ ܗܠܝܢ ܡܬܚܙ̈ܝܢܝܬܐ: ܚܣܝܪ ܡܢ ܕܢܪܓܫ ܒܒܪܝܐ ܗܝ ܡܬܝܕܥܢܝܬܐ ܕܟܣܝܐ ܒܗܝܢ: ܟܡܐ ܐܢ ܚܐܪ ܒܗܝܢ. ܐܝܢܐ ܕܝܢ ܕܡܛܠ ܚܦܝܛܘܬܗ ܘܕܟܝܘܬܗ ܐܬܕܪܫ ܒܗܝܢ܆ ܝܕܥ ܕܟܠܗܝܢ ܥܠܘܗܝ ܡܒܕ̈ܩܢ. ܘܡܐ ܕܐܪܓܫ ܒܗܕܐ܆ ܗܝܕܝܢ ܐܦ ܗܘ ܥܠ ܚܝܠܐ ܘܚܟܡܬܐ ܕܬܩܢܘܬܗ ܡܫܘܕܥ. ܘܡܟܪܙ ܕܠܐ ܫܠܘܐ ܥܠ ܨܒܝܢܗ ܕܚܘܒܐ ܗܘ ܕܠܐ ܡܬܕܪܟ: ܕܐܫܬܡܫ ܒܗܘܢ ܒܚܝܠܐ ܘܒܚܟܡܬܐ.
15
section
15
ܘܐܡܪ ܐܢܐ ܦܫܝܩܐܝܬ܆ ܕܐܝܟܢܐ ܕܦܓܪܐ ܡܒܕܩ ܥܠ ܢܦܫܐ ܕܥܡܪܐ ܒܗ ܒܝܕ ܣܘܥܪ̈ܢܘܗܝ: ܘܗܝ ܢܦܫܐ ܡܟܪܙܐ ܥܠ ܗܘܢܐ ܕܐܝܬܘܗܝ ܪܝܫܗ ܒܝܕ ܙܘ̈ܥܝܗ̇܆ ܗܟܢܐ ܐܦ ܗܘܢܐ ܕܐܝܬܘܗܝ ܦܓܪܐ ܕܪܘܚܐ ܘܕܡܠܬܐ: ܐܝܟ ܦܓܪܐ ܥܠ ܢܦܫܐ ܕܥܡܪܐ ܒܗ ܡܒܕܩ ܥܠܝܗܘܢ. ܘܗܝ ܗܕܐ ܢܦܫܗ ܕܗܢܐ ܗܘܢܐ܆ ܡܒܕܩܐ ܥܠ ܗܘܢܗ ܕܐܝܬܘܗܝ ܐܒܐ. ܘܐܝܟܢܐ ܕܗܘܢܐ ܒܝܕ ܡܨܥܝܘܬܗ̇ ܕܢܦܫܐ ܡܥܒܕ ܒܦܓܪܗ ܕܐܝܬܘܗܝ ܗܘܢܐ.
16
section
16
ܦܓܪܗ ܕܝܢ ܕܗܘܢܐ ܠܐ ܝܕܥ ܡܢܐ ܣܥܪ ܗܘܢܐ ܗܘܢܐ ܕܝܢ ܕܐܝܬܘܗܝ ܦܓܪܗ ܕܗܘܢܐ ܝܕܥ ܡܢܐ ܣܥܪ ܗܘܢܗ ܘܡܢܐ ܣܥܪ ܘܡܢܐ ܥܬܝܕ ܠܡܣܥܪ. ܡܛܠ ܕܗܘܝܘ ܒܠܚܘܕ ܡܢ ܟܠܗܝܢ ܒܪ̈ܝܬܐ ܘܛܟܣܗܝܢ: ܨܠܡܗ ܫܪܝܪܐ ܘܡܩܒܠܢܐ ܕܝܕܥܬܗ ܕܐܒܐ. ܗܘܢܐ ܠܡ ܕܡܬܚܕܬ ܒܝܕܥܬܐ ܒܕܡܘܬܐ ܕܒܪܝܗ.
17
section
17
ܘܐܢ ܟܬܝ̈ܒܬܐ ܗܠܝܢ ܕܠܪ̈ܚܝܩܐ ܡܫܡ̈ܫܢ: ܡܫܟ̈ܚܢ ܕܢܘ̈ܕܥܢ ܡܢܐ ܐܣܬܥܪ ܘܡܢܐ ܥܬܝܕ ܕܢܣܬܥܪ܆ ܚܕ ܟܡܐ ܡܠܐ ܘܪܘܚܐ: ܟܠ ܚܟܡܝܢ ܘܟܠ ܡܫܘܕܥܝܢ ܠܗܘܢܐ ܦܓܪܗܘܢ. ܘܐܡܪ ܐܢܐ ܒܫܪܪܐ ܕܬܪ̈ܥܐ ܣܓܝ̈ܐܐ ܕܡܠܝܢ ܦܘܪ̈ܫܢܐ ܡܫܚ̈ܠܦܐ ܦܓܥܘ ܒܝ ܒܕܘܟܬܐ ܗܕܐ. ܘܠܐ ܨܒܝܬ ܕܐܪܫܘܡ ܐܢܘܢ ܠܟ .. ܛ. ܗܝ ܕܠܐ ........ ـܬ ܕܠܟܪܛܝܣܐ ܘ .... ܐܗܝܡܢ ....... ܗܢܘܢ ܕܕܠܡܐ ........ ܕܝܢ ܕܢܦܓܥܘܢ . ܗ ....... ܟܬܝܒܬܐ ܘܡܛܠ ܕܡܬܚܣܢ ܗܘ ܟܪܛܝܣܐ ܡܢ ܡܪ̈ܚܐ. ܘܡܛܠ ܗܕܐ ܠܐ ܡܫܟܚܐ ܕܥܠ ܟܠܡܕܡ ܢܬܐܫܪ.
18
section
18
ܘܐܝܟܢܐ ܕܐܬܚܙܝܬ ܕܐܝܬ ܡܕܡ ܕܠܐ ܡܫܟܚ ܟܪܛܝܣܐ ܘܕܝܘܬܐ ܕܢܘܕܥܘܢܝܗܝ. ܗܟܢܐ ܟܒܪ ܐܝܬ ܡܕܡ: ܕܠܐ ܡܫܟ̈ܚܢ ܒܪ̈ܝܬܐ ܕܐܝܬܝܗܝܢ ܟܬܝܒ̈ܬܐ ܕܠܘܬ ܪ̈ܚܝܩܐ: ܕܢܘܕ̈ܥܢ ܟܠܗ ܨܒܝܢܐ ܕܟܬܘܒܗܝܢ. ܐܡܪ ܐܢܐ ܕܝܢ ܟܝܢܗ. ܡܛܠ ܕܠܘ ܨܠܡܗ ܐܢܝܢ ܟܠܗܝܢ. ܡܠܬܐ ܕܝܢ ܘܪܘܚܐ ܕܐܝܬܝܗܘܢ ܐܬܘ̈ܬܗ ܕܐܒܐ܆ ܟܠ ܚܟܡܝܢ ܘܟܠ ܡܘܕܥܝܢ. ܡܛܠ ܕܠܐ ܗܘ̈ܝ ܒܪ̈ܝܬܐ. ܐܠܐ ܨܠܡܐ ܚܬܝܬܐ ܘܨܡܚܐ ܫܪܝܪܐ ܕܐܝܬܘܬܗ ܕܐܒܐ.
19
section
19
ܚܟܡ ܕܝܢ ܕܐܦ ܗܘܢܐ ܟܠ܆ ܡܛܠ ܕܡܢ ܡܠܬܐ ܘܪܘܚܐ ܝܕ̈ܥܝ ܟܠ: ܕܐܝܬܘܗܝ ܐܦ ܗܘ ܨܠܡܗܘܢ ܫܪܝܪܐ ܘܕܡܘܬܗܘܢ ܡܬܒܕܩ ܠܗ. ܐܝܟܢܐ ܕܗܘ ܕܩܪܝܒ ܨܝܕ ܚܒܪܗ: ܡܨܐ ܝܕܥ ܟܠܗ ܨܒܝܢܗ ܒܝܕ ܡܠܬܗ ܘܪܘܚܗ. ܘܐܝܟܐ ܕܐܝܬ ܡܕܡ ܕܠܐ ܡܬܓܠܐ ܠܗ ܡܢ ܡܠܬܐ ܘܪܘܚܐ܆ ܠܘ ܡܛܠ ܕܠܐ ܐܫܟܚܘ ܗܢܘܢ ܕܢܘܕܥܘܢ. ܐܠܐ ܡܛܠ ܗܢܘܢ ܕܫܡܥܝܢ ܠܐ ܣܦܩܝܢ ܠܟܠ.
20
section
20
ܗܘܢܐ ܕܝܢ ܡܛܠ ܗܘܢܗ ܠܟܠ ܣܦܩ. ܦܓܪܐ ܕܝܢ ܐܦܠܐ ܟܝܢܗ ܝܕܥ. ܢܦܫܐ ܕܝܢ ܝܕܥܐ ܟܝܢܐ ܕܦܓܪܗ܆ ܟܕ ܟܝܢܗ ܠܐ ܝܕܥܐ. ܡܐ ܕܝܢ ܕܝܕܥܬ ܟܝܢܗ܆ ܠܐ ܡܟܝܠ ܢܦܫܐ ܗܝ ܐܠܐ ܗܘܢܐ.
21
section
21
ܘܗܘܢܐ ܠܐ ܡܪܓܫ ܒܟܝܢܗ: ܐܠܐ ܒܝܕ ܡܠܬܐ ܘܪܘܚܐ ܕܐܝܬܝܗܘܢ ܢܦܫܗ. ܘܐܝܟܢܐ ܕܠܐ ܡܬܝܕܥ ܟܝܢܗ ܕܦܓܪܐ: ܐܠܐ ܒܝܕ ܢܦܫܐ ܕܥܡܪܐ ܒܗ: ܘܠܐ ܗܝ ܢܦܫܐ ܡܬܝܕܥܐ ܒܠܥܕ ܡܢ ܦܓܪܗ܆ ܗܟܢܐ ܐܦܠܐ ܒܪܐ ܘܪܘܚܐ ܡܬܝܕܥܝܢ: ܐܠܐ ܒܝܕ ܗܘܢܐ ܕܐܝܬܘܗܝ ܦܓܪܗܘܢ. ܢܦܫܗ ܕܝܢ ܕܗܘܢܐ܆ ܝܕܥܐ ܗܝ ܗܘܢܗ ܒܟܠܙܒܢ ܐܦ ܕܠܐ ܦܓܪܗ: ܡܛܠ ܕܒܪܬ ܟܝܢܗ ܗܝ ܕܗܘܢܗ. ܗܢܘ ܕܝܢ ܕܐܒܐ.
22
section
22
ܘܐܝܟܢܐ ܕܐܝܬ ܐܡܬܝ ܕܢܫܩܠܘܢ ܗܠܝܢ ܫܡܗ̈ܐ ܘܡܢܝ̈ܢܐ: ܘܡܢ ܒܝܬ ܦܓܪܐ ܠܢܦܫܐ ܘܠܗܘܢܐ: ܒܗܝ ܕܡܬܥܠܝܢ ܠܗܘܢ ܠܛܟܣܐ ܕܗܘܢܐ: ܡܛܠ ܗܝ ܕܗܒ ܠܗܘܢ ܕܢܗܘܘܢ ܒܢ ܚܕ: ܐܝܟܢܐ ܕܐܢܐ ܘܐܢܬ ܚܕ ܚܢܢ܆ ܗܟܢܐ ܐܝܬ ܐܡܬܝ ܕܢܫܬܩܠܘܢ ܫܡܗ̈ܐ ܘܡܢܝ̈ܢܐ: ܡܢ ܒܝܬ ܐܒܐ ܠܒܪܗ ܘܠܪܘܚܗ ܘܠܒܪܝܬܗ ܡܠܝܠܬܐ ܕܐܝܬܝܗ̇ ܦܓܪܗ: ܡܛܠ ܗܝ ܕܢܗܘܐ ܐܠܗܐ ܟܠ ܒܟܠ.
23
section
23
ܠܐ ܕܝܢ ܬܣܒܪ ܡܛܠ ܕܐܡܪܬ ܕܡܫܬܩܠܝܢ ܫܡܗ̈ܐ ܘܡܢܝ̈ܢܐ: ܡܢ ܒܝܬ ܒܪܝܬܐ ܡܠܝܠܬܐ ܠܒܪܘܝܗ: ܕܐܦ ܗܢܘܢ ܩܢܘ̈ܡܐ ܘܫܡ̈ܗܐ ܕܐܒܐ ܘܕܒܪܐ ܘܕܪܘܚܐ ܡܬܥܛܝܢ. ܐܠܐ ܐܝܟܢܐ ܕܟܝܢܗ ܕܗܘܢܐ ܡܬܚܝܕ ܒܟܝܢܗ ܕܐܒܐ ܒܕܐܝܬܘܗܝ ܦܓܪܗ܆ ܗܟܢܐ ܫܡܗ̈ܝ ܢܦܫܐ ܘܦܓܪܐ: ܡܬܒܠܥܝܢ ܒܩܢܘ̈ܡܐ ܕܒܪܐ ܘܕܪܘܚܐ. ܘܕܠܐ ܫܘܠܡ ܡܩܘܐ ܚܕ ܟܝܢܐ. ܬܠܬܐ ܩܢܘ̈ܡܝܢ ܕܐܠܗܐ ܘܕܨܠܡܗ. ܐܝܟ ... ܡܬܓܫܡـ ....... ܡܢ ܒܬܪ ܡܬ ...... ܡܛܠ (؟) ܫܠܡܘ ....
24
section
24
ܡܛܠ ܗܕܐ ܓܝܪ ܐܝܬ ܡܢܝ̈ܢܐ ܒܝܬ ܦܓܪܐ ܘܢܦܫܐ ܘܗܘܢܐ܆ ܡܛܠ ܫܘܚ̈ܠܦܐ ܕܨܒ̈ܝܢܐ. ܡܫܬܩܠܝܢ ܕܝܢ ܫܡܗ̈ܐ ܘܡܢܝ̈ܢܐ: ܗܢܘܢ ܕܡܛܠ ܡܬܬܙܥܢܘܬܐ ܥܠܘ ܥܠ ܗܘܢܐ. ܡܫܬܩܠܝܢ ܕܝܢ ܐܦ ܫܡܗ̈ܐ ܣܓܝ̈ܐܐ: ܗܢܘܢ ܕܐܫܬܡܝ ܒܗܘܢ ܐܠܗܐ: ܘܐܬܟܢܝ ܐܠܨܐܝܬ ܡܛܠ ܫܘ̈ܚܠܦܝܗܘܢ ܕܡܠܝ̈ܠܐ ܡܥܒܕܢܐܝܬ ܘܡܕܒܪܢܐܝܬ ܘܫܐܝܠܐܝܬ ܐܝܟ ܕܡܛܠ ܡܣ̈ܟܠܢܐ ܕܝܢܐ. ܘܡܛܠ ܚܛܗ̈ܐ ܬܒܘܥܐ. ܘܡܛܠ ܚܛܗ̈ܐ ܬܒܘܥܐ. ܘܡܛܠ ܟܪ̈ܝܗܐ ܐܣܝܐ. ܘܠܘܬ ܡܝ̈ܬܐ ܡܢܚܡܢܐ. ܡܛܠ ܒܥܠܕܒܒܘܬܐ ܘܚܛܝܬܐ܆ ܩܛܘܠܐ ܘܡܬܬܘܝܢܐ. ܥܡ ܫܪܟܐ.
25
section
25
ܠܘ ܐܝܟ ܡܢ ܕܗܘ ܗܠܝܢ ܟܠܗܘܢ ܦܘܪ̈ܫܢܐ ܠܝܬܘܗܝ ܐܠܐ ܡܛܠ ܕܗܢܘܢ ܕܥܠܝܗܘܢ ܣܢܝܩܝܢ ܠܝܬ ܐܢܘܢ . ܫܡܗ̈ܐ ܕܝܢ ܘܩܢܘ̈ܡܐ ܕܒܪܐ ܘܕܪܘܚܐ. ܠܐ ܥܒܪܝܢ. ܡܛܠ ܕܠܘ ... ܐܝܬ ܠܗܘܢ ...... ܠܗܐ ... ܘܐ .............. ܥܒܘܪܬܐ ܐܫܬܡܝܘ. ܠܐ ܥܒܪܝܢ. ܐܠܐ ܡܢ ܐܡܬܝ ܕܐܝܬܝܗ̇ ܥܠܬܗܘܢ ܐܝܬܝܗܘܢ ܘܟܡܐ ܕܐܝܬܝܗ̇. ܠܘ ܕܝܢ ܐܝܟ ܒܪܝܬܐ ܡܠܝܠܬܐ: ܕܐܦ ܥܠܬܗ ܕܝܠܗ ܐܒܐ ܗܘ. ܕܗܕܐ ܕܝܢ ܒܛܝܒܘܬܐ ܕܗܢܘܢ ܕܝܢ ܒܟܝܢ ܐܝܬܘܬܐ.
26
section
26
ܗܘ ܕܝܢ ܗܘܢܐ ܐܝܟ ܕܐܡܪܢܢ܆ ܚܕ ܗܘ ܟܝܢܗ ܘܩܢܘܡܗ ܘܛܟܣܗ. ܘܒܙܒܢ ܕܡܛܠ ܚܐܪܘܬܗ ܡܫܠܛܬܐ ܢܦܠ ܡܢ ܛܟܣܗ ܩܕܡܝܐ ܐܫܬܡܝ ܢܦܫܐ. ܘܟܕ ܬܘܒ ܐܬܢܚܬ ܐܬܟܢܝ ܦܓܪܐ. ܘܒܙܒܢ ܗܘ ܟܕ ܗܘ ܦܓܪܐ ܘܢܦܫܐ ܘܗܘܢܐ. ܡܛܠ ܫܘܚ̈ܠܦܐ ܕܨܒ̈ܝܢܘܗܝ. ܡܛܠ ܕܐܝܬ ܐܡܬܝ ܕܢܥܒܪܘܢ ܨܒ̈ܝܢܘܗܝ ܘܙܘ̈ܥܘܗܝ ܡܫܚ̈ܠܦܐ: ܘܢܩܘܡ ܒܒܪܝܬܗ ܩܕܡܝܬܐ. ܚܕ ܗܘ ܟܝܢܗ ܘܩܢܘܡܗ ܘܫܡܗ ܗܘ ܕܐܠܗܐ ܝܕܥ ܠܗ. ܘܗܘ ܡܐ ܕܩܡ ܒܟܝܢܗ܆ ܚܕ ܗܘ ܠܡ ܡܢ ܟܠܗܘܢ ܗܘ̈ܝܐ. ܕܠܐ ܐܬܪܗ ܘܠܐ ܫܡܗ ܝܕܝܥ. ܘܕܗܘܢܐ ܗܝ ܠܡ ܬܘܒ ܥܪܛܠܝ ܕܢܐܡܪ ܡܢܐ ܗܘ ܟܝܢܗ.
27
section
27
ܘܠܐ ܬܬܕܡܪ ܕܐܡܪܬ ܕܒܚܕܝܘܬܗܘܢ ܕܡܠܝ̈ܠܐ ܕܥܡ ܐܠܗܐ ܐܒܐ: ܚܕ ܐܢܘܢ ܟܝܢܐ ܒܬܠܬܐ ܩܢܘ̈ܡܝܢ: ܕܠܐ ܬܘܣܦܬܐ ܡܕܡ ܘܠܐ ܫܘܚܠܦܐ. ܐܢ ܓܝܪ ܝܡܐ ܗܢܐ ܡܬܪܓܫܢܐ: ܕܚܕ ܗܘ ܒܟܝܢܗ ܘܒܓܘܢܗ ܘܒܛܥܡܗ: ܘܐܡܬܝ ܕܢܚܠܛܘܢ ܒܗ ܢܗܪ̈ܘܬܐ ܣܓܝ̈ܐܐ ܩܢ̈ܝܝ ܛܥ̈ܡܬܐ ܡܫܚ̈ܠܦܬܐ: ܠܘ ܒܠܚܘܕ ܗܘ ܠܘܬ ܦܘܪ̈ܫܢܝܗܘܢ ܠܐ ܡܫܬܚܠܦ. ܐܠܐ ܠܗܘܢ ܓܡܝܪܐܝܬ ܠܘܬ ܟܝܢܗ ܘܓܘܢܗ ܘܛܥܡܗ ܕܠܐ ܥܡܠ ܡܫܚܠܦ܆ ܚܕܟܡܐ ܝܡܐ ܡܬܝܕܥܢܐ ܘܠܐ ܡܣܬܝܟܢܐ ܘܠܐ ܡܫܬܚܠܦܢܐ ܕܐܝܬܘܗܝ ܐܠܗܐ ܐܒܐ: ܐܡܬܝ ܕܢܬܘܒܘܢ ܠܗ ܗܘ̈ܢܐ ܒܕܡܘܬ ܢܚ̈ܠܐ ܠܝܡܐ. ܠܟܝܢܗ ܘܠܓܘܢܗ ܘܠܛܥܡܗ ܠܟܠܗܘܢ ܓܡܝܪܐܝܬ ܡܫܚܠܦ. ܘܡܟܝܠ ܠܐ ܗܘܘ ܣܓܝ̈ܐܐ. ܐܠܐ ܚܕ ܐܝܬܝܗܘܢ ܒܝܚܝܕܝܘܬܗ ܕܠܐ ܫܘܠܡ ܘܕܠܐ ܦܘܪܫ ܡܛܠ ܚܕܝܘܬܗܘܢ ܘܡܘܙܓܗܘܢ ܕܥܡܗ.
28
section
28
ܘܐܝܟܢܐ ܕܒܚܘܠܛܢܗܘܢ ܕܢܗܪ̈ܘܬܐ ܕܥܡ ܝܡܐ: ܕܗܘ̈ܢܐ ܕܥܡ ܐܒܐ: ܗܘܝܐ ܬܪܝܢܘܬ ܟܝ̈ܢܐ ܐܘ ܪܒܥܝܘܬ ܩܢܘ̈ܡܐ. ܐܠܐ ܐܝܟ ܕܚܕ ܗܘ ܝܡܐ ܒܟܝܢܗ ܘܒܓܘܢܗ ܘܒܛܥܡܗ: ܩܕܡ ܕܢܬܚܠܛܘܢ ܒܗ ܢܗܪ̈ܘܬܐ ܐܦ ܡܐ ܕܐܬܚܠܛܘ ܒܗ܆ ܗܟܢܐ ܟܝܢܐ ܐܠܗܝܐ ܚܕ ܗܘ ܒܩܢܘ̈ܡܐ ܬܠܬܐ ܕܐܒܐ ܘܕܒܪܐ ܘܕܪܘܚܐ: ܐܦ ܡܐ ܕܐܬܚܠܛܘ ܒܗ ܗܘ̈ܢܐ ܐܝܟ ܕܩܕܡ ܕܢܬܚܠܛܘܢ ܒܗ.
29
section
29
ܚܙܝܢܢ ܓܝܪ ܕܐܦ ܩܕܡ ܕܢܓܠܘܢ ܡܝ̈ܐ ܕܝܡܐ ܠܐܬܪܐ ܚܕ ܕܬܬܚܙܐ ܝܒܝܫܬܐ܆ ܐܦ ܢܗܪ̈ܘܬܐ ܒܗ ܚܕ ܗܘܘ. ܡܢ ܒܬܪ ܕܝܢ ܕܐܬܦܪܫܘ ܡܢܗ ܣܓܝ̈ܐܐ ܡܫܚ̈ܠܦܐ ܒܕܟܠ ܚܕܚܕ ܡܢܗܘܢ ܐܫܬܚܠܦ ܠܛܥܡܗ ܕܐܪܥܐ ... ܐܫܬܟܚ ܒܗ. ܗܟܢܐ ܒܗ̇ ܒܕܡܘܬܐ ܩܕܡ ܕܬܦܪܫ ܚܛܝܬܐ ܒܝܬ ܗܘ̈ܢܐ ܠܐܠܗܐ: ܒܕܡܘܬ ܐܪܥܐ ܒܝܬ ܝܡܐ ܠܢܗܪ̈ܘܬܐ܆ ܚܕ ܗܘܘ ܒܗ ܕܠܐ ܫܘܚܠܦܐ. ܟܕ ܕܝܢ ܐܬܝܕܥܬ ܚܛܝܬܗܘܢ ܐܬܦܪܫܘ ܡܢܗ ܘܐܬܢܟܪܝܘ ܠܗ ܘܠܛܥܡܗ ܘܠܓܘܢܗ. ܒܕܩܢܘ ܟܠ ܚܕ ܚܕ ܡܢܗܘܢ ܛܥܡܗ ܕܦܓܪܐ ܗܘ ܕܐܬܟܕܢܘ ܥܡܗ. ܟܕ ܕܝܢ ܬܫܬܩܠ ܐܪܥܐ ܡܢ ܡܨܥܬܐ܆ ܚܕ ܗܘ ܝܡܐ ܘܢܗܪ̈ܘܬܐ ܕܠܐ ܫܘܚܠܦ. ܗܟܢܐ ܟܕ ܬܬܥܛܐ ܚܛܝܬܐ ܡܢ ܒܝܬ ܗܘ̈ܢܐ ܠܐܠܗܐ܆ ܚܕ ܐܢܘܢ ܘܠܐ ܣܓܝ̈ܐܐ.
30
section
30
ܠܐ ܕܝܢ ܡܛܠ ܕܐܡܪܬ: ܕܐܝܟ ܢܗܪ̈ܘܬܐ ܡܢ ܩܕܝܡ ܒܝܡܐ ܐܝܬܝܗܘܢ ܗܘܘ ܡܠܝ̈ܠܐ ܒܐܠܗܐ ܬܣܒܪ ܡܢ ܗܕܐ: ܕܐܦ ܕܠܐ ܫܘܪܝ ܐܢܘܢ ܥܡܗ ܒܟܝܢܗܘܢ. ܐܠܐ ܐܦܢ ܒܚܟܡܬܗ ܘܒܚܝܠܐ ܕܥܒܘܕܘܬܗ: ܠܗ ܥܡܗ ܐܝܬܝܗܘܢ ܕܠܐ ܫܘܪܝܐ (؟) ܠܒܪܝܬܗܘܢ ܫܘܪܝܐ ܐܝܬ. ܠܐ ܕܝܢ ... ܠܗܘܢ ܫܘܠܡܐ ܡܛܠ ܚܕܝܘܬܗܘܢ ܕܥܡ ܗܘ ܕܫܘܪܝܐ ܠܝܬ ܠܗ ܐܦܠܐ ܫܘܠܡܐ ܡܫܬܟܚ ܠܗ.
31
section
31
ܠܗܠܝܢ ܟܠܗܝܢ ܐܬܢܬܦ ܪܥܝܢܝ: ܟܕ ܒܡܘܗܒܬܐ ܪܒܬܐ ܕܟܬܝ̈ܒܬܐ ܨܒܝܬ ܠܡܬܒܩܝܘ. ܘܡܛܠ ܕܡܢ ܗܕܐ ܕܘܡܪܐ ܪܒܐ ܐܚܕܢܝ: ܘܐܥܝܪܢܝ ܠܘܬ ܬܫܒܘܚܬܐ ܘܩܘܒܠ ܛܝܒܘܬܐ ܕܝܗܘܒܗ܆ ܨܒܝܬ ܕܐܦ ܠܚܘܒܟ ܐܪܫܘܡ ܐܢܝܢ. ܕܐܦ ܐܢܬ ܬܓܕܘܠ ܟܠܝܠ ܬܫܒܘܚܬܐ ܕܠܐ ܫܠܘܐ ܠܗܘ ܕܕܝܠܗ ܗܘ ܥܒܕ ܬܫܒܘܚܬܐ. ܘܢܦܝܣܝܘܗܝ ܕܐܝܟܢܐ ܕܒܪ̈ܚܡܘܗܝ ܐܫܘܝ ܠܢ ܕܥܠ ܐܦ̈ܝ ܗܠܝܢ ܙܥܘܪ̈ܝܬܐ ܢܩܠܣܝܘܝ܆ ܬܘܒ ܢܫܘܐ ܠܢ ܒܛܝܒܘܬܗ܆ ܕܕܠܐ ܡܨܥܝܘܬܐ ܕܡܕܡ ܡܢ ܒܪ̈ܝܬܐ: ܐܠܐ ܒܡܨܥܝܘܬܐ ܕܒܪܗ ܘܕܪܘܚܗ: ܢܬܒܣܡ ܡܢ ܚܘܒܗ ܕܠܐ ܫܘܠܡ܆ ܘܢܫܒܚܝܘܗܝ ܥܠ ܟܠ ܕܒܪܐ ܐܡܝܢ.
32
section
32
ܫܡܥ ܕܝܢ ܡܟܝܠ܇ ܗܿܘ ܡܕܡ ܕܡܛܠܬܗ ܗܘܬ ܥܠܬܐ ܠܟܬܝܒ̈ܬܢ ܠܘܬ ܒܣܝܡܘܬܟ. ܘܫܒܘܩ ܠܢ ܥܠ ܗܿܝ ܕܩܠܝܠ ܐܬܬܗܝܢܢ ܠܘܬܗܝܢ ܡܛܠܬܗܝܢ. ܐܝܟ ܕܣܒܪ ܐܢܐ ܕܝܢ ܡܪܝ ܕܡܦܣ ܐܢܬ ܗܘܼ ܕܐܝܬ ܐ̈ܢܫܝܢ ܕܐܡܪܝܢ ܕܥܝܕܐ ܠܡ ܟܝܢܐ ܗܼܘ ܕܬܪ̈ܝܢ. ܘܠܝ ܐܝܟ ܕܡܬܚܙܝܐ ܆ ܠܘ ܒܠܚܘܕ ܕܚܟܡܬܐ ܠܝܬܝܗ ܡܠܬܐ ܗܕܐ܆ ܐܠܐ ܠܐ ܪܕܝܘܬܐ ܘܠܐ ܦܪܘܫܘܬܐ ܕܐܝܠܝܢ ܕܡܬܚܫܚܝܢ ܒܗܿ ܡܟܪܙܐ. ܝܕܥܐ ܗܝ ܓܝܪ ܪܕܝܘܬܟ ܕܐܝܟܢܐ ܕܥܣܩܐ ܠܓܡܠܐ ܕܐܝܟ ܢܫܪܐ ܒܐܐܪ ܢܦܪܚ܃ ܐܘ ܠܢܘܢܐ ܕܒܝܒܫܐ ܢܬܦܖܿܦܥ܃ ܡܛܠ ܕܒܟܝܢܗܘܢ ܗܕܐ ܠܐ ܩܢܝܢ܃ ܥܡ ܨܒ̈ܘܬܐ ܣܓܝܐ̈ܬܐ ܕܠܗܢܐ ܢܝܫܐ ܦܚܡܢ ܕܥܣܩܢ ܕܢܗܘܝܢ. ܗܟܢܐ ܥܣܩܐ ܕܡܕܡ ܕܒܟܝܢܐ ܗ̣ܘ ܢܫܬܚܠܦ: ܥܝܕܐ ܕܝܢ ܐܝܟܢܐ ܕܦܫܝܩ ܠܢܫܪܐ ܕܐܡܬܝ ܕܒ̇ܥܐ ܒܐܐܪ ܢܦܪܚ: ܐܘ ܐܡܬܝ ܕܒܿܥܐ ܒܐܪܥܐ ܠܡܩܡ. ܘܐܝܟ ܡܐ ܕܕܠܝܠ ܠܢܘܢܐ ܕܡܢ ܢܗܪܐ ܠܢܗܪܐ ܐܘ ܡܢ ܢܗܪܐ ܠܝܡܐ ܐܘ ܡܢ ܝܡܐ ܠܢܗܪܐ ܢܥܒܕ ܡܖܿܕܝܬܗ ܐܝܟ ܡܢ ܕܒܟܝܢܗܘܢ ܐܝܬ ܠܗܘܢ ܗܕܐ܆ ܗܟܢܐ ܕܠܝܠ ܕܟܠ ܡܕܡ ܕܥܝܕܐ ܡܩܝܡ ܠܗ܇ ܕܐܦ ܡܢ ܥܝܕܐ ܐܚܪܢܐ ܢܫܬܪܐ. ܐܝܟ ܡܢ ܕܒܗ ܒܟܝܢܐ ܐܫܬܟܚ ܐܬܪܐ ܠܗܟܢ ܘܠܗܟܢ.
33
section
33
ܡܕܡ ܕܝܢ ܕܐܡܿܪ ܐܢܐ ܕܐܝܟ ܗܟܢ ܐܝܬܘܗܝ. ܐܝܬ ܠܝ ܥܝܕܐ ܕܐܩܒܠ ܣܝܒܪܬܐ ܚܕܐ ܙܒܢ ܒܝܘܡܐ. ܘܐܢ ܒܿܥܐ ܐܢܐ ܕܠܥܠ ܡܢ ܥܝܕܐ ܐܬܚܫܚ܆ ܡܫܟܚ ܐܢܐ ܕܚܕܐ ܠܬܪ̈ܝܢ ܝܘܡ̈ܝܢ ܐܩܒܠ. ܐܢ ܕܝܢ ܠܒܪ ܡܢ ܥܝܕܐ ܬܪ̈ܬܝܢ ܙܒ̈ܢܝܢ ܒܝܘܡܐ: ܘܐܝܟ ܕܐܡܪܬ܆ ܡܫܟܚ ܗܼܘ ܥܝܕܐ ܫܪܐ ܠܥܝܕܐ܆ ܡܛܠ ܟܝܢܐ ܕܡܫܟܚ ܡܬܪܟܢ ܠܟܐ ܘܠܟܐ. ܕܟܝܢܐ ܕܝܢ ܐܝܬܝܗ܆ ܕܒܟܠܙܒܢ ܒܥܕܢܗ ܢܩܒܠ ܣܝܒܪܬܐ܆ ܕܠܥܠ ܡܢ ܟܝܢܐ ܕܝܢ ܕܟܠ ܟܠܗ ܠܐ ܢܣܬܝܒܪ. ܕܠܒܪ ܡܢ ܟܝܢܐ ܕܝܢ ܕܒܟܠܫܥ ܢܬܠܥܒ: ܥܡ ܟܠܗܝܢ ܕܠܗܢܐ ܢܝܫܐ ܦܚܡܢ:
34
section
34
ܡܕܝܢ ܠܐ ܡܕܡ ܕܗ̇ܘܐ ܠܥܠ ܡܢ ܥܝܕܐ܆ ܘܠܐ ܡܕܡ ܕܗܿܘܐ ܠܒܪ ܡܢ ܥܝܕܐ ܫܿܘܐ ܠܕܘܡܪܐ: ܐܝܟ ܡܢ ܕܠܗ ܠܟܝܢܐ ܐܫܬܟܚ ܗܠܝܢ ܟܠܗܝܢ. ܡܕܡ ܕܝܢ ܕܠܥܠ ܡܢ ܟܝܢܐ ܐܘ ܕܠܒܪ ܡܢ ܟܝܢܐ ܗ݇ܘܐ܆ ܗܿܘ ܗܘ ܫ̇ܘܐ ܠܕܘܡܪܐ. ܠܘܐ ܕܝܢ ܠܕܘܡܖܿܐ ܕܠܥܠ ܡܢ ܟܝܢܐ ܩܘܠܣܐ. ܠܕܘܡܪܐ ܕܝܢ ܕܠܒܪ ܡܢ ܟܝܢܐ ܥܕܠܝܐ.
35
section
35
ܡܬܒܥܐ ܕܝܢ ܠܘܩܕܡ ܠܡܕܥ܆ ܕܟܡܐ ܐܢܘܢ ܟܝ̈ܢܐ܆ ܘܟܡܐ ܛܟ̈ܣܝܗܘܢ: ܘܟܡܐ ܡ̈ܘܙܓܝܗܘܢ: ܘܟܡܐ ܐܣܟܡ̈ܝܗܘܢ: ܘܟܡܐ ܐܢܘܢ ܙܘܥ̈ܐ ܕܟܠ ܚܕ ܚܕ ܡܢܗܘܢ ܘܕܠܩܘܒܠܗܘܢ: ܘܕܡܢܐ ܐܢܘܢ ܗܢܘܢ ܙܘܥ̈ܐ ܘܣ̈ܩܘܒܠܝܗܘܢ: ܘܕܐܝܠܝܢ ܡܢܗܘܢ ܟܝܢܐܝܬ ܡܢ ܠܓܘ ܒܥܕܢܗܘܢ ܡܬܬܙܝܥܢ ܕܠܐ ܥܠܬܐ ܒܪܝܬܐ: ܘܕܐܝܠܝܢ ܡܢܗܘܢ ܕܐܦܢ ܒܗ ܐܢܘܢ ܒܟܝܢܐ ܥ̈ܠܠܬܐ ܒܖ̈ܝܬܐ ܡܪܒܝܢ ܠܗܘܢ: ܘܕܐܝܠܝܢ ܡܥܕܝܢ ܫܚܩܝܢ ܠܗ ܠܟܝܢܐ܇ ܐܡܬܝ ܕܓܕܫ ܘܥܠܒ ܡܘܙܓܐ ܕܐܣܛܘܟ̈ܣܐ ܚܡܝܡܐ ܘܝܒܝܫܐ: ܘܕܐܝܠܝܢ ܐܡܬܝ ܕܚܡܝܡܐ ܘܪܛܝܒܐ : ܘܕܐܝܠܝܢ ܐܡܬܝ ܕܪܛܝܒܐ ܘܩܪܝܪܐ: ܘܕܐܝܠܝܢ ܐܡܬܝ ܕܩܪܝܪܐ ܘܝܒܝܫܐ: ܘܕܐܝܠܝܢ ܐܡܬܝ ܕܫܿܘܐ ܡܘܙܓܐ ܕܟܠܗܘܢ ܐܟܚܕܐ: ܘܕܐܝܠܝܢ ܕܐܦܢ ܡܬܙܝܥܝܢ ܡܫܟܚܐ ܕܠܐ ܢܐܬܘܢ ܠܥܒܕܐ: ܘܕܐܝܠܝܢ ܐܢܘܢ ܕܠܐ ܡܬܓܡܪܝܢ ܒܥܒܕܐ ܠܐ ܩܐܡ ܟܝܢܐ: ܘܕܐܢ ܐܝܬ ܡܢܗܘܢ ܕܓܡܝܪܐܝܬ ܡܫܟܚܐ ܕܢܬܥܩܪܘܢ ܡܢܗ ܕܟܝܢܐ: ܘܕܐܢ ܡܬܥܩܪܝܢ ܐܢ ܡܫܟܚܐ ܕܐܚܪ̈ܢܐ ܚܠܦܝܗܘܢ ܢܬܢܨܒܘܢ.
36
section
36
ܘܡܐ ܕܗܠܝܢ ܟܠܗܝܢ ܐܕܪܟܢ܆ ܗܝܕܝܢ ܝܕܥܝܢܢ ܡܕܡ ܕܒܟܝܢܐ ܘܕܠܥܠ ܡܢ ܟܝܢܐ ܘܕܠܒܪ ܡܢ ܟܝܢܐ ܡܣܬܥܪ. ܘܐܝܟ ܕܪܢܐ ܐܢܐ܆ ܕܩܕܡ ܕܢܪܓܫ ܐܢܫ ܒܗܠܝܢ ܟܠܗܘܢ ܦܘܪ̈ܫܢܐ ܠܐ ܝܿܨܦ ܕܕܠܥܠ ܡܢ ܟܝܢܐ. ܐܡܿܪ ܐܢܐ ܕܝܢ ܕܐܦܢ ܟܝܢܐܝܬ ܬܗܘܐ ܡܪܕܝܬܐ ܕܚܝ̈ܘܗܝ: ܡܢܘ ܓܝܪ ܡܫܟܚ ܢ̇ܦܩ ܡܢ ܚܫܘܟܐ ܐܢ ܢܘܗܪܐ ܠܐ ܚܿܙܐ. ܐܘ ܡܢܘ ܡܖܿܦܐ ܚܪ̈ܘܒܐ ܐܢ ܠܚܡܐ ܠܐ ܡܫܟܚ: ܥܡ ܣܓ̈ܝܐܬܐ ܕܠܗܠܝܢ ܕܡܿܝܢ܇
37
section
37
ܐܝܟܢܐ ܕܝܢ ܕܛܘܒܢܐ ܡܘܫܐ ܥܠ ܒܖܿܝܬܐ ܡܬܚܙܝܢܝܬܐ ܡܘܕܥܐ ܬܫܥܝܬܗ ܠܘܬ ܒ̈ܢܝ ܐܢܫܐ܆ ܡܦܣ ܐܢܬ ܗܘܼ ܓܝܪ ܒܗܢܐ ܛܟܣܐ ܕܒ̈ܢܝ ܐܢܫܐ: ܗܟܢܐ ܐܦ ܚܢܢ ܢܨܠܐ ܕܒܥܘܕܪܢܐ ܕܛܝܒܘܬܗ ܕܐܠܗܐ ܢܫܟܚ ܕܐܦܢ ܥܠ ܦܓܪܐ ܗܢܐ ܡܬܚܙܝܢܐ ܘܡܘܙܓܘ̈ܗܝ ܘܛܟܣ̈ܘܗܝ ܘܐܣܟ̈ܡܘܗܝ ܘܙܘܥ̈ܘܗܝ ܠܡܡܠܠܘܿ
38
section
38
ܗܝܕܝܢ ܡܥܝܢܐ ܕܟܝ̈ܢܐ ܕܒܖ̈ܝܬܐ܆ ܝܕܝܥܐ ܗܝ ܕܬܪ̈ܝܢ ܐܢܘܢ ܒܠܚܘܕ: ܡܬܕ̈ܓܫܢܐ ܘܡܬܝܕܥ̈ܢܐ. ܗܿܘ ܕܡܛܠ ܟܣܝܘܬܗ ܘܪܒܘܬܗ ܐܫܬܐܠܢ ܡܢ ܕܢܬܩܪܒ ܨܐܕܘܗܝ ܟܡܐ ܕܝܢ ܕܡܫܟܚܐ ܘܐܝܬ ܦܘܪܣܐ ܡܬܝܕܥ ܒܝܕ ܗܢܐ ܡܬܪܓܫܢܐ: ܐܝܟ ܢܦܫܐ ܒܝܕ ܦܓܪܐ.
39
section
39
ܢܫܪܐ ܕܝܢ ܒܡܠܬܢ ܐܝܟ ܡܐ ܕܣܦܩܝܢܢ܆ ܥܠ ܟܝܢܗ ܕܦܓܪܐ ܘܕܝܠܝ̈ܬܗ. ܡܦܣܐ ܗܝ ܕܝܢ ܪܕܝܘܬܟ ܡܪܝ ܕܗܢܐ ܦܓܪܐ ܡܬܪܓܫܢܐ ܡܢ ܐܪܒܥܐ ܐܣܛܘܟܣ̈ܐ ܡܬܪ̈ܓܫܢܐ ܐܬܩܝܡ ܒܝܕ ܚܟܡܬܐ ܫܒܝܚܬܐ ܕܐܠܗܐ: ܘܡܛܠ ܕܡܢܗܘܢ ܗܼܘ ܩܘܝܡܗ܆ ܡܢܗܘܢ ܘܒܗܘܢ ܐܦ ܚܝܘ̈ܗܝ ܘܡܘܬܗ ܘܚܘܠܡܢܗ ܘܟܘܪܗܢܗ. ܠܐ ܗ̣ܘܐ ܕܝܢ ܕܠܐ ܒܛܝܠܘܬܐ ܕܒܪܘܝܗ.
40
section
40
ܡܕܝܢ ܐܝܟ ܕܐܡܪܢܢ: ܐܦ ܙܘܥ̈ܐ ܕܠܚܡܝܢ ܠܗܠܝܢ ܡܘܙ̈ܓܐ. ܡܫܬܟܚܝܢ ܒܗ. ܡܘ̈ܙܓܘܗܝ ܕܝܢ ܐܝܬܝܗܘܢ ܗܠܝܢ: ܚܡܝܡܘܬܐ ܘܩܪܝܪܘܬܐ ܘܝܒܝܫܘܬܐ ܘܪܛܝܒܘܬܐ. ܘܡܛܠ ܗܕܐ܆ ܠܐ ܒܝܒܝܫܘܬܐ ܕܠܐ ܪܛܝܒܘܬܐ ܡܫܟܚ ܚܳܝܐ܆ ܘܠܐ ܒܚܡܝܡܘܬܐ ܕܠܐ ܩܪܝܪܘܬܐ. ܡܕܝܢ ܐܡܬܝ ܕܐܝܬܘܗܝ ܒܫܘܝܘܬ ܡܘ̈ܙܓܐ܆ ܗܝܕܝܢ ܐܝܬܘܗܝ ܐܦ ܒܚܘܠܡܢܐ. ܐܦ ܙܘܥ̈ܘܗܝ ܡܛܟܣܐܝܬ ܡܬܙܝܥܝܢ. ܐܡܬܝ ܕܝܢ ܕܚܕ ܡܢ ܡܘ̈ܙܓܐ ܢܫܬܟܚ ܥܠܒ܆ ܡܕܘܕ ܠܗ ܠܟܠܗ ܛܟܣܐ. ܘܡܛܠ ܗܕܐ ܚܦܝܛܘܬܐ ܥܠ ܫܘܝܘܬ ܡ̈ܘܙܢܓܐ ܗܘܝܐ.
41
section
41
ܐܦ ܕܦܓܖܿܐ ܡܬܝܕܥܢܐ ܛܟܣܘ̈ܗܝ ܕܝܢ ܐܝܬܝܗܘܢ ܗܠܝܢ: ܚ̈ܝܐ ܘܡܘܬܐ: ܚܘܠܡܢܐ ܘܟܘܪܗܢܐ. ܐܣ̈ܟܡܘܗܝ ܕܝܢ ܗܠܝܢ: ܩܘܡܐ ܘܡܘܬܒܐ: ܗܠܟܬܐ ܘܡܓܣܐ: ܫܬܩܐ ܘܡܠܝܠܘܬܐ: ܙܘܥܘ̈ܗܝ ܕܝܢ ܗܠܝܢ: ܟܦܢܐ ܫܢܬܐ ܪܓܬܐ ܚܡܬܐ ܕܚܠܬܐ ܥܩܬܐ ܣܢܐܬܐ ܡܐܝܢܘܬܐ ܪܗܝܒܘܬܐ ܚܪܥܘܬܐ ܒܥܖܪܝܪܝܘܬܐ ܚܬܝܪܘܬܐ ܟܡܝܪܘܬܐ ܐܒܠܐ ܒܝܫܘܬܐ. ܕܠܩܘܒܠܐ ܕܝܢ ܕܙܘܥ̈ܘܗܝ ܗܠܝܢ: ܣܒܥܐ ܥܝܪܘܬܐ ܓܥܨܐ ܡܫܝܢܘܬܐ ܠܒܝܒܘܬܐ ܚܕܘܬܐ ܚܘܒܐ ܚܦܝܛܘܬܐ ܒܗܝܠܘܬܐ ܬܡܝܡܘܬܐ ܡܟܘܬܐ ܡܟܝܟܘܬܐ ܦܨܝܚܘܬܐ ܒܘܝܐܐ ܛܒܘܬܐ. ܪ̈ܓܫܘܗܝ ܕܝܢ: ܚܙܝܐ ܫܡܥܐ ܣܘܩܐ ܛܥܡܐ ܓܫܬܐ. ܗܠܝܢ ܟܠܗܘܢ ܘܐܢ ܐܝܬ ܐܚܖ̈ܢܐ ܕܦܚܡܝܢ ܠܗܘܢ ܕܠܐ ܐܬܟܬܒܘ܇ ܓܘܢܐܝܬ ܥܡ ܚ̈ܝܘܬܐ ܩܥܝܢܢ ܠܗܘܢ. ܡܛܠ ܕܟܠܗܝܢ ܐܝܠܝܢ ܕܩܢܝܢ ܚܝ̈ܘܬܐ ܘܒܥܝܪܐ ܩܢܐ ܦܓܪܐ.
42
section
42
ܠܐ ܓܝܪ ܐܝܬ ܦܘܪܣܐ ܕܟܠܗܘܢ ܗܠܝܢ ܐܟܚܕܐ ܐܡܝܢܐܝܬ ܢܬܚܙܘܢ ܒܦܓܖܿܐ܇ ܐܠܐ ܡܐ ܕܚܕ ܡܢܗܘܢ ܒܥܕܢܗ ܢܬܙܝܥ܆ ܐܘ ܡܢ ܠܓܘ ܐܘ ܡܢ ܠܒܪ ܬܙܝܥܝܘܗܝ ܥܠܬܐ܆ ܙܘܥܐ ܐܚܪܢܐ ܕܠܩܘܒܠܗ ܡܥܒܕ ܡܥܒܕܢܐܝܬ ܡܢ ܦܓܪܐ: ܟܕ ܒܚܝܠܐ ܒܗ ܗܼܘ ܒܦܓܪܐ܆ ܡܛܠ ܕܐܦ ܗܼܘ ܒܙܒܢܗ ܡܬܚܙܐ. ܐܡܬܝ ܕܝܢ ܕܟܦܢܐ ܫܟܝܚ ܣܒܥܐ ܪܚܝܩ. ܘܐܡܬܝ ܕܫܢܬܐ ܥܝܪܘܬܐ. ܘܐܡܬܝ ܕܥܩܬܐ ܘܕܚܠܬܐ ܚܕܘܬܐ ܘܠܒܝܒܘܬܐ. ܥܡ ܫܪܟܐ ܕܠܗܠܝܢ ܕܡܝܢ.
43
section
43
ܗܘܝܬ ܕܝܢ ܝܕܥ ܕܗܠܝܢ ܕܕܠܩܘܒܠܐ ܠܐ ܓܡܝܪܐܝܬ ܪܚܝܩܝܢ. ܒܗܿܝ ܕܡܢ ܣܒܥܐ ܢܒܿܥ ܟܦܢܐ. ܘܡܢ ܚܕܘܬܐ ܥܩܬܐ. ܠܐ ܕܝܢ ܒܠܥܕܝܗܘܢ ܩܐܡ ܦܓܪܐ܆ ܘܠܐ ܒܟܘܠܗܘܢ ܫܘܝܐܝܬ ܒܟܠ ܙܒܢ ܡܬܚܫܚ: ܠܐ ܓܝܪ ܒܟܠ ܙܒܢ ܕܡܟ ܘܠܐ ܒܟܠܙܒܢ ܡܬܬܥܝܪ: ܘܠܐ ܒܟܠܙܒܢ ܡܣܬܝܒܪ ܘܠܐ ܒܟܠܙܒܢ ܗ݈ܘ̇ܐ ܕܠܐ ܣܝܒܪܬܐ.
44
section
44
ܘܗܠܝܢ ܟܠܗܘܢ ܙܘ̈ܥܐ ܕܚܫܒܢ ܘܣܩܘܒ̈ܠܝܗܘܢ܆ ܒܬܪ ܗܠܝܢ ܬܠܬܐ ܛܟܣ̈ܝܢ ܘܫܬܐ (66v) ܐ̈ܣܟܡܝܢ ܕܡܢ ܠܥܠ ܪܕܝܢ. ܐܡ̇ܪ ܐܢܐ ܕܝܢ. ܒܬܪ ܚܝ̈ܐ ܘܚܘܠܡܢܐ ܘܟܘܪܗܢܐ܇ ܘܥܝܪܘܬܐ ܘܫܢܬܐ ܘܐܝܠܝܢ ܕܠܥܝܪܘܬܐ ܘܠܚܘܠܡܢܐ ܢܩܝܦܝܢ܆ ܡܢ ܫܢܬܐ ܘܡܢ ܟܘܪܗܢܐ ܦܪܝܩܝܢ܆ ܐܦܢ ܠܐ ܟܠܗܘܢ ܘܓܡܝܪܐܝܬ. ܚܙܝܢ ܚܢܢ ܓܝܪ ܕܒܫܢܬܐ܆ ܒܛܝܠܝܢ ܡܠܥܣܐ ܘܚܙܝܐ ܘܦܪܘܫܘܬܐ ܘܚܡܬܐ ܘܥܩܬܐ ܘܚܕܘܬܐ ܕܒܫܪܪܐ܇ ܥܡ ܫܪܟܐ ܕܠܗܠܝܢ ܕܡܝܢ.
45
section
45
ܒܟܘܪܗܢܐ ܕܝܢ ܠܘ ܟܠܗܘܢ ܗܠܝܢ ܕܒܛܝܠܝܢ ܒܫܢܬܐ ܒܛܠܝܢ ܒܗ. ܐܠܐ ܐܝܟ ܡܫܘܚܬܗ ܘܐܝܟ ܚܝܠܗ ܡܿܒܛܠ ܙܘ̈ܥܐ. ܠܚܘܠܡܢܐ ܕܝܢ ܘܠܥܝܪܘܬܐ ܟܘܠܗܘܢ ܠܘܝܢ. ܐܦܢ ܠܐ ܟܘܠܗܘܢ ܫܘܝܐܝܬ ܡܥܒܕܝܢ. ܣܘܩܐ ܕܝܢ ܒܟܠܙܒܢ ܒܥܝܪܘܬܐ ܘܒܫܢܬܐ ܘܒܚܘܠܡܢܐ ܘܒܟܘܪܗܢܐ܆ ܫܟܝܚ ܗܘ ܥܡ ܟܠܗܘܢ ܙܘܥܘ̈ܗܝ ܕܦܓܙܿܐ. ܗܘܝܘ ܓܝܪ ܚܝ̈ܘܗܝ: ܘܐܝܟܢܐ ܕܗܘ ܣܘܩܐ ܒܟܠܗܘܢ ܗܼܘ ܘܥܡ ܟܠܗܘܢ ܫܟܝܚ ܘܟܠܗܘܢ ܠܗ ܠܘܝܢ܆ ܗܟܢܐ ܡܘܬܐ ܡܢ ܟܠܗܘܢ ܡܢܟܪܝ: ܘܠܟܠܗܘܢ ܗܼܘ ܡܒܛܠ.
46
section
46
ܡܫܟܚܐ ܕܝܢ ܐܝܟ ܕܐܡܪܝܢ܆ ܕܡܛܠ ܫܘܥܒܕܗ ܕܦܓܪܐ ܕܠܢܦܫܐ: ܡܫܟܚܬ ܟܘܠ ܠܡܣܥܪ ܐܝܟ ܐܠܗܐ܆ ܡܛܠ ܗܿܝ ܕܨܠܡܗ ܐܝܬܝܗ: ܕܐܦ ܒܚܝ̈ܘܗܝ ܕܦܓܪܐ ܢܬܢܟܪܐ ܠܡܢܗܘܢ ܕܗܢܘܢ ܙܘܥ̈ܐ ܕܐܡܪܢܢ. ܘܐܝܟ ܕܐܡܪܝܢ ܬܘܒ ܐܢ̈ܫܝܢ܆ ܕܐܢܗܘ ܕܓܡܝܪܐܝܬ ܬܫܬܟܚ ܒܕܡܘܬ ܐܠܗܐ ܐܝܟ ܕܐܬܒܪܝܬ܆ ܐܦ ܠܥܠ ܡܢ ܟܠܗܘܢ ܙܘ̈ܥܐ ܡܨܝܐ ܥܒܫܕܐ ܠܗ. ܡܢ ܠܡ ܕܐܬܢܟܪܝܬ ܕܬܗܘܐ ܨܠܡܐ ܕܐܠܗܐ܇ ܘܒܨܒܝܢܗܿ ܗܘܬ ܨܠܡܐ ܕܒܥܝܪܐ: ܐܫܬܥܒܕܬ ܠܟܠܗܘܢ ܙܘܥ̈ܘܗܝ ܕܦܓܪܐ܇ ܗܢܘܢ ܕܓܘܢܐܝܬ ܩܢܐ ܠܗܘܢ ܥܡ ܚܝܘܬܐ ܘܒܥܝܪܐ ܐܚܝ̈ܢܘܗܝ: ܠܐ ܓܝܪ ܡܫܟܚܐ ܕܟܕ ܗ̇ܝ ܐܝܬܝܗܿ ܠܒܪܿ ܡܢ ܟܝܢܗܿ ܒܣܘܥܪܢܗ̇ ܕܬܥܒܕܝܘܗܝ ܠܦܓܪܗܿ ܠܥܠ ܡܢ ܟܝܢܗ ܒܙܘܥ̈ܘܗܝ : ܘܐܟܙܢܐ ܕܢܘܪܐ ܠܐ ܡܕܥܟܐ ܠܢܘܪܐ. ܘܠܐ ܡ̈ܝܐ ܡܝ̈ܒܫܝܢ ܠܡ̈ܝܐ. ܗܟܢܐ ܢܦܫܐ ܕܐܝܬܝܗܿ ܒܦܓܪܐ ܒܥܒ̈ܕܝܗ̇: ܠܘ ܡܢ ܕܝܠܗ ܒܠܚܘܕ ܠܐ ܡܨܝܐ ܡܚܪܪܐ ܠܗ ܠܦܓܪܐ܆ ܐܠܐ ܐܦ ܕܠܐ ܕܝܠܗ ܡܩܢܝܐ ܠܗ: ܪܡܘܬܐ ܓܝܖܿ ܘܫܘܒܚܐ ܣܪܝܩܐ ܘܪܚܡܬ ܟܣܦܐ ܠܘ ܕܝܠܗ ܐܢܘܢ.
47
section
47
ܡܐ ܕܝܢ ܕܙܘܥ̈ܘܗܝ ܟܝܢܐܝܬ ܘܡܛܟܣܐܝܬ ܗܘܝܢ ܡܬܙܝܥܝܢ ܐܬܐ ܐܢܘܢ ܕܡܢܬܐ ܡܕܡ ܙܥܘܪܬܐ ܕܚܘܠܡܢܗ ܕܢܦܫܐ. ܡܐ ܕܝܢ ܕܕܠܐ ܕܝܠܝܗܘܢ ܢܗܘܐ܆ ܐܬܐ ܗܿܝ ܕܓܡܝܪܘܬܐ. ܡܕܝܢ ܗܪܟܐ ܠܘ ܦܓܪܐ ܡܬܩܠܣ: ܕܠܘ ܗܘ ܡܢܗ ܘܠܗ ܥܒܕ ܡܕܡ ܕܕܘܡܖܿܐ: ܗܢܘ ܕܝܢ ܕܢܗܘܐ ܠܥܠ ܡܢ ܟܝܢܗ: ܐܠܐ ܢܦܫܐ. ܘܠܐ ܬܘܒ ܢܦܫܐ ܫܘܝܐ ܣܓܝ ܠܩܘܠܣܐ. ܡܛܠ ܕܠܘ ܡܕܡ ܕܫܿܘܐ ܤܓܝ ܠܕܘܡܪܐ ܥܒܕܬ. ܡܛܠ ܕܐܦܢ ܠܦܓܪܐ ܥܠܝܬ ܡܢ ܟܝܢܗ: ܗ̣ܝ ܥܕܟܝܠ ܡܛܠܗܕܐ ܒܟܝܢܗܿ ܩܡܬ. ܘܡܕܡ ܕܟܝܢܐܝܬ ܡܣܬܥܪ ܠܐ ܠܩܘܠܣܐ ܘܠܐ ܠܕܘܡܪܐ ܫܿܘܐ:
48
section
48
ܘܗܕܐ ܠܘ ܕܝܠܝ ܗܝ ܐܠܐ ܕܗܿܘ ܒܪܘܝܗܿ ܕܢܦܫܐ ܒܕ ܝܕܥ̇ ܗܘܐ ܐܝܠܝܢ ܡܫܟܚܐ ܢܦܫܐ ܠܡܣܥܪ ܐܡܪ: ܕܡܐ ܕܥܒܕܬܘܢ ܗܠܝܢ ܟܠܗܝܢ: ܐܡܪܘ ܕܥܒ̈ܕܐ ܚܢܢ ܒ̈ܛܝܠܐ: ܕܡܕܡ ܕܐܬܦܩܕ ܠܢ ܥܒܕܢ. ܘܝܕܝܥܐ܆ ܕܐܠܐ ܡܕܡ ܕܝܕܥ ܡܪܗ ܕܥܒܕܐ ܕܡܫܟܚ ܣܥܪ ܠܐ ܡܦܩܕ ܠܗ.
49
section
49
ܘܬܘܒ ܠܐ ܫܘܝܐ ܠܩܘܠܣܐ܆ ܐܝܟ ܡܢ ܕܠܘ ܗܝ ܡܢܗܿ ܘܒܗܿ ܒܟܝܢܗܿ ܩܡܬ. ܐܠܐ ܐܝܟܢܐ ܕܦܓܖܿܐ ܒܝܕ ܚܘܠܡܢܗܿ ܘܚܝܠܗܿ ܕܢܦܫܐ ܣܿܠܩ ܡܢ ܟܝܢܗ: ܗܟܢܐ ܐܦ ܢܦܫܐ ܒܝܕ ܚܝܠܐ ܘܚܟܡܬܐ ܕܐܠܗܐ ܣܠܩܐ ܠܟܝܢܗ.
50
section
50
ܫܘܝܐ ܕܝܢ ܠܕܘܡܪܐ ܣܓܝܐܐ܆ ܡܕܒܪܢܘܬܗ ܕܡܪܐ ܟܠ: ܕܗܘ ܐܬܚܫܚ ܒܟܘܠܗܝܢ ܕܫܘܝܢ ܠܕܘܡܪܐ. ܐܡܿܪ ܐܢܐ ܕܝܢ܆ ܒܕ ܟܝܢܐ ܘܕܠܒܪ ܡܢ ܟܝܢܐ ܘܕܠܥܠ ܡܢ ܟܝܢܐ. ܒܪܢܫܐ ܕܝܢ ܐܡܬܝ ܕܠܒܪ ܡܢ ܟܝܢܐ ܢܫܬܟܚ܆ ܕܘܡܪܐ ܘܥܕܠܝܐ. ܐܡܬܝ ܕܝܢ ܕܒܟܝܢܗ܆ ܠܐ ܥܕܠܝܐ ܘܠܐ ܩܘܠܣܐ. ܠܥܠ ܡܢ ܟܝܢܗ ܕܝܢ܆ ܘܠܐ ܡܕܡ ܡܨܐ ܠܡܣܥܖܿ: ܘܡܕܝܢ ܘܠܐ ܠܕܘܡܪܐ ܘܠܐ ܠܩܘܠܣܐ ܫܿܘܐ܆ ܐܠܐ ܒܠܚܘܕ ܕܡܢ ܥܕܠܝܐ ܪܚܝܩ܆ ܡܛܠ ܕܟܡܐ ܐܢ ܢܣܥܘܪ ܡܝܬܪ̈ܬܐ܆ ܥܕܟܝܠ ܟܝܢܐܝܬ ܣܥܪܝܢܢ:
51
section
51
ܘܐܝܟܢܐ ܕܠܐ ܡܨܐ ܦܓܪܐ ܚܝܐ ܕܠܐ ܣܝܒܪܬܐ܆ ܗܟܢܐ ܐܦ ܠܐ ܢܦܫܐ ܕܠܐ ܡܝܬܖ̈ܬܐ: ܘܐܝܟܢܐ ܕܠܐ ܣܦܩܐ ܠܦܓܪܐ ܣܝܒܪܬܐ ܕܚܕ ܝܘܡ ܠܫܪܟܐ ܕܝܘܡ̈ܬܗ܆ ܗܟܢܐ ܠܐ ܣܦܩܢ ܕܢܚܝܢ ܠܢ ܡܝܬܖ̈ܬܐ ܕܐܬܡܠܝ ܝܘܡܢ. ܘܐܢ ܦܓܖܿܐ ܗܢܐ ܡܬܪܓܫܢܐ ܘܡܣܬܝܟܢܐ: ܒܟܠ ܝܘܡ ܣܢܝܩ ܥܠ ܣܝܒܪܬܐ ܕܐܟܘܬܗ܇ ܚܕ ܟܡܐ ܢܦܫܐ ܕܠܐ ܡܣܬܝܟܐ ܡܢ ܒܢܝ̈ܢܫܐ܆ ܣܢܝܩܐ ܥܠ ܡܐܟܘܠܬܐ ܕܠܐ ܡܣܬܝܟܐ ܒܟܠ ܫܥ.
52
section
52
ܘܡܢܐ ܐܡ̇ܪ ܐܢܐ ܕܒܕܡܘܬ ܡܐܟܘܠܬܐ ܠܦܓܖܿܐ ܡܬܒܥܝܢ ܡܝܬܖ̈ܬܐ ܠܢܦܫܐ. ܐܠܐ ܕܐܝܟ ܣܘܩܐ ܠܦܓܪܐ ܡܬܒܥܝܢ ܠܗܿ ܡܝܬܖ̈ܬܐ. ܕܠܐ ܡܟܘܠܬܐ ܓܝܪ ܡܫܟܚܐ ܗ̣ܝ ܕܐܦ ܝܘܡ̈ܬܐ ܢܗܘܐ ܦܓܪܐ. ܕܠܐ ܣܘܩܐ ܕܝܢ ܘܠܐ ܚܕܐ ܫܥܐ.
53
section
53
ܡܕܝܢ ܡܦܝܣ ܐܢܐ܆ ܕܠܐ ܬܡܐܢ ܠܢ ܕܢܦܠܘܚ ܡܝܬܖ̈ܬܐ ܘܠܐ ܢܬܬܟܠ ܥܠ ܕܐܬܦܠܚ. ܘܢܦܘܫ ܠܢ ܡܢ ܦܘܠܚܢܗܝܢ ܒܕ ܣܒܪܝܢܢ ܕܣܦܩܢ ܠܢ ܐܝܠܝܢ ܕܥܒܪ. ܘܠܐ ܢܛܥܢ ܠܐܢܫ ܘܠܐܠܗܐ ܛܝܒܘܬܐ܇ ܒܐܝܠܝܢ ܕܦܠܚܢ ܐܘ ܦܠܚܝܢ ܚܢܢ. ܐܝܟܢܐ ܕܐܦ ܠܐ ܒܡܟܘܠܬܐ ܕܡܩܒܠ ܦܓܪܢ ܘܿܠܐ ܠܢ ܕܢܛܥܢ ܠܐܢܫ ܛܝܒܘܬܐ ܕܡܕܡ ܕܐܟܠܢ: ܡܕܝܢ ܟܠ ܡܕܡ ܕܣܥܪܝܢ ܚܢܢ ܡܛܠ ܣܘܢܩܢܢ ܘܡܛܠܗܕܐ ܠܐ ܫܘܿܝܢ ܚܢܢ ܠܬܫܒܘܚܬܐ. ܐܢ ܓܝܪ ܣܥܪܝܢܢ ܕܝܠܢ ܘܐܢ ܠܐ ܣܥܪܝܢ ܚܢܢ ܡܬܓܠܙܝܢܢ: ܐܠܗܐ ܕܝܢ ܟܠ ܡܕܡ ܕܣܥܪ ܒܟܝܢܐ ܘܠܥܠ ܡܢ ܟܝܢܐ ܘܠܒܪ ܡܢ ܟܝܢܐ܆ ܠܘ ܡܛܠܬܗ ܐܠܐ ܡܛܠܬܢ. ܠܐ ܓܝܪ ܣܢܝܩ ܗܘܐ ܥܠ ܗܠܝܢ . ܘܡܛܠ ܗܕܐ܆ ܒܟܠܗܝܢ ܫܿܘܐ ܠܬܫܒܘܚܬܐ. ܘܠܐ ܡܫܟܚܐ ܕܐܝܟ ܡܐ ܕܘܿܠܐ ܢܫܬܒܚ ܡܢ ܟܠܗܘܢ ܡ̈ܠܝܠܐ.
54
section
54
ܟܠܗܝܢ ܓܝܪ ܕܣܥܪ ܐܝܟ ܕܐܡܪܢ: ܒܟܝܢܐ ܘܠܒܪ ܡܢ ܟܝܢܐ ܘܠܥܠ ܡܢ ܟܝܢܐ ܐܝܬܝܗܝܢ. ܒܟܝܢܐ ܕܝܢ ܘܠܒܪ ܡܢ ܟܝܢܐ ܕܝܠܗ. ܕܠܥܠ ܕܝܢ ܡܢ ܟܝܢܐ ܕܝܠܢ. ܐܢ ܓܝܪ ܒܪܢܫܐ ܠܝܬ ܠܗ ܕܙܣܥܘܪ ܡܕܡ ܠܥܠ ܡܢ ܟܝܢܗ܆ ܐܠܐ ܟܠܗܝܢ ܡܝܬܖ̈ܬܐ ܟܝܢܐܝܬ ܣܿܥܪ܆ ܚܕ ܟܡܐ ܗܿܘ ܣܟܐ ܕܟܠܗܝܢ ܛܒ̈ܬܐ: ܠܝܬ ܠܗ ܕܢܣܥܘܪ ܡܕܡ ܠܒܪ ܡܢ ܟܝܢܗ:
55
section
55
ܬܠܬ ܓܝܪ ܐܝܬ ܕܠܝܬ ܠܗ ܠܐܠܗܐ: ܘܚܕܐ ܚܣܝܪܐ ܡܢ ܨܒܝܢܗ܆ ܘܚܕܐ ܡܢ ܚܝܠܐ ܕܒܪܘܝܘܬܗ܆ ܘܚܕܐ ܡܢ ܣܥܘܪܘܬܗ. ܠܐ ܓܝܪ ܒܡܘܬܐ ܕܐܢܫ ܨܒܐ܆ ܘܠܐ ܕܢܒܪܐ ܐܝܬܝܐ ܐܚܪܢܐ ܐܟܘܬܗ ܕܠܐ ܫܘܪܝ ܡܫܟܚ. ܘܠܐ ܚܛܝܬܐ ܣܿܥܪ. ܘܠܐ ܡܕܡ ܐܝܬ ܠܥܠ ܡܢ ܟܝܢܗ ܕܢܣܬܥܪ.
56
section
56
ܕܟܝܢܗ ܗܘܬ ܓܝܪ ܛܒܐ ܗܕܐ܇ ܕܟܕ ܠܐ ܐܝܬܝܢ ܘܟܕ ܠܐ ܣܢܝܩ ܥܠܝܢ܇ ܕܠܐ ܦܝܣܐ ܒܪܢ ܒܨܠܡܗ ܘܥܒܕܢ ܝܕ̈ܬܐ ܕܟܠ ܕܐܝܬ ܠܗ ܟܝܢܐܝܬ ܘܐܝܬܝܐܝܬ. ܠܒܪ ܡܢ ܟܝܢܗ ܕܝܢ ܘܒܟܝܢܗ ܗܿܝ ܕܢܚܬ ܘܣܝܒܪ ܟܠܗܝܢ ܐܝܠܝܢ ܕܚܢܢ ܡܛܠ ܕܢܦܩܢ ܡܢ ܟܝܢܢ ܩܢܝܢ܆ ܗܢܐ ܗܘ ܕܝܢ ܟܠܗܝܢ ܕܡܢ ܒܛܢܐ ܠܡܘܬܐ. ܗ̇ܘ ܕܝܢ ܠܘ ܐܝܟ ܡܢ ܕܣܥܪ ܡܕܡ ܕܫܿܘܐ ܠܗܢܐ ܡܣܡ ܒܪܝܫܐ ܐܬܐ ܠܗ ܐܠܐ ܒܚܘܒܗ ܟܝܢܝܐ ܕܢܚܪܪܢ ܡܢ ܠܘܛܬܐ ܘܟܠܗܝܢ ܐܝܠܝܢ ܕܪܕܝܢ ܒܬܪܗ: ܕܩܒܠܢ ܡܛܠ ܣܟܠܘܬܢ. ܗܼܘ ܕܝܢ ܕܠܐ ܣܟܠܘ ܩܒܠ ܐܢܝܢ. ܘܐܫܟܚ ܕܐܦ ܡܢܢ ܢܥܛܐ ܐܢܝܢ.
57
section
57
ܕܠܒܪ ܡܢ ܟܝܢܐ ܗܝ ܓܝܪ ܕܐܠܗܐ ܡܢ ܐܢܬܬܐ ܢܬܝܠܕ܆ ܐܠܗܐ ܕܝܢ ܡܛܠ ܚܘܒܗ ܕܠܘܬܢ: ܘܕܠܐ ܐܣܝܪ ܟܝܢܗ ܘܡܫܥܒܕ ܠܚܕ ܡܢ ܢܡ̈ܘܣܐ܆ ܐܬܝܠܕ ܡܢ ܐܢܬܬܐ܆ ܐܝܟ ܕܨ̇ܒܐ܆ ܟܕ ܠܐ ܐܘܒܕ ܗܿܝ ܕܐܝܬܘܗܝ ܗܘܐ܆ ܕܠܢ ܢܚܪܪ ܡܢ ܒܛܢܐ ܘܝܠܕܐ ܕܠܘܛܬܐ ܘܕܚܛܝܬܐ: ܘܢܘܠܕܢ ܡܙܕܪܝܫ ܒܝܠܕܐ ܕܒܘܪܟܬܐ ܘܕܙܕܝܩܘܬܐ:
58
section
58
ܚܢܢ ܓܝܪ ܡܛܠ ܕܚܒܠܢ ܟܝܢܢ ܒܨܒܝܢܢ܇ ܐܬܝܢ ܠܗܢܐ ܒܛܢܐ ܘܝܠܕܐ ܕܚܒܝܫ ܬܚܝܬ ܠܘܛܬܐ. ܗܼܘ ܕܝܢ ܟܕ ܐܝܬܘܗܝ ܡܕܡ ܕܐܝܬܘܗܝ܆ ܒܛܝܒܘܬܗ ܩܒܠ ܥܡ ܝܠܕܐ ܟܠܗܝܢ ܐܝܠܝܢ ܕܪܕܝܢ ܒܬܪ ܝܠܕܐ ܥܕܡܐ ܠܡܘܬܐ. ܕܐܝܬܝܗܝܢ ܠܐ ܗܘܐ ܠܒܪ ܡܢ ܟܝܢܗ ܕܝܠܗ ܒܠܚܘܕ܆ ܐܠܐ ܐܡܿܖܿ ܐܢܐ܆ ܕܐܦ ܠܒܪ ܡܢ ܟܝܢܢ ܕܝܠܢ: ܕܠܢ ܕܒܨܒܝܢܢ ܡܛܠ ܕܣܥܪܢ ܚܛܝܬܐ ܢܦܠܢ ܒܗܝܢ ܢܚܪܪܢ ܡܢܗܝܢ ܆ ܕܒܨܒܝܢܗ ܕܠܐ ܚܛܗܐ ܫܩܠ ܐܢܝ̈ܢ ܥܠܘܗܝ܆ ܠܐ ܕܝܢ ܐܫܟܚܢ ܕܚܢܢ ܡܢܢ ܘܠܢ ܢܣܩ ܡܢܗܝܢ܆ ܡܛܠ ܕܕܣܥܪܢ ܚܛܝܬܐ ܢܦܠܢ ܒܗܝܢ. ܗܼܘ ܕܝܢ ܠܐ ܗܘܐ ܒܠܚܘܕ ܠܐ ܟܬܪ ܒܗܝܢ܆ ܐܠܐ ܐܦ ܠܢ ܐܣܩ: ܡܛܘܠ ܕܐܝܟ ܕܐܡܪܢ ܒܚܘܒܗ ܕܠܐ ܚܛܝܬܐ ܢܚܬ ܠܗܝܢ.
59
section
59
ܠܥܠ ܡܢ ܟܝܢܐ ܗܝ ܓܝܪ ܕܒܪܢܫܐ ܢܬܝܠܕ ܡܢ ܐܢܬܬܐ ܕܠܐ ܙܘܘܓܐ܇ ܟܕ ܩܝܡܝܢ ܒ̈ܬܘܠܐ ܕܝܠܕܬܗ. ܘܠܥܠ ܡܢ ܟܝܢܐ ܗܝ ܕܒ̈ܢܝ ܐܢܫܐ ܕܢܡܘܬ ܐܢܫ ܒܨܒܝܢܗ: ܘܡܢ ܒܬܪ ܡܘܬܗ ܢܩܘܡ ܒܨܒܝܢܗ ܕܠܐ ܚܒܠܐ ܘܕܠܐ ܥܘܕܖܿܢܐ ܕܐܚܖ̈ܢܐ. ܐܠܗܐ ܕܝܢ ܕܪܚܿܡ ܐܢܫܐ ܗܘ܆ ܗܘܐ ܒܪܢܫܐ ܘܐܬܝܠܕ ܒܨܒܝܢܗ ܕܠܐ ܙܘܘܓܐ: ܘܡܝܬ ܐܝܟ ܕܨܒܐ܆ ܘܩܡ ܕܠܐ ܚܒܠܐ ܒܨܒܝܢܗ. ܦܪܩܬܗ ܓܝܪ ܝܡܝܢܗ ܘܕܪܥܗ ܩܕܝܫܐ: ܠܗܢܐ ܐܠܗܐ ܕܗܘܐ ܒܪܢܫܐ܆ ܟܕ ܐܝܬܘܗܝ ܐܦ ܐܠܗܐ.
60
section
60
ܗܿܘ ܓܝܪ ܚܡܝܪܐ ܕܐܠܗܘܬܐ: ܕܒܛܝܒܘܬܗ ܐܬܛܡܪ ܒܓܒܝܠܬܐ ܦܛܝܪܬܐ ܕܐܢܫܘܬܐ܇ ܠܘ ܒܠܚܘܕ ܟܝܢܗ ܘܛܥܡܗ ܘܚܝܠܗ ܠܐ ܐܘܒܕ܆ ܐܠܐ ܠܟܠܗ ܓܒܝܠܬܐ ܠܘܬ ܟܠܗܝܢ ܕܝܠܗ ܢܬܦ. ܥܕ ܩܠܝܠ ܓܝܖܿ ܙܒܢܐ܆ ܐܦ ܚܡܝܪܐ ܕܐܬܛܡܪ ܒܓܒܝܠܬܐ ܦܛܝܪܐ ܡܣܬܒܪ. ܒܬܪ ܕܝܢ ܙܒܢܐ ܟܠܗܿ ܓܒܝܠܬܐ ܠܘ ܚܡܝܪܐ ܡܣܬܒܪܐ: ܐܠܐ ܐܝܬܝܗ ܒܫܪܪܐ:
61
section
61
ܗܟܢܐ ܐܦ ܡܪܢ ܒܙܒܢܢ ܕܝܠܢ ܘܒܥܠܡܢ ܘܒܡܫܘܚܬܢ: ܕܒܪܢܫܐ ܗܘ ܡܣܬܒܪ ܗܘܐ. ܒܙܒܢܗ ܕܝܢ ܕܝܠܗ ܘܒܥܠܡܗ ܘܒܡܠܟܘܬܗ܆ ܒܪܢܫܐ ܠܘ ܐܠܗܐ ܡܣܬܒܪ: ܐܠܐ ܐܝܬܘܗܝ ܒܫܖܿܪܐ: ܘܐܝܟܢܐ ܕܒܗܢܐ ܥܠܡܐ ܠܐ ܗܘܐ ܬܖ̈ܝܢ ܐܠܗܐ ܘܒܖܿܢܫܐ: ܐܠܐ ܚܕ ܐܠܗܐ ܡܛܠܬܗ܇ ܘܗܼܘ ܟܕ ܗܼܘ ܒܪܢܫܐ ܡܛܠܬܢ܇ ܗܟܢܐ ܒܥܠܡܗ ܠܐ ܗܘܐ ܬܪ̈ܝܢ ܐܠܗܐ ܘܒܪܢܫܐ: ܐܠܐ ܚܕ ܗܘ ܐܠܗܐ ܡܛܠܬܗ ܕܐܝܬܘܗܝ ܐܠܗܐ. ܘܒܪܢܫܐ ܐܠܗܐ܇ ܡܛܠ ܐܠܗܐ ܕܗܘܐ ܒܪܢܫܐ. ܐܝܟܢܐ ܓܝܪ ܕܗܿܘ ܡܛܠ ܗܢܐ ܒܪܢܫܐ܆ ܗܟܢܐ ܐܦ ܗܢܐ ܡܛܘܠ ܗܿܘ ܐܠܗܐ:
62
section
62
ܐܠܗܐ ܕܝܢ ܟܕ ܗܘܐ ܒܪܢܫܐ܆ ܠܐ ܐܘܒܕ ܚܕܐ ܡܢ ܟܝܢܝ̈ܬܗ܇ ܒܪܢܫܐ ܕܝܢ ܠܐ ܒܟܠܗܝܢ ܟܝܢܝ̈ܬܗ ܩܐܡ܆ ܘܠܐ ܒܕ ܠܥܠ ܡܢ ܟܝܢܗ. ܐܠܐ ܐܘܒܕ ܗܝ ܕܐܝܬܘܗܝ ܗܘܐ ܒܪܢܫܐ ܡܥܒܕܢܐܝܬ. ܕܟܝܢܗ ܕܝܢ ܗܿܝ ܕܒܨܠܡ ܐܠܗܐ ܐܬܒܪܝ ܒܪܢܫܐ. ܕܠܥܠ ܕܝܢ ܡܢ ܟܝܢܗ ܗ̇ܝ ܕܒܕܡܘܬܗ ܗܘܝܢ ܚܢܢ: ܘܐܝܟ ܗܿܝ ܕܐܢܐ ܐܬܝܬ ܕܚܝ̈ܐ ܢܗܘܘܢ ܠܗܘܢ ܘܡܕܡ ܕܝܬܝܪ ܢܗܘܐ ܠܗܘܢ. ܘܐܝܟ ܗܿܝ ܕܥܠ ܡܠܟܘܬܝ ܬܩܢܬ܇ ܘܐܝܩܪܐ ܝܬܝܪܐ ܐܬܬܘܣܦ ܠܝ:
63
section
63
ܘܒܫܖܿܪܐ ܕܒܗܠܝܢ ܟܠܗܝܢ ܕܡܣܬܥܪܢ ܚܐܪ ܗܘܐ ܢܒܝܐ: ܘܬܗܪ ܘܩܪܝܗܝ ܕܘܡܪܐ: ܠܗܿܘ ܕܗܠܝܢ ܟܠܗܝܢ ܣܥܪ ܡܛܠ ܚܘܒܗ ܕܠܘܬ ܡ̈ܠܝܠܐ: ܘܣܓܝ ܫܿܘܐ ܠܬܗܪܐ ܘܠܬܫܒܘܚܬܐ ܗܢܐ ܕܘܡܪܐ. (71r) ܕܘܡܪܐ ܗܼܘ ܓܝܪ ܕܠܐ ܡܬܡܠܠ ܕܟܝܢܐ ܕܡ̈ܠܝܠܐ܇ ܗܿܘ ܕܡܛܠ ܒܪܝܬܗ ܘܫܘܪܝܐ ܕܗܘܝܗ: ܘܡܛܠ ܡܬܙܝܥܢܘܬܐ ܕܨܒܝܢܗ ܡܢܟܪܝ ܗܘܐ ܠܟܝܢܐ ܐܠܗܝܐ ܕܐܝܬܘܗܝ ܕܠܐ ܫܘܪܝ ܘܥܒܘܕܐ ܕܟܠ ܘܠܐ ܡܫܬܚܠܦܢܐ: ܕܢܬܚܠܛ ܥܡ ܟܝܢܐ ܕܒܪܘܝܗ ܘܒܛܝܒܘܬܗ ܢܗܘܐ ܒܗ ܚܕ ܒܟܠ ܡܕܡ ܕܠܐ ܫܘܠܡ܆
64
section
64
ܐܡ̇ܪ ܐܢܐ ܕܝܢ ܠܚܘܒܟ܆ ܕܐܝܟܢܐ ܕܐܚܕܗ ܬܗܪܐ ܠܢܒܝܐ ܟܕ ܒܗܠܝܢ ܚܪ ܘܩܥܐ ܕܘܡܪܐ: ܗܟܢܐ ܐܚܕܢܝ ܕܘܡܪܐ ܒܗܠܝܢ ܟܠܗܝܢ ܕܦܓܥ ܒܝ ܒܐܘܪܚܐ ܗܕܐ ܕܠܒܟܬ. ܘܐܬܟܠܝܬ ܡܢ ܢܝܫܐ ܗ̇ܘ ܕܫܪܝܬ ܒܗ ܒܕ ܐܬܐܣܖܿܬ ܒܫܫܠܬܐ ܚܝܠܬܢܝܬܐ ܕܚܘܒܗܝܢ ܕܗܠܝܢ ܕܕܠܐ ܣܘܟܝ ܕܝܠܝ ܐܪܥܢܝ. ܘܦܫܬ ܡܢ ܡܠܘܐܐ ܕܫܘܠܡܗ ܕܫܘܪܝ.
65
section
65
ܐܡܿܪ ܐܢܐ ܕܝܢ ܕܟܒܪ ܐܦ ܗܼܘ ܫܘܪܝܐ ܡܛܠܬܗ ܕܗܢܐ ܫܘܠܡܐ ܗܘܐ: ܐܝܟܢܐ ܓܝܪ ܕܐܝܢܐ ܕܒܥ̇ܐ ܕܢܩܘܡ ܥܠ ܫܘܠܡܐ ܕܟܠܗܘܢ ܢܚ̈ܠܐ: ܠܘܬ ܝܡܐ ܫܪܟܐ ܡܖܿܕܝܬܗ: ܗܟܢܐ ܐܝܢܐ ܕܒܥ̇ܐ ܕܢܩܘܡ ܥܠ ܚܝܠܐ ܕܡܕܡ ܡܕܡ ܡܢ ܒܖ̈ܝܬܐ: ܠܘܬ ܚܟܡܬܐ ܡܠܝܬ ܦܘܪ̈ܫܢܐ ܕܬܩܢܬܗ ܫ̇ܪܟ:
66
section
66
ܘܐܝܟ ܕܐܚܕ ܠܗ ܬܗܪܐ ܠܗ̇ܘ ܕܩܐܡ ܥܠ ܓܢܒ ܝܡܐ ܥܠ ܠܐ ܡܣܬܝܟܢܘܬܗ ܘܥܠ ܛܥܡܗ ܘܥܠ ܓܘܢܗ ܘܥܠ ܟܠ ܕܐܝܬ ܠܗ: ܘܥܠ ܕܐܝܟܢ ܐܦ ܢܗܖ̈ܘܬܐ ܘܢܚ̈ܠܢܐ ܘܬ̈ܦܐ ܕܪܡܝܢ ܒܗ: ܐܦ ܗܢܘܢ ܒܗ ܠܐ ܡܣ̈ܬܝܟܢܐ ܗܘܿܝܢ ܘܠܐ ܡܬܦܪ̈ܫܢܐ: ܒܕ ܩܿܢܐܢ ܟܠܗܝܢ ܕܝܠܗ܇ ܗܟܢܐ ܐܦ ܐܝܢܐ ܕܒܗܢܐ ܫܘܠܡܐ ܕܟܠ ܣܘ̈ܟܠܝܢ ܚܐܪ: ܒܬܗܪܐ ܣܓܝܐܐ ܘܒܕܘܡܪܖܐ ܗ݈ܘܳܐ ܒܫ ܚܢܐ ܕܗܠܝܢ ܟܘܠܗܝܢ ܦܘܪ̈ܫܢܐ ܕܝܕܥ̈ܬܐ ܡܫܚ̈ܠܦܬܐ: ܒܚܕܐ ܝܕܥܬܐ ܐܝܬܝܝܬܐ ܘܝܚܝܕܝܬܐ ܡܬܡܙܓܢ: ܘܗܿܘܝܢ ܟܠܗܝܢ ܗܠܝܢ ܘܗܿܝ ܚܕܐ ܕܠܐ ܫܘܠܡ.
67
section
67
ܡܛܠ ܕܝܢ ܕܗܫܐ ܦܫܢ ܠܢ ܡܢ ܕܢܓܡܪܝܘܗܝ ܠܗܿܘ ܙܝܫ ܩܕܡܝܐ ܥܠ ܕܦܓܥ ܠܗ ܒܢ ܩܠܝܠܐܝܬ ܗܢܐ ܫܘܠܡܐ ܪܚܝܡܐ ܗܐ ܢܛܝܪ ܠܟ ܘܠܝ ܘܠܟܠ ܕܨܒܵܐ ܒܓܙܐ ܪܒܐ ܕܟܠ ܣܝܡ̈ ܕܚܟܡܬܐ ܚܕܝܗ ܕܡܫܝܚܐ: ܗܿܘ ܕܒܚܫܡܝܬܐ ܢܦܠ ܥܠܘܡ ܝܘܚܢܢ: ܘܐܬܒܕܩ ܠܗ ܥܠ ܡܫܠܡܢܐ. ܐܬܒܝܢ ܕܝܢ ܒܗ̇ܝ ܕܚܫܡܝܬܐ. ܡܕܝܢ ܠܐ ܕܠܐ ܚܫܡܝܬܐ ܘܠܐ ܕܠܐ ܚܕܝܐ ܡܬܝܕܥ ܡܫܠܡܢܐ. ܚܙܝ ܕܝܢ ܕܡܚܕܐ ܕܐܬܝܕܥ܆ ܐܦ ܐܬܦܪܫ ܘܗܘܐ ܢܘܚܐ:
68
section
68
ܐܟܙܢܐ ܕܝܢ ܕܠܐ ܘܿܠܐ ܠܗܿ ܠܐܪܥܐ ܛܒܬܐ ܕܡܩܒܠܐ ܙܪܥܐ ܕܐܝܟ ܕܩܒܠܬܗ ܒܠܚܘܕ ܬܬܠܝܘܗܝ: ܐܠܐ ܚܕ ܒܬܠܬܝܢ ܘܒܫܬܝܢ ܘܒܡܐܐ܆ ܗܟܢܐ ܐܦ ܠܐ ܒܬܪܥܝܬܟ ܡܗܝܪܬܐ܇ ܗܿܘ ܙܪܥܐ ܕܐܫܬܕܝ ܒܗ̇ ܡܫܘܚܕܐܝܬ ܢܟܬܪ: ܐܠܐ ܐܬܚܦܛ ܕܗܿܘ ܡܕܡ ܕܐܙܕܪܥ ܒܟ ܢܐܬܐ ܒܥܐ̈ܦܐ ܣ̈ܓܝܐܐ ܕܡܢ ܗܕܐ ܐܟܖܿܐ ܢܪܘܙ. ܘܒܟܠܙܒܢ ܢܗܝܡܢܟ ܙܪܥܗܿ. ܘܐܪܥܐ ܬܬܒܪܟ. ܘܡܣܟ̈ܢܐ ܣ̈ܓܝܐܐ ܢܬܦܪܢܣܘܢ. ܐܝܟܢܐ ܕܡܢ ܐܟܪܐ ܘܡܢ ܐܪܥܐ ܘܡܢ ܐܝܠܝܢ ܕܡܬܦܪܢܣܝܢ ܬܫܒܘܚܬܐ ܘܗܘܠܠܐ ܢܣܩ ܠܗܿܘ ܐܟܪܐ ܘܕܡܐ ܕܕܝܠܗ ܗܘ ܟܠܗ ܙܪܥܐ ܕܒܘܪܟܬܐ ܠܥܠܡ ܐܡܝܢ:.:
