ܠܛܒܬܐ ܩܕܡܝܬܐ ܠܝܬ ܣܩܘܒܠܐ. ܡܛܠ ܕܒܐܝܬܘܬܗ̇ ܐܝܬܝܗ̇ ܛܒܬܐ ܠܐܝܬܘܬܐ ܕܝܢ ܠܝܬ ܕܠܩܘܒܠܐ܀

ܣܩܘܒܠܝܘܬܐ ܒܡܘ̈ܙܓܐ ܐܝܬܝܗ̇. ܡܘ̈ܙܓܐ ܕܝܢ ܒܦܓܪ̈ܐ ܐܝܬܝܗܘܢ. ܣܩܘܒܠܝܘܬܐ ܗܟܝܠ ܒܒܪ̣̈ܝܬܐ ܐܝܬܝܗ̇܀

ܟܠ ܟܝܢܐ ܡܠܝܠܐ܆ ܐܝܬܘܬܐ ܝܕܘܥܬܢܝܬܐ ܐܝܬܘܗܝ. ܐܠܗܐ ܕܝܢ ܡܬܝܕܥܢܐ ܐܝܬܘܗܝ. ܠܐ ܡܬܦܠܓܢܐܝܬ ܡ̇ܢ ܫ̇ܪܐ ܒܐܝܠܝܢ ܕܫ̇ܪܐ܆ ܐܝܟ ܐܘܡܢܘܬܐ ܐܪܥܢܝܬܐ. ܡܝܬܪ ܕܝܢ ܡܢ ܗܕܐ܆ ܒܗ̇ܝ ܕܩܢܘܡܐܝܬ ܐܝܬܘܗܝ܀

ܟܠܡܕܡ ܕܗ̣ܘܐ܆ ܐܘ ܡܩܒܠܢܐ ܗܘ ܕܣܩܘܒܠܝܘܬܐ܆ ܐܘ ܡܢ ܣܩܘܒܠܝܘܬܐ

ܐܬܩ̇ܝܡ. ܠܘ ܕܝܢ ܟܠ ܕܡܩܒܠܢܐ ܗܘ ܕܣܩܘܒܠܝܘܬܐ܇ ܐܦ ܥܡ ܐܝܠܝܢ ܕܡܢ ܣܩܘܒܠܝܘܬܐ ܐܬܩܝ̇ܡܘ ܟܕܝܢ܀

ܪ̈ܫܝܬܐ ܠܐ ܝ̇ܠܕ̈ܢ ܘܠܐ ܡܬܝܠܕ̈ܢ. ܡܨܥܝܘܬܐ ܕܝܢ ܝ̇ܠܕܐ ܘܡܬܝܠܕܐ܀

ܒܦܘܚܡܐ ܚܢܢ ܡܕܡ ܚܪܝܢ ܐܝܬܝܢ. ܘܐܚܪܢܐ ܗ̇ܘ ܕܒܢ. ܘܐܚܪܢܐ ܗ̇ܘ ܕܒܗ ܚܢܢ. ܐܟܚܕ ܕܝܢ ܐܝܬܘܗܝ ܗ̇ܘ ܕܒܗ ܚܢܢ܆ ܘܗ̇ܘ ܕܒܗ ܐܝܬܘܗܝ ܗ̇ܘ ܕܒܗ ܚܢܢ܀

ܟܕ ܢܫ̣ܬܩܠܘܢ ܗܠܝܢ ܕܐܟܚܕܐ܆ ܡܫܬ̣ܩܠ ܐܦ ܡܢܝܢܐ. ܘܟܕ ܗܢܐ ܢܫ̣ܬܩܠ܆ ܚܕ ܢܗܘܐ ܗ̇ܘ ܕܒܢ܇ ܘܗ̇ܘ ܕܒܗ ܥܬܝܕܝܢ ܚܢܢ ܠܡܗܘܐ܀

ܟܕ ܐܬܦܪ̣ܫ ܗ̇ܘ ܕܒܗ ܥܬܝܕܝܢ ܚܢܢ ܠܡܗܘܐ܆ ܐܘܠܕ ܠܗܢܐ ܕܒܗ ܚܢܢ. ܟܕ ܕܝܢ ܢܬܚ̇ܠܛ ܗܢܐ ܕܒܢ܆ ܫ̇ܩܠ ܗ̇ܘ ܡܕܡ ܕܥܡ ܡܢܝܢܐ ܡܫܬ̣ܩܠ܀

ܟܕ ܢܗܘܐ ܒܗ̇ܘ ܕܐܝܬܘܗܝ܆ ܚܙ̇ܝܢܢ ܠܗ̇ܘ ܕܐܝܬܘܗܝ. ܟܕ ܕܝܢ ܒܗ̇ܘ ܕܠܝܬܘܗܝ܆ ܝ̇ܠܕܝܢܢ ܡܐ ܕܠܝܬܘܗܝ. ܟܕ ܕܝܢ ܢܫ̣ܬܩܠܘܢ ܗܠܝܢ ܕܒܗܘܢ ܚܢܢ܆ ܬܘܒ ܠܐ ܢܗܘܐ ܡܐ ܕܠܝܬܘܗܝ܀

ܡܢܗܘܢ ܕܫܐܕ̈ܐ܆ ܕܠܩܘܒܠܐ ܐܢܘܢ ܕܦܘܠܚܢܐ ܕܦܘ̈ܩܕܢܐ. ܘܡܢܗܘܢ ܕܠܩܘܒܠܐ ܕܣܘ̈ܟܠܐ ܕܟܝܢܐ. ܘܡܢܗܘܢ ܕܠܩܘܒܠܐ ܕܡ̈ܠܐ ܕܥܠ ܐܠܗܘܬܐ. ܡܛܠ ܕܐܦ ܗ̣ܝ ܝܕܥܬܐ ܕܦܘܪܩܢܢ܆ ܡܢ ܗܠܝܢ ܬܠܬ ܡܬܩܝ̇ܡܐ܀

ܟܠܗܘܢ ܐܝܠܝܢ ܕܗܫܐ ܓܘ̈ܫܡܐ ܪ̈ܘܚܢܐ ܩܢ̣ܝܢ܆ ܡܠܟܘܬܐ ܕܥܠܡ̈ܐ ܕܗ̣ܘܘ ܡ̇ܡܠܟܝܢ. ܐܝܠܝܢ ܕܝܢ ܕܒܦܓܪ̈ܐ ܦܠܘ̈ܚܐ ܘܐ ܣܩܘ̈ܒܠܝܐ ܟܕܝܢܝܢ܆ ܡܠܟܘܬܐ ܕܥܠܡ̈ܐ ܕܥܬܝܕܝܢ ܢ̇ܡܠܟܘܢ܀

ܗܘ ܕܐܝܬܘܗܝ ܕܠܐ ܡܨܥܝܘܬܐ. ܘܗ̣ܘ ܗܢܐ ܬܘܒ܆ ܒܝܕ ܡܨܥܝ̈ܐ ܒܟܠ ܐܝܬܘܗܝ܀

ܡܢܗܘܢ ܕܡܠܝ̈ܠܐ܆ ܬܐܘܪܝܐ ܘܦܘܠܚܢܐ ܕܪܘܚ ܩܢ̣ܝܢ. ܡܢܗܘܢ ܕܝܢ ܦܘܠܚܢܐ ܘܬܐܘܪܝܐ. ܡܢܗܘܢ ܕܝܢ ܥܘܘܟܐ ܘܕܝ̣ܢܐ܀

ܠܟܠ ܚܕܐ ܡܢ ܐܘ̈ܡܢܘܬܐ܆ ܒܗ̇ܘ ܕܥܠܝܗ̇ ܩ̇ܐܡ ܚ̇ܙܐ ܐܢܬ. ܝܕܥܬܐ ܕܝܢ ܕܗ̇ܘ ܕܐܝܬܘܗܝ܆ ܒܟܠܗܘܢ ܗܠܝܢ ܬܫܟܚ. ܐܢܗ̣ܘ ܕܟܠܡܕܡ ܡܪܢ ܒܚܟܡܬܐ ܥܒ̣ܕ܀

ܟܕ ܢܫ̣ܬܩܠܘܢ ܐܪܒܥܐ܆ ܡܫܬ̣ܩܠܝܢ ܐܦ ܚܡܫܐ. ܟܕ ܕܝܢ ܢܫ̣ܬܩܠܘܢ ܚܡܫܐ܆ ܠܐ ܡܫ̣ܬܩܠܝܢ ܥܡܗܘܢ ܐܪܒܥܐ܀

ܗ̇ܘ ܕܐܬܦܪ̣ܫ ܡܢ ܚܡܫܐ܆ ܠܐ ܦܪܝܫ ܡܢ ܐܪܒܥܐ. ܗ̇ܘ ܕܝܢ ܕܐܬܦ̣ܪܫ ܡܢ ܐܪܒܥܐ܆ ܐܓܗܝ ܠܗ ܐܦ ܡܢ ܚܡܫܐ܀

ܟܕ ܢܬܚ̇ܠܦ ܗ̇ܘ ܕܒܢ܆ ܢܬܚ̇ܠܦܘܢ ܗ̇ܢܘܢ ܕܒܗܘܢ ܚܢܢ. ܘܗܢܐ ܣܓܝܐܝܬ ܥܕܡܐ ܕܗ̇ܘ ܕܐܝܬܘܗܝ܆ ܠܐ ܬܘܒ ܒܦܘܪ̈ܣܐ ܢܫܬܡܗ܀

ܥܒ̣ܪܐ ܕܦܘܠܚܢܐ ܘܕܫܘܢܩܐ ܝܪܬܘܬܐ ܕܩܕܝ̈ܫܐ. ܗ̇ܘ ܕܝܢ ܕܣܩܘܒܐܝ ܠܩܕܡܝܐ܆ ܥܠ̣ܬܐ ܗܘ ܕܬܪܝܢܐ. ܘܥ̣ܒܪܗ ܕܗܢܐ܆ ܝܪܬܘܬܐ ܕܐܝܠܝܢ ܕܕܠܩܘܒܠܐ ܐܝܬܝܗܘܢ܀

ܝܕܥܬܐ ܕܒܐܪܒܥܐ܆ ܝܕܥܬܐ ܗܝ ܕܣܘ̈ܟܠܐ ܕܒ̣ܪ̈ܝܬܐ. ܝܕܥܬܐ ܕܝܢ ܕܚܕ܆ ܝܕܥܬܐ ܗܝ ܕܗ̇ܘ ܕܒܠܚܘܕܘܗܝ ܐܝܬܘܗܝ܀

ܡܐ ܕܣܘ̈ܟܠܐ ܒܠܚܘܕ ܕܟܠܗܘܢ ܐܝܠܝܢ ܕܒܓܕܫܐ ܗ̣ܘܘ ܢܫܬܚܪܘܢ ܒܢ܆ ܗܝܕܝܢ ܒܠܚܘܕ ܗ̇ܘ ܕܡܬܝܕܥ܆ ܡܢ ܗ̇ܘ ܕܝܕ̇ܥ ܒܠܚܘܕܘܗܝ ܢܬܝܕܥ܀

ܛܒ̈ܬܐ ܘܒܝ̈ܫܬܐ ܐܝܠܝܢ ܕܕܠܐ ܚܫܚܬܐ ܡܣ̣ܬܒܪ̈ܢ܆ ܡܢܗܝܢ ܒܓܘ ܢܦܫܐ ܘܡܢܗܝܢ ܠܒܪ ܡܢܗ̇ ܢܫܬܟܚ̈ܢ. ܐܝܠܝܢ ܕܝܢ ܕܟܝܢܐܝܬ ܡܬܐܡܪ̈ܢ ܕܐܝܬܝܗܝܢ ܒܝ̈ܫܬܐ܆ ܕܢܗܘܝ̈ܢ ܠܒܪ ܡܢܗ̇ ܠܐ ܡܫܟܚܐ܀

ܓܘ̈ܫܡܐ ܕܕܝ̈ܘܐ܆ ܓܘܢܐ ܩ̣ܢܝ̈ܢ ܘܐܣܟܡܐ. ܐܠܐ ܡܢ ܡܪܓܫܢܘܬܢ ܕܝܠܢ

ܥ̇ܪܩܝܢ܆ ܒܗ̇ܝ ܕܠܐ ܕܡ̇ܐ ܗ̇ܘ ܡܘܙܓܐ܇ ܠܡܘܙܓܐ ܕܦܓܪ̈ܐ ܕܢ̇ܦܠܝܢ ܬܚܝܬ ܡܪ̈ܓܫܢܘܬܢ. ܡܐ ܓܝܪ ܕܠܐܢܫܝ̈ܢ ܨܒ̈ܝܢ ܠܡܬܚܙܝܘ܆ ܠܟܠܗ̇ ܕܡܘ̣ܬܐ ܕܦܓܪܢ ܡܫܬܚܠܦܝܢ. ܟܕ ܠܐ ܡܚܘܝ̈ܢ ܠܢ ܓܘ̈ܫܡܝܗܘܢ܀

ܣܘ̈ܟܠܐ ܕܐܝܠܝܢ ܕܒܐܪܥܐ܆ ܛܒ̈ܬܐ ܕܐܪܥܐ ܐܝܬܝܗܘܢ. ܐܢ ܕܝܢ ܠܗܠܝܢ ܝ̇ܕܥܝܢ ܡܠܐܟ̈ܐ ܩܕܝ̈ܫܐ: ܐܝܟ ܡܠܬܗ̇ ܕܬܩܘܥܝܬܐ܆ ܡܠܐܟ̈ܐ ܕܐܠܗܐ ܛܒ̈ܬܐ ܕܐܪܥܐ ܐܟ̇ܠܝܢ. ܐܡܝܪ ܕܝܢ ܕܠ̣ܚܡܐ ܕܡܠܐܟ̈ܐ ܐܟ̣ܠ ܒܪ ܐܢܫܐ. ܡܕܝܢ ܝܕܝܥܐ ܗܝ ܕܣܘ̈ܟܠܐ ܕܗ̇ܘ ܕܒܐܪܥܐ܆ ܐܦ ܡܢܗܘܢ ܕܒܢܝ̈ܢܫܐ ܝ̣ܕܥܘ܀

ܐܢܗ̣ܘ ܕܫܢܢܐ ܒܚܝܠܐ ܐܝܬܘܗܝ ܒܦܪܕܬܐ܆ ܐܦ ܫܘܠܡܐ ܒܚܝܠܐ ܐܝܬܘܗܝ ܒܡܩܒܠܢܐ. ܐܢ ܕܝܢ ܗܕܐ ܗܟܢܐ ܗܝ܆ ܠܘ ܗ̣ܝ ܟܕ ܗ̣ܝ ܐܝܬܝܗ̇ ܦܪܕܬܐ ܘܗ̇ܘ ܡܕܡ ܕܒܗ̇. ܘܠܐ ܫܢܢܐ ܘܗ̇ܘ ܡܕܡ ܕܒܦܪܕܬܐ. ܗ̣ܝ ܕܝܢ ܟܕ ܗ̣ܝ ܐܝܬܝܗ̇ ܦܪܕܬܐ ܕܗܢܐ ܡܕܡ ܕܐܚܝܕ ܡܢ ܫܢܢܐ ܘܫܢܢܐ ܕܝܠܗ̇ ܕܗܕܐ ܦܪܕܬܐ. ܐܦܢ ܓܝܪ ܦܪܕܬܐ ܬܗܘܐ ܫܢܢܐ܆ ܠܐ ܥܕܟܝܠ ܦܪܕܬܐ ܕܗ̇ܘ ܕܐܝܬܘܗܝ ܒܫܢܢܐ ܫܢܢܐ ܩ̇ܒܠ̇ܬ. ܟܕ ܕܝܢ ܢܓܗܐ ܡܢ ܫܢܢܐ ܘܡܢ ܦܪܕܬܐ܆ ܢܩܢܐ ܫܢܢܐ ܕܗ̇ܝ ܦܪܕܬܐ ܩܕܡܝܬܐ܀

ܐܝܠܝܢ ܕܒܢܣܝ̈ܘܢܐ ܨܒ̇ܝܢ ܠܡܥܪܒܠܘܬܢ܇ ܐܘ ܡܢ̇ܬܐ ܣܟܘܠܬܢܝܬܐ ܕܢܦܫܐ ܫ̇ܐܠܝܢ܆ ܐܘ ܡ̇ܢܬܐ ܚܫܘܫܬܐ ܕܒܗ̇ ܡܬܚܪܝܢ ܠܡܣܒ. ܐܘ ܠܦܓܪܐ܆ ܐܘ ܠܚܕܪ̈ܝ ܦܓܪܐ܀

ܐܢܗ̣ܘ ܕܡ̇ܢܬܐ ܡܢ ܥܠܡܐ ܗܢܐ ܐܝܬܘܗܝ ܦܓܪܐ ܐܢܫܝܐ: ܥ̇ܒܪ ܠܗ ܕܝܢ ܐܣܟܡܗ ܕܥܠܡܐ ܗܢܐ܆ ܝܕܝܥܐ ܗܝ ܕܐܦ ܐܣܟܡܗ ܕܦܓܪܐ ܢ̣ܥܒܪ܀

ܚܡܫ ܐܢܝܢ ܬܐܘ̈ܪܝܣ ܪ̈ܫܝܬܐ܇ ܕܬܚܘܬܝܗܝܢ ܡܬܬܣܝܡܐ ܟܠ ܬܐܘܪܝܐ. ܘܩܕܡܝܬܐ ܐܡ̇ܪܝܢ ܕܐܝܬܝܗ̇܆ ܬܐܘܪܝܐ ܕܬܠܝܬܝܘܬܐ ܣܓܝܕܬܐ ܘܩܕܝܫܬܐ. ܕܬܪ̈ܬܝܢ ܕܝܢ ܘܕܬܠܬ܆ ܬܐܘܪܝܐ ܕܐܝܠܝܢ ܕܕܠܐ ܓܫܘܡ ܐܢܘܢ ܘܕܝܠܗܘܢ ܕܓܘ̈ܫܡܐ. ܕܐܪܒܥ ܕܝܢ ܘܕܚܡܫ܆ ܬܐܘܪܝܐ ܕܕܝ̣ܢܐ ܘܕܒܛܝܠܘܬܐ܀

ܒܣܘܓܐܐ ܕܐܘܪ̈ܚܬܐ܆ ܬܠܬ ܐܢܝܢ ܐܘܪ̈ܚܬܐ ܕܦܘܪܩܢܐ܇ ܐܝܠܝܢ ܕܓܘܢܐܝܬ ܩ̣ܢܝ̈ܢ ܠܡܥܛܐ ܚ̈ܛܗܐ. ܝܚܝܕܐܝܬ ܕܝܢ ܬܪ̈ܬܝܢ ܡܢܗܝܢ ܩ̣ܢܝ̈ܢ ܗܕܐ ܕܡܢ ܚܫ̈ܐ ܢܚܪܪ̈ܢ. ܡܝܬܪܘܬܐ ܕܝܢ ܕܗ̇ܝ ܕܬܠܬ܆ ܕܥܠ̣ܬܐ ܐܦ ܕܬܫܒܘܚܬܐ ܬܗܘܐ.

ܠܘ̣ܝܐ ܕܝܢ ܠܩܕܡܝܬܐ ܬܫܒܘܚܬܐ. ܘܠܕܬܪ̈ܬܝܢ ܡܙܡܘܪܐ. ܘܠܗ̇ܝ ܕܬܠܬ ܪܘܡܪܡܐ܀

ܐܝܟܢܐ ܕܥܡ ܦܓܪ̈ܐ ܐܙ̇ܠܝܢ ܓܘ̈ܢܐ ܘܐܣ̈ܟܡܐ ܘܡܢܝ̈ܢܐ܆ ܗܟܢܐ ܥܡ ܐܪܒܥܐ ܐܣܛܘ̈ܟܣܐ܇ ܐܦ ܗܘܠܐ ܡܬܚ̇ܒܠܐ. ܥܡܗܘܢ ܓܝܪ ܩܢ̣ܝܐ ܗ̇ܝ ܕܠܝܬܝܗ̇ ܗܘܬ ܘܗ̇ܝ ܕܗ̣ܘܬ܀

ܒܠܚܘܕ ܢܘܪܐ ܡܢ ܐܪܒܥܐ ܐܣܛܘ̈ܟܣܐ ܦܪܝܫܐ ܡܢ ܡܕܡ ܕܒܗ̇ ܚ̇ܝ܀

ܐܝܟܢܐ ܕܒܒܢܝ̈ܢܫܐ ܐܝܣܪܝܠ: ܘܒܐܬܪ̈ܘܬܐ ܐܬܪܐ ܕܝܗܘܕ: ܘܒܡܕܝ̈ܢܬܐ ܐܘܪܫܠܡ: ܗܟܢܐ ܐܦ ܢܝܫܐ ܕܦ̈ܠܐܬܐ ܕܣܘ̈ܟܠܐ ܡܢ̇ܬܗ ܕܡܪܝܐ ܐܝܬܘܗܝ܀

ܒܢܝ̈ ܐܢܫܐ ܐܝܠܝܢ ܕܡܕܡ ܡܢ ܕܒܟܝ̈ܢܐ ܚܙ̣ܘ܆ ܚܙܬܗܘܢ ܫܚܝܡܬܐ ܒܠܚܘܕ ܐܣ̇ܬܟܠܘ. ܝܕܥܬܗܘܢ ܓܝܪ ܪܘܚܢܝܬܐ܆ ܙܕܝ̈ܩܐ ܒܠܚܘܕ ܩ̇ܒܠܘ. ܗ̇ܘ ܕܝܢ ܕܡܬܚܪܐ ܥܠ ܗܕܐ܆ ܕܡ̇ܐ ܠܗ̇ܘ ܕܐܡ̇ܪ ܕܥܢܝܢܐ ܗ̣ܘܐ ܠܝ ܥܡ ܐܒܪܗܡ܇ ܟܕ

ܪܕ̇ܐ ܒܐܘܪܚܐ ܥܡ ܬܪ̈ܬܝܢ ܢܫܘ̈ܗܝ. ܕܗ̣ܘ ܗܢܐ ܫܪܪܐ ܡ̇ܢ ܡܠܠ. ܠܬܪ̈ܬܝܢ ܕܝܢ ܕܝܬܩ̈ܣ ܠܐ ܚܙ̣ܐ. ܘܠܐܝܠܝܢ ܕܡܢܗܝܢ ܡܬܝܠܕܝܢ ܠܐ ܐܣ̇ܬܟܠ܀

ܐܝܟܢܐ ܕܟܠ ܚܕܐ ܡܢ ܐܘܡܢܘ̈ܬܐ: ܥܠ ܡܪܓܫܢܘܬܐ ܚܪܝܦܬܐ ܕܠܚ̇ܡܐ ܠܗܘܠܐ ܕܝܠܗ̇ ܣܢܝܩܐ܆ ܗܟܢܐ ܐܦ ܗܘܢܐ ܥܠ ܡܪܓܫܢܘܬܐ ܪܘܚܢܝܬܐ ܣܢܝܩ܇ ܕܗ̣ܘܐ ܦܪ̇ܫ ܪ̈ܘܚܢܝܬܐ܀

ܡܪܓܫܢܘܬܐ ܡܟ̣ܢܐ ܕܡܢ ܢܦܫܗ̇ ܗ̣ܘܬ ܪܓ̇ܫܐ ܒܡܬܪ̈ܓܫܢܝܬܐ. ܗܘܢܐ ܕܝܢ ܒܟܠܙܒܢ ܩ̇ܐܡ ܘܡܟ̇ܬܪ܆ ܕܐܝܕܐ ܬܐܘܪܝܐ ܪܘܚܢܝܬܐ܇ ܬܬܠ ܠܗ ܢܦܫܗ̇ ܠܚܙܬܐ܀

ܐܝܟܢܐ ܕܢܘܗܪܐ ܟܕ ܟܠܡܕܡ ܡܚܘܐ ܠܢ: ܠܐ ܣܢܝܩ ܥܠ ܢܘܗܪܐ ܕܒܗ ܢܬܚܙܐ܆ ܗܟܢܐ ܐܠܗܐ ܟܕ ܡܚܘ̇ܐ ܟܠܡܕܡ܇ ܠܐ ܣܢܝܩ ܥܠ ܢܘܗܪܐ ܕܒܗ ܢܬܝܕܥ܁ ܗ̣ܘ ܓܝܪ ܒܐܝܬܘܬܗ ܢܘܗܪܐ ܗܘ܀

ܗܝ̣ ܟܕ ܗ̣ܝ ܐܝܬܝܗ̇ ܡܪܓܫܢܘܬܐ ܐܦ ܪܓܫܐ܆ ܘܠܐ ܡܪܓܫܢܐ

ܘܡܬܪܓܫܢܐ. ܡܪܓܫܢܘܬܐ ܓܝܪ ܐܝܬܝܗ̇܆ ܚܝܠܐ ܕܒܗ ܡܥܕܝܢܢ ܡ̇ܪܓܫܝܢܢ ܒܗܘ̈ܠܣ. ܪܓܫܐ ܕܝܢ ܐܝܬܘܗܝ܆ ܗܕܡܐ ܕܒܗ ܫܪ̣ܝܐ ܡܪܓܫܢܘܬܐ. ܡܪܓܫܢܐ ܕܝܢ܆ ܚܝܘܬܐ ܕܩܢ̣ܝܐ ܠܗܝܢ ܠܡܪ̈ܓܫܢܘܬܐ. ܡܬܪܓܫܢܐ ܕܝܢ܆ ܗ̇ܘ ܡܕܡ ܕܢ̇ܦܠ ܬܚܝܬ ܡܪ̈ܓܫܢܘܬܐ. ܠܘ ܕܝܢ ܗܟܢܐ ܗܘ ܗܘܢܐ. ܡܢ ܚܕܐ ܓܝܪ ܡܢ ܐܪܒܥܬܝܗܝܢ ܓܠܝܙ ܗܘ܀

ܡܪܓܫܢܘܬܐ ܪܘܚܢܝܬܐ ܐܝܬܝܗ̇܆ ܠܐ ܚܫܘܫܘܬܐ ܕܢܦܫܐ ܡܠܝܠܬܐ܇ ܕܗ̣ܘܝܐ ܡܢ ܛܝܒܘܬܐ ܕܐܠܗܐ ܀

ܐܝܟܢܐ ܕܟܕ ܥ̇ܝܪܝܢܢ: ܡܕܡ ܡܕܡ ܥܠ ܫܢܬܐ ܡܡܠܠܝܢܢ: ܡܐ ܕܝܢ ܕܕܡܟ̣ܢܢ: ܒܢܣܝܢܐ ܝ̇ܠܦܝܢܢ܆ ܗܟܢܐ ܟܠܗܝܢ ܐܝܠܝܢ ܕܫܡܥܝܢܢ ܥܠ ܐܠܗܐ܇ ܟܕ ܠܒܪ ܡܢܗ ܐܝܬܝܢ̇܇ ܡܐ ܕܗ̣ܘܝܢ ܚܢܢ ܒܗ܇ ܒܢܣܝܢܐ ܬܚܘܝܬܗܝܢ ܡܩ̇ܒܠܝܢܢ܀

ܟܕ ܡܢ ܒܪܫܝܬ ܗ̣ܘܝܢ܆ ܙܪ̈ܥܐ ܕܡܝܬܪܘܬܐ ܐܬܬܟܝܢܘ ܒܢ. ܕܒܝܫܘܬܐ ܕܝܢ

ܠܐ. ܠܐ ܗܘܐ ܓܝܪ ܕܗ̇ܘ ܡܕܡ ܕܡܩܒ̈ܠܢܐ ܚܢܢ܇ ܐܦ ܚܝܠܗ ܦܢܛܘܣ ܐܝܬ ܒܢ. ܡܛܠ ܕܟܕ ܡܫܟܚܝܢܢ ܕܠܐ ܢܗܘܐ ܐܝܬܝܢ܆ ܚܝܠܐ ܕܗ̇ܘ ܕܠܝܬܘܗܝ ܠܝܬ ܒܢ. ܐܢܗ̣ܘ ܕܚܝ̈ܠܐ ܡܘ̈ܙܓܐ ܐܢܘܢ. ܗ̇ܘ ܕܝܢ ܡܕܡ ܕܠܐ ܐܝܬܘܗܝ ܠܝܬܘܗܝ ܡܘܙܓܐ܀

ܐܝܬ ܐܡܬܝ ܕܠܐ ܐܝܬܝܗ̇ ܗܘܬ ܒܝܫܘܬܐ. ܘܢܗܘܐ ܐܡܬܝ ܕܐܦܠܐ ܐܝܬܝܗ̇. ܠܐ ܕܝܢ ܐܝܬ ܐܡܬܝ ܕܠܐ ܐܝܬܝܗ̇ ܗܘܬ ܡܝܬܪܘܬܐ܆ ܘܠܐ ܢܗܘܐ ܐܡܬܝ ܕܠܐ ܐܝܬܝܗ̇. ܠܐ ܡܬܛܠܩ̈ܢܐ ܐܢܘܢ ܓܝܪ ܙܪ̈ܥܐ ܕܡܝܬܪܘܬܐ. ܘܡܦܝܣ ܠܝ ܐܦ ܗ̇ܘ ܥܬܝܪܐ ܕܒܫܝܘܠ ܡܬܕܝܢ ܗܘܐ ܡܛܠ ܒܝܫܘܬܗ܆ ܘܥܠ ܐܚܘ̈ܗܝ ܡܪܚ̇ܡ ܗܘܐ. ܠܡܪ̇ܚܡܘ ܕܝܢ ܙܪܥܐ ܗܘ ܫܦܝܪܐ ܕܡܝܬܪܘܬܐ܀

ܐܢܗ̣ܘ ܕܡ̇ܘܬܐ ܬܪܝܢܐ ܗܘ ܕܚܝ̈ܐ: ܘܟܘܪܗܢܐ ܬܪܝܢܐ ܗܘ ܕܚܘܠܡܢܐ܆ ܝܕܝܥܐ ܗܝ ܕܐܦ ܒܝܫܘܬܐ ܬܪܝܢܝܬܐ ܗܝ ܕܡܝܬܪܘܬܐ. ܡܘܬܐ ܓܝܪ ܘܟܘܪܗܢܐ ܕܢܦܫܐ ܒܝܫܘܬܐ ܗܝ. ܡܝܬܪܘܬܐ ܕܝܢ ܐܦ ܡܢܗ̇ ܕܡܨܥܝܘܬܐ ܩܫܝܫܐ܀

ܬܡܢ ܡܬܐܡܪ ܕܐܝܬܘܗܝ ܐܠܗܐ܆ ܐܝܟܐ ܕܡ̇ܥܒܕ. ܘܐܝܟܐ ܕܝܬܝܪܐܝܬ ܡ̇ܥܒܕ܆ ܬܡܢ ܝܬܝܪܐܝܬ ܩ̇ܪܝܒ. ܡ̇ܥܒܕ ܕܝܢ ܝܬܝܪܐܝܬ܆ ܒܟܝ̈ܢܐ ܡܠܝ̈ܠܐ ܘܩܕܝ̈ܫܐ. ܒܚܝ̈ܠܐ ܗܟܝܠ ܫܡܝ̈ܢܐ܆ ܬܘܒ ܝܬܝܪܐܝܬ ܩ̇ܪܝܒ܀

ܐܠܗܐ ܒܟܠ ܕܘܟ ܐܝܬܘܗܝ܆ ܘܠܘ ܒܕܘܟ ܐܝܬܘܗܝ. ܒܟܠܕܘܟ ܐܝܬܘܗܝ܆ ܕܒܟܠ ܕܗ̣ܘܐ ܐܝܬܘܗܝ ܒܝܕ ܚܟܡܬܗ ܡܠ̣ܝܬ ܦܘܪ̈ܫܢܐ. ܠܘ ܕܝܢ ܒܕܘܟ ܐܝܬܘܗܝ܆ ܡܛܠ ܕܠܘ ܡܢ ܗܘܝ̈ܐ ܐܝܬܘܗܝ܀

ܐܢܗ̣ܘ ܕܡܠܟܘܬܐ ܕܫܡܝ̈ܐ: ܒܡܕܡ ܕܡܣ̇ܬܝܟ ܘܒܡܕܡ ܕܡܣܝ̇ܟ ܡܬܝܕܥܐ܆ ܐܦ ܫܘܢܩܐ ܒܕܠܩܘܒܠܐ ܕܗܠܝܢ ܢܬܝܕܥ܀

ܠܝܬ ܡܕܡ ܡܢ ܠܐ ܡܓܫܡ̈ܐ܇ ܕܒܚܝܠܐ ܐܝܬܘܗܝ ܒܓܘ̈ܫܡܐ. ܕܠܐ ܓܫܘܡ ܓܝܪ ܐܝܬܝܗ̇ ܢܦܫܢ܀

ܟܠܡܕܡ ܕܒܚܝܠܐ ܐܝܬ ܒܦܓܪ̈ܐ܆ ܘܒܡܥܒܕܢܘܬܐ ܡܟܢ ܒܗܘܢ. ܒܢܝ̈ ܟܝܢܐ ܐܢܘܢ ܕܐܝܠܝܢ ܕܡܢܗܘܢ ܗ̣ܘܘ. ܡܢ ܚܙܬܐ ܕܝܢ ܘܡܢ ܗܘܠܐ ܡܚܪܪ ܗܘ ܗܘܢܐ܀

ܠܝܬ ܡܕܡ ܕܒܚܝܠܐ ܐܝܬܘܗܝ ܒܢܦܫܐ܆ ܘܡܫܟܚܐ ܕܢܦܘܩ ܡܢܗ̇ ܒܡܥܒܕܢܘܬܐ܇ ܘܝܚܝܕܐܝܬ ܢܩܘܡ. ܗܕܐ ܓܝܪ ܒܦܓܪ̈ܐ ܡܟ̣ܢܐ ܕܬܗܘܐ܀

ܟܠܡܕܡ ܕܠܦܓܪ̈ܐ ܢܩܝܦ܆ ܐܦ ܠܐܝܠܝܢ ܕܡܢܗܘܢ ܡܬܝܠܕܝܢ ܠܘ̣ܐ. ܘܠܐ ܡܕܡ ܕܝܢ ܡܢ ܗܠܝܢ ܢܩܝܦ ܠܢܦܫܐ܀

ܝܚܝܕܝܘܬܐ܆ ܗ̣ܝ ܡ̇ܢ ܝܚܝܕܐܝܬ ܠܐ ܡܬܙܝܥܐ. ܡܬܙܝܥܐ ܕܝܢ ܒܡܩܒܠܢܘܬܗ ܕܗܘܢܐ: ܗ̇ܘ ܕܒܡܗܡܝܢܘܬܗ ܡ̇ܗܦܟ ܐܦܘ̈ܗܝ ܡܢܗ̇܆ ܘܒܝܕ ܓܠܝܙܘܬܐ ܕܡܢܗ̇܇ ܡ̇ܘܠܕ ܠܠܐ ܝܕܥܬܐ܀

ܟܠܡܕܡ ܕܗ̣ܘܐ܆ ܡܛܠ ܝܕܥܬܐ ܕܐܠܗܐ ܗ̣ܘܐ. ܐܠܐ ܡܢܗܘܢ .ܕܗܘܝ̈ܐ ܩܕܡܝܝܢ܆ ܘܡܢܗܘܢ ܬܪ̈ܝܢܝܢ. ܘܡܢ ܗܘܝ̈ܐ ܩܕܡܝ̈ܐ܆ ܩܫܝܫܐ ܝܕܥܬܐ. ܘܡܢ ܗܘܝ̈ܐ ܬܪ̈ܝܢܐ ܡܬܙܝܥܢܘܬܐ܀

ܡܬܙܝܥܢܘܬܐ ܥܠ̣ܬܐ ܗܝ ܕܒܝܫܘܬܐ. ܡܛܠܩܢܝܬܐ ܕܝܢ ܕܒܝܫܘܬܐ

ܡܝܬܪܘܬܐ. ܡܝܬܪܘܬܐ ܕܝܢ ܒܪܬܐ ܗܝ ܕܫ̈ܡܗܐ ܘܦܘܪ̈ܣܐ. ܥܠ̣ܬܐ ܕܝܢ ܕܗܠܝܢ ܡܬܙܝܥܢܘܬܐ ܗܝ܀

ܡܐ ܕܝܕܥܬܐ ܕܐܝܠܝܢ ܕܩܕܡܝܝܢ ܒܪܫܢܘܬܗܘܢ ܘܕܬܪ̈ܝܢܝܢ ܒܗܘܝܗܘܢ ܒܪ̈ܫܢܐ ܬܗܘܐ܆ ܗܝܕܝܢ ܒܠܚܘܕܝܗܘܢ ܐܝܠܝܢ ܕܩܕܡܝܝܢ ܒܪܫܢܘܬܗܘܢ܇ ܝܕܥܬܐ ܕܬܠܝܬܝܘܬܐ ܢܩ̇ܒܠܘܢ܀

ܫܐܕ̈ܐ ܐܝܠܝܢ ܕܥܡ ܗܘܢܐ ܡܬܟ̇ܬܫܝܢ܆ ܡܬܩܪܝܢ ܦܪ̈ܚܬܐ. ܚܝܘ̈ܬܐ ܕܝܢ܆ ܐܝܠܝܢ ܕܠܚ̣ܡܬܐ ܡܕ̇ܠܚܝܢ. ܒܥܝܪ̈ܐ ܕܝܢ܆ ܐܝܠܝܢ ܕܠܪܓܬܐ ܡ̇ܕܝܠܝܢ܀

ܕܠܐ ܥܒ̣ܪܐ ܡ̇ܢ ܐܝܬܘܗܝ܆ ܡܘܠܝܐ ܕܐܝܠܝܢ ܕܩܕܡܝܝܢ ܒܪܫܢܘܬܗܘܢ. ܒܥܒ̣ܪܐ ܕܝܢ ܡܣܝܟ ܣܘܪܩܐ. ܗܘܝ̈ܐ ܕܝܢ ܬܪ̈ܝܢܐ ܡ̈ܬܡܬܚܝܢ ܥܡ ܣܘܪܩܐ. ܢ̇ܝܚܝܢ ܕܝܢ܆ ܟܕ ܡܘܠܝܐ ܠܘܬ ܝܕܥܬܐ ܕܠܐ ܗܘܠܐ ܢܩ̇ܪܒ ܠܡܩ̈ܒܠܢܘܗܝ܀

ܒܠܚܘܕ ܐܝܠܝܢ ܕܩܕܡܝܝܢ ܒܗܘܝܗܘܢ܆ ܡܚܪܪܝܢ ܡܢ ܚ̇ܒܠܐ ܕܒܡܥܒܕܢܘܬܐ. ܠܝܬ ܕܝܢ ܡܕܡ ܡܢ ܗܘܝ̈ܐ ܡܢ ܗ̇ܝ ܕܒܚܝܠܐ܀

ܛܒ̈ܐ ܥܠ̣ܬܐ ܗ̇ܘܝܢ ܕܝܕܥܬܐ ܘܕܫܘܢܩܐ܆ ܒܝ̈ܫܐ ܕܝܢ ܕܫܘܢܩܐ ܒܠܚܘܕ܀

ܒܢܝ̈ܢܫܐ ܡܢ ܫܝܘܠ ܕܚ̇ܠܝܢ. ܫܐܕ̈ܐ ܕܝܢ ܡܢ ܬܗܘܡܐ. ܐܝܬ ܕܝܢ ܕܒܝܫܝ̈ܢ ܡܢ ܗܠܝܢ܆ ܚܘܘ̈ܬܐ ܕܠܗܘܢ ܠܝܬ ܠܡܐ܀

ܠܚܕ ܡܢ ܡܘ̈ܬܐ ܡ̇ܢ ܥ̣ܠܬܐ ܩܕܡܝܬܐ ܐܝܬ ܠܗ ܝܠܝܕܘܬܐ. ܐܚܪܢܐ ܕܝܢ ܐܬ̇ܐ ܡܢ ܩܕܝ̈ܫܐ܆ ܥܠ ܐܝܠܝܢ ܕܠܘ ܒܙܕܩܐ ܗܦ̇ܟܝܢ. ܐܡܐ ܕܝܢ ܕܗ̇ܘ ܕܬܠܬܐ ܡܫܬܒܩܢܘܬܐ ܗ̇ܘܝܐ. ܐܢ ܕܝܢ ܡܝܘܬܐ ܐܝܬܘܗܝ: ܗ̇ܘ ܕܡ̇ܟܢ ܠܡܫ̣ܬܪܝܘ ܡܢ ܦܓܪܐ ܕܟܕܝܢ ܥܡܗ܆ ܡ̇ܢ ܐܝܬܘܗܝ ܠܐ ܡܝܘܬܐ ܗ̇ܘ ܕܗܕܐ ܠܐ ܡܟܢ ܕܬܓܕܫ ܠܗ. ܟܠ ܓܝܪ ܕܐܬܟܕܢܘ ܥܡ ܦܓܪ̈ܐ܆ ܐܠܨܐܝܬ ܐܦ ܡܫ̣ܬܪܝܢ܀

ܐܝܟܢܐ ܕܢܘܗܪܐ ܘܚܫܘܟܐ ܓܕܫ̈ܐ ܐܢܘܢ ܕܐܐܪ܆ ܗܟܢܐ ܠܢܦܫܐ ܡܠܝܠܬܐ ܡܝܬܪܘܬܐ ܘܒܝܫܘܬܐ܇ ܘܝܕܥܬܐ ܘܠܐ ܝܕܥܬܐ ܡܬܚܝ̇ܕ̈ܢ܀

ܐܢܗ̣ܘ ܕܝܘܡܢ ܡܩ̇ܒܠܝܢ ܠܗ ܠܪܒܝܬܐ ܚܟܝܡܐ ܒܒ̈ܬܝܗܘܢ܆ ܝܕܝܥܐ ܗܝ ܕܐܬܡܠܝ ܝ̣ܬܒܘ ܘܚܠܦ̣ܘ ܫܛܪ̈ܝܗܘܢ. ܒܪܡ ܕܝܢ ܚܟܝܡܐ ܐܬܩܪܝ܆ ܕܗ̇ܘ ܡܐ ܕܝܬܝܪܐܝܬ ܡܩܒܠܢܗ ܗ̣ܘܐ܆ ܝܬܝܪܐܝܬ ܫ̣ܒܩ܀

ܠܝܬ ܡܢ ܗܘܝ̈ܐ ܬܪ̈ܝܢܐ܇ ܕܡܩܒܠܢܐ ܗܘ ܕܝܕܥܬܐ. ܘܠܐ ܡܢ ܗܘܝ̈ܐ ܩܕܡܝ̈ܐ܇ ܕܩܕܡܝܬ ܒܕܘܟܬܐ ܗ̣ܘܐ܀

ܝܕܥܬܐ ܒܕܘܟܬܐ ܡܬܐܡܪܐ ܕܐܝܬܝܗ̇܆ ܐܡܬܝ ܕܡܩܒܠܢܗ̇ ܢܬܥܪܙܠ ܒܡܕܡ ܡܢ ܗܘܝ̈ܐ ܬܪ̈ܝܢܐ. ܗ̇ܘ ܕܫܪܝܪܐܝܬ ܘܪܫܐܝܬ ܒܕܘܟܬܐ ܡܬܐܡܪ ܕܐܝܬܘܗܝ܀

ܕܢܗܘܘܢ ܐܝܬܝܗܘܢ ܡܠܝ̈ܠܐ ܒܟܠܙܒܢ: ܐܘ ܕܠܐ ܢܗܘܘܢ ܐܝܬܝܗܘܢ܆ ܗܕܐ ܕܨܒܝܢܐ ܐܝܬܝܗ̇ ܕܒܪܘܝܐ. ܕܢܗܘܘܢ ܕܝܢ ܠܐ ܡܝܘ̈ܬܐ ܐܘ ܡܝܘ̈ܬܐ܆ ܠܨܒܝܢܗܘܢ ܠܘ̣ܝܐ܇ ܘܕܢܬ̣ܟܕܢܘܢ ܘܕܠܐ ܢܬ̣ܟܕܢܘܢ ܒܕܐܝܟ ܗܢܐ ܐܘ ܒܕܐܝܟ ܗܢܐ܀

ܚܝ̈ܐ ܫܪܝܪ̈ܐ ܕܡܠܝ̈ܠܐ܆ ܡܥܒܕܢܘܬܗܘܢ ܟܝܢܝܬܐ. ܡܘܬܗܘܢ ܕܝܢ ܡܥܒܕܢܘܬܗܘܢ ܕܠܒܪ ܡܢ ܟܝܢܐ. ܐܢ ܕܝܢ ܡܝܘܬܐ ܐܝܬܘܗܝ ܒܕܐܝܟ ܗܢܐ ܡܘܬܐ: ܗ̇ܘ ܕܡܟܢ ܠܡܫܕܐ ܚܝ̈ܐ ܫܪܝܪ̈ܐ܆ ܐܝܢܐ ܡܢ ܗܘܝ̈ܐ ܐܝܬܘܗܝ ܠܐ ܡܝܘܬܐ. ܟܠ ܓܝܪ ܟܝܢܐ ܡܠܝܠܐ܆ ܡܩܒܠܢܐ ܗܘ ܕܣܩܘܒܠܝܘܬܐ܀

ܒܝܕܥܬܐ ܕܐܝܠܝܢ ܕܬܪ̈ܝܢܝܢ ܒܗܘܝܗܘܢ܆ ܥܠܡ̈ܐ ܡܫ̈ܚܠܦܐ ܡܬܩܝ̇ܡܝܢ. ܘܩܪ̈ܒܐ ܠܐ ܡܬܡ̈ܠܠܢܐ ܬܟ̇ܒܝܢ. ܒܝܚܝܕܝܘܬܐ ܕܝܢ ܡܕܡ ܡܢ ܗܠܝܢ ܠܐ ܓܕ̇ܫ. ܫܝܢܐ ܕܝܢ ܠܐ ܡܬܡܠܠܢܐ. ܘܗܘ̈ܢܐ ܒܠܚܘܕ ܥܪ̈ܛܠܝܐ܇ ܕܒܟܠܙܒܢ ܡܣܬܒܥܝܢ

ܡܢ ܠܐ ܡܣܬܒܥܢܘܬܗ. ܐܢܗ̣ܘ ܕܐܝܟ ܡܠܬܗ ܕܦܪܘܩܢ܆ ܐܒܐ ܠܐܢܫ ܠܐ ܕܐ̇ܢ. ܟܠܗ ܕܝܢ ܕܝ̣ܢܐ ܝ̣ܗܒܗ ܠܡܫܝܚܐ܀

ܡܝܬܪ̈ܬܐ ܩܕܡܝܢ ܡܬܐܡܪ̈ܢ ܕܐܝܬܝܗܝܢ܆ ܒܓܒܐ ܗ̇ܘ ܕܒܗ ܩܢ̣ܝܢܢ ܡܪ̈ܓܫܢܘܬܐ. ܒܣܬܪܢ ܕܝܢ ܒܝ̈ܫܬܐ܆ ܒܓܒܐ ܗ̇ܘ ܕܒܗ ܡܪ̈ܓܫܢܘܬܐ ܠܐ ܩܢ̣ܝܢܢ. ܠܡܥܪܩ ܓܝܪ ܡܢ ܙܢܝܘܬܐ ܡܬܦܩܕܝܢܢ܆ ܘܠܡܪܕܦ ܒܬܪ ܪܚܡܬ ܐܟܣ̈ܢܝܐ܀

ܡ̇ܢ ܝ̇ܕܥ ܩܘܝܡܗ ܕܥܠܡܐ ܘܡܥܒܕܢܘܬܐ ܕܐܣ̈ܛܘܟܣܐ. ܘܡܢ̣ ܢܣ̇ܬܟܠ ܪܘܟܒܐ ܕܐܪܓܘܢ ܗܢܐ ܕܢܦܫܢ. ܘܐ ܡܢ̣ܘ ܢܥ̇ܩܒ ܐܝܟܢܐ ܗܢܐ ܥܡ ܗܢܐ ܐܬܟܕܢ. ܘܡ̇ܢܘ ܐܘܚܕܢܗܘܢ ܘܫܘܬܦܘܬܗܘܢ ܕܠܘܬ ܚܕܕ̈ܐ܆ ܕܡܪܟܒܬܐ ܦܠܘܚܬܐ ܢܗܘܐ ܠܢܦܫܐ ܡܠܝܠܬܐ ܕܚܦܝܛܐ ܕܬܬܡ̇ܢܥ ܠܘܬ ܝܕܥܬܐ ܕܐܠܗܐ܀

ܝܬܝܪܘܬܐ ܕܗܘܢܐ ܘܕܢܘܪܐ ܒܡܠܐܟ̈ܐ ܐܝܬ. ܒܒܢܝ̈ܢܫܐ ܕܝܢ܆ ܕܪܓܬܐ ܘܕܐܪܥܐ. ܒܫܐܕ̈ܐ ܕܝܢ܆ ܕܚ̣ܡܬܐ ܘܕܐܐܪ. ܘܬܠܝܬܝ̈ܐ ܠܘܬ ܡܨܥܝ̈ܐ ܒܝܕ ܢܚܝܪ̈ܐ ܡܬܩ̇ܪܒܝܢ ܐܝܟ ܕܐܡ̇ܪܝܢ܆ ܩ̇ܕܡܝ̈ܐ ܕܝܢ ܠܘܬ ܬܪ̈ܝܢܐ ܒܝܕ ܦܘܡܐ܀

ܠܗ̇ܘ ܕܪܫܝ ܒܝܕܥܬܐ܆ ܐܝܬ ܠܗ ܗ̇ܘ ܕܒܬܪܗ. ܠܗ̇ܘ ܕܝܢ ܕܪܫܝ ܒܠܐ ܝܕܥܬܐ܆ ܠܝܬ ܠܗ܀

ܥܡ ܐܠܗܐ ܡܬܐܡܪ ܕܐܝܬܘܗܝ ܩܕܡܝܐ܆ ܐܝܢܐ ܕܝ̇ܕܥ ܠܬܠܝܬܝܘܬܐ ܩܕܝܫܬܐ. ܘܒܬܪܗ ܗ̇ܘ ܕܣܘ̈ܟܠܐ ܕܡ̈ܬܝܕܥܢܐ ܚܙ̇ܐ. ܬܠܝܬܝܐ ܬܘܒ܆ ܐܝܢܐ ܕܠܗܘܢ ܠܠܐ ܡܓܫܡ̈ܐ ܚܙ̇ܐ. ܘܕܐܪܒܥܐ ܐܝܢܐ ܕܬܐܘܪܝܐ ܕܥܠܡ̈ܐ ܝܕ̇ܥ. ܐܝܢܐ ܕܝܢ ܕܩܢ̣ܐ ܠܐ ܚܫܘܫܘܬܐ ܕܢܦܫܐ܆ ܚܡܝܫܝܐ ܕܗܠܝܢ ܒܘܠܝܬܐ ܢܬܚܫ̣ܒ܀

ܫܘܠܡܐ ܕܝܕܥܬܐ ܟܝܢܝܬܐ܆ ܝܚܝܕܝܘܬܐ ܩܕܝܫܬܐ. ܫܘܠܡܐ ܕܝܢ ܠܠܐ ܝܕܥܬܐ ܠܝܬ܆ ܐܝܟ ܕܐܡ̇ܪܝܢ. ܠܝܬ ܓܝܪ ܣܟܐ ܠܪܒܘܬܗ܀

ܠܗܢܐ ܚܐ̇ܢ ܡܪܝܐ܆ ܠܐܝܢܐ ܕܝܕܥܬܐ ܕܪܘܚ ܝܗ̇ܒ ܠܗ. ܐܢܗ̣ܘ ܕܙܕܝܩܐ ܒܢܘܗܪܐ ܡܗ̇ܠܟ܆ ܣܟܠܐ ܕܝܢ ܒܚܫܘܟܐ. ܚܐ̇ܢ ܗܘ ܕܝܢ ܡܪܝܐ ܐܦ ܠܣܟܠܐ܆ ܒܗ̇ܝ ܕܠܘ ܡܚܕܐ ܡܫܢ̇ܩ ܠܗ܆ ܐܘ ܒܗ̇ܝ ܕܡܢ ܒܝܫܘܬܐ ܠܘܬ ܡܝܬܪܘܬܐ ܡܚܦ̇ܛ ܠܗ܀

ܚܝ̈ܐ ܕܒܪ ܐܢܫܐ܆ ܝܕܥܬܐ ܩܕܝܫܬܐ ܐܝܬܝܗ̇. ܪ̈ܚܡܘܗܝ ܕܝܢ ܣܓܝ̈ܐܐ ܕܐܠܗܐ܆ ܬܐܘܪܝܐ ܕܗܘܝ̈ܐ ܐܝܬܝܗ̇. ܣܓܝ̈ܐܐ ܕܝܢ ܚܟܝ̈ܡܐ ܕܥܠܡܐ ܗܢܐ ܐܫܬܘܕܝܘ ܠܢ ܝܕܥܬܐ. ܐܠܐ ܛܒܝ̈ܢ ܐܢܘܢ ܪ̈ܚܡܘܗܝ ܕܡܪܝܐ ܡܢ ܚܝ̈ܐ܀

ܢܘܗܪܗ ܕܗܘܢܐ ܬܠܝܬܐܝܬ ܡܬܦ̣ܪܫ. ܗܢܘ ܕܝܢ ܠܝܕܥܬܐ ܕܬܠܝܬܝܘܬܐ ܣܓܝܕܬܐ ܘܩܕܝܫܬܐ܆ ܘܠܟܝܢܐ ܠܐ ܡܓܫܡܐ ܕܡܢܗ̇ ܐܬ̣ܒܪܝ܆ ܘܠܬܐܘܪܝܐ ܕܗܘܝ̈ܐ܀

ܐܢܗ̣ܘ ܕܟܠܝܠܐ ܕܟܐܢܘܬܐ ܝܕܥܬܐ ܗܘ ܩܕܝܫܬܐ܆ ܘܬܘܒ ܕܗܒܐ ܕܐܚܝܕ ܟܐܦ̈ܐ ܥܠ ܥܠܡ̈ܐ ܕܗ̣ܘܘ ܐܘ ܕܗ̇ܘܝܢ ܡ̇ܘܕܥ܆ ܬܐܘܪܝܐ ܡܕܝܢ ܕܟܝܢܐ ܡܓܫܡܐ ܘܠܐ ܡܓܫܡܐ ܐܝܬܘܗܝ ܟܠܝܠܐ܇ ܕܡܢ ܕܝܢ̇ܐ ܟܐܢܐ ܒܪܫܐ ܕܐܓܘܢܣ̈ܛܐ ܡܬܬܣܝܡ܀

ܠܘ ܠܝܕܥܬܐ ܕܟ̣ܣܝܐ ܒܣܘܥܪ̈ܢܐ܇ ܠܐ ܝܕܥܬܐ ܥܒܝܕܐ ܣܩܘܒܠܐ. ܐܠܐ ܠܝܕܥܬܐ ܕܡܣ̈ܬܟܠܢܝܗܘܢ ܕܣܘܥܪ̈ܢܐ. ܠܐ ܝܕܥܬܐ ܓܝܪ ܠܐ ܡܟ̣ܢܐ ܕܒܟܝܢܐ ܡܓܫܡܐ ܬܗܘܐ܀

ܟܝܢܐ ܬܪܝܢܐ ܢܝܫܐ ܗܘ ܕܦܓܪܐ܆ ܩܕܡܝܐ ܕܝܢ ܕܢܦܫܐ. ܗܘܢܐ ܕܝܢ ܐܝܬܘܗܝ܆ ܡܫܝܚܐ ܗ̇ܘ ܕܠܝܕܥܬܐ ܕܝܚܝܕܝܘܬܐ ܡܚܝܕ܀

ܟܦܘܪܝܐ ܩܕܡܝܐ ܐܝܬܘܗܝ܆ ܫܒܝܩܘܬܐ ܕܣܘܥܪ̈ܢܐ ܥܠܡܢܝ̈ܐ܇ ܕܒܨܒܝܢܐ ܡܛܠ ܝܕܥܬܐ ܕܐܠܗܐ ܗ̣ܘܝܐ܀

ܟܦܘܪܝܐ ܬܪܝܢܐ ܐܝܬܘܗܝ܆ ܫܒܝܩܘܬܐ ܕܒܝܫܘܬܐ܇ ܕܒܛܝܒܘܬܗ ܕܐܠܗܐ ܘܒܚܦܝܛܘܬܗ ܕܒܪܢܫܐ ܗ̣ܘܝܐ܀

ܟܦܘܪܝܐ ܕܬܠܬܐ ܐܝܬܘܗܝ܆ ܦܘܪܫܢܐ ܕܡܢ ܠܐ ܝܕܥܬܐ܇ ܕܡܟ̣ܢܐ ܠܡܬܚܙܝܘ ܠܒܢܝ̈ܢܫܐ܇ ܐܝܟ ܡܫܘܚܬܐ ܕܬܩܢܘܬܗܘܢ܀

ܬܫܒܘܚܬܗ ܘܢܘܗܪܗ ܕܗܘܢܐ܆ ܝܕܥܬܐ ܗܝ. ܬܫܒܘܚܬܗ̇ ܕܝܢ ܘܢܘܗܪܗ̇ ܕܢܦܫܐ܆ ܠܐ ܚܫܘܫܬܐ̇܀

ܗ̇ܘ ܡܕܡ ܕܡܘ̇ܬܐ ܡܬܪܓܫܢܐ ܡܥܕ ܥ̇ܒܕ ܒܢ܆ ܒܗ̇ ܒܕܡܘ̣ܬܐ ܕܝ̣ܢܗ ܟܐܢܐ ܕܐܠܗܐ ܠܫܪܟܐ ܕܡܠܝ̈ܠܐ ܣܥ̇ܪ܇ ܒܙܒܢܐ ܕܥܬܝܕ ܠܡܕܢ ܚܝ̈ܐ ܘܡܝ̈ܬܐ܇ ܘܦ̇ܪܥ ܠܟܠ ܐܢܫ ܐܝܟ ܥ̇ܒ̈ܕܘܗܝ܀

ܐܢܗ̣ܘ ܕܓܝܚܘܢ ܢܗܪܐ ܗܘ ܡܨܪܝܐ: ܗ̇ܘ ܕܚܕ̇ܪ ܠܟܠܗ̇ ܐܪܥܐ ܕܟܘܫ: ܕܡܢܗ ܒܝܕ ܚܕ ܡܢ ܢܒܝ̈ܐ ܐܬܦ̇ܩܕ ܐܝܣܪܝܠ ܕܠܐ ܢ̣ܫܬܐ܆ ܝ̣ܕܥܢ ܐܢܘܢ ܐܦ ܠܗ̇ܠܝܢ ܬܠܬ ܪ̈ܫܐ ܐܚܪ̈ܢܐ܆ ܘܠܢܗܪܐ ܗ̇ܘ ܕܡܢܗ ܐܬܦ̣ܪܫܘ ܐܪܒܥܐ ܪ̈ܝܫܝܢ܀

ܠܗܘܢܐ ܝܕܥܬܐ ܘܠܐ ܝܕܥܬܐ ܡܬܚ̇ܝ̈ܕܢ. ܪܓܬܐ ܕܝܢ ܡܩܒܠܢܝܬܐ ܗܝ ܕܢܟܦܘܬܐ ܘܕܦܚܙܘܬܐ. ܠܚܡ̣ܬܐ ܕܝܢ ܡܥܕ ܓܕ̇ܫ ܚܘ̣ܒܐ ܘܣܢܐܬܐ. ܠܘ̣ܐ ܕܝܢ ܠܩܕܡܝ̈ܐ ܩܕܡܝܐ܆ ܘܠܬܪ̈ܝܢܐ ܬܪܝܢܐ܀

ܡܬܟ̣ܪܟ ܗܘܢܐ܆ ܟܕ ܢܗܘܐ ܚܫܘܫܐ. ܘܠܐ ܡܬܠܒܟܢܐ ܗ̇ܘܐ܆ ܟܕ ܣܥ̇ܪ ܗܘ̈ܠܣ ܡܩܝ̈ܡܢܝܬܐ ܕܪ̈ܓܝܓܬܗ. ܦܐ̇ܫ ܕܝܢ ܡܢ ܛܘܥܝܝ܆ ܡܐ ܕܗ̣ܘܐ ܕܠܐ ܚܫܐ܇ ܘܗ̣ܘܐ ܒܥܢܝܢܐ ܕܐܝܠܝܢ ܕܕܠܐ ܓܫܘܡ ܐܢܘܢ܇ ܐܝܠܝܢ ܕܡܡܠܝܢ ܟܠܗܝܢ ܪ̈ܓܝܓܬܗ ܪ̈ܘܚܢܝܬܐ܀

ܚܘ̣ܒܐ ܐܝܬܘܗܝ܆ ܬܩܢܘܬܐ ܡܝܬܪܬܐ ܕܢܦܫܐ ܡܠܝܠܬܐ܇ ܕܒܗ̇ ܒܗܕܐ ܠܐ ܡܫܟܚܐ ܕܬܚ̇ܒ ܠܡܕܡ ܕܐܝܬܘܗܝ ܡܢ ܡܬܚܒ̈ܠܢܝܬܐ܇ ܝܬܝܪ ܡܢ ܝܕܥܬܐ ܕܐܠܗܐ܀

ܟܠܗܘܢ ܗܘܝ̈ܐ܆ ܡܛܠ ܝܕܥܬܐ ܕܐܠܗܐ ܗ̣ܘܘ. ܟܠܡܕܡ ܕܝܢ ܕܡܛܠ ܐܚܪܢܐ ܗ̇ܘܐ܆ ܒܨܝܪ ܗܘ ܡܢ ܗ̇ܘ ܡܕܡ ܕܡܛܠܬܗ ܗ̣ܘܐ. ܡܛܠ ܗܢܐ ܡܝܬܪܐ ܗܝ ܡܢ ܟܠ ܝܕܥܬܐ ܕܐܠܗܐ܀

ܝܕܥܬܐ ܟܝܢܝܬܐ ܐܝܬܝܗ̇܆ ܡܬܕܪܟܢܘܬܐ ܫܪܝܪܬܐ ܕܗܠܝܢ ܕܡܛܠ ܝܕܥܬܐ ܕܬܠܝܬܝܘܬܐ ܩܕܝܫܬܐ ܗ̣ܘܘ܀

ܟܠܗ ܟܝܢܐ ܡܠܝܠܐ ܐܬܬܟܝܢ ܕܢܗܘܐ ܐܝܬܘܗܝ܇ ܘܕܢܗܘܢ ܐܝܬܘܗܝ ܝܕܘܥܐ. ܐܠܗܐ ܕܝܢ ܝܕܥܬܐ ܐܝܬܝܝܬܐ ܐܝܬܘܗܝ. ܠܟܝܢܐ ܕܝܢ ܡܠܝܠܐ܆ ܐܝܬ ܠܗ ܣܩܘܒܠܝܘܬܐ ܗ̇ܝ ܕܠܐ ܢܗܘܐ܇ ܠܝܕܥܬܗ ܕܝܢ ܒܝܫܘܬܐ ܘܠܐ ܝܕܥܬܐ. ܘܠܐ ܡܕܡ ܕܝܢ ܡܢ ܗܠܝܢ ܣܩܘܒܠܝ ܠܐܠܗܐ܀

ܐܢ ܝܘܡܢ ܐܝܬܝܗ̇ ܗ̇ܝ ܕܡܬܐܡܪܐ ܥܪܘܒܬܐ: ܕܒܗ̇ ܐܨܛܠܒ ܦܪܘܩܢ܆ ܟܠܗܘܢ ܓܝܪ ܐܝܠܝܢ ܕܡܝ̣ܬܘ܆ ܦܠܐܬܐ ܐܢܘܢ ܕܩܒܪܗ܇ ܕܒܗܘܢ ܙܕܝܩܘܬܗ ܕܐܠܗܐ ܡܝ̣ܬܬ̇. ܕܚܝ̇ܐ ܠܝܘܡܐ ܕܬܠܬܐ܆ ܘܩܝ̇ܡܐ ܟܕ ܠܒܝܫܐ ܓܘܫܡܐ ܕܪܘܚ. ܐܢܗ̣ܘ ܕܝܘܡܢܐ ܘܡܚܪ ܚܝ̈ܠܐ ܣܥ̇ܪ܇ ܘܠܝܘܡܐ ܕܬܠܬܐ ܡܫܬܡܠܐ܀

ܡܚܙܝܬܐ ܕܛܒܘܬܗ ܕܐܠܗܐ: ܘܕܚܝܠܗ ܘܕܚܟܡܬܗ܆ ܗܠܝܢ ܕܩܕܡܝܬ ܡܢ ܠܐ ܡܕܡ ܠܡܕܡ ܗ̣ܘܘ܀

ܒܬܐܘܪܝܐ ܟܝܢܝܬܐ ܕܬܪ̈ܬܝܢ܆ ܚܟܡܬܗ ܕܡܫܝܚܐ ܡܠ̣ܝܬ ܦܘܪ̈ܫܢܐ ܚܙ̇ܝܢܢ܇ ܗ̇ܝ ܕܒܗ̇ ܐܬܚܫ̇ܚ ܘܒܪ̣ܐ ܥܠܡ̈ܐ. ܒܝܕܥܬܐ ܕܝܢ ܕܥܠ ܡܠܝ̈ܠܐ܆ ܥܠ ܩܢܘܡܗ ܝܠ̣ܦܢܢ܀

ܩܕܡܝܬܐ ܕܟܘܠܗܝܢ ܝܕ̈ܥܬܐ܆ ܝܕܥܬܐ ܕܚܕܝܘܬܐ ܘܕܝܚܝܕܝܘܬܐ ܐܝܬܝܗ̇. ܘܡܢ ܟܠܗ̇ ܬܐܘܪܝܐ ܟܝܢܝܬܐ ܩܫܝܫܐ ܝܕܥܬܐ ܕܪܘܚ. ܗܕܐ ܓܝܪ ܠܘܩܕܡ ܡܢ ܒܪܘܝܐ ܢܦܩ̣ܬ̇܆ ܘܥܡ ܟܝܢܐ ܕܐܬܠܘ̇ܝ ܠܗ̇ ܕܢܚ̣ܬ̇܀

ܟܕ ܫܘ̈ܚܠܦܐ ܣܓܝ̈ܐܐ ܐܢܘܢ܆ ܝܕܥܬܐ ܕܐܪܒܥܐ ܒܠܚܘܕ ܩܒ̇ܠܢܢ. ܕܩܕܡܝܐ ܘܕܬܪܝܢܐ. ܘܕܐܚܪܝܐ. ܘܕܩܕܡܘܗܝ. ܘܩܕܡܝܐ ܐܝܬܘܗܝ ܐܝܟ ܕܐܡ̇ܪܝܢ܆ ܫܘܢܝܐ ܕܡܢ

ܒܝܫܘܬܐ ܠܘܬ ܡܝܬܪܘܬܐ. ܬܪܝܢܐ ܕܝܢ܆ ܕܡܢ ܠܐ ܚܫܘܫܬܐ ܠܘܬ ܬܐܘܪܝܐ ܟܝܢܝܬܐ ܕܬܪ̈ܬܝܢ. ܘܬܠܝܬܝܐ܆ ܗ̇ܘ ܕܡܢ ܗܕܐ ܠܘܬ ܝܕܥܬܐ ܕܥܠ ܡܠܝ̈ܠܐ. ܘܕܐܪܒܥܐ܆ ܫܘܢܝܐ ܕܡܢ ܟܠܗܝܢ ܠܘܬ ܝܕܥܬܐ ܕܬܠܝܬܝܘܬܐ ܩܕܝܫܬܐ܀

ܦܓܪܐ ܕܗ̇ܘ ܕܐܝܬܘܗܝ܆ ܬܐܘܪܝܐ ܕܗܘܝ̈ܐ ܐܝܬܘܗܝ. ܢܦܫܐ ܕܝܢ ܕܗ̇ܘ ܕܐܝܬܘܗܝ܆ ܝܕܥܬܐ ܕܝܚܝܕܘܬܐ ܐܝܬܝܗ̇. ܘܗ̇ܘ ܡ̇ܢ ܕܝܕ̇ܥ ܠܢܦܫܐ܆ ܢܦܫܐ ܕܗ̇ܘ ܕܐܝܬܘܗܝ ܡܬܩܪܐ. ܐܝܠܝܢ ܕܝܢ ܕܝܕ̇ܥܝܢ ܦܓܪܐ܆ ܦܓܪܐ ܕܗܕܐ ܢܦܫܐ ܡܫܬܡܗܝܢ܀

ܢܦܫܐ ܦܠܘܚܬܐ: ܕܒܛܝܒܘܬܗ ܕܐܠܗܐ ܐܨܠܚ̣ܬ̇: ܘܡܢ ܦܓܪܐ ܫܢ̇ܝܬ̇܆ ܒܗ̇ܢܘܢ ܐܬܪ̈ܘܬܐ ܕܝܕܥܬܐ ܗ̇ܘܝܐ. ܐܝܟܐ ܕܐܒܪ̈ܐ ܕܠܐ ܚܫܘܫܬܗ̇ ܢܡܢ̇ܥܘܢܗ̇܀

ܗܠܝܢ ܗ̇ܘܝܢ ܠܗ̇ ܠܢܦܫܐ ܝܪ̈ܘܬܐ ܒܬܪ ܡܘܬܐ܆ ܐܝܠܝܢ ܕܠܘܬ ܡܝܬܪܘܬܐ ܐܘ ܒܝܫܘܬܐ ܗ̣ܘܘ ܠܗ̇ ܡܥܕܪ̈ܢܐ܀

ܥܘܬܪܗ̇ ܕܢܦܫܐ ܝܕܥܬܐ ܗܝ. ܡܣܟܢܘܬܗ̇ ܕܝܢ ܠܐ ܝܕܥܬܐ. ܐܢ ܕܝܢ ܠܐ ܝܕܥܬܐ ܓܠܝܙܘܬܐ ܗܝ ܕܝܕܥܬܐ܆ ܩܕ̇ܝܡ ܗܘ ܥܘܬܪܐ ܠܡܣܟܢܘܬܐ܇ ܘܚܘܠܡܢ ܢܦܫܐ ܠܟܘܪܗܢܗ̇܀

ܡ̇ܢ ܝܕ̇ܥ ܡܥܒܕܢܘܬܐ ܕܦܘ̈ܩܕܢܐ. ܘܡܢ̣ܘ ܡܣܬ̇ܟܠ ܚܝ̈ܠܝܗ̇ ܕܢܦܫܐ܇ ܘܐܝܟܢܐ ܗܠܝܢ ܠܗܠܝܢ ܡܐܣܝܢ܇ ܘܠܘܬ ܬܐܘܪܝܐ ܕܗܠܝܢ ܕܐܝܬܝܗܘܢ ܡܚܦ̇ܛܝܢ܀

ܐܪ̈ܓܝܓܢ ܡ̇ܢ ܨܒܘ̈ܬܐ ܗܠܝܢ ܕܒܝܕ ܡܪ̈ܓܫܢܘܬܐ ܡܬܩ̇ܪ̈ܒܢ ܠܢ. ܐܪܓܝܓܐ ܕܝܢ ܡܢܗܝܢ ܬܐܘܪܝܐ ܕܝܠܗܝܢ. ܐܠܐ ܡܛܠ ܕܠܐ ܡ̇ܕܪܟܐ ܠܝܕܥܬܐ ܗ̣ܝ ܡܪܓܫܢܘܬܐ ܡܛܠ ܟܪܝܗܘܬܢ܆ ܗܕܐ ܡܣܬ̣ܒܪܐ ܕܡܝܬܪܐ ܡܢ ܗ̇ܝ ܕܥܕܟܝܠ ܠܐ ܐܬܕ̣ܪܟ̇ܬ܀

ܥܠ ܟܠܡܕܡ ܕܡܢ ܐܪܒܥܐ ܐܣܛܘ̈ܟܣܐ ܐܬܩܝ̇ܡ: ܟܕ ܢܗܘܐ ܪܚ̇ܝܩ ܘܟܕ ܢܗܘܐ ܩ̇ܪܝܒ܆ ܡܫܟܚܐ ܕܕܡ̣ܘܬܗ ܢ̣ܣܒ. ܒܠܚܘܕ ܕܝܢ ܗܘܢܢ ܐܝܬܘܗܝ ܠܢ ܠܐ ܡܬܕܪܟܢܐ܆ ܘܐܠܗܐ ܥܒܘܕܗ. ܠܐ ܓܝܪ ܡܫܟܚܐ ܕܢܣ̇ܬܟܠ ܡ̇ܢܘ ܟܝܢܐ ܡܩܒܠܢܐ ܕܬܠܝܬܝܘܬܐ ܩܕܝܫܬܐ܆ ܐܦܠܐ ܕܢܣ̇ܬܟܠ ܠܝܚܝܕܝܘܬܐ ܝܕܥܬܐ ܩܢܘܡܝܬܐ܀

ܝܡܝܢܗ ܕܡܪܝܐ ܐܦ ܐܝܕܐ ܡܬܩܪܝܐ. ܐܝܕܗ ܕܝܢ ܠܐ ܡܬܩܪܝܐ ܐܦ ܝܡܝܢܐ. ܘܐܝܕܗ ܡ̇ܢ ܝܬܝܪܘܬܐ ܘܒܨܝܪܘܬܐ ܡܩ̇ܒܠܐ. ܠܐ ܕܝܢ ܓ̇ܕܫܐ ܗܕܐ ܐܦ ܠܝܡܝܢܐ܀

ܣܦ̣ܩ̇ܬ ܡ̇ܢ ܬܐܘܪܝܐ ܩܕܡܝܬܐ ܕܟܝܢܐ܆ ܠܗܘܝܐ ܕܟܝܢܐ ܡܠܝܠܐ. ܣܦ̇ܩܐ ܕܝܢ ܐܦ ܗܕܐ ܕܬܪ̈ܬܝܢ ܠܦܘܢܝܗ܀

ܐܝܠܝܢ ܕܒܦܓܪ̈ܐ ܫܘ̈ܝܐ ܚܐ̇ܝܢ܆ ܠܘ ܒܗ̇ ܟܕ ܒܗ̇ ܒܝܕܥܬܐ. ܐܠܐ ܒܗ ܟܕ ܒܗ ܒܥܠܡܐ ܐܝܬܝܗܘܢ. ܐܝܠܝܢ ܕܝܢ ܕܒܗ̇ ܟܕ ܒܗ̇ ܒܝܕܥܬܐ ܐܝܬܝܗܘܢ܆ ܒܗ̇ ܒܫܘܝܘܬ ܦܓܪܐ܆ ܘܒܗ ܒܥܠܡܐ ܐܝܬܝܗܘܢ܀

ܐܡܬܝ ܕܟܝܢܐ ܡܠܝܠܐ ܢܩܒ̇ܠ ܬܐܘܪܝܐ ܕܥܠܘܗܝ܆ ܗܝܕܝܢ ܐܦ ܟܠܗ ܚܝܠܗ ܕܗܘܢܐ ܚܠܝܡ܀

ܕܕܐܝܟ ܗܟܢܐ ܗܝ ܬܐܘܪܝܐ ܕܟܠ ܕܗ̣ܘܘ ܘܗ̇ܘܝܢ܆ ܐܝܟܢܐ ܕܢܫܟܚ ܟܝܢܐ ܡܩܒܠܢܗ̇ ܕܐܦ ܝܕܥܬܐ ܕܬܠܝܬܝܘܬܐ ܢܩܒ̇ܠ܀

ܠܘ̣ܐ ܠܝܕܥܬܐ ܕܥܠ ܡܠܝ̈ܠܐ܆ ܚܒ̇ܠܐ ܕܥܠܡ̈ܐ ܘܫܪܝܐ ܕܦܓܪ̈ܐ ܘܥܛܝܐ ܕܫܡܗ̈ܐ. ܟܕ ܦܝ̇ܫܐ ܫܘܝܘܬܐ ܕܝܕܥܬܐ ܐܝܟ ܫܘܝܘܬܐ ܕܩܢܘ̈ܡܐ܀

ܐܝܟܢܐ ܕܠܟܝܢܐ ܕܓܘ̈ܫܡܐ ܡܚܦ̇ܝܢ ܡܘ̈ܙܓܐ ܕܡܟ̇ܬܪܝܢ ܒܗܘܢ: ܘܕܠܐ ܫܠܘܐ ܡܝ̇ܒܠܝܢ ܚܕ ܠܚܕ܆ ܗܟܢܐ ܡܚܦ̇ܝܐ ܠܟܝܢܐ ܡܠܝܠܐ ܡܝܬܪܘܬܐ ܘܝܕܥܬܐ܇ ܐܘ ܒܝܫܘܬܐ ܘܠܐ ܝܕܥܬܐ. ܕܢܐܡܪ ܕܝܢ ܐܢܫ܆ ܕܚܕܐ ܡܢ ܗܠܝܢ ܬܪ̈ܝܢܝܬܐ ܥܡܗܘܢ ܕܡܠܝ̈ܠܐ ܐܬܬ̣ܟܝܢ̇ܬ ܠܐ ܙ̇ܕܩ. ܡܛܠ ܕܥܡ ܩܘܝܡܗ ܕܟܝܢܐ ܕܢ̣ܚ̇ܬ܀

ܡܢ ܬܪܝܢܘܬܐ ܝܕܥܬܐ ܕܥܠ ܡܠܝ̈ܠܐ ܩܫܝܫܐ܆ ܘܡܢ ܟܠ ܟܝ̈ܢܐ ܟܝܢܐ ܝܕܘܥܐ܀

ܠܬܐܘܪܝܐ ܟܝܢܝܬܐ ܕܬܪ̈ܬܝܢ: ܗ̇ܝ ܕܡܢ ܩܕܝܡ ܕܠܐ ܗܘܠܐ ܐܝܬܝܗ̇ ܗܘܬ܆ ܐܚܪܝܬ ܒܝܕ ܗܘܠܐ ܗ̣ܘ ܒܪܘܝܐ ܠܟܝܢܐ ܕܡܠܝ̈ܠܐ ܓ̇ܠܗ̇܀

ܟܠܡܕܡ ܕܗ̣ܘܐ܆ ܚܟܡܬܗ ܕܐܠܗܐ ܡܠ̣ܝܬ ܦܘܪ̈ܫܢܐ ܡ̇ܟܪܙ. ܠܝܬ ܕܝܢ ܡܢ ܟܠܗܘܢ ܗܘܝ̈ܐ܆ ܕܥܠ ܟܝܢܗ ܢܘܕܥ܀

ܐܝܟܢܐ ܕܠܟܝܢܗ ܕܐܒܐ ܡܠܬܐ ܡ̇ܘܕܥ܆ ܗܟܢܐ ܠܕܡܫܝܚܐ ܟܝܢܐ ܡܠܝܠܐ܀

ܨܠܡܐ ܕܐܝܬܘܬܗ ܕܐܠܗܐ܆ ܐܦ ܬܐܘܪܝܐ ܕܐܝܠܝܢ ܕܐܝܬܝܗܘܢ ܝ̇ܕܥ. ܗ̇ܘ ܕܝܢ ܕܝ̇ܕܥ ܬܐܘܪܝܐ ܕܗܘܝ̈ܐ܆ ܠܐ ܗܘܐ ܦܢܛܘܣ ܨܠܡܐ ܐܝܬܘܗܝ ܕܐܠܗܐ܀

ܚܕ ܗܘ ܒܠܚܘܕ ܕܫܡ̈ܗܐ ܕܓܘܐ ܩܢ̣ܐ ܥܡ ܐܚܪ̈ܢܐ܀

ܐܝܟܢܐ ܕܦܪܕܬܐ ܕܫܢܢܐ ܕܥܬܝܕ: ܡܬܐܡܪ ܗܢܐ ܓܘܫܡܐ܆ ܗܟܢܐ ܐܦ ܥܠܡܐ ܗܢܐ ܕܩ̇ܐܡ܇ ܦܪܕܬܐ ܢܬܩܪܐ ܕܗ̇ܘ ܕܒܬܪܗ܀

ܐܢܗ̣ܘ ܕܚ̈ܛܐ ܢܝܫܐ ܛܥܝ̈ܢܢ ܕܡܝܬܪܘܬܐ: ܘܬܒܢܐ ܢܝܫܐ ܕܒܝܫܘܬܐ܆ ܥܠܡܐ ܕܥܬܝܕ ܢܝܫܐ ܗܘ ܕܣܘܩܝܢܢ܇ ܕܢ̇ܬܦܐ ܬܒܢܐ ܠܘܬܗ̇܀

ܗܘܢܐ ܟܕ ܢ̇ܕܝܩ ܒܡ̈ܬܝܕܥܢܝܬܐ܆ ܒܙܒܢ ܠܚܙܬܗܝܢ ܡܦܪܫܐܝܬ ܡܩ̇ܒܠ. ܒܙܒܢ ܕܝܢ ܐܦ ܕܝܠܗܘܢ ܕܣܘܥܪ̈ܢܐ ܗ̇ܘܐ ܚܙ̇ܝܐ܀

ܥܝܢܐ ܡܬܪܓܫܢܝܬܐ ܟܕ ܬ̣ܚܘܪ ܒܡܕܡ ܕܡܬܚܙܐ܆ ܠܘ ܣܟܗ ܚܙ̇ܝܐ

ܥܝܢܐ ܕܝܢ ܡܬܝܕܥܢܝܬܐ܆ ܐܘ ܠܐ ܚܙ̣ܬ̇. ܐܘ ܟܕ ܬ̣ܚܙܐ܆ ܡܚܕܐ ܡܢ ܟܠ ܣܛܪ̈ܘܗܝ ܚ̇ܕܪܐ ܠܗ ܠܗ̇ܘ ܡܕܡ ܕܚܙ̇ܝܐ܀

ܐܝܟܢܐ ܕܢܘܪܐ ܒܚܝܠܐ ܩܢ̣ܝܐ ܠܗ ܠܓܘܫܡܗ̇܆ ܗܟܢܐ ܐܦ ܗܘܢܐ ܒܚܝܠܐ ܢ̣ܩܢܝܗ̇ ܠܢܦܫܐ. ܟܕ ܟܠܗ ܢܬܡ̇ܙܓ܆ ܒܢܘܗܪܐ ܕܬܠܝܬܝܘܬܐ ܩܕܝܫܬܐ܀

ܕܟܠܗܘܢ ܐܝܠܝܢ ܕܡܕܒܪܢܘܬܗܘܢ ܚܝ̈ܠܘܬܐ ܩܕܝ̈ܫܐ ܩܒ̇ܠܘ܆ ܐܦ ܣܘ̈ܟܠܝܗܘܢ ܝ̇ܕܥܝܢ. ܠܘ ܕܝܢ ܕܐܝܠܝܢ ܕܝ̇ܕܥܝܢ ܣܘ̈ܟܠܝܗܘܢ܆ ܐܦ ܡܕܒܪܢܘܬܗܘܢ ܦܢܛܘܣ ܐܬܗܝܡܢܘ܀

ܬܠܬܐ ܚܝܝ̈ܢ ܚ̇ܐܝܢ ܒܢܝ̈ ܐܢܫܐ. ܩܕܡܝ̈ܐ ܘܬܪ̈ܝܢܐ ܘܬܠܝܬܝ̈ܐ. ܘܡ̇ܢ ܚܝ̈ܐ ܩܕܡܝ̈ܐ ܘܬܪ̈ܝܢܐ܆ ܡܩܒ̇ܠܝܢ ܐܝܠܝܢ ܕܡܢ ܟܝܢܐ ܩܕܡܝܐ ܐܝܬܝܗܘܢ. ܠܚܝ̈ܐ ܕܝܢ ܬܠܝ̈ܬܝܐ܆ ܐܝܠܝܢ ܕܡܢ ܟܝܢܐ ܬܪܝܢܐ ܡܫܘܬܦܝܢ. ܘܚܝ̈ܐ ܩܕܡܝ̈ܐ ܐܡ̇ܪܝܢ ܕܐܝܬܝܗܘܢ ܡܢ ܗ̇ܘ ܕܐܝܬܘܗܝ. ܬܪ̈ܝܢܐ ܕܝܢ ܘܬܠܝܬܝ̈ܐ ܡܢ ܗ̇ܘ ܕܠܝܬܘܗܝ܀

ܐܝܟܢܐ ܕܠܘ ܗܘ̈ܠܣ ܡܬܪܣܝܢ ܦܓܪ̈ܐ ܐܠܐ ܚܝܠܗܝܢ܆ ܗܟܢܐ ܠܘ ܣܘܥܪ̈ܢܐ ܡܪܒ̇ܝܢ ܠܢܦܫܐ܇ ܐܠܐ ܬܐܘܪܝܐ ܕܝܠܗܘܢ܀

ܣܘܥܪ̈ܢܐ ܕܝܕܥܬܐ ܗܘܠܢܝܬܐ܆ ܡܢܗܘܢ ܩܕ̈ܡܝܝܢ ܘܡܢܗܘܢ ܬܪ̈ܝܢܝܢ. ܘܩܕܡܝ̈ܐ ܡ̇ܢ ܒܚܝܠܐ ܐܝܬܝܗܘܢ ܡܬܚܒ̈ܠܢܐ. ܬܪ̈ܝܢܐ ܕܝܢ ܒܚܝܠܐ ܘܒܡܥܒܕܢܘܬܐ܀

ܐܝܟܢܐ ܕܟܐܦܐ ܡܓܢܝܛܣ: ܒܚܝܠܗ̇ ܟܝܢܝܐ ܢ̇ܬܦܐ ܦܪܙܠܐ ܠܘܬܗ̇܆ ܗܟܢܐ ܝܕܥܬܐ ܩܕܝܫܬܐ ܠܗܘܢܐ ܕܟ̣ܝܐ܇ ܟܝܢܐܝܬ ܢ̇ܬܦܐ ܠܘܬܗ̇܀

ܐܦ ܗܘܢܐ ܚܡܫ ܡܪ̈ܓܫܢܘܬܐ ܪ̈ܘܚܢܝܬܐ ܩܢ̣ܐ܇ ܕܒܗܝܢ ܡ̇ܪܓܫ ܒܗܘ̈ܠܣ ܐܚܝܢܝ̈ܬܗ. ܘܚܙܬܐ ܡ̇ܢ ܡܚܘ̇ܝܐ ܠܗ ܠܣܘܥܪ̈ܢܐ ܡ̈ܬܝܕܥܢܐ ܥܪܛܠܐܝܬ. ܒܡܫܡܥܬܐ ܕܝܢ ܠܡ̈ܠܐ ܕܥܠܝܗܘܢ ܡܩܒ̇ܠ. ܡܢ ܪܚܐ ܕܝܢ ܕܡܢܟܪܝ ܡܢ ܟܠܗ̇ ܕܓܠܘܬܐ ܡܬܒ̇ܣܡ ܣܘܩܐ. ܘܡܢ ܗܢܝܘܬܐ ܕܗܠܝܢ ܡܩܒ̇ܠ ܦܘܡܐ. ܒܝܕ ܓܫܬܐ ܕܝܢ ܡܫ̇ܬܪܪ܆ ܟܕ ܬܚܘܝܬܐ ܚܬܝܬܬܐ ܕܝܠܗܘܢ ܕܣܘܥܪ̈ܢܐ ܫ̇ܩܠ܀

ܟܠ ܚܙ̇ܝ̈ܐ ܕܣܘܥܪ̈ܢܐ ܡܬܝܕܥܢܐ܇ ܡܢ ܟܕܘ ܐܬܗܝܡܢܘ ܡܠܬܐ ܫܪܝܪܬܐ ܕܥܠܝܗܘܢ. ܘܠܐ ܬܘܒ ܐܝܠܝܢ ܕܡ̈ܠܝܗܘܢ ܐܬܗܝܡܢܘ ܠܡܚܙܐ܇ ܐܦ

ܣܘܥܪ̈ܢܝܗܘܢ ܚܙ̇ܝܢ. ܐܝܬ ܕܝܢ ܐܢܫܝ̈ܢ܆ ܕܐܦ ܠܬܪ̈ܝܗܘܢ ܗܠܝܢ ܦܘܪ̈ܫܢܐ ܡܫ̣ܬܘܝܢ. ܕܗ̣ܢܘܢ ܡܬܩܪܝܢ ܒܘܟܪ̈ܐ ܕܐܚܝ̈ܗܘܢ܀

ܚܕ ܗܘ ܡܢ ܟܠܗܘܢ ܗܘܝ̈ܐ܇ ܕܠܐ ܫܡܐ ܘܐܬܪܗ ܠܐ ܝܕܝܥ܀

ܕܡܢ̣ܘ ܟܝܢܐ ܒܝܘ̈ܡܬܐ ܕܩܕܡ ܚܫܐ. ܘܕܡ̇ܢ ܗܝ ܐܝܕܥܬܐ ܕܦܢܛܩܘܣܛܐ ܩܕܝܫܬܐ܀

ܚܡܫܐ ܐܚܝ̈ܢܐ ܐܢܘܢ ܕܚܡܫܝܢ. ܘܗܠܝܢ ܡܛܝ̈ܒܢܐ ܐܢܘܢ ܕܝܕܥܬܐ ܕܗܠܝܢ܀

ܐܪܒܥܐ ܐܚܝ̈ܢܐ ܐܢܘܢ ܕܐܪܒܥܝܢ. ܘܒܗܠܝܢ ܐܝܬܝܗ̇ ܬܐܘܪܝܐ ܕܐܪܒܥܝܢ܀

ܚܕ ܗܘ ܕܒܥܠܕ ܐܪܒܥܐ ܘܚܡܫܐ܇ ܝ̇ܕܥ ܠܐܪܒܥܝܢ ܘܠܚܡܫܝܢ܀

ܡܢ̣ܘ ܢܐܬܐ ܠܦܣܟܐ ܩܕܝܫܬܐ. ܘܡܢ̣ܘ ܢܕܥ ܠܦܢܛܩܘܣܛܐ ܩܕܝܫܬܐ܀

ܚܕ ܗܘ ܕܒܗܕܐ ܐܫܬܒܩ. ܘܗ̣ܘ ܟܕ ܗ̣ܘ ܒܗ̇ ܢܫܬܟܚ܀

ܠܘ ܟܠܗܘܢ ܩܕܝ̈ܫܐ ܠܠܚܡܐ ܐܟ̇ܠܝܢ. ܠܟܣܐ ܕܝܢ ܟܠܗܘܢ ܫ̇ܬܝܢ܀

ܪ̈ܓܫܐ ܘܗܘܢܐ ܡܦ̇ܠܓܝܢ ܠܗܝܢ ܠܡܬܪ̈ܓܫܢܝܬܐ. ܗܘܢܐ ܕܝܢ ܒܠܚܘܕܘܗܝ ܐܝܬ ܠܗ ܣܘܟܠܐ ܕܡ̈ܬܝܕܥܢܝܬܐ. ܕܣܘܥܪ̈ܢܐ ܘܕܣܘ̈ܟܠܐ ܗ̣ܘ ܗ̇ܘܐ ܚܙ̇ܝܐ܀

ܐܘܡܢܘܬܗ ܡܬܦܪܫܢܝܬܐ ܕܐܘܡܢܐ ܡܣ̇ܝܟܐ ܠܥ̇ܒܕܗ. ܘܚܟܡܬܗ ܕܐܠܗܐ ܡܣܝ̇ܟܐ ܠܟܠ. ܘܐܟܙܢܐ ܕܐܝܢܐ ܕܒܡܠܬܐ ܦ̇ܪܫ ܐܘܡܢܘܬܗ ܕܐܘܡܢܐ ܡܢܗ: ܫ̇ܪܐ ܠܗ ܠܥ̇ܒܕܗ܆ ܗܟܢܐ ܐܝܢܐ ܕܒܬܪܥܝܬܗ ܦ̇ܪܫ ܚܟܡܬܗ ܕܐܠܗܐ ܡܢܗ܇ ܡܚܒ̇ܠ ܠܟܠ܀

ܬܠܝܬܝܘܬܐ ܠܐ ܡܬܣܝܡܐ ܥܡ ܬܐܘܪܝܐ ܕܡܬܪ̈ܓܫܢܝܬܐ ܘܡܬܝܕܥܢܝ̈ܬܐ ܘܠܐ ܬܘܒ ܥܡܗܘܢ ܕܣܘܥܪ̈ܢܐ ܡܬܡܢܝܐ. ܕܗ̇ܝ ܐܝܬܝܗ̇ ܡܘܙܓܐ ܘܗܠܝܢ ܒ̣ܪ̈ܝܐ. ܬܠܝܬܝܘܬܐ ܕܝܢ ܩܕܝܫܬܐ܆ ܠܚܘܕܝܗ̇ ܝܕܥܬܐ ܐܝܬܝܝܬܐ ܐܝܬܝܗ̇܀

ܗܘܢܐ ܐܢܗ̣ܘ ܕܒܫܒܝܠܐ ܕܩܢܘܡܗ ܪܕ̇ܐ܆ ܦ̇ܓܥ ܒܚܝ̈ܠܘܬܐ ܩܕܝ̈ܫܐ. ܐܢ ܕܝܢ ܒܕܐܪܓܢܘܢ ܕܢܦܫܐ܆ ܢ̇ܦܠ ܒܫܐܕ̈ܐ܀

ܗ̇ܘ ܕܩ̇ܕܡܝܐ ܫܩ̣ܠ ܫܢܢܐ ܕܦܪܕܬܐ܆ ܩܕܡܝܐ ܗܘ ܕܐܝܠܝܢ ܕܐܝܬ ܠܗܘܢ ܦܪܕܬܐ. ܘܐܝܢܐ ܕܫ̣ܩܠ ܫܢܢܐ ܬܪܝܢܐ܆ ܩܕܡܝܐ ܗܘ ܕܐܝܠܝܢ ܕܐܝܬ ܠܗܘܢ ܫܢܢܐ ܩܕܡܝܐ. ܘܐܝܢܐ ܕܫ̣ܩܠ ܫܢܢܐ ܬܠܝܬܝܐ܆ ܩܕܡܝܐ ܗܘ ܕܐܝܠܝܢ ܕܐܝܬ ܠܗܘܢ ܫܢܢܐ ܬܪܝܢܐ. ܘܥܠ ܗܠܝܢ ܕܫܪܟܐ ܗܟܢܐ܆ ܥܕܡܐ ܕܢ̣ܫܠܚ ܠܫܢܢܐ ܐܚܪܝܐ ܘܩܕܡܝܐ܇ ܗ̇ܘ ܕܠܝܬ ܠܗ ܐܝܟ ܐܚܪܝܐ ܚܝܠܐ ܕܦܪܕܬܐ܀

ܡܐ ܕܝ̈ܠܕܬܐ ܦܫ̣ ܡܢ ܕܠܡܐܠܕ܆ ܗܝܕܝܢ ܐܦ ܢܛܘܪ̈ܘܗܝ ܕܒܝܬܐ ܢܬܙܝܥܘܢ. ܗܝܕܝܢ ܐܦ ܬܪ̈ܝܗܘܢ ܪ̈ܫܐ܆ ܢܥ̣ܦܘܢ ܘܪܕܐ ܘܒܘܨܐ܀

ܡܪܟܒܬܐ ܕܝܕܥܬܐ܆ ܢܘܪܐ ܘܐܐܪ. ܡܪܟܒܬܐ ܕܝܢ ܕܠܐ ܝܕܥܬܐ܆ ܐܐܪ ܘܡܝ̈ܐ܀

ܡܢܗܘܢ ܕܫܐܕ̈ܐ ܠܡܬܝ̈ܕܥܢܐ ܝܕܘܥ̈ܐ ܩ̣ܪܘ. ܡܢܗܘܢ ܕܝܢ ܐܦ ܠܝܕܝܥܘܬܗ ܕܡܬܝܕܥܢܐ ܢ̣ܣܒܘ܀

ܚܕ ܗܘ ܒܠܚܘܕܘܗܝ ܣܓܝܕܐ܆ ܗ̇ܘ ܕܝܚܝܕܐܝܬ ܐܝܬ ܠܗ ܝܚܝܕܝܐ܀

ܝܕܥܬܐ ܠܘ ܒܐܬܪ̈ܘܬܐ ܕܠܐ ܝܕܥܬܐ ܪܕ̇ܝܐ܆ ܐܠܐ ܒܐܬܪ̈ܘܬܐ ܕܝܕܥܬܐ܀

ܠܠܐ ܝܕܥܬܐ܆ ܡܢܗܘܢ ܒܨܒܝܢܗܘܢ ܘܡܢܗܘܢ ܕܠܐ ܒܨܒܝܢܗܘܢ ܢܬܦ̣ܘܗ̇ ܠܘܬܗܘܢ. ܘܬܪ̈ܝܢܐ ܡ̇ܢ ܫܒܝ̣̈ܐ ܡܬܐܡܪܝܢ. ܩܕܡܝ̈ܐ ܕܝܢ ܫ̇ܒܝ̈ܐ ܡܫܬܡܗܝܢ. ܐܬ̣ܘ ܠܡ ܫ̇ܒܝ̈ܐ ܘܫ̣ܒܘ ܐܢܝܢ܀

ܗܘܢܐ ܠܢܦܫܐ ܡ̇ܠܦ. ܢܦܫܐ ܕܝܢ ܠܦܓܪܐ. ܘܒܠܚܘܕܘܗܝ ܒܪܢܫܐ ܕܐܠܗܐ܆ ܠܒܪ ܐܢܫܐ ܕܝܕܥܬܐ ܝ̇ܕܥ܀

ܬܠܬܐ ܡܕܒ̈ܚܐ ܕܡܪ̈ܘܡܐ ܝ̣ܠܦܢܢ ܕܐܝܬܝܗܘܢ. ܕܬܠܝܬܝܗܘܢ ܦܫܝܛܐ ܗܘ. ܗܠܝܢ ܕܝܢ ܬܪ̈ܝܢ ܡܪ̈ܟܒܐ. ܘܚܟܡܬܐ ܡ̇ܢ ܕܥܠ ܡܕܒܚܐ ܬܪܝܢܐ܆ ܠܚܟܡܬܐ ܕܬܠܝܬܝܐ ܡ̇ܘܕܥܐ. ܗ̇ܘ ܕܝܢ ܕܥܠ ܡܕܒܚܐ ܩܕܡܝܐ܆ ܠܗ̇ܝ ܕܒܬܪܝܢܐ ܩܕܡܝܐ܀

ܠܐܝܠܝܢ ܕܗܫܐ ܒܦܬܝܐ ܥ̇ܡܪܝܢ܆ ܐܬܝܗܒܘ ܠܗܘܢ ܬܠܬܐ ܡܕܒܚܝ̈ܢ. ܠܐܝܠܝܢ ܕܝܢ ܕܒܐܘܪܟܐ ܘܒܥܘܡܩܐ܆ ܒܥܠܡܐ ܕܥܬܝܕ ܡܬܝܗܒܝܢ ܠܗܘܢ܀

ܠܕܝ̣ܢܗ ܡ̇ܢ ܟܐܢܐ ܕܡܫܝܚܢ܆ ܫܘܚܠܦܐ ܕܓܘ̈ܫܡܐ ܘܕܐܬܪ̈ܘܬܐ ܘܕܥܠܡ̈ܐ ܡ̇ܘܕܥ. ܠܢܓܝܪܘܬ ܪܘܚܗ ܕܝܢ܆ ܐܝܠܝܢ ܕܠܘܩܒܠ ܡܝܬܪܘܬܐ ܡܬܚܪܝܢ. ܠܪ̈ܚܡܘܗܝ ܕܝܢ ܝܬܝܪܐܝܬ܆ ܐܝܠܝܢ ܕܡܢܗ ܡܬܦܪܢܣܝܢ ܟܕ ܠܐ ܫܘ̇ܝܢ܀

ܦܬܘܪܗ ܕܡܫܝܚܐ ܐܠܗܐ ܗܘ. ܦܬܘܪܐ ܕܝܢ ܕܡܪ̈ܝܡܐ܆ ܟܝܢܐ ܗܘ ܡܓܫܡܐ ܘܠܐ ܡܓܫܡܐ܀

ܠܬܐܘܪܝܐ ܡ̇ܢ ܕܠܐ ܡܓܫܡ̈ܐ: ܗ̇ܝ ܕܩܕܡܝܬ ܕܠܐ ܗܘܠܐ ܝ̇ܕܥܝܢ ܗܘܝܢ܆ ܗܫܐ ܟܕ ܡܥܪܙܠܐ ܒܗܘܠܐ ܝܕ̇ܥܝܢܢ. ܠܗ̇ܝ ܕܝܢ ܕܥܠ ܓܘ̈ܫܡܐ܆ ܠܐ ܡܬܘܡ ܕܠܐ ܗܘܠܐ ܚܙ̣ܝܢ܀

ܡܐ ܕܗܘ̈ܢܐ ܩ̇ܒܠܘ ܬܐܘܪܝܐ ܕܥܠܝܗܘܢ܆ ܗܝܕܝܢ ܐܦ ܟܠܗ ܟܝܢܐ ܕܓܘ̈ܫܡܐ ܢܫ̣ܬܩܠ. ܘܗܟܢܐ ܕܠܐ ܗܘܠܐ ܬܗܘܐ ܬܐܘܪܝܐ ܕܥܠܘܗܝ܀

ܡܢܗܝܢ ܕܝܕܥ̈ܬܐ܆ ܚܕܐ ܡܢܗܝܢ ܠܐ ܡܬܘܡ ܬܗܘܐ ܒܗܘܠܐ. ܐܚܪܬܐ ܕܝܢ ܠܐ ܡܬܘܡ ܕܠܐ ܗܘܠܐ. ܗ̇ܝ ܕܝܢ ܗܘܠܢܝܬܐ܆ ܐܦ ܕܠܐ ܗܘܠܐ ܡܫܟܚܐ ܕܬܗܘܐ܀

ܡܢܗܘܢ ܕܗܘܝ̈ܐ ܩܕܡ ܕܝܢ̣ܐ܆ ܘܡܢܗܘܢ ܒܬܪ ܕܝ̣ܢܐ ܗ̣ܘܘ. ܘܥܠ ܩܕܡܝ̈ܐ ܐܢܫ ܠܐ ܐܘܕܥ. ܥܠ ܬܪ̈ܝܢܐ ܕܝܢ ܗ̇ܘ ܕܒܚܘܪܝܒ ܐܫܬܥ̇ܝ܀

ܡܢ ܐܝܠܝܢ ܕܠܫܘܡܠܝܐ ܓܡܝܪܐ ܕܒܝܫܬܐ ܡ̣ܛܘ܆ ܡܫܟܚܐ ܕܢܣܬ̇ܟܠ ܣܓܝܐܘܬ ܥ̈ܠܡܐ ܕܗ̣ܘܘ. ܠܐ ܓܝܪ ܡܫܟܚܐ ܕܡܢ ܫܠܝ ܒܠܐ ܝܕܥܬܐ ܢܫܬܡܠܐ܆ ܡܛܠ ܕܐܦ ܠܐ ܒܝܕܥܬܐ܀

ܗܘܝܐ ܕܓܘ̈ܫܡܐ܆ ܠܘ ܗܘܝܐ ܕܡܠܝ̈ܠܐ ܡ̇ܘܕܥ. ܐܠܐ ܟܝܢܐ ܕܫܡܗ̈ܐ ܡ̇ܥܠ. ܘܪܘܟܒܗܘܢ ܕܗܠܝܢ܆ ܦܘܪܫܢܐ ܕܛܘܟܣܗܘܢ ܕܗ̇ܢܘܢ ܡܚܘ̇ܐ܀

ܠܐ ܡܬܦܪ̈ܫܢܐ ܗ̇ܘܝܢ ܦܪ̈ܝܫܐ܇ ܟܕ ܬܐܘܪܝܐ ܕܗ̇ܢܝܢ ܕܦ̇ܪܫ ܐܢܘܢ ܢܣܒܘܢ܀

ܠܥܠ ܡܬܐܡܪܝܢ ܕܐܝܬܝܗܘܢ܆ ܐܝܠܝܢ ܕܩܢ̣ܝܢ ܓܘ̈ܫܡܐ ܩܠܝ̈ܠܐ. ܠܬܚܬ ܕܝܢ ܝܩܝܪ̈ܐ. ܘܠܥܠ ܡܢ ܩܕܡܝ̈ܐ܆ ܐܝܠܝܢ ܕܡܢܗܘܢ ܩܠܝܠܝܢ. ܬܚܬܝܝܢ ܕܝܢ ܡܢ ܬܪ̈ܝܢܐ܆ ܐܝܠܝܢ ܕܡܢܗܘܢ ܝܩܝܪ̈ܝܢ܀

ܪܘܚܐ ܕܩܘܕܫܐ: ܠܘ ܦܘܪܫܢܐ ܩܕܡܝܐ ܕܡܠܝ̈ܠܐ ܘܗܘܝܐ ܕܓܘ̈ܫܡܐ ܐܘܕܥ ܠܢ܆ ܐܠܐ ܦܘܪܫܢܗܘܢ ܕܗܫܐ ܕܡܠܝ̈ܠܐ ܘܫܘܚܠܦܐ ܕܓܘ̈ܫܡܐ ܓܠ̣ܐ ܠܢ܀

ܐܢܗ̣ܘ ܕܐܠܗܐ ܟܠܡܕܡ ܒܚܟܡܬܐ ܥ̣ܒܕ܆ ܠܝܬ ܡܕܡ ܕܡܢܗ ܐܬܒ̣ܪܝ܇ ܕܠܐ ܟܠ ܚܕ ܡܢܗܘܢ ܢܝܫܐ ܕܢܗܝܪ̈ܐ ܛܥܝܢ܀

ܬܐܘܪܝܐ ܡ̇ܢ ܕܠܐ ܡܓܫܡ̈ܐ܆ ܒܠܐ ܡܬܬܚܬܝܢܘܬܐ ܡܩ̇ܘܝܐ. ܗ̇ܝ ܕܝܢ ܕܥܠ ܓܘ̈ܫܡܐ ܡܢܗ̇ ܡܬܬܚܬܝܢܝܬܐ܇ ܘܡܢܗ̇ ܠܐ ܡܬܬܚܬܝܢܝܬܐ ܡܬܚܙܝܐ܀

ܐܢܗ̣ܘ ܕܝܕܥܬܐ ܕܐܝܠܝܢ ܕܠܘ ܡܢ ܫܠܝ ܡܣ̣ܬܪܩܝܢ ܩܕܡܝܬܐ ܐܝܬܝܗ̇܆ ܝܕܝܥܐ ܗܝ ܕܩܕܡܝܝܢ ܐܢܘܢ ܓܘ̈ܫܡܐ ܩܠܝ̈ܠܐ ܠܝܩܝܪ̈ܐ܀

ܐܝܟܢܐ ܕܗ̇ܘ ܕܒܡܠܬܗ ܥܠ ܨܒܘ̈ܬܐ ܕܥܠܡܐ ܕܥܬܝܕ ܓ̣ܠܐ ܠܢ: ܠܘ ܥܠ ܗܘܝܐ ܕܓܘ̈ܫܡܐ ܘܕܠܐ ܓܘ̈ܫܡܐ ܬܢ̇ܝ ܠܢ܆ ܗܟܢܐ ܘܗ̇ܘ ܕܥܠ ܗܘܝܗ ܕܥܠܡܐ ܗܢܐ ܐܘܕܥ܇ ܠܘ ܥܒ̣ܪܗܘܢ ܕܓܘ̈ܫܡܐ ܘܕܠܐ ܓܘ̈ܫܡܐ ܫܘܕܥ. ܐܠܐ ܦܘܪܫܢܗܘܢ ܘܫܘܚܠܦܗܘܢ ܡܬܢ̇ܐ܀

ܡܢ̣ܘ ܝ̣ܕܥ ܦܘܪܫܢܐ ܩܕܡܝܐ. ܘܡܢ̣ܘ ܚ̣ܙܐ ܗܘܝܐ ܕܓܘ̈ܫܡܐ܇ ܘܥ̈ܠܡܐ ܗ̇ܢܘܢ ܡܫܚܠܦ̈ܐ܇ ܗ̇ܢܘܢ ܕܡܢܗܘܢ ܡܢ ܚܝܠܘ̈ܬܐ ܩܕܝ̈ܫܐ ܐܬܬܪܣܝܘ܇ ܘܐܡܠܟܘ ܡܠܟܘܬܐ ܛܘܒܬܢܝܬܐ܀

ܟܠ ܟܡܐ ܕܕܝ̇ܢܐ ܕ̣ܢ ܠܡ̈ܬܕܝܢܢܐ܆ ܗܟܢܐ ܐܦ ܥܠܡ̈ܐ ܥ̣ܒܕ. ܘܗ̇ܘ ܕܝ̇ܕܥ ܡܢܝܢܐ ܕܕܝ̈ܢ̣ܐ܆ ܝ̇ܕܥ ܐܦ ܡܢܝܢܐ ܕܥܠܡ̈ܐ܀

ܐܝܟܢܐ ܕܛܟܣ̈ܐ ܡܫ̈ܚܠܦܐ ܦ̇ܪܫܝܢ ܠܡܠܝ̈ܠܐ ܡܢ ܚܕܕ̈ܐ܆ ܗܟܢܐ ܐܦ ܕܘܟܝ̈ܬܐ ܕܠܚ̇ܡ̈ܢ ܠܓܘ̈ܫܡܐ ܕܟܕܝܢܝܢ ܒܗܘܢ܀

ܕܝ̣ܢܐ ܐܚܪܝܐ܆ ܠܘ ܫܘܚܠܦܐ ܕܓܘ̈ܫܡܐ ܡܚܘ̇ܐ. ܐܠܐ ܥܛܝܗܘܢ ܡ̇ܘܕܥ܀

ܟܠ ܚܕ ܡܢ ܬܓܡ̈ܐ ܕܚܝ̈ܠܘܬܐ ܫܡܝ̈ܢܐ܆ ܐܘ ܟܠܗ ܡܢ ܥܠܝ̈ܐ ܐܘ ܟܠܗ̇ ܡܢ ܬܚܬܝ̈ܐ ܐܘ ܡܢ ܥܠܝ̈ܐ ܘܬܚܬܝ̈ܐ ܐܬܩܝ̇ܡ܀

ܗ̇ܘ ܡ̇ܢ ܕܠܘܬ ܝܕܥܬܐ ܪܕ̇ܐ܆ ܠܘܬ ܚܘܠܦܐ ܡܝܬܪܐ ܕܓܘ̈ܫܡܐ ܩ̇ܪܒ. ܗ̇ܘ ܕܝܢ ܕܠܘܬ ܠܐ ܝܕܥܬܐ܆ ܠܘܬ ܚܘܠܦܐ ܒܝܫܐ ܪܕ̇ܐ܀

ܡܫܚܠܦܬܐ ܡ̇ܢ ܐܝܬܝܗ̇܆ ܬܐܘܪܝܐ ܕܐܪܓܢܘܢ ܗܢܐ ܕܢܦܫܐ. ܣܓܝܐܬ ܕܝܢ ܫܘܚܠܦܐ܆ ܕܐܪ̈ܓܢܐ ܕܫܡܝ̈ܢܐ. ܝܬܝܪ ܕܝܢ ܡܢ ܗܠܝܢ܆ ܬܐܘܪܝܐ ܕܥܠ ܡܠܝ̈ܠܐ. ܒܗ̇ܝ ܕܗ̇ܢܘܢ ܡ̇ܢ ܡܥܡܪ̈ܐ ܐܢܘܢ ܕܝܕܘ̈ܥܬܢܐ. ܗ̇ܢܘܢ ܕܝܢ ܡܩܒ̈ܠܢܐ ܕܬܠܝܬܝܘܬܐ ܩܕܝܫܬܐ܀

ܝܕܥܬܐ ܡ̇ܢ ܝ̣ܠܕ̇ܬ ܠܝܕܥܬܐ. ܝ̇ܠܕܐ ܕܝܢ ܠܝܕܘܥܐ ܒܟܠܙܒܢ܀

ܠܐ ܗܘܐ ܓܘ̈ܫܡܐ ܕܚܝ̈ܠܘܬܐ ܪ̈ܘܚܢܐ. ܐܠܐ ܕܢܦ̈ܫܬܐ ܒܠܚܘܕ ܡܟ̣ܢܝܢ ܕܡܢ ܥܠܡܐ ܐܚܝܢܗܘܢ ܢܬܬܪܣܘܢ܀

ܐܝܟܢܐ ܕܒܪ̈ܓܫܢܘܬܐ ܡܬܚ̇ܠܦ̈ܢ: ܒܣܘ̈ܟܠܐ ܕܡܘ̈ܙܓܐ ܡܫܚ̈ܠܦܐ܆ ܗܟܢܐ ܐܦ ܗܘܢܐ ܡܬܚ̇ܠܦ܇ ܟܕ ܚܐ̇ܪ ܒܬܐܘܪ̈ܝܣ ܡܫܚ̈ܠܦܬܐ ܒܟܠ ܥܕܢ܀

ܐܝܬ ܐܡܬܝ܆ ܕܕܚܝ̈ܐ ܒܠܚܘܕ ܐܝܬܘܗܝ ܗܘܐ ܡܪܝܐ ܕܝܢ̇ܐ. ܠܐ ܕܝܢ ܢܗܘܐ ܐܡܬܝ܆ ܕܕܡܝ̈ܬܐ ܒܠܚܘܕ ܢܗܘܐ ܕܝܢ̇ܐ. ܘܢܗܘܐ ܬܘܒ ܐܡܬܝ܆ ܕܕܚܝ̈ܐ ܒܠܚܘܕ ܢܗܘܐ ܕܝܢ̇ܐ܀

ܐܢܗ̣ܘ ܕܚܝ̈ܐ ܡܩ̈ܒܠܢܐ ܐܢܘܢ ܕܝܬܝܕܘܬܐ ܘܕܒܨܝܪܘܬܐ܆ ܡܕܝܢ ܕܠܩܘܒܠܐ ܕܗܠܝܢ ܕܐܝܬܝܗܘܢ ܡܝ̈ܬܐ܆ ܝܕܝܥܐ ܗܝ ܕܗ̣ܢܝܢ ܗܠܝܢ ܡܩܒ̇ܠܝܢ. ܘܐܢ ܗܕܐ ܗܟܢܐ ܗܝ܆ ܓܘ̈ܫܡܐ ܬܘܒ ܡܫ̈ܚܠܦܐ ܢܗܘܘܢ܇ ܘܥܠܡ̈ܐ ܕܠܗܘܢ ܠܚ̇ܡܝܢ ܢܬܒܪܘܢ܀

ܕܒ̇ܪ̈ܝܐ ܡ̇ܢ܆ ܠܚܡܗܘܢ ܕܠܐ ܐܦ̈ܐ ܗܘ. ܘܫܩ̣ܝܗܘܢ ܕܒ̈ܒܐ ܡܠ̣ܐ. ܕܓܘܝ̈ܐ ܕܝܢ܆ ܠܚܡܗܘܢ ܠܚ̣ܡ ܐܦ̈ܐ ܗܘ. ܘܫ̣ܩܝܗܘܢ ܕܠܐ ܢܟܝܢܐ܀

ܕܙܒܢܐ ܗܝ ܡܬܙܝܥܢܘܬܐ ܕܓܘ̈ܫܡܐ. ܕܠܐ ܙܒܢܐ ܕܝܢ ܫܘܚܠܦܐ ܕܠܐ ܡܓܫܡ̈ܐ܀

ܬܐܘܪܝܐ ܕܥܠܡܐ ܗܢܐ ܡܬܪܓܫܢܐ܆ ܠܘ ܠܒܢܝ̈ܢܫܐ ܒܠܚܘܕ ܝܗܝܒܐ ܠܬܘܪܣܝܐ. ܐܠܐ ܠܟܝ̈ܢܐ ܡܠܝ̈ܠܐ ܐܚܪ̈ܢܐ܀

ܗ̇ܘ ܕܒܠܚܘܕܘܗܝ ܝ̇ܬܒ ܡܢ ܝܡܝܢܗ ܕܐܒܐ܆ ܒܠܚܘܕܘܗܝ ܐܝܬ ܠܗ ܝܕܥܬܐ ܕܝܡܝܢܐ܀

ܐܝܠܝܢ ܕܢܘܗܪܐ ܕܬܪ̈ܝܗܘܢ ܢܗܝܪ̈ܐ ܚܙ̣ܘ܆ ܗ̣ܢܘܢ ܢܚܙܘܢ ܠܢܘܗܪܐ ܩܕܡܝܐ ܘܛܘܒܬܢܐ܇ ܗ̇ܘ ܕܠܗ ܢܚܙܐ ܒܡܫܝܚܐ. ܟܕ ܒܝܕ ܚܘܠܦܐ ܡܝܬܪܐ ܢܩܘܡ ܩܕܡܘܗܝ܀

ܐܒܐ ܒܠܚܘܕܘܗܝ ܝ̇ܕܥ ܠܡܫܝܚܐ. ܘܒܪܐ ܒܠܚܘܕܘܗܝ ܠܐܒܐ. ܗܢܐ ܡ̇ܢ܆ ܐܝܟ ܕܠܝܚܝܕܝܐ ܒܝܚܝܕܝܘܬܐ. ܗܢܐ ܕܝܢ܆ ܐܝܟ ܕܠܚܕܝܘܬܐ ܘܝܚܝܕܝܘܬܐ܀

ܡܫܝܚܐ ܐܝܬܘܗܝ܆ ܗ̇ܘ ܕܒܠܚܘܕܘܗܝ ܐܝܬ ܠܗ ܒܗ ܠܝܚܝܕܝܘܬܐ܇ ܘܕܝ̣ܢܐ ܕܡܠܝ̈ܠܐ ܩܒ̇ܠ܀

ܝܚܝܕܝܘܬܐ ܐܝܬܝܗ̇܆ ܗ̇ܘ ܕܗܫܐ ܡܢ ܡܫܝܚܐ ܒܠܚܘܕ ܡܬܝܕܥ. ܗ̇ܘ ܕܝܕܥܬܗ ܐܝܬܝܝܬܐ ܗܝ܀

ܕܡܠܐܟ̈ܐ ܡ̇ܢ ܐܝܬܝܗ̇܆ ܕܒܟܠ ܙܒܢ ܢܬܬܪܣܘܢ ܒܬܐܘܪܝܐ ܕܗܘܝ̈ܐ. ܕܒܢܝ̈ܢܫܐ ܕܝܢ܆ ܠܘ ܒܟܠܙܒܢ. ܕܫܐܕ̈ܐ ܕܝܢ܆ ܠܐ ܒܙܒܢ ܘܠܐ ܕܠܐ ܙܒܢ܀

ܗܘ̈ܢܐ ܕܚܝ̈ܠܘܬܐ ܫܡܝ̈ܢܐ ܕܟ̣ܝܢ ܐܢܘܢ ܘܡܠ̣ܝܢ ܝܕܥܬܐ. ܘܓܘ̈ܫܡܝܗܘܢ ܢܘܗܪ̈ܐ ܐܢܘܢ܇ ܕܨܡ̇ܚܝܢ ܥܠ ܐܝܠܝܢ ܕܡܬܩ̇ܪܒܝܢ ܠܘܬܗܘܢ܀

ܗܘܢܐ ܥܪܛܠܝܐ ܐܝܬܘܗܝ܆ ܗ̇ܘ ܕܒܬܐܘܪܝܐ ܕܥܠܘܗܝ ܠܝܕܥܬܐ ܕܬܠܝܬܝܘܬܐ ܡܚܝܕ܀

ܟܠ ܚܕ ܡܢ ܚܘ̈ܠܦܐ ܣܝ̣ܡ ܕܢܬܪܣܐ ܠܡܠܝ̈ܠܐ. ܘܐܝܠܝܢ ܕܡܬܬܪܣܝܢ܆ ܠܚܘܠܦܐ ܡܝܬܪܐ ܐܬ̇ܝܢ. ܐܝܠܝܢ ܕܝܢ ܕܠܐ ܡܬܬܪܣܝܢ܆ ܠܘܬ ܚܘܠܦܐ ܒܝܫܐ܀

ܗܘܢܐ ܕܩ̣ܢܐ ܠܒܘܫܐ ܐܚܪܝܐ ܐܝܬܘܗܝ܆ ܗ̇ܘ ܕܬܐܘܪܝܐ ܕܟܠܗܘܢ ܗܘܝ̈ܐ ܬܪ̈ܝܢܐ ܒܠܚܘܕ ܝ̇ܕܥ܀

ܒܥܠܡܐ ܕܥܬܝܕ ܡܬܥܒܪܝܢ ܓܘ̈ܫܡܐ ܕܠܐ ܝܕܥܬܐ. ܒܗ̇ ܕܝܢ ܕܒܬܪܗ܆ ܬܘܣܦܬܐ ܕܢܘܪܐ ܘܕܐܐܪ ܡܩ̇ܒܠ ܚܘܠܦܐ. ܘܐܝܠܝܢ ܕܠܬܚܬ ܡܟܝܠ ܠܘܬ ܝܕܥܬܐ ܡܬܚܦ̇ܛܝܢ. ܐܢܗ̣ܘ ܕܒ̈ܬܝܗܘܢ ܕܥ̇ܘ̈ܠܐ ܡܩ̇ܒܠܝܢ ܕܘܟܝܐ܇ ܘܝܘܡܢܐ ܘܡܚܪ ܚܝ̈ܠܐ ܣܥ̇ܪ ܡܫܝܚܐ܇ ܘܒܝܘܡܐ ܕܬܠܬܐ ܡܫܬܡܠܐ܀

ܗܘܢܐ ܕܠܐ ܡܫܡܠܝ ܐܝܬܗܘܝ܆ ܗ̇ܘ ܕܥܕܟܝܠ ܣܢܝܩ ܥܠ ܬܐܘܪܝܐ܇ ܕܒܝܕ ܟܝܢܐ ܦܓܪܢܐ ܡܬܝܕܥܐ܀

ܚܟܡܬܗ ܡܠ̣ܝܬ ܦܘܪ̈ܫܢܐ ܕܡܫܝܚܐ܆ ܟܝܢܐ ܦܓܪܢܐ ܩܒ̇ܠ. ܕܝܠܗ ܕܝܢ ܠܝܬܘܗܝ ܡܩܒܠܢܐ. ܟܝܢܐ ܕܝܢ ܠܐ ܡܓܫܡܐ ܘܚܟܡܬܐ ܕܝܚܝܕܝܘܬܐ ܡܚܘ̇ܐ܆ ܘܡܩܒܠܢܐ ܕܝܠܗ̇ ܕܝܚܝܕܝܘܬܐ ܐܝܬܘܗܝ܀

ܗܘܢܐ ܓܡܝܪܐ ܐܝܬܘܗܝ܆ ܗ̇ܘ ܕܝܕܥܬܐ ܐܝܬܝܝܬܐ ܦܫܝܩܐܝܬ ܡܫܟܚ ܕܢܩܒ̇ܠ܀

ܠܚܟܡܬܐ ܡ̇ܢ ܕܝܚܝܕܝܘܬܐ܆ ܟܕ ܡܚܝܕܐ ܠܟܝܢܐ ܕܠܬܚܬ ܡܢܗ̇ ܝ̣ܕܥܢܢ. ܗ̣ܝ ܕܝܢ ܝܚܝܕܝܘܬܐ܆ ܕܬܬܚܙܐ ܟܕ ܡܥܪܙܠܐ ܒܡܕܡ ܡܢ ܗܘܝ̈ܐ ܠܐ ܡܫܟܚܐ. ܘܡܛܠ ܗܢܐ ܗܘܢܐ ܠܐ ܡܓܫܡܐ܆ ܒܐܝܠܝܢ ܕܠܘ ܓܘ̈ܫܡܐ ܐܢܘܢ ܚܙ̇ܐ ܠܬܠܝܬܝܘܬܐ ܩܕܝܫܬܐ܀

ܢܦܫܐ ܚ̇ܣܝܪܬܐ ܐܝܬܝܗ̇܆ ܐܝܕܐ ܕܚܝܠܗ̇ ܚܫܘܫܐ ܠܘܬ ܣܪܝܩܘܬܐ ܪܟ̣ܝܢ܀

ܐܢܗ̣ܘ ܕܫܘܡܠܝܗ ܕܗܘܢܐ: ܝܕܥܬܐ ܗܝ ܕܠܐ ܗܘܠܐ ܐܝܟ ܕܐܡ̇ܪܝܢ: ܝܕܥܬܐ ܕܝܢ ܕܠܐ ܗܘܠܐ ܬܠܝܬܝܘܬܐ ܗܝ ܒܠܚܘܕ܆ ܝܕܝܥܐ ܗܝ ܕܒܫܘܡܠܝܐ܆ ܘܠܐ ܡܕܡ ܡܢ ܗܘܠܐ ܡܟ̇ܬܪ. ܘܐܢ ܗܕܐ ܗܟܢܐ ܗܝ܆ ܗܘܢܐ ܡܟܝܠ ܥܪܛܠܝܐ ܢܗܘܐ ܚܙ̇ܝܐ ܕܬܠܝܬܝܘܬܐ܀

ܢܦܫܐ ܓܡܝܪܬܐ ܐܝܬܝܗ̇܆ ܐܝܕܐ ܕܚܝܠܗ̇ ܚܫܘܫܐ ܟܝܢܐܝܬ ܡ̇ܥܒܕ܀

ܐܝܠܝܢ ܕܒܬܐܘܪܝܐ ܕܠܐ ܗܘܠܐ ܗ̣ܘܘ܆ ܗܠܝܢ ܐܦ ܒܗ ܒܛܟܣܐ ܐܝܬܝܗܘܢ. ܠܘ ܕܝܢ ܐܝܠܝܢ ܕܒܗ ܟܕ ܒܗ ܒܛܟܣܐ ܐܝܬܝܗܘܢ܇ ܡܢ ܟܕܘ ܐܦ ܒܗ̇ ܒܬܐܘܪܝܐ ܕܠܐ ܗܘܠܐ ܐܝܬܝܗܘܢ. ܡܫܟܚܐ ܓܝܪ ܛܐܘܣ ܕܢܗܘܘܢ ܒܬܐܩܪܝܐ ܕܥܠ ܡ̈ܬܝܕܥܢܐ. ܗ̇ܝ ܕܐܦ ܗ̣ܝ ܥܠ ܗܘܢܐ ܥܪܛܠܝܐ ܣܢܝܩܐ܇ ܐܢܗ̣ܘ ܕܐܦ ܡܢ ܩܕܝܡ ܥܪܛܐܝܬ ܚܙ̣ܗ̇܀

ܫܘܢܩܐ ܐܝܬܘܗܝ܆ ܟܪܝܘܬܐ ܚܡܝܡܬܐ ܕܡܕܟ̇ܝܐ ܡܢ̇ܬܗ̇ ܚܫܘܫܬܐ ܕܢܦܫܐ܀

ܓܘܢܐܝܬ ܡ̇ܢ ܩ̣ܢܝܢ ܬܐܘܪܝܐ ܩܕܡܝܬܐ ܘܬܪܝܢܬܐ܇ ܕܗ̣ܘܐ ܐܝܬ ܠܗܝܢ ܚܙ̇ܝܐ ܥܪܛܠܝܐ. ܝܚܝܕܐܝܬ ܕܝܢ ܗ̇ܝ ܚܕܐ ܕܠܐ ܗܘܠܐ. ܐܚܪܝܬܐ ܕܝܢ ܒܗܘܠܐ ܐܝܬܝܗ̇܀

ܚܘܠܦܐ ܕܐܪ̈ܓܢܐ ܐܝܬܘܗܝ܆ ܫܘܢܝܐ ܕܡܢ ܓܘ̈ܫܡܐ ܠܓܘ̈ܫܡܐ܇ ܐܝܟ ܡܫܘܚܬܐ ܕܛܟܣ̈ܐ ܕܗ̇ܢܘܢ ܕܡܬܟܕܢܝܢ ܥܡܗܘܢ܀

ܓܘܢܐܝܬ ܡ̇ܢ ܐܝܬܝܗ̇܇ ܕܬܐܘܪܝܐ ܕܬܪ̈ܬܝܢ ܘܕܬܠܬ ܗ̇ܝ ܕܗܘܠܐ. ܝܚܝܕܐܝܬ ܕܝܢ ܗ̇ܝ ܕܚܕܐ܆ ܗܘܢܐ ܥܪܛܠܝܐ ܐܝܬ ܠܗ̇ ܘܕܝܠܗ ܟܕ ܕܝܠܗ ܕܛܟܣܐ. ܐܚܪܬܐ ܕܝܢ ܥܡ ܦܓܪܐ ܘܒܛܟܣ̈ܐ ܡܫܚܠܦ̈ܐ܀

ܡܬܙܝܥܢܘܬܐ ܩܕܡܝܬܐ ܕܡܠܝ̈ܠܐ ܐܝܬܝܗ̇܆ ܦܘܪܫܢܗ ܕܗܘܢܐ ܡܢ ܝܚܝܕܝܘܬܐ ܕܒܗ܀

ܓܘܢܐܝܬ ܡ̇ܢ ܐܝܬܝܗ̇܇ ܕܟܠܗܘܢ ܥܠܡ̈ܐ ܡܢ ܐܪܒܥܐ ܐܣܛܘ̈ܟܣܐ ܢܬܩܝ̇ܡܘܢ. ܝܚܝܕܐܝܬ ܕܝܢ܆ ܕܟܠ ܚܕ ܡܢܗܘܢ ܫܘܚܠܦܐ ܕܡܘܙܓܐ܀

ܝܕܥܬܐ ܕܟܝܢܐ ܩܕܡܝܐ ܐܝܬܝܗ̇܆ ܬܐܘܪܝܐ ܪܘܚܢܝܬܐ܇ ܗ̇ܝ ܕܒܗ̇ ܐܬܚ̇ܫܚ ܒܪܘܝܐ ܘܥ̣ܒܕ ܗܘ̈ܢܐ ܒܠܚܘܕ܇ ܕܐܝܬܝܗܘܢ ܡܩ̈ܒܠܢܐ ܕܟܝܢܗ܀

ܓܘܫܡܐ ܪܘܚܢܐ ܘܕܠܩܘܒܠܗ܆ ܠܐ ܗܘܐ ܡܢ ܗܕܡܝ̈ܢ ܐܘ ܡܢ ܡܢܘ̈ܬܢ ܗ̇ܘܐ. ܐܠܐ ܡܢ ܓܘܫܡܐ. ܠܐ ܗܘܐ ܓܝܪ ܫܘܢܝܐ ܕܡܢ ܗ̈ܕܡܐ ܠܗ̈ܕܡܐ ܐܝܬܘܗܝ ܚܘܠܦܐ. ܐܠܐ ܕܡܢ ܡܘܙܓܐ ܡܝܬܪܐ ܐܘ ܒܝܫܐ܇ ܠܘܬ ܚܘܠܦܐ ܡܝܬܪܐ ܐܘ ܒܝܫܐ܀

ܝܕܥܬܐ ܕܥܠ ܟܝܢܐ ܬܪܝܢܐ܆ ܬܐܘܪܝܐ ܪܘܚܢܝܬܐ ܐܝܬܝܗ̇܇ ܗ̇ܝ ܕܒܗ̇ ܐܬܚ̇ܫܚ ܡܫܝܚܐ܇ ܘܒ̣ܪܐ ܟܝܢܐ ܕܓܘ̈ܫܡܐ ܘܥܠܡ̈ܐ ܡܢܗ܀

ܬܐܘܪܝܐ ܩܕܡܝܬܐ ܕܟܝܢܐ܆ ܡܟ̣ܢܐ ܕܬܦܪܘܫ ܡܢ ܗܘܢܐ ܘܕܠܐ ܬܦܪܘܫ. ܗ̇ܝ ܓܝܪ ܕܡܬܝ̇ܠܦܐ܆ ܡܬܦܪܫܢܝܬܐ ܐܝܬܝܗ̇. ܗ̇ܝ ܕܝܢ ܕܒܗܘܢܐ ܝܕܘܥܗ̇ ܡܬܚܙܝܐ܆ ܠܐ ܡܬܦܪܫܢܝܬܐ ܡܚ̣ܘܝܐ܀

ܢܦܫܐ ܐܝܬܝܗ̇܆ ܗܘܢܐ ܕܒܡܗܡܝܢܘܬܗ ܢ̣ܦܠ ܡܢ ܝܚܝܕܝܘܬܐ܇ ܘܡܢ ܠܐ ܙܗܝܪܘܬܗ ܠܛܟܣܐ ܕܦܘܠܚܢܐ ܢ̣ܚܬ܀

ܢܝܫܐ ܕܛܟܣܐ ܐܢܫܝܐ ܓܘܫܡܐ ܐܢܫܝܐ. ܢܝܫܐ ܕܝܢ ܕܟܠ ܚܕ ܚܕ ܡܢ ܛܟܣ̈ܐ ܪܒܘܬܐ. ܘܐܣܟܡ̈ܐ. ܘܓܘ̈ܢܐ. ܘܡܘ̈ܙܓܐ. ܘܚܝ̈ܠܐ ܟܝܢܝ̈ܐ. ܘܡܚܝܠܘܬܐ. ܘܙܒܢܐ. ܘܐܬܪܐ. ܘܐܒ̈ܗܐ. ܘܬܪ̈ܒܝܬܐ. ܘܦܘܪ̈ܣܐ. ܘܚܝ̈ܐ. ܘܡܘܬܐ. ܘܐܝܠܝܢ ܕܠܗܠܝܢ ܢܩܝ̈ܦܢ܀

ܗܘܢܐ ܐܝܬܘܗܝ܆ ܚܙ̇ܝܐ ܕܬܠܝܬܝܘܬܐ ܩܕܝܫܬܐ܀

ܕܡܢܐ ܗܝ ܚܕܝܘܬܗ ܕܗܘܢܐ܆ ܡܫܟܚܐ ܗܝ ܠܡܐܡܪ. ܕܡ̇ܢܘ ܕܝܢ ܟܝܢܗ ܠܐ ܡܬܐܡܪ. ܗ̇ܘ ܓܝܪ ܕܠܘ ܡܢ ܚܙܬܐ ܘܠܘ ܡܢ ܗܘܠܐ ܐܬܩܝ̇ܡ܆ ܠܝܬܝܗ̇ ܝܕܥܬܗ ܕܡܘܙܓܐ܀

ܨܠܡܐ ܕܐܠܗܐ ܐܝܬܘܗܝ܆ ܠܘ ܗ̇ܘ ܕܡܩܒܠܢܐ ܗܘ ܕܚܟܡܬܗ. ܗܟܢܐ ܓܝܪ ܐܦ ܟܝܢܐ ܦܓܪܢܐ ܐܝܬܘܗܝ ܗܘܐ ܨܠܡܐ ܕܐܠܗܐ. ܐܠܐ ܗ̇ܘ ܕܗ̣ܘܐ ܡܩܒܠܢܐ ܕܝܠܗ̇ ܕܝܚܝܕܘܬܐ܇ ܐܝܬܘܗܝ ܨܠܡܐ ܕܐܠܗܐ܀

ܠܚܕܝܘܬܗ ܟܝܢܝܬܐ ܕܗܘܢܐ܆ ܫܡܐ ܕܠܐ ܡܝܘܬܘܬܐ ܡ̇ܘܕܥ. ܠܠܐ ܡܬܚܒܠܢܘܬܗ ܕܝܢ܆ ܗ̇ܝ ܕܠܥܠܡ ܐܝܬܘܗܝ. ܘܠܫܡܐ ܩܕܡܝܐ܆ ܝܕܥܬܐ ܕܬܠܝܬܝܘܬܐ ܠܘ̣ܝܐ. ܠܗ̇ܘ ܕܝܢ ܕܬܪ̈ܝܢ܆ ܬܐܘܪܝܐ ܩܕܡܝܬܐ ܕܟܝܢܐ܀

ܫܐܕܐ ܐܝܬܘܗܝ܆ ܟܝܢܐ ܡܠܝܠܐ܇ ܗ̇ܘ ܕܡܛܠ ܝܬܝܪܘܬܐ ܕܚܡ̣ܬܐ ܢ̣ܦܠ ܡܢ ܦܘܠܚܢܐ ܕܐܠܗܐ܀

ܝܕܥܬܐ ܠܗܘܢܐ ܡܐܣܝܐ. ܠܚ̣ܡܬܐ ܕܝܢ ܚ̣ܘܒܐ. ܘܠܪܓܬܐ ܢܟܦܘܬܐ. ܥܠ̣ܬܐ ܕܝܢ ܕܩܕܡܝܐ ܬܪܝܢܐ܆ ܘܕܬܪܝܢܐ ܬܠܝܬܝܐ܀

ܥܠܡܐ ܐܝܬܘܗܝ܆ ܩܘܝܡܐ ܟܝܢܝܐ܇ ܕܐܚܝܕ ܓܘ̈ܫܡܐ ܡܫܚܠܦ̈ܐ ܘܡܦܪ̈ܫܐ ܕܡܠܝ̈ܠܐ ܡܛܠ ܝܕܥܬܐ ܕܐܠܗܐ܀

ܟܘܟܒ̈ܐ ܒܫܘܒܚܐ ܡܝܬܪܝܢ ܡܢ ܚܕܕ̈ܐ܆ ܘܠܐ ܗܘܐ ܒܓܘ̈ܫܡܐ. ܪܒܘܬܗܘܢ ܕܝܢ ܘܐܣܟܡܝ̈ܗܘܢ ܘܪܚܝܩܘܬܗܘܢ ܕܡܢ ܚܕܕ̈ܐ ܘܡܪ̈ܕܝܬܗܘܢ ܡܫܚܠܦ̈ܬܐ. ܘܗ̇ܝ ܕܡܢܗܘܢ ܠܓܘ ܡܢ ܛܠܠܗ̇ ܕܐܪܥܐ: ܘܡܢܗܘܢ ܠܒܪ ܡܢܗ: ܘܡܢܗܘܢ ܒܬܚܘܡܐ ܡܦܪܫܢܐ܆ ܡ̇ܘܕܥܐ ܥܠ ܛܟܣܝ̈ܗܘܢ ܘܥܠ ܡܕܒܪܢܘܬܐ ܕܐܬܗܝܡܢܘ ܡܢ ܐܠܗܐ܀

ܕܝ̣ܢܐ ܕܐܠܗܐ ܐܝܬܘܗܝ܆ ܗܘܝܐ ܕܥܠܡܐ܇ ܕܐܝܟ ܡܫܘܚܬܐ ܕܟܠ ܚܕ ܡܢ ܡܠܝ̈ܠܐ ܦܓܪܐ ܝ̇ܗܒ ܠܗ܀

ܡܢܗ̇ ܕܢܘܪܐ ܐܝܬܘܗܝ ܡܘܩܕܢܐ ܘܡܢܗ̇ ܠܐ ܡܘܩܕܢܐ. ܘܡܘܩܕܢܐ ܐܝܬܘܗܝ܆ ܗ̇ܘ ܕܠܗܘܠܐ ܡܬܪܓܫܢܝܬܐ ܡ̇ܘܩܕ. ܠܐ ܡܘܩܕܢܐ ܕܝܢ܆ ܡܓܡܪܢܐ ܕܫܓܝܫܘܬܐ ܕܫܓܝ̈ܫܐ. ܘܩܕܡܝܐ ܡ̇ܢ ܠܐ ܡ̇ܘܩܕ ܟܠܗ ܡܠܘܐܐ ܡܬܪܓܫܢܐ. ܬܪܝܢܐ ܕܝܢ ܡܘܩܕܢܐ ܗܘ ܕܟܠܗ ܡܠܘܐܐ ܕܫܓܝܫܘܬܐ܀

ܩܪܢܐ ܐܚܪܝܬܐ ܐܝܬܝܗ̇܆ ܦܘܩܕܢܗ ܕܕܝܢ̇ܐ܇ ܕܟ̣ܕܢ ܠܡܠܝ̈ܠܐ ܒܦܓܪ̈ܐ ܛܒ̈ܐ ܐܘ ܒܝ̈ܫܐ܇ ܕܒܬܪܗ ܠܐ ܢܗܘܘܢ ܦܓܪ̈ܐ ܒܝ̈ܫܐ܀

ܥܠ ܬܐܘܪܝܐ ܕܗܘܝ̈ܐ: ܘܥܠ ܝܕܥܬܐ ܕܬܠܝܬܝܘܬܐ ܐܢܚܢܢ ܘܫܐܕ̈ܐ ܡ̇ܕܝܠܝܢܢ ܩܪܒܐ ܪܒܐ ܥܡ ܚܕܕ̈ܐ. ܗܠܝܢ ܟܕ ܨ̇ܒܝܢ ܕܢܥܘܟܘܢ ܠܢ ܕܠܐ ܢܕܥ. ܚܢܢ ܕܝܢ ܟܕ ܡܬܚܦ̇ܛܝܢܢ ܕܢ̣ܐܠܦ܀

ܬܐܘܪܝܐ ܐܝܬܝܗ̇܆ ܝܕܥܬܐ ܪܘܚܢܝܬܐ ܕܐܝܠܝܢ ܕܗ̣ܘܐ ܘܗ̇ܘܝܢ܇ ܕܡܥ̇ܠܝܐ ܠܗܘܢܐ ܠܘܬ ܛܟܣܗ ܩܕܡܝܐ܀

ܐܝܠܝܢ ܕܚܦܝܛܝܢ ܗܫܐ ܠܡܬܩ̇ܪܒܘ ܠܝܕܥܬܐ܆ ܓܘܢܐܝܬ ܩܢ̣ܝܢ ܠܡܝ̈ܐ ܘܠܡܫ̣ܚܐ ܡܒ̇ܣܡܐ. ܝܚܝܕܐܝܬ ܕܝܢ ܘܝܬܝܪܐܝܬ ܩܢ̣ܝܢ ܒܢܝ̈ܢܫܐ ܠܡܫ̣ܚܐ܀

ܫܡܫܐ ܡܬܝܕܥܢܐ ܐܝܬܘܗܝ܆ ܟܝܢܐ ܡܠܝܠܐ܇ ܗ̇ܘ ܕܢܘܗܪܐ ܩܕܡܝܐ ܘܛܘܒܬܢܐ ܐܚܝܕ ܒܗ܀

ܐܝܟܢܐ ܕܠܝܬ ܠܡܐܡܪ ܕܐܝܬ ܗܘܢܐ ܕܩܫܝܫ ܡܢ ܗܘܢܐ܆ ܗܟܢܐ ܐܦ ܠܐ ܡܢ ܦܓܪ̈ܐ ܦܠܘ̈ܚܐ ܦܓܪ̈ܐ ܪ̈ܘܚܢܐ. ܐܢ ܚܕ ܗܘ ܚܘܠܦܐ ܥܠ̣ܬܐ ܕܬܪ̈ܝܗܘܢ ܐܪ̈ܓܢܐ܀

ܕܝ̣ܢܐ ܕܡܠܐܟ̈ܐ ܐܝܬܘܗܝ܆ ܝܕܥܬܐ ܕܥܠ ܟܘܪ̈ܗܢܐ ܢܦ̈ܫܢܐ܇ ܕܠܘܬ ܚܘܠܡܢܐ ܡܥ̇ܠܝܐ ܠܐܝܠܝܢ ܕܐܬܡ̇ܚܝܘ܀

ܚܕ ܗܘ ܚܘܠܦܐ ܕܒܪܦܦ ܥܝܢܐ܇ ܕܐܝܟ ܡܫܘܚܬܐ ܠܟܠ ܐܢܫ ܡܢ ܕܝ̣ܢܐ ܡܬܩ̇ܪܒ܇ ܘܓܘܫܡܐ ܕܟܠܢܫ ܡ̇ܬܩܢ ܐܝܟ ܡܫܘܚܬܐ ܕܛܟܣܗ. ܕܢܐܡܪ ܓܝܪ ܐܢܫ: ܕܒܡܢܘ̈ܬܐ ܐܝܬ ܚܘܠܦܐ ܠܒܪ ܡܢ ܗܢܐ ܕܓܘܐ܆ ܗܕܐ ܕܐܝܢܐ ܕܠܐ ܝ̇ܕܥ ܣܘ̈ܟܠܐ ܕܕܝ̣ܢܐ ܐܝܬܝܗ̇܀

ܚܘܠܦܐ ܕܙܕܝ̈ܩܐ ܐܝܬܘܗܝ܆ ܫܘܢܝܐ ܕܡܢ ܦܓܪ̈ܐ ܦܠܘ̈ܚܐ ܘܚܙ̇ܝ̈ܐ܇ ܠܘܬ ܦܓܪ̈ܐ ܚܙ̇ܝ̈ܐ ܐܘ ܕܝܬܝܪܐܝܬ ܚܙ̇ܝܝܢ܀

ܠܐ ܡܬܟ̇ܠܠ ܗܘܢܐ ܒܟܠܝܠܐ ܕܝܕܥܬܐ ܐܝܬܝܝܬܐ܇ ܐܠܐ ܫ̣ܕܐ ܡܢܗ ܠܠܐ ܝܕܥܬܐ ܕܬܪ̈ܝܗܘܢ ܐܓܘ̈ܢܐ܀

ܚܘܠܦܐ ܕܚܛܝ̈ܐ ܐܝܬܘܗܝ܆ ܫܘܢܝܐ ܕܡܢ ܦܓܪ̈ܐ ܦܠܘ̈ܚܐ ܐܘ ܫܐܕܢܝ̈ܐ܇ ܠܘܬ ܐܝܠܝܢ ܕܝܬܝܪܐܝܬ ܝܩܝܪ̈ܝܢ ܘܚܫܘܟܝܢ܀

ܟܠܗܘܢ ܚܘ̈ܠܦܐ ܕܡܢ ܩܕܡ ܥܠܡܐ ܕܥܬܝܕ ܗ̣ܘܘ܆ ܠܡܢܗܘܢ ܥܡ ܦܓܪ̈ܐ ܡܝܬܪ̈ܐ ܟ̣ܕܢܗ ܘܡܢܗܘܢ ܥܡ ܒܝ̈ܫܐ. ܐܝܠܝܢ ܕܝܢ ܕܒܬܪ ܗܢܐ ܕܐܬ̇ܐ ܗ̇ܘܝܢ܆ ܠܟܠܗܘܢ ܥܡ ܐܪ̈ܓܢܐ ܝܕܘ̈ܥܬܢܐ ܟ̇ܕܢܝܢ܀

ܣܗܪܐ ܡܬܝܕܥܢܐ ܐܝܬܘܗܝ܆ ܟܝܢܐ ܡܠܝܠܐ܇ ܕܡܢ ܫܡܫܐ ܕܙܕܝܩܘܬܐ ܡܬܢ̇ܗܪ܀

ܟܠ ܕܗ̣ܘܐ ܡܩܒܠܢܐ ܕܝܕܥܬܐ ܕܐܠܗܐ: ܘܝܬܝܪ ܡܢ ܗܕܐ ܝܕܥܬܐ ܡܝ̇ܩܪ ܠܠܐ ܝܕܥܬܐ܆ ܠܗܢܐ ܐܡ̇ܪܝܢ ܕܐܝܬܘܗܝ ܒܝܫܐ. ܠܝܬܘܗܝ ܓܝܪ ܟܝܢܐ ܦܓܪܢܐ ܡܩܒܠܢܐ ܕܝܕܥܬܐ. ܡܕܝܢ ܘܠܐ ܡܕܡ ܡܢ ܦܓܪ̈ܐ܇ ܘ̇ܠܐ ܕܢܬܐܡܪ ܕܐܝܬܘܗܝ ܒܝܫܐ܀

ܒܗ ܒܪܦܦ ܥܝܢܐ܆ ܘܟܪ̈ܘܒܐ ܟܪ̈ܘܒܐ. ܘܓܒܪܝܐܝܠ ܓܒܪܝܐܝܠ. ܘܒܪܢܫܐ ܒܪܢܫܐ ܐܫܬܡܗܘ܀

ܡܢ ܩܕܝܡ ܠܗܘܢܐ܆ ܐܠܗܐ ܠܐ ܡܬܚܒܠܢܐ ܐܝܬ ܗܘܐ ܠܗ ܡܠܦܢܐ ܕܣܘ̈ܟܠܐ ܕܠܐ ܗܘܠܐ. ܗܫܐ ܕܝܢ ܐܪܓܫܬܐ ܡܬܚܒܠܢܝܬܐ܇ ܩ̇ܒܠ ܡܠܦܢܐ ܕܣܘ̈ܟܠܐ ܗܘ̈ܠܢܝܐ܀

ܝܕܥܬܐ ܪܘܚܢܝܬܐ ܐܝܬܝܗ̇܆ ܓܦ̈ܐ ܕܗܘܢܐ. ܝܕܘܥܐ ܐܝܬܘܗܝ ܗܘܢܐ ܕܓܦ̈ܐ. ܘܐܢ ܗܕܐ ܗܟܢܐ ܗܝ܆ ܢܝܫܐ ܕܐܝ̈ܠܢܐ ܛܥܝ̈ܢܝܢ ܣܘܥܪ̈ܢܐ. ܗܠܝܢ ܕܥܠܝܗܘܢ ܫܟ̇ܢ ܗܘܢܐ܇ ܘܒܛܪ̈ܦܝܗܘܢ ܡܬܦܪܓܐ܆ ܘܡܢ ܦܐܪ̈ܝܗܘܢ ܡܬܒ̇ܣܡ. ܟܕ ܡܬܚܦ̇ܛ ܒܟܠܫܥ ܠܘܬ ܐܝܠܢܐ ܕܚܝ̈ܐ܀

ܐܝܟܢܐ ܕܐܝܠܝܢ ܕܐܬܘ̈ܬܐ ܠܛܠܝ̈ܐ ܡ̇ܫܠܡܝܢ: ܒܕܦ̈ܐ ܪܫ̇ܡܝܢ ܠܗܝܢ܆ ܗܟܢܐ ܐܦ ܡܫܝܚܐ ܟܕ ܡ̇ܠܦ ܠܡܠܝ̈ܠܐ ܚܟܡܬܗ܇ ܒܟܝܢܐ ܕܦܓܪܐ ܪܫܡ܀

ܗ̇ܘ ܕܥܬܝܕ ܕܢܚܙܐ ܠܟ̈ܬܝܒܬܐ܆ ܥܠ ܢܘܗܪܐ ܣܢܝܩ. ܘܗ̇ܘ ܕܥܬܝܕ ܕܢ̣ܐܠܦ ܚܟܡܬܐ ܕܗܘܝ̈ܐ܆ ܥܠ ܚܘ̣ܒܐ ܪܘܚܢܝܐ ܣܢܝܩ܀

ܐܢ ܟܠܗ̇ ܒܝܫܘ̇ܬܐ ܡܢ ܣܟܘܠܬܢܘܬܐ ܘܡܢ ܚܡ̣ܬܐ ܘܡܢ ܪܓܬܐ ܡܬܝܠܕܐ: ܒܗܘܢ ܕܝܢ ܒܗܠܝܢ ܚܝ̈ܠܐ ܡܫܟܚܐ ܗܝ ܕܢܬܚܫ̇ܚ ܛܒܐܝܬ ܘܒܝܫܐܝܬ܆ ܡܕܝܢ ܝܕܝܥܐ ܗܝ ܕܒܚܫܚܬܐ ܕܠܒܪ ܡܢ ܟܝܢܐ ܕܗܠܝܢ ܡܢܘ̈ܬܐ ܘܠܝܬܐ ܡܬܝܠܕܐ ܒܝܫܬܐ. ܐܢ ܕܝܢ ܗܕܐ ܗܟܢܐ ܐܝܬܝܗ̇ ܐܝܟ ܡܐ ܕܐܦ ܐܝܬܝܗ̇܆ ܠܝܬ ܡܕܡ ܕܡܢ ܐܠܗܐ ܐܬܒ̣ܪܝ܇ ܘܐܝܬܘܗܝ ܒܝܫܬܐ܀

ܐܬ̇ܐ ܕܡܕܢܚܐ ܦܠܐܬܐ ܗܝ ܕܩܕܝ̈ܫܐ. ܐܬ̇ܐ ܕܝܢ ܕܡܥܪܒܐ ܢܦ̈ܫܬܐ ܕܒܫܝܘܠ. ܫܘܡܠܝ ܕܝܢ ܦܘܢܝܐ ܕܪܗܛܐ ܕܟܠ ܬܠܝܬܝܘܬܐ ܩܕܝܫܬܐ܀

ܡܝܬܪ̈ܬܐ ܡܚܘ̇ܝܢ ܠܗ ܠܗܘܢܐ ܬܐܘܪܝܐ ܟܝܢܝܬܐ ܕܬܪ̈ܬܝܢ. ܘܗܕܐ ܡܚܘ̇ܝܐ ܠܗ ܠܗ̇ܝ ܩܕܡܝܬܐ. ܘܗ̇ܝ ܬܘܒ ܩܕܡܝܬܐ ܠܝܚܝܕܝܘܬܐ ܩܕܝܫܬܐ܀

ܟܘܟܒ̈ܐ ܡ̈ܬܝܕܥܢܐ ܐܝܬܝܗܘܢ܆ ܟܝ̈ܢܐ ܡܠܝ̈ܠܐ܇ ܕܐܬܗܝܡܢܘ ܠܡܢ̇ܗܪܘ ܠܐܝܠܝܢ ܕܒܚܫܘܟܐ ܐܝܬܝܗܘܢ܀

ܐܝܢܐ ܕܐܝܕܥܬܗ ܡܣܝܟܬܐ ܗܝ܆ ܐܦ ܠܐ ܝܕܥܬܗ ܡܣܝܟܬܐ ܗܝ. ܘܐܝܢܐ ܕܠܐ ܝܕܥܬܗ ܠܐ ܡܣܝܟܬܐ ܗܝ܆ ܐܦ ܐܝܕܥܬܗ ܠܐ ܡܣܝܟܬܐ ܗܝ܀

ܐܢ ܗ̣ܘ ܕܒܡܬܛܥ̈ܡܢܝܬܐ ܠܝܬ ܕܚ̣ܠܐ ܡܢ ܕܒܫܐ ܘܡܢ ܟܟܪܝܬܐ:

ܝܬܝܪ ܕܝܢ ܡܢ ܗܠܝܢ ܡܬܐܡܪܐ ܝܕܥܬܐ ܕܐܠܗܐ܆ ܝܕܝܥܐ ܗܝ ܕܠܝܬ ܡܕܡ ܡܢ ܟܠ ܕܒܐܪܥܐ ܕܝ̇ܗܒ ܗܢܝܘܬܐ ܐܝܟ ܝܕܥܬܐ ܕܐܠܗܐ܀

ܡܠܐܟ̈ܐ ܐܝܠܝܢ ܕܠܐܢܫ̈ܐ ܡܢ ܐܪܥܐ ܬܠܡܕܘ܆ ܠܗܘܢ ܠܗܠܝܢ ܒܥܠܡܐ ܕܥܬܝܕ ܝܪ̈ܘܬܐ ܕܡܕܒܪܢܘܬܗܘܢ ܢܩܝܡܘܢ܀

ܐܝܟܢܐ ܕܩܪܢܐ ܩܕܡܝܬܐ ܗܘܝܐ ܕܓܘ̈ܫܡܐ ܐܘܕܥ̇ܬ܆ ܗܟܢܐ ܐܦ ܩܪܢܐ ܐܚܪܝܬܐ ܚܒ̇ܠܐ ܕܓܘ̈ܫܡܐ ܡ̇ܘܕܥܐ܀

ܟܠܗ̇ ܬܐܘܪܝܐ ܟܝܢܝܬܐ ܕܬܪ̈ܬܝܢ܆ ܢܝܫܐ ܛܥܝܢܐ ܕܚ̇ܠܒܐ. ܩܕܡܝܬܐ ܕܝܢ ܕܕܒܫܐ. ܘܗܕܐ ܗܝ ܐܪܥܐ ܕܡ̇ܪܕܝܐ ܚ̇ܠܒܐ ܘܕܒܫܐ܀

ܐܝܟܢܐ ܕܢܝܚܬܐ ܩܕܡܝܬܐ ܕܐܠܗܐ܆ ܒܨܝܪܘܬ ܒܝܫܘܬܐ ܘܛܘܠܩܐ ܕܓܘ̈ܫܡܐ ܥܒܝ̈ܐ ܡ̇ܘܕܥܐ܆ ܗܟܢܐ ܐܦ ܬܪܝܢܝܬܐ܇ ܚܒ̇ܠܐ ܕܓܘ̈ܫܡܐ ܗܘܝ̈ܐ ܬܪ̈ܝܢܐ܇ ܘܒܨܝܪܘܬ ܠܐ ܝܕܥܬܐ ܡ̇ܘܕܥܐ܀

ܡܢ ܬܐܘܪܝܐ ܗ̇ܝ ܕܡܢܗ̇ ܐܬܩܝ̇ܡ ܗܘܢܐ܆ ܕܢܬܩܝ̇ܡ ܡܢܗ̇ ܡܕܡ ܐܚܪܢܐ ܠܐ ܡܫܟܚܐ܇ ܘܐܠܐ ܐܦ ܗ̣ܘ ܡܩܒܠܢܐ ܗܘ ܕܬܠܝܬܝܘܬܐ܀

ܕܗܘܢܐ ܗܝ ܥܪܛܠܝܐ ܕܢܐܡܪ ܡ̇ܢܘ ܟܝܢܗ. ܘܥܠ ܗܢܐ ܫܘܐܠܐ ܗܫܐ ܠܝܬ ܡܦܩ ܒܪܘܚܐ. ܠܚܪܬܐ ܕܝܢ ܐܦܠܐ ܗ̣ܘ ܫܘܐܠܐ܀

ܐܝܟܢܐ ܕܒܪܢܫܐ ܟܕ ܩ̇ܒܠ ܡܦܘܚܝܬܐ: ܗ̣ܘܐ ܠܢܦܫܐ ܚܝ̇ܐ܆ ܗܟܢܐ ܐܦ ܗܘܢܐ ܟܕ ܢܩܒ̇ܠ ܠܬܠܝܬܝܘܬܐ ܩܕܝܫܬܐ܇ ܗ̇ܘܐ ܠܗܘܢܐ ܚܝ̇ܐ܀

ܝܪܬܘܬܗ ܕܡܫܝܚܐ܆ ܝܕܥܬܐ ܗܝ ܕܝܚܝܕܝܘܬܐ. ܐܢ ܕܝܢ ܟܠܗܘܢ ܢܗܘܘܢ ܒܢܝ̈ ܝܪܬܘܬܗ ܕܡܫܝܚܐ܆ ܟܠܗܘܢ ܢܕܥܘܢ ܠܝܚܝܕܝܘܬܐ ܩܕܝܫܬܐ. ܠܐ ܕܝܢ ܡܫܟܚܐ ܕܢܗܘܘܢ ܒܢܝ̈ ܝܪܬܘܬܗ܇ ܐܠܐ ܠܘܩܕܡ ܗ̣ܘܘ ܝܪ̈ܘܬܘܗܝ܀

ܐܢܗ̣ܘ ܕܝܘܡܗ ܕܡܪܝܐ ܐܝܟ ܓܢܒܐ ܒܠܠܝܐ ܗܟܢܐ ܐܬ̇ܐ܆ ܠܐ ܐܢܫ ܝܕ̇ܥ ܡܢ ܟܠ ܕܒܒܝܬܐ܇ ܒܐܝܕܐ ܫܥܬܐ ܐܘ ܒܐܝܢܐ ܝܘܡܐ ܡܚܠ̇ܨ ܠܕܡܟ̈ܐ܀

ܟܠ ܡܕܡ ܕܡܢ ܟܝܢܐ ܗܘ ܦܓܪܢܐ: ܘܡܬܐܡܪ ܩܕܝܫܐ܆ ܗܢܐ ܒܡܠܬܗ ܕܐܠܗܐ ܡܬܩ̇ܕܫ. ܘܟܠܡܕܡ ܕܡܢ ܡܠܝ̈ܠܐ ܡܫܬܡܗ ܩܕܝܫܐ܆ ܗܢܐ ܒܝܕܥܬܐ ܕܐܠܗܐ ܡܬܩ̇ܕܫ. ܐܝܬ ܕܝܢ ܡܢ ܬܪ̈ܝܢܐ ܛܐܘܣ܆ ܕܒܡܠܬܗ ܕܐܠܗܐ ܡܬܩ̇ܕܫܝܢ. ܐܝܟ ܛܠܝ̈ܐ ܕܐܝܬܝܗܘܢ ܡܩܒ̈ܠܢܐ ܕܝܕܥܬܐ܀

ܡܕܡ ܕܠܐ ܕܟ̣ܐ܆ ܐܘ ܡܢ ܚܫܚܬܐ ܕܠܒܪ ܡܢ ܟܝܢܐ܆ ܐܘ ܡܢ ܒܝܫܘܬܐ ܗ̇ܘܐ. ܘܟܠܡܕܡ ܕܠܒܪ ܡܢ ܚܫܚܬܐ ܡܣ̣ܬܒܪ ܕܐܝܬܘܗܝ ܛܡܐܐ܆ ܗܢܐ ܡܢ ܟܝܢܐ ܗܘ ܦܓܪܢܐ. ܗ̇ܘ ܕܝܢ ܕܡܢ ܒܝܫܘܬܐ ܐܝܬܘܗܝ ܛܡܐܐ܆ ܗܢܐ ܡܢ ܟܝܢܐ ܡܠܝܠܐ ܐܡ̇ܪܝܢ ܕܐܝܬܘܗܝ܀

ܟܕ ܡܬܨܝܕܝܢܢ ܒܟܪܣܐ܆ ܚܝ̈ܐ ܕܢܨܒ̈ܬܐ ܚܐ̇ܝܢ ܚܢܢ. ܟܕ ܕܝܢ ܡܬܝܠܝܕ܆ ܚܝ̈ܐ ܕܚܝ̈ܘܬܐ. ܡܐ ܕܝܢ ܕܐܬܓܡ̇ܪܢܢ܆ ܘܐ ܚܝ̈ܐ ܕܡܠܐܟ̈ܐ ܐܘ ܚܝ̈ܐ ܕܫܐܕ̈ܐ ܚܐ̇ܝܢ ܚܢܢ ܥܠ̣ܬܐ ܕܝܢ ܕܚܝ̈ܐ ܩܕܡܝ̈ܐ ܟܝܢܐ ܡܢܦܫܐ. ܘܕܬܪ̈ܝܢܐ ܐܪܓܫܬܐ. ܕܬܠܝܬܝ̈ܐ ܕܝܢ ܗ̇ܝ ܕܢܗܘܐ ܡܩܒ̈ܠܢܐ ܕܡܝܬܪܘܬܐ ܐܘ ܕܒܝܫܘܬܐ܀

ܕܐܝܠܝܢ ܕܚܝ̈ܝܗܘܢ ܘܡܘܬܗܘܢ ܪܘܚܐ ܕܩܘܕܫܐ ܐܫ̇ܬܥܝ ܠܢ܆ ܕܝܠܗܘܢ ܐܦ ܩܝ̣ܡܬܐ ܕܗ̇ܘܝܐ ܩ̇ܕܡ ܣ̇ܒܪ ܠܢ܀

ܡܠܐܟ̈ܐ ܘܫܐܕ̈ܐ ܠܥܠܡܢ ܡܬܩ̇ܪܒܝܢ. ܚܢܢ ܕܝܢ ܠܥܠܡܝ̈ܗܘܢ ܠܐ ܡܬܩ̇ܪܒܝܢܢ. ܠܐ ܓܝܪ ܠܡܠܐܟ̈ܐ ܡܫܟܚܝܢܢ ܕܢܩ̇ܪܒ ܝܬܝܪ ܠܐܠܗܐ܆ ܐܦܠܐ ܠܫܐܕ̈ܐ ܠܡܛܡ̇ܐܘ ܝܬܝܪ ܡܬܪܥ̇ܝܢܢ܀

ܐܝܠܝܢ ܕܗܫܐ ܠܬܚܬ ܡܢ ܐܪܥܐ ܐܝܬܝܗܘܢ܆ ܠܐܝܠܝܢ ܕܗܫܐ ܥ̣ܒܕܘ ܐܪ̈ܥܢܐ܇ ܠܘܬ ܒܝܫܘܬܐ ܕܠܐ ܟܝܠܐ ܠܕܘ̇ܝ̈ܐ ܢ̣ܬܦܘܢ܀

ܡܬܝܕܥܢܐ ܡ̇ܢ ܐܝܬܘܗܝ ܟܝܢܐ ܡܓܫܡܐ ܘܠܐ ܡܓܫܡܐ. ܝܕܘܥܐ ܕܝܢ ܒܠܚܘܕܘܗܝ ܟܝܢܐ ܠܐ ܡܓܫܡܐ. ܐܠܗܐ ܕܝܢ ܘܝܕܘܥܐ ܘܡܬܝܕܥܢܐ ܐܝܬܘܗܝ. ܐܠܐ ܠܐ ܗܘܐ ܐܝܟ ܟܝܢܐ ܠܐ ܡܓܫܡܐ ܝ̇ܕܥ. ܐܦܠܐ ܬܘܒ ܐܝܟ ܟܝܢܐ ܡܓܫܡܐ ܘܠܐ ܡܓܫܡܐ ܡܬܝܕܥ܀

ܗ̇ܘ ܕܝ̇ܕܥ ܠܐܠܗܐ܆ ܐܘ ܝܕܥܬܐ ܕܟܝܢܗ ܐܝܬ ܠܗ܆ ܐܘ ܕܚܟܡܬܗ ܗ̇ܝ ܕܒܗ̇ ܐܬܚ̇ܫܚ ܘܥ̣ܒܕ ܟܠ܀

ܛܘܒܘܗܝ ܠܐܝܢܐ ܕܒܝܕ ܣܘܥܪ̈ܢܐ܇ ܡܩ̇ܒܠ ܬܚܘܝܬܐ ܕܛܝܒܘܬܗ ܕܐܠܗܐ. ܛܘܒܘܗܝ ܕܝܢ ܐܦ ܠܐܝܢܐ ܕܒܝܕܥܬܐ ܡ̣ܨܐ ܕܢܥ̇ܩܒ ܥܠ ܗܠܝܢ܀

ܗܝܡܢܘܬܐ ܐܝܬܝܗ̇܆ ܛܒܬܐ ܨܒܝܢܝܬܐ܇ ܕܠܘܬ ܛܘܒܬܢܘܬܐ ܕܥܬܝܕܐ ܡܕܒ̇ܪܐ ܠܢ܀

ܟܠܗ̇ ܬܐܘܪܝܐ ܟܝܢܝܬܐ ܕܬܪ̈ܬܝܢ܆ ܢܝܫܐ ܕܟܘܟܒ̈ܐ ܛܥܝܢܐ. ܟܘܟܒ̈ܐ ܕܝܢ܆ ܗܠܝܢ ܕܐܬܗܝܡܢܘ ܠܡܢ̇ܗܪܘ ܠܐܝܠܝܢ ܕܒܠܠܝܐ ܐܝܬܝܗܘܢ܀

ܟܠܗܘܢ ܐܝܠܝܢ ܕܒܡܝ̈ܐ ܥ̇ܡܕܝܢ܆ ܠܪܝܚܐ ܒܣܝܡܐ ܡܩ̇ܒܠܝܢ ܗ̇ܘ ܕܝܢ ܕܡ̇ܥܡܕ܆ ܗ̣ܘܝܘ ܕܐܝܬ ܠܗ ܡܫ̣ܚܐ ܡܒ̇ܣܡܐ܀

ܛܘܒܘܗܝ ܠܐܝܢܐ ܕܠܐ ܐܚܒ ܠܡܕܡ ܡܢ ܬܐܘܪܝܐ ܟܝܢܝܬܐ ܕܬܪ̈ܬܝܢ܇ ܐܠܐ ܐܢ ܠܗ̇ ܠܬܐܘܪܝܐ܀

ܛܘܒܘܗܝ ܠܐܝܢܐ ܕܠܐ ܣܢ̣ܐ ܠܡܕܡ ܡܢ ܬܐܘܪܝܐ ܩܕܡܝܬܐ ܕܟܝ̈ܢܐ܇ ܐܠܐ ܠܒܝܫܘܬܗܘܢ܀

ܛܘܒܘܗܝ ܠܐܝܢܐ ܕܡ̣ܛܐ ܠܐܝܕܥܬܐ ܕܠܐ ܡܬܥ̣ܒܪܐ܀

ܐܝܟܢܐ ܕܦܓܪܢ ܟܕ ܡܬܝܠܕ ܡܢ ܐܒܗ̈ܝܢ: ܕܢܗܦܘܟ ܢܘܠܕ ܐܢܘܢ ܠܐ ܡ̣ܨܐ܆ ܗܟܢܐ ܐܦ ܢܦܫܐ ܕܡܬܝܠܕܐ ܡܢ ܐܠܗܐ ܕܬܦ̣ܪܥܝܘܗܝ ܝܕܥܬܐ ܠܐ ܡ̣ܨܝܐ. ܡܢܐ ܓܝܪ ܐܦܪܘܥ ܠܡܪܝܐ ܕܟܠܗܘܢ ܦܘܪ̈ܥܢܘܗܝ ܥܠܝ܀

ܠܐ ܫ̇ܠܝ̈ܢ ܫܐܕ̈ܐ ܡܢ ܕܠܡܥܫܩ ܠܝܕܘܥܐ܆ ܐܦ ܟܕ ܠܐ ܢ̇ܣܟܠ. ܐܝܟ ܡ̇ܢ ܕܢܬܦܘܢ ܠܘܬܗܘܢ ܗܘܢܗ. ܥܢܢܐ ܓܝܪ ܡܕܡ ܩܝ̇ܡܐ ܥܠ ܬܪܥܝܬܐ܆ ܘܕܚ̇ܘܐ ܠܗܘܢܐ ܡܢ ܬܐܘܪܝܐ܇ ܒܥܕܢܐ ܕܐܝܟ ܕܠܥܫܘ̈ܩܐ ܡ̇ܟܣ ܠܗܘܢ ܠܫܐܕ̈ܐ܀

ܐܠܗܐ ܢ̣ܨܒ ܠܗ ܡܠܝ̈ܠܐ. ܪܒ̣ܝܬ̇ ܒܗܘܢ ܬܘܒ ܚܟܡܬܗ܆ ܟܕ ܩ̇ܪܝܐ ܠܗܘܢ ܟܬܒ̈ܐ ܕܟܠ ܦܘܪܫܢ܀

ܝܕܝܥܘܬܗ ܕܐܠܗܐ܆ ܒܐܝܠܝܢ ܕܩܕܝܡܝܝܢ ܒܗܘܝܗܘܢ ܐܝܬܝܗ̇ ܠܐ ܝܕܝܥܘܬܗ ܕܝܢ ܒܡܫܝܚܗ ܐܝܬܝܗ̇܀

ܝܕܝܥܘܬܗ ܕܡܫܝܚܐ܆ ܒܐܝܠܝܢ ܕܬܪ̈ܝܢܝܢ ܒܗܘܝܗܘܢ ܐܝܬܝܗ̇. ܠܐ ܝܕܝܥܘܬܗ ܕܝܢ ܒܐܒܘܗܝ ܐܝܬܝܗ̇܀

ܝܪܘܬܗ ܕܡܫܝܚܐ ܐܝܬܘܗܝ܆ ܗ̇ܘ ܕܣܘ̈ܟܠܐ ܕܟܠܗܘܢ ܗܘܝ̈ܐ ܕܡܢ ܒܬܪ ܕܝ̣ܢܐ ܩܕܡܝܐ ܝ̇ܕܥ܀

ܝܕܥܘܬܐ ܠܝܕܘܥܐ܆ ܡܢܗ̇ ܒܝܕܘܥܐ ܘܡܢܗ̇ ܒܠܐ ܝܕܘܥܐ ܡܬܓܠ̣ܝܐ܀

ܡܢܗ̇ ܕܝܕܝܥܘܬܐ ܒܕܟ̣ܝ̈ܐ܆ ܘܡܢܗ̇ ܒܐܝܠܝܢ ܕܠܐ ܕܟ̣ܝܢ ܗ̣ܘܝܐ. ܘܗ̇ܝ ܡ̇ܢ ܕܒܩܕܡܝ̈ܐ ܗ̣ܘܝܐ܆ ܝܕܥܬܐ ܪܘܚܢܝܬܐ ܡܬܩܪܝܐ. ܗ̇ܝ ܕܝܢ ܕܠܬܪ̈ܝܢܐ ܓܕܝܫܐ܆ ܬܐܘܪܝܐ ܟܝܢܝܬܐ ܡܫܡܗܝܢ܀

ܗ̇ܘ ܕܚܟܡܬܐ ܡ̣ܠܝܬ ܦܘܪ̈ܫܢܐ ܒܗܘܝ̈ܐ ܣ̣ܡ܆ ܗܢܐ ܐܦ ܐܘܡܢܘܬܐ ܡ̇ܠܦ ܠܐܝܠܝܢ ܕܨ̇ܒܝܢ܇ ܕܐܝܟܝܢܐ ܐܢܫ ܕܠܝܠܐܝܬ ܢܗܘܐ ܚܙ̇ܝܗ̇܀

ܒܪ ܝܪܬܘܬܗ ܕܡܫܝܚܐ ܐܝܬܘܗܝ܆ ܗ̇ܘ ܕܒܝܚܝܕܘܬܐ ܗ̇ܘܐ܇ ܘܡܢܗ̇ ܕܬܐܘܪܝܐ ܥܡ ܡܫܝܚܐ ܡܬܒ̇ܣܡ܀

ܐܢ ܐܚܪܢܐ ܗܘ ܝܪܘܬܐ ܘܐܚܪܬܐ ܝܪܬܘܬܐ܆ ܠܘ ܡܠܬܐ ܗܘ ܗ̇ܘ ܕܝ̇ܪܬ. ܐܠܐ ܡܫܝܚܐ ܠܡܠܬܐ ܕܐܝܬܘܗܝ ܝܪܬܘܬܐ. ܡܛܠ ܕܟܠ ܡ̇ܢ ܕܗܟܢ ܝ̇ܪܬ܆ ܠܝܪܬܘܬܐ ܡܬܚܝ̇ܕ. ܡܢ ܚܘܝܕܐ ܕܝܢ ܡܠܬܐ ܐܠܗܐ ܡܚܪܪ ܗܘ܀

ܡܢܗܘܢ ܕܡܟܬܒ̈ܢܐ ܕܝܘ̈ܠܦܢܐ ܫܪܝܪ̈ܐ܆ ܡܢ ܬܐܘܪܝܐ ܩܕܡܝܬܐ ܕܟܝܢܐ ܢܦ̣ܠܘ.

ܡܢܗܘܢ ܕܝܢ ܡܢ ܬܪܝܢܝܬܐ. ܘܡܢܗܘܢ ܐܦ ܡܢ ܕܬܠܝܬܝܘܬܐ ܩܕܝܫܬܐ ܫ̣ܪܥܘ܀

ܐܢܗ̣ܘ ܕܒܝܕ ܟܝܢܐ ܡܓܫܡܐ ܘܠܐ ܡܓܫܡܐ ܡܬܝܕܥ ܐܠܗܐ: ܬܪ̈ܬܝܢ ܓܝܪ ܬܐܘܪ̈ܝܣ ܕܗܠܝܢ ܡ̇ܚܝ̈ܢ ܠܡܠܝ̈ܠܐ܆ ܫܦܝܪ ܡܬܐܡܪ܇ ܕܐܠܗܐ ܒܓܘ ܬܪ̈ܝܢ ܚܝܝ̈ܢ ܡܬܝܕܥ܀

ܓܙܘܪܬܐ ܡܬܝܕܥܢܘܬܐ ܐܝܬܝܗ̇܆ ܡܪܚܩܢܘܬܐ ܨܒܝܢܝܬܐ ܕܡܢ ܚܫ̈ܐ܇ ܕܡܛܠ ܝܕܥܬܐ ܕܐܠܗܐ܀

ܐܝܠܝܢ ܕܐܫܬܘܬܦܘ ܠܒ̣ܣܪܐ ܘܕܡ̣ܐ܆ ܛܠܝ̈ܐ ܐܢܘܢ. ܟܠ ܕܝܢ ܕܛܠ̣ܐ܆ ܠܐ ܛܒܐ ܗܘ ܘܠܐ ܒܝܫܐ. ܡܕܝܢ ܫܦܝܪ ܐܡ̇ܪܝܢ܇ ܕܒܢܝ̈ ܐܢܫܐ ܡܨܥܝ̈ܐ ܐܢܘܢ ܒܝܬ ܡܠܐܟ̈ܐ ܠܫܐܕ̈ܐ܀

ܐܝܟܢܐ ܕܪܗܒܘܢܐ ܕܒܦܓܪ̈ܐ ܡܢ̇ܬܐ ܗܘ ܙܥܘܪܬܐ ܕܦܓܪܐ܆ ܗܟܢܐ ܐܦ ܪܗܒܘܢܐ ܕܒܝܕ̈ܥܬܐ܇ ܡܢ̇ܬܐ ܡܕܡ ܐܝܬܝܗ̇ ܕܝܕܥܬܐ ܕܗܘܝ̈ܐ܀

ܐܢ ܥܠܡܐ ܟܠܗ ܕܒܢܝ̈ܢܫܐ ܥܠܡܐ ܗܘ ܕܛܠܝ̈ܐ܆ ܐܡܬܝ ܕܗ̣ܘ ܠܩܘܡܬܐ ܢ̇ܕܪܟܘܢ܇ ܗ̇ܝ ܕܠܙܕܝܩ̈ܐ ܐܘ ܠܥ̇ܘ̈ܠܐ ܠܚ̇ܡܐ܀

ܝܚܝܕܝܐ ܐܝܬܘܗܝ܆ ܗ̇ܘ ܕܩܕܡܘܗܝ ܐܚܪܢܐ ܠܐ ܐܬܝܠܕ܇ ܐܦܠܐ ܡܢ ܒܬܪܗ܀

ܠܥܠ ܡܬܐܡܪ ܕܐܝܬܘܗܝ܆ ܠܐܝܟܐ ܕܝܕܥܬܐ ܠܩܢܝ̈ܝܗ̇ ܡܩ̇ܪܒܐ. ܠܬܚܬ ܕܝܢ܆ ܠܐܝܟܐ ܕܠܐ ܝܕܥܬܐ ܠܐܝܠܝܢ ܕܩ̣ܢܝܢ ܠܗ̇܀

ܡܫܝܚܘܬܐ ܡܬܝܕܥܢܝܬܐ ܐܝܬܝܗ̇܆ ܝܕܥܬܐ ܪܘܚܢܝܬܐ ܕܝܚܝܕܝܘܬܐ ܩܕܝܫܬܐ. ܘܡܫܝܚܐ ܐܝܬܘܗܝ܆ ܗ̇ܘ ܕܠܗܕܐ ܝܕܥܬܐ ܡܚܝܕ. ܘܐܢ ܗܕܐ ܗܟܢܐ ܗܝ܆ ܠܘ ܡܠܬܐ ܗܘ ܩܕܡܝܬ ܡܫܝܚܐ. ܐܝܟ ܕܠܐ ܗ̇ܘ ܕܐܬܡ̣ܫܚ ܩܕܡܝܬ ܐܠܗܐ. ܐܠܐ ܗ̇ܘ ܡܛܠ ܗܢܐ ܡܫܝܚܐ܆ ܘܗܢܐ ܡܛܠ ܗ̇ܘ ܐܠܗܐ܀

ܚܕ ܗܘ ܡܢܝܢܐ ܕܟܡܝܘܬܐ. ܟܡܝܘܬܐ ܕܝܢ ܥܡ ܟܝܢܐ ܦܓܪܢܐ ܟܝܢܐ. ܡܢܝܢܐ ܡܕܝܢ܆ ܕܬܐܘܪܝܐ ܟܝܢܝܬܐ ܕܬܪ̈ܬܝܢ ܐܝܬܘܗܝ܀

ܒܘܟܪܐ ܐܝܬܘܗܝ܆ ܗ̇ܘ ܕܩܕܡܘܗܝ ܐܚܪܢܐ ܠܐ ܐܬܝܠܕ. ܒܬܪܗ ܕܝܢ ܐܚܪ̈ܢܐ ܗ̣ܘܘ܀

ܡܫܝܚܘܬܐ ܐܘ ܝܕܥܬܐ ܕܝܚܝܕܝܘܬܐ ܡ̇ܘܕܥܐ܆ ܐܘ ܬܐܘܪܝܐ ܕܗܘܝ̈ܐ ܡܒ̇ܕܩܐ. ܐܢܗ̣ܘ ܕܝܢ ܕܝܬܝܪ ܡܢ ܚܒܪ̈ܘܗܝ ܡܫܝܚ ܡܫܝܚܐ܆ ܝܕܝܥܐ ܗܝ ܕܒܝܕܥܬܐ ܕܝܚܝܕܝܘܬܐ ܡܫܝܚ. ܡܛܠ ܗܢܐ ܒܠܚܘܕܘܗܝ ܡܬܐܡܪ܆ ܕܝ̇ܬܒ ܡܢ ܝܡܝܢܐ ܕܐܒܘܗܝ. ܗ̇ܝ ܕܗܪܟܐ ܐܝܟ ܢܡܘܣܐ ܕܝܕܘܥ̈ܬܢܐ܆ ܠܚܕܝܘܬܐ ܘܠܝܚܝܕܝܘܬܐ ܡ̇ܘܕܥܐ ܝܡܝܢܐ܀

ܐܝܟܢܐ ܕܐܝܠܝܢ ܕܕܒ̈ܚܬܐ ܦܠܐܬܢܝ̈ܬܐ ܠܐܠܗܐ ܡܩ̇ܪܒܝܢ: ܒܝܕ ܡܝܬܪ̈ܬܐ ܙܘܥ̈ܐ ܚܝܘ̈ܬܢܐ ܕܢܦܫܐ ܡ̇ܘܩܕܝܢ܆ ܗܟܢܐ ܐܝܠܝܢ ܕܠܫܐܕ̈ܐ ܡܕ̈ܒܚܝܢ܇ ܒܝܕ ܒܝ̈ܫܬܐ ܡܥܒ̈ܕܢܘܬܐ ܟܝܢܝ̈ܬܐ ܕܢܦܫܐ ܡܚ̇ܒܠܝܢ܀

ܠܝܬܘܗܝ ܡܘܫܐ ܘܐܠܝܐ ܡܠܟܘܬܐ ܕܐܠܗܐ. ܐܢܗ̣ܘ ܕܗ̇ܝ ܬܐܘܪܝܐ ܐܝܬܝܗ̇܇ ܗܠܝܢ ܕܝܢ ܐܢܫ̈ܐ ܩܕܝ̈ܫܐ. ܐܝܟܢܐ ܡܕܝܢ ܦܪܘܩܢ ܟܕ ܐܫܬܘܕܝ ܠܬܠܡܝ̈ܕܐ܇ ܕܢܚܘܐ ܠܗܘܢ ܡܠܟܘܬܐ ܕܐܠܗܐ܇ ܒܓܘܫܡܐ ܪܘܚܢܐ ܠܗ ܘܠܡܘܫܐ ܘܠܐܠܝܐ ܒܛܘܪܐ ܚܘܝ ܠܗܘܢ܀

ܒܘܟܪܐ ܕܡܢ ܒܝܬ ܡܝ̈ܬܐ ܐܝܬܘܗܝ܆ ܗ̇ܘ ܕܩ̣ܡ ܡܢ ܒܝܬ ܡܝ̈ܬܐ܇ ܘܩܕܡܝܐ ܠܒ̣ܫ ܓܘܫܡܐ ܪܘܚܢܐ܀

ܐܝܟܢܐ ܕܢܘܗܪܐ ܕܕ̇ܠܩ ܒܗܝ̈ܟܠܝܢ ܩܕܝ̈ܫܐ: ܦܠܐܬܐ ܗܘ ܕܐܝܕܥܬܐ

ܪܘܚܢܝܬܐ܆ ܘܗܟܢܐ ܘܗ̇ܘ ܕܒܝܬ ܦܬܟܪ̈ܐ܇ ܐܬ̇ܐ ܗܘ ܕܝܘ̈ܠܦܢܐ ܘܕܣܘ̈ܟܠܐ ܕ̈ܓܠܐ. ܘܩܕܡܝܐ ܡ̇ܢ ܡܬܬܪܣܐ܆ ܒܡܫ̣ܚܗ ܕܚ̣ܘܒܐ ܩܕܝܫܐ. ܬܪܝܢܐ ܕܝܢ ܒܝܕ ܚ̣ܘܒܐ ܥܠܡܢܝܐ܇ ܕܡ̇ܚܒ ܠܥܠܡܐ ܘܠܗܠܝܢ ܕܒܗ܀

ܐܢ ܗ̣ܘ ܕܒܝܘܡܐ ܕܬܠܬܐ ܡܫܝܚܐ ܡܫܬܡܠܐ: ܒܗ̇ܘ ܕܝܢ ܕܩܕܡܘܗܝ ܝ̇ܩܕ ܗ̇ܘ ܕܩܝ̈ܣܐ ܒܡܕܒܪܐ ܡܓ̇ܒܐ ܗܘܐ܆ ܝܕܝܥܐ ܗܝ ܕܝܘܡܢ ܐܝܬܝܗ̇ ܗ̇ܝ ܕܡܬܐܡܪܐ ܥܪܘܒܬܐ܇ ܕܒܚܕܥܣܪܐ ܫܥ̈ܐ ܕܒܗ̇܇ ܥܡܡ̈ܐ ܡܢ ܦܪܘܩܢ ܠܚܝ̈ܐ ܕܠܥܠܡ ܐܬܩܪܝܘ܀

ܦܠܐܬܐ ܕܐܬܚ̣ܙܝ̇ܬ ܠܡܥܡܕܢܐ ܕܡܬܥܡܕܢܐ: ܐܪܐ ܟܝ ܒܬܐܘܪܝܐ ܩܕܡܝܬܐ܆ ܐܘ ܒܬܪܝܢܝܬܐ܇ ܐܘ ܒܬܠܝܬܝܬܐ ܐܝܬܝܗ̇. ܘܬܘܒ ܐܢ ܡܫܟܚܐ ܕܝܚܝܕܝܘܬܐ ܒܕܡ̣ܘܬܐ ܕܕܐܝܟ ܗܕܐ ܬܬܛܒ̇ܥ܆ ܐܠܐ ܩܢܕܝܢܘܣ ܗܘ ܕܥܠ ܗܕܐ ܓܠܝܐܝܬ ܢܘܕܥ. ܬܬ̇ܪܨ ܕܝܢ ܗܕܐ ܦܠܐܬܐ ܒܝܬ ܕܝܕܘܥ̈ܐ܀

ܦܛܝܪ̈ܐ ܡܬܝ̈ܕܥܢܐ ܐܝܬܘܗܝ܆ ܬܩܢܘܬܐ ܕܢܦܫܐ ܡܠܝܠܬܐ܇ ܕܡܢ ܡܝܬܪ̈ܬܐ ܕܟܝ̈ܬܐ܇ ܘܡܢ ܝܘ̈ܠܦܢܐ ܫܪ̈ܝܪܐ ܡܬܩ̇ܝܡܐ܀

ܐܝܟܢܐ ܕܐܢ ܬܬܚܒ̇ܠ ܐܪܥܐ: ܬܘܒ ܠܠܝܐ ܒܐܦܝ̈ ܐܪܩܝܥܐ ܠܐ ܗ̇ܘܐ܆ ܗܟܢܐ

ܟܕ ܬܫ̣ܬܩܠ ܒܝܫܘܬܐ܇ ܬܘܒ ܠܐ ܬܗܘܐ ܠܐ ܝܕܥܬܐ ܒܡܠܝ̈ܠܐ. ܠܐ ܝܕܥܬܐ ܕܝܢ ܛܠܠܗ̇ ܕܒܝܫܬܐ ܐܝܬܝܗ̇. ܕܒܗ̇ ܐܝܠܝܢ ܕܐܝܟ ܕܒܠܠܝܐ ܡܗܠܟܝܢ܆ ܒܡܫ̣ܚܐ ܕܡܫܝܚܐ ܡܬܢ̣ܗܪܝܢ ܘܠܟܘܟܒ̈ܐ ܚܙ̇ܝܢ. ܐܝܟ ܝܕܥܬܐ ܕܡܫ̣̈ܬܘܝܢ ܕܢܩܒ̇ܠܘܢ ܡܢܗ. ܘܐܦ ܗ̣ܢܘܢ ܟܘܟܒ̈ܐ ܢ̇ܦܠܝܢ ܠܗܘܢ܇ ܐܢ ܩܠܝܠܐܝܬ ܬܘܒ ܠܘܬ ܫܡܫܐ ܕܙܕܝܩܘܬܐ ܠܐ ܢܬܦ̇ܢܘܢ܀

ܐܢ ܗ̣ܘ ܕܥܘܬܪܗ ܕܐܠܗܐ ܗ̇ܘ ܕܥܬܝܕ: ܬܐܘܪܝܐ ܗܝ ܪܘܚܢܝܬܐ ܕܥܠܡ̈ܐ ܕܗ̇ܘܝܢ܆ ܢܒ̣ܗܬܘܢ ܐܝܠܝܢ ܕܒܚܟܐ ܘܒܟܪܣܐ ܡܣܝ̇ܟܝܢ ܠܡܠܟܘܬܐ ܕܫܡܝܐ܀

ܐܝܟܢܐ ܕܟܘܟܒܐ ܗ̇ܘ ܕܒܓܢܝܐ ܕܚܒܪܗ ܡܬܚܦܐ ܥܠܝ ܗܘ ܡܢܗ܆ ܗܟܢܐ ܗ̇ܘ ܕܝܬܝܪܐܝܬ ܡܟܝܟ ܡܢ ܚܒܪܗ܇ ܒܥܠܡܐ ܕܥܬܝܕ ܢܫܬܟܚ ܕܡܥܠܝ ܗܘ ܡܢܗ܀

ܚܨܪ ܟܒܕܐ ܐܝܬܝܗ̇܆ ܡܚܫܒܬܐ ܩܕܡܝܬܐ܇ ܕܡܢ ܡܢ̇ܬܐ ܕܪܓܬܐ ܕܢܦܫܐ ܡܬܩ̇ܝܡܐ܀

ܠܐܝܠܝܢ ܕܕܠܐ ܪ̈ܚܡܐ ܐܢܘܢ܆ ܡܢ ܒܬܪ ܡܘܬܗܘܢ ܫܐܕ̈ܐ ܕܠܐ ܪ̈ܚܡܐ ܡܩܒ̇ܠܝܢ ܠܗܘܢ. ܠܐܝܠܝܢ ܕܝܢ ܕܝܬܝܪܐܝܬ ܕܠܐ ܪ̈ܚܡܐ ܐܢܘܢ܆ ܕܒܝܫܝܢ ܡܢ ܗܠܝܢ

ܡܩܒ̇ܠܝܢ ܠܗܘܢ. ܘܐܢ ܗܕܐ ܗܟܢܐ ܗܝ܆ ܛܥܝܐ ܠܗܘܢ ܠܐܝܠܝܢ ܕܢܦܫܗܘܢ ܡܢ ܦܓܪܐ ܡ̇ܦܩܝܢ܇ ܕܕܐܝܟ ܐܝܠܝܢ ܫܐܕ̈ܐ ܡܩܒ̇ܠܝܢ ܠܗܘܢ ܡܢ ܒܬܪ ܡܘܬܗܘܢ. ܐܦ ܡܠܬܐ ܗܝ ܓܝܪ܆ ܕܠܐ ܐܢܫ ܡܢ ܐܝܠܝܢ ܕܐܝܟ ܨܒܝܢܗ ܕܐܠܗܐ ܢ̇ܦܩܝܢ܇ ܢܫ̣ܬܠܡ ܠܫܐܕ̈ܐ ܕܕܐܝܟ ܗܠܝܢ܀

ܒܥܠܡܐ ܕܥܬܝܕ܆ ܠܐ ܐܢܫ ܦ̇ܠܛ ܡܢ ܒܝܬ ܐܣܝܪ̈ܐ ܕܢ̇ܦܠ ܒܗ. ܐܡܝܪ ܓܝܪ ܕܠܐ ܬܦܘܩ ܡܢ ܬܡܢ܆ ܥܕܡܐ ܕܬܬܠ ܫܡܘܢܐ ܐܚܪܝܐ. ܕܐܝܬܘܗܝ ܚܫܐ ܙܥܘܪܐ܀

ܐܢ ܗ̣ܘ ܕܡܘܗܒܬܐ ܕܠܫܢ̈ܐ ܡܘܗܒܬܐ ܗܝ ܕܪܘܚ: ܡܢ ܗܕܐ ܕܝܢ ܡܘܗܒܬܐ ܓܠܝܙܝܢ ܐܢܘܢ ܫܐܕ̈ܐ܆ ܒܠܫܢ̈ܐ ܠܐ ܡܡܠܠܝܢ. ܐܡ̇ܪܝܢ ܕܝܢ ܕܡܢ ܝܘܠܦܢܐ ܡܦ̣ܣܝܢ ܒܠܫܢ̈ܐ ܕܒܢܝ̈ܢܫܐ. ܘܠܘ ܕܕܘܡܪܐ ܗܝ܆ ܐܢ ܡܢ ܡܩܒܠܢܘܬܐ ܩ̣ܢܝܢ ܗܕܐ. ܒܗ̇ܝ ܕܥܡ ܩܘܝܡܗ ܕܥܠܡܐ ܐܝܬܘܗܝ ܡܬܚܐ ܕܩܘܝܡܗܘܢ. ܐ̣ܡܪ ܕܝܢ ܐܢܫ܆ ܕܐܦ ܡܦܪ̈ܫܐ ܐܢܘܢ ܠܫܢܝ̈ܗܘܢ. ܡܛܠܬܗ̇ ܕܝܠܗ̇ ܕܥ̣ܠܬܐ ܕܒܢܝ̈ܢܫܐ. ܘܐܝܬ ܕܐܡ̇ܪܝܢ ܕܐܦ ܠܫܢ̈ܐ ܕܩܫܝ̈ܫܝܢ ܐܝܬ ܒܗܘܢ. ܐܝܟ ܕܢܫܬܟܚܘܢ ܣܩܘܒܠܝܝܢ ܠܥܒܪ̈ܝܐ܆ ܐܝܠܝܢ ܕܒܠܫܢܐ ܥܒܪܝܐ ܡܬܚܫܚܝܢ ܘܠܫܘܢܝ̈ܐ܇ ܐܝܠܝܢ ܕܒܠܫܢܐ ܝܘܢܝܐ ܡܡܠܠܝܢ. ܘܠܕܫܪܟܐ ܗܟܢܐ܀

ܬܪܒܐ ܡܬܝܕܥܢܐ ܐܝܬܘܗܝ܆ ܥܒܝܘܬܐ ܕܡܢ ܒܝܫܘܬܐ ܠܗܘܢܐ ܓ̇ܕܫܐ܀

ܡܢܗܝܢ ܕܚܝܘ̈ܬܐ ܐܡ̇ܪܝܢ܆ ܕܢܫܡܬܐ ܡܢ ܠܒܪ ܢ̇ܬܦ̈ܢ ܘܡܢܗܝܢ ܡܢ ܠܓܘ ܘܡܢܗܝܢ ܡܢ ܚܕܪ̈ܝܗܝܢ ܘܡܢܗܝܢ ܡܢ ܟܠ ܓܒ̈ܝܢ. ܘܐܝܠܝܢ ܕܡܢ ܠܒܪ܆ ܐܡ̇ܪܝܢ ܕܐܝܬܝܗܘܢ ܒܢܝ̈ܢܫܐ. ܘܟܠ ܕܐܝܬ ܠܗܘܢ ܪܬܐ. ܕܡܢ ܠܓܘ ܕܝܢ܆ ܢܘ̈ܢܐ. ܘܟܠ ܕܦܫܝܛ ܚܪܫܗ. ܕܡܢ ܚܕܪ̈ܝܗܝܢ ܕܝܢ܆ ܕܒܘܪ̈ܝܬܐ ܒܚܘܨܐ ܕܓܦܝ̈ܗܝܢ. ܕܡܢ ܟܠ ܓܒ̈ܝܢ ܕܝܢ܆ ܕܝܘ̈ܐ. ܘܟܠܗܘܢ ܡܠܝ̈ܠܐ ܐܝܠܝܢ ܕܩ̣ܢܝܢ ܓܘ̈ܫܡܐ ܕܐܐܪ܀

ܒܥܠܡܐ ܕܥܬܝܕ܆ ܓܒܪܐ ܚܡܬܢܐ ܥܡ ܡܠܐܟ̈ܐ ܠܐ ܡܬܡܢܐ. ܐܦܠܐ ܪܫܢܘܬܐ ܡܬܗܝܡܢ. ܠܐ ܓܝܪ ܚܙ̇ܐ ܡܛܠ ܚܫܐ. ܘܕܠܝܠܐܝܬ ܡܬܥ̇ܝܛ ܥܠ ܐܝܠܝܢ ܕܡܢܗ ܡܬܕܒ̣ܪܝܢ. ܘܡܢ ܚܙܬܐ ܢ̇ܦܠ܆ ܘܠܗܠܝܢ ܒܩܢܕܝܢܘܣ ܪܡ̇ܐ. ܬܪ̈ܬܝܗܝܢ ܕܝܢ ܡܢܟܪ̈ܝܢ ܐܢܝܢ ܠܛܟܣܐ ܡܠܐܟܝܐ܀

ܐܢ ܒܥܠܡ̈ܐ ܕܐܬ̇ܝܢ: ܐܠܗܐ ܥܘܬܪܗ ܠܡܠܝ̈ܠܐ ܡܚܘ̇ܐ܆ ܝܕܝܥܐ ܗܝ ܕܒܐܝܠܝܢ ܕܒܬܪ ܗܢܐ ܕܐܬ̇ܐ ܢܥ̣ܒܕ ܗܕܐ. ܒܗ̇ܝ ܕܩܕܡ ܗܢܐ܆ ܠܐ ܡܫܟܚܝܢ ܡܠܝ̈ܠܐ ܕܢܩ̇ܒܠܘܢ ܥܘܬܪܗ ܩܕܝܫܐ܀

ܐܩܠܝܕܐ ܕܡܠܟܘܬܐ ܕܫܡܝܐ ܐܝܬܘܗܝ܆ ܡܘܗܒܬܐ ܕܪܘܚ܇ ܗ̇ܝ ܕܒܡ̈ܢܘܢ ܡ̈ܢܘܢ܇ ܓ̇ܠܝܐ ܣܘ̈ܟܠܐ ܕܦܘܠܚܢܐ ܘܕܟܝܢܐ܇ ܘܕܡ̈ܠܐ ܕܥܠ ܐܠܗܐ܀

ܡܫܝܚܐ ܡ̇ܢ ܠܒܢܝ̈ܢܫܐ ܩܕܡ ܡܐܬܝܬܗ܆ ܦܓܪܐ ܡܠܐܟܝܐ ܚܘܝ. ܠܐܚܪ̈ܝܐ ܕܝܢ܆ ܠܘ ܓܘܫܡܐ ܗ̇ܘ ܕܗܫܐ ܐܝܬ ܠܗ ܚܘܝ. ܐܠܐ ܗ̇ܘ ܕܥܬܝܕ ܕܢܗܘܐ ܠܗܘܢ ܓܠ̣ܐ܀

ܡܘܠܟܢܐ ܕܡܐܐ ܐܥܦܝ̈ܢ܆ ܬܐܘܪܝܐ ܕܗܘܝ̈ܐ ܐܝܬܘܗܝ. ܚܝ̈ܐ ܕܝܢ ܕܠܥܠܡ܆ ܐܝܕܥܬܐ ܕܬܠܝܬܝܘܬܐ ܩܕܝܫܬܐ. ܗܠܝܢ ܐܢܘܢ ܠܡ ܚܝ̈ܐ ܕܠܥܠܡ܆ ܕܢܕܥܘܢܟ ܠܟ ܐܠܗܐ ܫܪܝܪܐ ܒܠܚܘܕܝܟ܀

ܡܫܝܚܐ ܕܐܬܚܙܝ ܠܝܥܩܘܒ ܥܠ ܣܒܠܬܐ: ܐܢ ܗ̣ܘ ܕܬܐܘܪܝܐ ܟܝܢܝܬܐ ܪܡ̇ܙ܆ ܕܡ̣ܘܬܗ̇ ܕܣܒܠܬܐ ܥܠ ܐܘܪܚܐ ܕܦܠܘܚܘܬܐ ܡ̇ܘܕܥܐ. ܐܢ ܕܝܢ ܝܕܥܬܐ ܕܝܚܝܕܝܘܬܐ ܡ̇ܘܕܥ܆ ܦܠܐܬܐ ܕܟܠܗܘܢ ܥܠܡ̈ܐ ܐܝܬܝܗ̇ ܣܒܠܬܐ܀

ܫܒܬܐ ܐܝܬܝܗ̇܆ ܒܗܝܠܘܬܐ ܕܢܦܫܐ ܡܠܝܠܬܐ܇ ܕܒܗ̇ ܡ̣ܟܢܐ ܕܠܐ ܬܥ̣ܒܪ ܬܚܘܡ̈ܐ ܕܟܝܢܐ܀

ܠܘ ܠܐܝܠܝܢ ܕܣ̇ܓܕܝܢ. ܐܠܐ ܠܐܝܠܝܢ ܕܡܕܒ̇ܚܝܢ ܠܗܘܢ܇ ܕܚ̇ܩܝܢ ܚܝܠܘ̈ܬܐ ܐܠܗܝ̈ܐ. ܘܗܕܐ ܒܕ̈ܝܢ̇ܐ ܒܝܕ ܡܢܘܚ ܓܠܝܐܝܬ ܝܠ̣ܦܢܢ܀

ܐܪܒܥ ܩܪ̈ܢܢ ܠܐܪܒܥ ܐܣܛܘܟܣ̈ܐ ܡ̇ܘܕ̈ܥܢ. ܘܡܐܢܐ ܕܐܬܚܙܝ܆ ܠܥܠܡܐ ܥܒܝܐ ܡ̇ܘܕܥ. ܘܚܝܘ̈ܬܐ ܡܫ̈ܚܠܦܬܐ ܦ̈ܠܐܬܐ ܐܢܝܢ ܕܛܟܣ̈ܐ ܕܒܢܝ̈ ܐܢܫܐ. ܘܗܢܐ ܗ̇ܘ ܕܥܠ ܐܓܪܐ ܠܦܛܪܘܣ ܐܬܚܙܝ܀

ܥܡ ܐܝܠܝܢ ܕܠܘܬ ܗܘ̈ܠܣ ܥܡܘ̈ܛܬܐ ܡܬܩ̇ܪܒܝܢ: ܘܥܠܝܗܝܢ ܨܒ̇ܝܢ ܠܡܟܬܒ܆ ܫܐܕܐ ܕܪܝܓܙܐ ܒܠܠܝܐ ܘܒܐܝܡܡܐ ܡ̇ܩܪܒ. ܗ̣ܘ ܕܡܥܕ ܥ̇ܘܪ ܬܪܥܝܬܐ܇ ܘܓ̇ܠܙ ܠܗ̇ ܡܢ ܬܐܘܪܝܐ ܕܪܘܚ܀

ܡܨܢܦܬܐ ܡܬܝܕܥܢܝܬܐ ܐܝܬܝܗ̇܆ ܗܝܡܢܘܬܐ ܕܠܐ ܡܨܛܠܝܐ܇ ܘܠܐ ܡܩܒܠܢܝܬܐ ܕܕܚܠܬܐ܀

ܚܕܐ ܗܝ ܡܢ ܟܠ ܐܪ̈ܓܝܓܢ܇ ܕܡܬܡܬܚܐ ܥܡ ܩܘܝܡܗ ܕܗܘܢܐ. ܗ̇ܝ ܕܠ̣ܘܝܐ ܠܝܕܥܬܐ. ܒܗ̇ܝ ܕܟܠܗܝܢ ܥܡ ܥܠܡܐ ܕܥܬܝܕ ܥ̇ܒܪ̈ܢ܀

ܚܕܐ ܗܝ ܪܚܡܬܐ ܛܒܬܐ ܕܠܥܠܡ. ܗ̇ܝ ܕܝܕܥܬܐ ܕܫܪܪܐ ܓܒ̇ܝܐ ܠܗ̇. ܘܠܐ ܡܬܦܪܫܢܝܬܐ ܐܡ̇ܪܝܢ ܕܐܝܬܝܗ̇ ܡܢ ܗܘܢܐ܀

ܒܬܐܘܪܝܐ ܟܝܢܝܬܐ ܕܬܪ̈ܬܝܢ܆ ܡܢܗܘܢ ܪ̈ܫܐ ܘܡܢܗܘܢ ܬܚܝܬ ܪ̈ܫܐ ܐܡ̇ܪܝܢ ܕܐܝܬܝܗܘܢ܇ ܐܝܟ ܕܡܢ ܐܢܢܩܐ. ܒܝܚܝܕܝܘܬܐ ܕܝܢ܆ ܠܐ ܪ̈ܫܐ ܘܠܐ ܕܬܚܝܬ ܪ̈ܫܢܐ. ܐܠܐ ܟܠܗܘܢ ܐܠܗ̈ܐ ܢܗܘܘܢ܀

ܛܣܐ ܡܬܝܕܥܢܐ ܐܝܬܘܗܝ܆ ܝܕܥܬܐ ܕܬܠܝܬܝܘܬܐ ܩܕܝܫܬܐ܀

ܡܬܒ̇ܨܪܐ ܝܕܥܬܐ ܘܢ̇ܚܬܐ܆ ܒܐܝܠܝܢ ܕܡܢ ܒܝܫܘܬܐ ܘܡܢ ܝܘ̈ܠܦܢܐ ܕܓ̈ܠܐ ܒ̇ܢܝܢ ܡܓܕܠܐ. ܓ̇ܕܫܐ ܠܗܘܢ ܕܝܢ ܠܐ ܝܕܥܬܐ ܘܒܘܒܠܐ ܕܣܘ̈ܟܠܐ܆ ܐܝܟܢܐ ܕܐܦ ܠܗ̇ܢܘܢ ܕܒܢ̇ܝܢ ܗܘܘ ܡܓܕܠܐ܀

ܫܡܗ̈ܐ ܕܟܠ ܠܫܢܝ̈ܐ ܡ̈ܠܐ ܡ̇ܘ̈ܕܥܢ. ܣܘܥܪ̈ܢܐ ܕܝܢ ܡܬܝܕܥܝܢ. ܡ̈ܠܐ ܡܕܝܢ ܕܫܠܝ̈ܚܐ ܕܒܠܫܢܐ ܥܒܪܝܐ ܐܬܡܠܠ܆ ܡ̈ܫܬܚ̇ܠܦܢ ܗܘ̈ܝ ܠܫܡܗ̈ܐ ܘܠܡ̈ܠܐ ܕܠܫ̈ܢܐ. ܘܡܛܠ ܗܕܐ ܟܠ ܫܪ̈ܒܢ ܗ̇ܘ ܡܕܡ ܕܡܬܓ̣ܠܐ ܗܘܐ ܝ̣ܕܥ܀

ܡ̈ܠܐ ܕܡܝܬܪ̈ܬܐ ܡܚܙܝܬܐ ܐܢܝܢ ܕܡܝܬܪ̈ܬܐ. ܗ̇ܘ ܕܝܢ ܕܫ̇ܡܥ ܡ̈ܠܐ ܘܠܐ ܥ̇ܒܕ ܠܗܝܢ܆ ܗܢܐ ܐܝܟ ܕܒܛܠܠܐ ܚܙ̇ܐ ܡܝܬܪܘܬܐ܇ ܕܐܝܬܝܗ̇ ܦܪܨܘܦܐ ܕܢܦܫܐ܀

ܦܕܬܐ ܡܬܝܕܥܢܝܬܐ ܐܝܬܝܗ̇܆ ܬܩܢܘܬܐ ܕܢܦܫܐ ܡܠܝܠܬܐ܇ ܕܒܗ̇ ܡܥܕ ܒܪܢܫܐ ܠܡܦܠܚ ܒܗ̇ ܡܝܬܪ̈ܬܗ܀

ܡܫܝܚܐ ܐܬܚܙܝ ܒܪܘܝܐ܆ ܒܠܚܡܐ ܕܟܡܝܘܬܐ. ܒܚܡ̣ܪܐ ܕܚܕܝܘܬܐ. ܒܥܝ̈ܢܘܗܝ ܕܝܢ ܕܣܡܝܐ ܕܟܝܢܐ܀

ܐܠܗܐ ܟܕ ܒ̇ܪܐ ܡܠܝ̈ܠܐ܆ ܘܠܐ ܒܡܕܡ ܐܝܬܘܗܝ ܗܘܐ. ܟܕ ܕܝܢ ܒ̇ܪܐ ܟܝܢܐ ܡܓܫܡܐ ܘܥܠܡ̈ܐ ܕܡܢܗ܆ ܒܡܫܝܚܗ ܐܝܬܘܗܝ܀

ܐܢ ܗ̣ܘ ܕܐܝܬܘܬܐ ܡܢ ܐܝܬܘܬܐ: ܕܝܬܝܪܐ ܐܘ ܕܒܨܝܪܐ ܠܐ ܡܬܐܡܪܐ: ܕܝܘܐ ܕܝܢ ܕܒܝܫ ܡܢ ܕܝܘܐ ܡܢ ܦܪܘܩܢ ܐܫܬܡܗ܆ ܝܕܝܥܐ ܗܝ ܕܠܘ ܒܐܝܬܘܬܗܘܢ ܒܝܫܝ̈ܢ ܕܝܘ̈ܐ܀

ܠܐܝܠܝܢ ܕܥܠ ܒܪܘܝܐ ܡܓ̇ܕܦܝܢ: ܘܐܡ̇ܪܝܢ ܒܝܫܐܝܬ ܠܦܓܪܐ ܗܢܐ ܕܢܦܫܢ܆ ܡܢ̣ܘ ܢܚܘܐ ܐܢܘܢ ܛܝܒܘܬܐ ܗ̇ܝ ܕܟܕ ܐܝܬܝܗܘܢ ܚܫܘ̈ܫܐ ܩ̇ܒܠܘ܇ ܕܒܐܪܓܢܘܢ ܕܕܐܝܟ ܗܢܐ ܐܬܟ̣ܕܢܘ. ܣ̇ܗܕܝܢ ܕܝܢ ܠܡ̈ܠܝ܆ ܐܝܠܝܢ ܕܒܫܪܓܪ̈ܓܝܬܐ ܕܚܠܡ̈ܐ ܡܢ ܫܐܕ̈ܐ ܡܣܬܪܕ̇ܝܢ܇ ܘܠܥܝܪܘܬܐ ܐܝܟ ܕܠܘܬ ܡܠܐܟ̈ܐ ܥ̇ܪܩܝܢ܇ ܟܕ ܩܠܝܠ ܢܬܬܥܝܪ ܦܓܪܐ܀

ܫܘܘܕܥܐ ܐܝܬܘܗܝ܆ ܦܘܫܩܐ ܕܦܘ̈ܩܕܢܐ ܠܒܘܝܐܐ ܕܦܫܝ̈ܛܐ܀

ܐܠ̇ܨܐ ܠܗܘܢܐ܆ ܕܐܘ ܥܠ ܠܐ ܡܓܫܡ̈ܐ ܐܘ ܥܠ ܓܘܫܡ̈ܐ ܢܬܚ̇ܟܡ. ܐܘ ܕܦܫܝܛܐܝܬ ܢܚܙܐ ܣܘܥܪ̈ܢܐ. ܗܠܝܢ ܐܢܘܢ ܓܝܪ ܚܝܘ̈ܗܝ. ܐܠܐ ܠܠܐ ܡܓܫܡ̈ܐ܆ ܠܐ ܚܙ̇ܐ ܟܕ ܛܡܐ ܒܨܒܝܢܗ. ܐܦܠܐ ܠܓܘܫܡ̈ܐ ܟܕ ܢܬܓ̣ܠܙ ܡܢ ܐܪܓܢܘܢ܇ ܗ̇ܘ ܕܡܚܘ̇ܐ ܠܗ ܡܬܪ̈ܓܫܢܝܬܐ. ܡܢܐ ܡܕܝܢ ܠܬܐܘܪܝܐ ܢܬܠܘܢ ܠܢܦܫܐ ܡܝܬܬܐ܆ ܐܝܠܝܢ ܕܛܠ̇ܡܝܢ ܠܒܪܘܝܐ܇ ܘܥ̇ܫܩܝܢ ܐܦ ܠܦܓܪܢ ܗܢܐ܀

ܚܘܣܝܐ ܐܝܬܘܗܝ܆ ܝܕܥܬܐ ܪܘܚܢܝܬܐ܇ ܕܡܕ̇ܒܪܐ ܢܦ̈ܫܬܐ ܕܦܠܘ̈ܚܐ܀

ܐܢܗ̣ܘ ܕܠܐܝܣܪܝܠ ܥܬܝܩܐ ܣܓܝ̈ܐܐ ܕܠܘ ܡܢ ܐܝܣܪܝܠ ܗ̣ܘܘ ܐܬܠܘ̇ܝܘ܆ ܕܠܡܐ ܟܝ ܐܦ ܥܡ ܐܝܣܪܝܠ ܚܕܬܐ ܣܓܝ̈ܐܐ ܡܢ ܡܨܪ̈ܝܐ ܢܦ̣ܩܘ܀

ܟܠܗ ܟܝܢܐ ܡܠܝܠܐ܆ ܠܬܠܬ ܡܢܘ̈ܬܐ ܡܬܦ̣ܪܫ. ܘܥܠ ܚܕܐ ܡ̇ܡܠܟܝܢ ܚܝ̈ܐ. ܘܥܠ ܬܪܝܢܬܐ ܡܘܬܐ ܘܚܝ̈ܐ. ܘܥܠ ܬܠܝܬܝܬܐ ܡܘܬܐ ܒܠܚܘܕ܀

ܦܪܙܘܡܐ ܡܬܝܕܥܢܐ ܐܝܬܘܗܝ܆ ܝܕܥܬܐ ܟܣܝܬܐ ܕܐܪ̈ܙܘܗܝ ܕܐܠܗܐ܀

ܣܘܥܪ̈ܢܐ ܕܒܝܕ ܡܪ̈ܓܫܢܘܬܐ ܢ̇ܦܠܝܢ ܬܚܝܬ ܢܦܫܐ܆ ܡ̇ܙܝܥܝܢ ܠܗ̇ ܕܬܩ̇ܒܠ ܒܗ̇ ܕܡ̣ܘ̈ܬܗܘܢ. ܡܛܠ ܕܗܢܘ ܥ̇ܒܕܗ ܕܗܘܢܐ ܕܢܕܥ. ܐܟܙܢܐ ܕܚܝܘ̈ܬܐ ܕܡܢ ܠܒܪ ܣܝ̈ܩܢ. ܘܒܩܢܕܝܢܘܣ ܢ̇ܦܠ ܐܠܐ ܦ̇ܠܚ. ܐܢ ܗ̣ܘ ܕܐܝܟ ܡܠܬܗ ܕܚܟܝܡܐ ܫܠܝܡܘܢ܇ ܢܘܗܪܗ ܕܡܪܝܐ ܢܫܡܬܐ ܗܝ ܕܒܢܝ̈ܢܫܐ܀

ܦܓܪܐ ܗܢܐ ܕܢܦܫܐ܆ ܝܘܩܢܐ ܗܘ ܕܒܝܬܐ. ܡܪ̈ܓܫܢܘܬܐ ܕܝܢ ܢܝܫܐ ܕܟܘ̈ܐ ܛܥܝ̈ܢܢ. ܕܡܢܗܝܢ ܡ̇ܕܝܩ ܗܘܢܐ܇ ܘܚܙ̇ܐ ܡܬܪ̈ܓܫܢܝܬܐ܀

ܡܪܛܘܛܐ ܡܬܝܕܥܢܐ ܐܝܬܘܗܝ܆ ܡܠܦܢܘܬܐ ܪܘܚܢܝܬܐ ܕܡܟ̇ܢܫܐ ܠܛܥܝ̈ܐ܀

ܠܘ ܕܟܠܢܫ ܗܝ ܠܡܐܡܪ܇ ܕܐܦܩ ܢܦܫܝ ܡܢ ܒܝܬ ܚܒܘܫܝܐ. ܐܠܐ ܕܐܝܠܝܢ ܕܡܛܠ ܕܟܝܘܬܐ ܕܢܦܫܐ܇ ܡ̣ܨܝܢ ܕܐܦ ܒܠܥܕ ܦܓܪܐ ܗܢܐ܇ ܡܬܩ̇ܪܒܘܢ ܠܬܐܘܪܝܐ ܕܗܘܝ̈ܐ܀

ܐܢܗ̣ܘ ܕܚܕܐ ܡܢ ܡܪ̈ܓܫܢܘܬܐ ܬܚ̣ܣܪ: ܝܬܝܪܐܝܬ ܡ̇ܥܝܩܐ ܠܐܝܠܝܢ ܕܡܬܓܠܙܝܢ ܡܢܗ̇܆ ܡܢ̣ܘ ܡܫܟܚ ܡܣܝܒܪ ܓܠܝܙܘܬܐ ܕܡܢ ܟܠܗܝܢ܇ ܐܝܕܐ ܕܡܢ ܫܠܝ ܗ̇ܘܝܐ܇ ܘܓ̇ܠܙܐ ܠܗ ܡܢ ܬܗܪܐ ܕܒܓܘ̈ܫܡܐ܀

ܬܪܒܢܩܐ ܡܬܝܕܥܢܐ ܐܝܬܘܗܝ܆ ܡܝܬܘܬܐ ܕܡܢ̇ܬܐ ܕܪܓܬܐ܇ ܕܡܛܠ ܝܕܥܬܐ ܕܐܠܗܐ ܗ̣̇ܘܝܐ܀

ܐܝܢܐ ܕܗܘܢܗ ܒܟܠܙܒܢ ܠܘܬ ܡܪܝܐ ܗܘ: ܘܡܢ̇ܬܗ ܚܡܬܢܝܢܐ ܡ̣ܠܝܐ ܡܟܝܟܘܬܐ ܡܢ ܥܘܗܕܢܐ ܕܐܠܗܐ: ܘܟܠܗ̇ ܪܓܬܗ ܪܟ̣ܝܢܐ ܠܘܬ ܡܪܝܐ܆ ܕܗܢܐ ܐܝܬܝܗ̇ ܕܠܐ ܢ̣ܕܚܠ ܡܢ ܒܥܠܝ̈ ܕܝ̣ܢܝ̈ܢ܇ ܐܝܠܝܢ ܕܠܒܪ ܡܢ ܦܓܪ̈ܝܢ ܡܬܟܪܟܝܢ܀

ܐܝܠܝܢ ܡܢ ܩܕܝ̈ܫܐ ܕܗܫܐ ܡܢ ܓܘ̈ܫܡܐ ܐܫ̣ܬܪܝܘ: ܘܒܓܘܕܐ ܕܡܠܐܟ̈ܐ ܕܬܚ̇ܠܛܘ܆ ܝܕܝܥܐ ܗܝ ܕܗ̣ܢܘܢ ܗܠܝܢ܇ ܡܛܠ ܡܕܒܪܢܘܬܐ ܐܦ ܠܥܠܡܢ ܐ̣ܬܘ܀

ܐܦܘܕܐ ܡܬܝܕܥܢܐ ܐܝܬܘܗܝ܆ ܙܕܝܩܘܬܗ̇ ܕܢܦܫܐ܇ ܕܒܗ̇ ܡ̣ܥܕ ܒܪܢܫܐ ܡܬܢ̇ܨܚ܆ ܒܣܘܥܪ̈ܢܐ ܘܒܝܘ̈ܠܦܢܐ ܕܠܐ ܥܕܠܝ܀

ܐܝܢܐ ܕܚܫܘܫܐ ܗܘ ܘܡܨ̇ܠܐ ܕܒܥܓܠ ܬܗܘܐ ܡܦܩܬܗ܆ ܕܡ̇ܐ ܠܓܒܪܐ ܕܟܪܝܗ܇ ܘܡܦܝܣ ܠܢܓܪܐ ܕܒܥܓܠ ܢ̣ܬܒܪܝܗ̇ ܠܥܪܣܗ܀

ܣܘܥܪ̈ܢܐ ܠܒܪ ܡܢ ܗܘܢܐ ܐܝܬܝܗܘܢ. ܬܐܘܪܝܐ ܕܝܢ ܕܥܠܝܗܘܢ ܠܓܘ ܡܢܗ ܡܬܩ̇ܝܡܐ. ܠܘ ܕܝܢ ܗܟܢܐ ܥܠ ܬܠܝܬܝܘܬܐ ܩܕܝܫܬܐ. ܝܕܥܬܐ ܓܝܪ ܐܝܬܝܝܬܐ ܒܠܚܘܕ ܐܝܬܝܗ̇܀

ܡܫܝܚܐ ܡܬܝܪܬ ܘܝ̇ܪܬ. ܐܒܐ ܕܝܢ ܒܠܚܘܕ ܡܬܝܪܬ܀

ܐܣܪ ܚܨ̈ܐ ܕܪܒ ܟܗ̈ܢܐ ܐܝܬܘܗܝ܆ ܡܟܝܟܘܬܗ̇ ܕܚ̣ܡܬܐ܇ ܕܡܚ̇ܝܨܐ ܠܗܘܢܐ܀

ܠܘ ܡܠܬܐ ܐܠܗܐ ܩܕܡܝܬ܇ ܢ̣ܚܬ ܠܫܝܘܠ ܘܣ̣ܠܩ ܠܫܡܝܐ. ܐܠܐ ܡܫܝܚܐ ܗ̇ܘ ܕܐܝܬ ܠܗ ܒܗ ܡܠܬܐ. ܦܓܪܐ ܓܝܪ ܫܚܝܡܐ ܠܝܬܘܗܝ ܡܩܒܠܢܐ ܕܝܕܥܬܐ. ܐܠܗܐ ܕܝܢ ܝܕܝܥܐ ܗܘ܀

ܟܠ ܬܐܘܪܝܐ ܒܢܝܫܐ ܕܣܘܟܠܗ̇܆ ܕܠܐ ܗܘܠܐ ܐܝܬܝܗ̇ ܘܕܠܐ ܓܫܘܡ. ܕܗܘܠܐ ܕܝܢ ܘܕܠܐ ܗܘܠܐ ܐܡ̇ܪܝܢ ܕܐܝܬܝܗ̇܆ ܐܝܕܐ ܕܩܢ̣ܝܐ ܘܕܠܐ ܩ̣ܢܝܐ ܣܘܥܪ̈ܢܐ ܕܢ̇ܦܠܝܢ ܬܚܘܬܝܗ̇܀

ܒܝܬ ܓܘܣܐ ܐܝܬܘܗܝ܆ ܦܓܪܐ ܦܠܘܚܐ ܕܢܦܫܐ ܚܫܘܫܬܐ܇ ܕܡܦ̇ܨܐ ܠܗ̇ ܡܢ ܫܐܕ̈ܐ ܕܚܕܝܪ̈ܝܢ ܠܗ̇܀

ܐܝܢܐ ܕܟܕ ܠܐ ܕܟ̣ܐ ܡ̇ܓܗܐ ܡܢ ܦܓܪܐ܆ ܗܢܐ ܢܬܚ̇ܫܒ ܕܠܡܐ ܒܪ ܫܪܒܬܗ ܕܗ̇ܘ ܕܐܬܩ̣ܛܠ܇ ܩ̇ܐܡ ܥܠ ܬܪܥܐ ܘܡܩ̇ܛܪܓ ܠܗ܀

ܠܝܬܝܗ̇ ܝܕܥܬܐ ܡܘܙܓܐ ܕܓܘ̈ܫܡܐ. ܘܠܐ ܓܘ̈ܢܐ ܡܘ̈ܙܓܐ ܕܠܐ ܡܓܫܡ̈ܐ. ܐܠܐ ܝܕܥܬܐ ܡ̇ܢ ܕܠܐ ܡܓܫܡ̈ܐ. ܓܘܢܐ ܕܝܢ ܕܓܘ̈ܫܡܐ ܓܕܫܢܐܝܬ܀

ܚ̇ܣܢܝܢ ܫܐܕ̈ܐ ܠܢܦܫܐ ܟܕ ܢ̣ܣܓܘܢ ܚܫ̈ܐ. ܘܠܒܪܢܫܐ ܠܐ ܡܪܓܫܢܐ ܥ̇ܒܕܝܢ ܠܗ. ܟܕ ܡܕܥ̇ܟܝܢ ܚܝ̈ܠܐ ܕܪ̈ܓܫܘܗܝ܆ ܕܕܠܡܐ ܟܕ ܚܕ ܡܢ ܣܘܥܪ̈ܢܐ ܕܩܪ̈ܝܒܝܢ ܢܫܬܟܚ܇ ܘܠܗܘܢܐ ܐܝܟ ܕܡܢ ܓܘܒܐ ܬܚܬܝܐ ܢܣܩܝܘܗܝ܀

ܗܘܢܐ ܕܩ̣ܢܐ ܓܘܫܡܐ܆ ܠܐ ܚ̇ܙܐ ܠܠܐ ܡܓܫܡ̈ܐ. ܘܟܕ ܢܗܘܐ ܕܠܐ ܓܫܘܡ܆ ܠܐ ܚ̇ܙܐ ܠܓܘ̈ܫܡܐ܀

ܟܠ ܬܐܘܪܝܐ܆ ܒܣܘܥܪܢܐ ܕܬܚܘܬܝܗ̇ ܡܬܚܙܝܐ. ܠܒܪ ܡܢ ܬܠܝܬܝܘܬܐ ܩܕܝܫܬܐ܀

ܡܢ ܬܠܬܐ ܡܕܒ̈ܚܐ ܕܝܕܥܬܐ܆ ܬܪ̈ܝܢ ܕܚܘܕܪܐ ܐܝܬܝܗܘܢ. ܗ̣ܘ ܕܝܢ ܬܠܝܬܝܐ ܕܠܐ ܚܘܕܪܐ ܡܬܚܙܐ܀

ܡ̣ܢܘ ܢܫ̇ܬܥܐ ܛܝܒܘܬܗ ܕܐܠܗܐ. ܘܡܢ̣ܘ ܢܥ̇ܩܒ ܠܡ̈ܠܐ ܕܒܛܝܠܘܬܐ܇ ܘܐܝܟܢܐ ܡܫܝܚܐ ܡܕܒ̇ܪ ܠܟܝܢܐ ܡܠܝܠܐ ܒܝܕ ܥܠܡ̈ܐ ܡܫ̈ܚܠܦܐ܇ ܠܘܬ ܚܕܝܘܬܐ ܕܝܚܝܕܝܘܬܐ ܩܕܝܫܬܐ܀

ܝܕܥܬܐ ܕܐܠܗܐ܆ ܠܘ ܥܠ ܢܦܫܐ ܡܠܝܠܬܐ ܣܢܝܩܐ. ܐܠܐ ܥܠ ܚܙܝܬܐ. ܡܠܝܠܘܬܐ ܓܝܪ܆ ܐܦ ܠܢܦܫ̈ܬܐ ܕܠܐ ܕܟ̣ܝ̈ܢ ܡܥ̣ܕܐ ܕܬܫܬܟܚ. ܚ̣ܙܝܐ ܕܝܢ ܒܕܟ̣ܝ̈ܬܐ ܒܠܚܘܕ܀

ܐܕܡ ܛܘܦܣܐ ܗܘ ܕܡܫܝܚܐ. ܚܘܐ ܕܝܢ ܕܟܝܢܐ ܡܠܝܠܐ܇ ܕܡܛܠܬܗ̇ ܡܫܝܚܐ ܢ̣ܦܩ ܡܢ ܦܪܕܝܣܗ܀

ܫܡܘ̈ܥܐ ܕܥܕܬܐ ܡܬܪܓܫܢܝܬܐ܆ ܒܕܘܟܝ̈ܬܐ ܒܠܚܘܕ ܡܬܦ̣ܪܫܝܢ ܡܢ ܚܕܕ̈ܐ. ܗܠܝܢ ܕܝܢ ܕܡܬܝܕܥܢܝܬܐ ܕܠܘܩܒܠ ܗܕܐ܆ ܒܕܘܟܝ̈ܬܐ ܘܒܓܘ̈ܫܡܐ܀

ܐܝܟܢܐ ܕܐܝܠܝܢ ܕܥܡܪܝܢ ܒܥܠܡܐ ܗܢܐ܆ ܚܙܬܐ ܩܠܝܠ ܙܥܘܪܬܐ ܫ̇ܩܠܝܢ ܥܠ ܥܠܡܐ ܕܥܬܝܕ܆ ܗܟܢܐ ܐܝܠܝܢ ܕܒܥܠܡܐ ܐܚܪܝܐ ܐܝܬܝܗܘܢ܇ ܨܡ̈ܚܐ ܡܕܡ ܢܗܝܪ̈ܐ ܚ̇ܙܝܢ ܕܬܠܝܬܝܘܬܐ ܩܕܝܫܬܐ܀

ܪܝܫ ܡܠܐܟ̈ܐ ܐܝܬܘܗܝ܆ ܐܝܬܘܬܐ ܡܠܝܠܬܐ܇ ܕܡ̈ܠܐ ܕܥܠ ܒܛܝܠܘܬܐ ܘܕܝ̣ܢܐ܇ ܘܕܥܠܡܝ̈ܗܘܢ ܕܡܠܐܟ̈ܐ ܐܬܗܝܡܢ܀

ܬܪ̈ܝܢ ܡܢ ܥܠܡ̈ܐ ܡܕܟ̇ܝܢ ܡܢ̇ܬܗ̇ ܚܫܘܫܬܐ ܕܢܦܫܐ. ܚܕ ܡܢܗܘܢ ܒܝܕ ܦܘܠܚܢܐ܆ ܘܐܚܪܢܐ ܒܝܕ ܬܫܢܝܩܐ ܚܪܝܦܐ܀

ܬܐܘܪܝܐ ܕܡܠܐܟ̈ܐ ܐܘܪܫܠܡ ܕܒܫܡܝܐ ܘܛܘܪܐ ܕܨܗܝܘܢ ܡܫܬܡܗܐ. ܐܢ ܕܝܢ ܐܝܠܝܢ ܕܗܝܡܢܘ ܒܡܫܝܚܐ: ܠܛܘܪܐ ܕܨܗܝܘܢ ܘܠܡܕܝܢܬܗ ܕܐܠܗܐ ܚܝ̇ܐ ܐܬܩ̇ܪܒܘ܆ ܒܬܐܘܪܝܐ ܡܕܝܢ ܕܡܠܐܟ̈ܐ ܗ̣ܘܘ ܘܗ̇ܘܝܢ܇ ܐܝܠܝܢ ܕܗܝܡܢܘ ܒܡܫܝܚܐ. ܗ̇ܝ ܕܡܢܗ̇ ܐܒܗ̈ܝܗܘܢ ܟܕ ܢ̣ܦܩܘ ܠܡܨܪܝܢ ܢ̣ܚܬܘ܀

ܡܠܐܟܐ ܐܝܬܘܗܝ܆ ܐܝܬܘܬܐ ܡܠܝܠܬܐ܇ ܕܡ̈ܠܐ ܕܥܠ ܒܛܝܠܘܬܐ ܘܕܝ̣ܢܐ܇ ܘܕܥܠܡܝ̈ܗܘܢ ܕܒܢܝ̈ܢܫܐ ܐܬܗܝܡܢ܀

ܐܝܠܝܢ ܕܐܪܥܗܘܢ ܦ̣ܠܚܘ ܒܫܬ ܫܢܝ̈ܐ ܕܦܘܠܚܢܐ܆ ܗܠܝܢ ܠܘ ܒܫ̣ܢܬܐ ܕܬܡܢܐ. ܐܠܐ ܒܕܫܒܥ ܢܬܪܣܘܢ ܝܬܡ̈ܐ ܘܐܪ̈ܡܠܬܐ. ܒܫ̣ܢܬܐ ܓܝܪ ܕܬܡܢܐ ܠܝܬ ܝܬܡ̈ܐ ܘܐܪ̈ܡܠܬܐ܀

ܡܢܗܘܢ ܕܒܢܝ̈ ܐܢܫܐ܆ ܥܐܕܐ ܥ̇ܒܕܝܢ ܥܡ ܡܠܐܟ̈ܐ. ܡܢܗܘܢ ܕܝܢ ܒܫ̣ܚܪܐ ܕܫܐܕ̈ܐ ܡܬܚ̇ܠܛܝܢ. ܘܡܢܗܘܢ ܥܡ ܒܢܝ̈ܢܫܐ ܛܡ̈ܐܐ ܡܫ̇ܬܢܩܝܢ܀

ܒܘܟܪ̈ܐ ܐܝܬܝܗܘܢ܆ ܟܝ̈ܢܐ ܡܠܝ̈ܠܐ܇ ܕܒܟܠ ܚܕ ܡܢ ܥܠܡ̈ܐ ܠܚܘܠܦܐ ܡܝܬܪܐ ܡܬܩ̇ܪܒܝܢ܀

ܡܢ ܛܟܣܐ ܕܡܠܐܟ̈ܐ܆ ܛܟܣܐ ܕܪ̈ܒܝ ܡܠܐܟ̈ܐ ܘܕܢܦ̈ܫܢܐ ܗ̇ܘܐ. ܡܢ ܕܢܦ̈ܫܢܐ ܕܝܢ܆ ܕܫܐܕ̈ܐ ܘܕܒܢܝ̈ܢܫܐ. ܡܢ ܕܒܢܝ̈ܢܫܐ ܕܝܢ܆ ܡܠܐܟ̈ܐ ܬܘܒ ܘܫܐܕ̈ܐ ܗ̇ܘܝܢ. ܐܢ ܗ̣ܘ ܕܫܐܕܐ ܐܝܬܘܗܝ܆ ܗ̇ܘ ܕܡܛܠ ܝܬܝܪܘܬܐ ܕܚ̣ܡܬܐ ܢ̣ܦܠ ܡܢ ܦܘܠܚܢܐ܇ ܘܥܡ ܓܘܫܡܐ ܚܫܝܟܐ ܘܡܬܝܚܐ ܐܬܟܕܢ܀

ܗܘܢܐ ܕܐܫ̇ܬܠܚ ܡܢ ܚܫ̈ܐ: ܘܣܘ̈ܟܠܐ ܕܗܘܝ̈ܐ ܚܙ̇ܐ܆ ܠܐ ܡܟܝܠ ܫܪܝܪܐܝܬ ܡܩܒ̇ܠ ܦܬܟܪ̈ܐ ܕܒܝܕ ܡܪ̈ܓܫܢܘܬܐ. ܐܠܐ ܐܝܟ ܗ̇ܘ ܕܥܠܡܐ ܐܚܪܢܐ ܡܬ̣ܒܪܐ ܒܝܕܥܬܗ. ܘܠܘܬܗ ܢ̇ܬܦ ܠܗ̇ ܠܬܪܥܝܬܗ܆ ܘܫ̇ܕܐ ܡܢܗ ܥܠܡܐ ܡܬܪܓܫܢܐ܀

ܥܢܢܐ ܡܬܝܕܥܢܝܬܐ ܐܝܬܝܗ̇܆ ܟܝܢܐ ܡܠܝܠܐ܇ ܕܐܬܗܝܡܢ ܡܢ ܐܠܗܐ ܠܡܫܩܝܘ ܠܕܡ̈ܟܝܢ ܡܢܗ܀

ܐܝܟܢܐ ܕܡܐ ܕܕ̇ܢܚ ܫܡܫܐ: ܐܦ ܨܒܘ̈ܬܐ ܐܝܠܝܢ ܕܩܠܝܠ ܪ̈ܡܢ ܡܢ ܐܪܥܐ ܛܠܠܐ ܥ̇ܒܕ̈ܢ܆ ܗܟܢܐ ܐܦ ܠܗܘܢܐ ܕܡܫ̇ܪܐ ܡܬܩ̇ܪܒ ܠܣܘ̈ܟܠܐ ܕܗܘܝ̈ܐ܇ ܣܘܥܪ̈ܢܐ ܥܡܘܛܐܝܬ ܡܬܚܙܝܢ܀

ܗܘܢܐ ܕܐܫ̇ܬܠܚ ܡܢ ܚܫ̈ܐ܆ ܟܠܗ ܗ̇ܘܐ ܐܝܟ ܢܘܗܪܐ. ܒܕܡܬܢ̇ܗܪ ܡܢ ܬܐܘܪܝܐ ܕܗܘܝ̈ܐ܀

ܥܪܦܠܐ ܡܬܝܕܥܢܝܬܐ ܐܝܬܝܗ̇܆ ܬܐܘܪܝܐ ܪܘܚܢܝܬܐ܇ ܕܐܚܝܕܐ ܒܗ̇ ܡ̈ܠܐ ܕܒܛܝܠܘܬܐ܇ ܘܕܝ̣ܢܐ ܕܐܝܠܝܢ ܕܥܠ ܐܪܥܐ܀

ܐܝܟܢܐ ܕܓܠ̈ܠܐ ܡܐ ܕܡܬܬܪܝܡܝܢ ܛܠܠܐ ܥ̇ܒܕܝܢ: ܘܬܘܒ ܡܚܕܐ ܕܠܐ ܛܠܠܐ ܡܬܚܙܝܢ܆ ܗܟܢܐ ܟܕ ܡ̇ܢ ܣܘ̈ܟܠܐ ܕܗܘܝ̈ܐ ܢܥ̣ܪܩܘܢ ܡܢ ܗܘܢܐ ܕܟ̣ܝܐ܇ ܡܚܕܐ ܬܘܒ ܡܬܝܕܥܝܢ܀

ܫܐܕ̈ܐ ܡ̇ܢ܆ ܠܓܘ̈ܢܐ ܘܠܐܣܟܡ̈ܐ ܘܠܪܒܘܬܐ ܒܠܚܘܕ ܡܬܕܡ̇ܝܢ. ܚܝܠܘ̈ܬܐ ܕܝܢ ܩܕܝ̈ܫܐ܆ ܐܦ ܠܗ ܠܟܝܢܐ ܕܓܘܫܡܐ ܝ̇ܕܥܝܢ ܠܡܫܚܠܦܘ. ܟܕ ܡܛܟܣܝܢ ܠܗ ܡܛܠ ܬܫܡ̈ܫܬܐ ܕܐܠܨ̈ܢ. ܘܗ̇ܝ ܡ̇ܢ ܠܘܬ ܡܪ̈ܟܒܐ ܓ̇ܕܫܐ. ܕܟܝܢܐ ܕܝܢ ܠܐ ܡܓܫܡܐ܆ ܠܝܬ ܐܢܘܢ ܣܘ̈ܟܠܐ ܕܕܐܝܟ ܗܠܝܢ ܐܝܟ ܕܐܡ̇ܪܝܢ܀

ܩܝ̣ܡܬܐ ܕܦܓܪܐ ܐܝܬܝܗ̇܆ ܫܘܢܝܐ ܕܡܢ ܡܘܙܓܐ ܒܝܫܐ܇ ܠܘܬ ܡܘܙܓܐ ܡܝܬܪܐ܀

ܚܝ̈ܐ ܡ̇ܢ ܩܕܡܝܬ ܠܚܝ̈ܐ ܡ̇ܚܝ̈ܢ. ܒܬܪܟܢ ܕܝܢ ܠܐܝܠܝܢ ܕܚ̇ܐܝܢ ܘܠܐܝܠܝܢ ܕܡܝܬܝܢ. ܠܚܪܬܐ ܕܝܢ ܐܦ ܠܡܝ̈ܬܐ ܡ̇ܚܝ̈ܢ܀

ܠܘ ܒܟܠܗܘܢ ܥܠܡ̈ܐ ܬܫܟܚ ܡܨܪܝܢ. ܒܐܚܪ̈ܢܐ ܕܝܢ ܬܚܙܐ ܠܐܘܪܫܠܡ ܘܠܛܘܪܐ ܕܨܗܝܘܢ܀

ܩܝ̣ܡܬܐ ܕܢܦܫܐ ܐܝܬܝܗ̇܆ ܦܘܢܝܐ ܕܡܢ ܛܟܣܐ ܕܚܫܘܫܘܬܐ܇ ܠܘܬ ܬܩܢܘܬܐ ܕܠܐ ܚܫ̈ܐ܀

ܡܬܙܝܥܢܘܬܗܘܢ ܣܓܝܐܬ ܕܡܘ̣̈ܬܐ ܘܚܫܝ̈ܗܘܢ ܡܫ̈ܚܠܦܐ ܕܡܠܝ̈ܠܐ܆ ܐܠܨ̇ܘ ܕܣܘ̈ܟܠܐ ܕܥܠ ܒܛܝܠܘܬܐ ܥܡܘܛܐܝܬ ܢܬܚܙܘܢ. ܛܟܣܝ̈ܗܘܢ ܕܝܢ ܡܫ̈ܚܠܦܐ܆ ܠܣܘ̈ܟܠܐ ܕܥܠ ܕܝ̣ܢܐ ܡܚܦܝ̈ܐ ܥ̣ܒܕܘ܀

ܡ̈ܠܐ ܕܥܠ ܕܝ̣ܢܐ܆ ܬܪ̈ܝܢܝܬܐ ܐܢܝܢ ܐܝܟ ܕܐܡ̇ܪܝܢ܇ ܕܡ̈ܠܐ ܕܥܠ ܡܬܙܝܥܢܘܬܐ ܘܥܠ ܒܛܝܠܘܬܐ܀

ܩܝ̣ܡܬܐ ܕܗܘܢܐ ܐܝܬܝܗ̇܆ ܫܘܢܝܐ ܕܡܢ ܠܐ ܝܕܥܬܐ܇ ܠܘܬ ܝܕܥܬܐ ܕܫܪܪܐ܀

ܐܝܟܢܐ ܕܠܘ ܗ̣ܝ ܟܕ ܗ̣ܝ ܐܝܬܝܗ̇ ܕܢܚܙܐ ܠܢܘܗܪܐ ܘܕܢܡܠܠ ܥܠ ܢܘܗܪܐ܆ ܗܟܢܐ ܠܐ ܫܘ̣ܝܐ ܗ̇ܝ ܕܢܚܙܐ ܠܐܠܗܐ܇ ܘܕܢܣ̇ܬܟܠ ܡܕܡ ܥܠ ܐܠܗܐ܀

ܚ̣ܡܬܐ ܟܕ ܬܫ̇ܬܓܫ܆ ܡܣܡ̇ܝܐ ܠܚܙ̇ܝܐ. ܪܓܬܐ ܕܝܢ ܟܕ ܚܝ̇ܘܬܢܐܝܬ ܬܬܙܝܥ܆ ܠܣܘܥܪ̈ܢܐ ܡ̈ܬܚܙܝܢܐ ܡܚܦ̇ܝܐ܀

ܣܝܦܐ ܡܬܝܕܥܢܐ ܐܝܬܘܗܝ܆ ܡܠܬܐ ܪܘܚܢܝܬܐ܇ ܕܦ̇ܪܫܐ ܦܓܪܐ ܡܢ ܢܦܫܐ܇ ܐܘ ܒܝܫܘܬܐ ܘܠܐ ܝܕܥܬܐ܀

ܐܝܟܢܐ ܕܐܝܠܝܢ ܕܠܡ̈ܕܝܢܬܐ ܐܬ̇ܝܢ ܕܢܚܙܘܢ ܫܘܦܪ̈ܝܗܝܢ: ܡܬܕܡ̇ܪܝܢ ܟܕ ܒܟܠ ܚܕ ܡܢ ܥ̇ܒ̈ܕܐ ܚܝ̇ܪܝܢ܆ ܗܟܢܐ ܐܦ ܗܘܢܐ ܟܕ ܢܬܩ̇ܪܒ ܠܣܘ̈ܟܠܐ ܕܗܘܝ̈ܐ܇ ܡܢ ܪܓܬܐ ܕܪܘܚ ܡܬܡܠܐ ܘܡܢ ܬܗܪܐ ܠܐ ܡܬܦ̣ܪܫ܀

ܐܢܗ̣ܘ ܕܡܠܟܘܬܐ ܕܫܡܝܐ ܬܐܘܪܝܐ ܕܗܘܝ̈ܐ ܐܝܬܝܗ̇: ܘܗܕܐ ܐܝܟ ܡܠܬܗ ܕܡܪܢ ܒܓܘܢ ܐܝܬܝܗ̇: ܓܘܢ ܕܝܢ ܠܒܝܟ ܗܘ ܡܢ ܫܐܕ̈ܐ܆ ܫܦܝܪ ܡܕܝܢ ܡܬܐܡܪ܇ ܕܦ̈ܠܫܬܝܐ ܐܪܥܐ ܕܡܘܠܟܢܐ ܠܒܝܟܝܢ܀

ܣܟܪܐ ܡܬܝܕܥܢܝܬܐ ܐܝܬܝܗ̇܆ ܝܕܥܬܐ ܦܠܘܚܬܐ܇ ܕܡܢ̇ܛܪܐ ܕܠܐ ܢܟܝܢ ܡ̇ܢܬܗ̇ ܚܫܘܫܬܐ ܕܢܦܫܐ܀

ܗ̇ܘ ܡܕܡ ܕܒܟܣܐ ܩܕܡܝܐ ܡܣܝܟ ܠܚ̣ܡܪܐ ܕܡ̇ܐ܆ ܗ̇ܘ ܕܐܝܬܘܗܝ ܝܕܥܬܐ ܕܠܐ ܡܓܫܡ̈ܐ. ܗ̇ܘ ܕܝܢ ܕܒܬܪܝܢܐ܆ ܢܝܫܐ ܕܡܝ̈ܐ ܫܩܝܠ. ܐܡ̇ܪ ܐܢܐ ܕܝܢ ܬܐܘܪܝܐ ܕܓܘ̈ܫܡܐ. ܘܗܢܘ ܟܣܐ ܕܡܢ ܬܪ̈ܝܗܘܢ ܗܠܝܢ܇ ܡܢ ܚܟܡܬܐ ܠܢ ܐܬܡ̣ܙܓ܀

ܪܒܝܬܐ ܕܥ̣ܘܠܐ ܕܢܦܠܘܚ ܐܪܥܐ ܠܐ ܡܫܟܚ. ܡܝܬܪ̈ܬܐ ܓܝܪ ܕܢܦܫܗ ܫ̣ܠܚ ܐܢܝܢ. ܘܕܢܚܕܘܪ ܬܘܒ ܕܘ̇ܝܐ ܡܬܢ̣ܟܦ܆ ܗ̇ܘ ܕܐܝܬܘܗܝ ܡܠܦܢܐ ܕܐܚܪ̈ܢܐ. ܘܠܗܠܝܢ ܕܠܬܚܬ ܡܢܗ ܡܟܝܠ܆ ܚܡܬܐܝܬ ܡ̇ܠܦ܇ ܗ̇ܘ ܕܗܫܐ ܒܝܬ ܢܨܝ̈ܐ ܦ̣ܪܫ ܠܡܟܬܪܘ܀

ܣܢܘܪܬܐ ܡܬܝܕܥܢܝܬܐ ܐܝܬܝܗ̇܆ ܝܕܥܬܐ ܪܘܚܢܝܬܐ܇ ܐܝܕܐ ܕܡܢ̇ܛܪܐ ܡ̇ܢܬܗ̇ ܣܟܘܠܬܢܝܬܐ ܕܢܦܫܐ ܕܠܐ ܢܟܝܢ܀

ܐܢܗ̣ܘ ܕܠܚ̣ܡܐ ܕܟܝܢܐ ܡܠܝܠܐ: ܬܐܘܪܝܐ ܕܗܘܝ̈ܐ ܐܝܬܘܗܝ: ܘܠܗܢܐ ܦܩܝܕܝܢܢ ܕܒܕܘܥܬܐ ܕܐܦܝ̈ܢ ܢܐܟܠܝܘܗܝ܆ ܝܕܝܥܐ ܗܝ ܕܒܝܕ ܦܘܠܚܢܐ ܠܗܢܐ ܐܟ̇ܠܝܢܢ܀

ܐܝܠܝܢ ܕܠܐܪܥܐ ܕܡܘܠܟܢܐ ܝ̣ܪܬܘ܆ ܒܟܠܗ ܚܝܠܗܘܢ ܢܩ̇ܛܠܘܢ ܠܦܠܫܬܝ̈ܐ ܕܒܗ̇. ܕܕܠܡܐ ܟܕ ܢܣܐܒ ܒܗܘܢ ܝܫܘܥ܇ ܢܦܘܫ ܠܗ ܡܢ ܕܠܡܦܩ ܒܚܝܠܗܘܢ܇ ܘܬܘܒ ܢܗܘܘܢ ܥ̣ܒ̈ܕܐ ܠܦܠܫܬܝ̈ܐ܀

ܒܠܘܥܐ ܡܬܝܕܥܢܐ ܐܝܬܘܗܝ܆ ܡܠܦܢܘܬܐ ܪܘܚܢܝܬܐ܇ ܗ̇ܝ ܕܠܢܦܫܐ ܡܠܝܠܬܐ ܡܢ ܥܘܡܩ̈ܐ ܕܒܝܫܘܬܐ ܠܘܬ ܡܝܬܪܘܬܐ ܡ̇ܣܩܐ܀

ܗ̇ܘ ܕܥܠ ܐܦܝ̈ ܠܐ ܚܫܘܫܘܬܐ ܡܬܟ̇ܬܫ܆ ܢܙ̇ܕܝܢ ܒܦܘ̈ܩܕܢܐ. ܗ̇ܘ ܕܝܢ ܕܥܠ ܐܦܝ̈ ܫܪܪܐ܆ ܒܝܕܥܬܐ ܢܣܝܦ ܠܒܥܠܕܒܒ̈ܘܗܝ. ܡܙܕܟܝܢܘܬܗ ܕܝܢ ܕܩܕܡܝܐ܆ ܟܕ ܢܣܥܘܪ ܡܕܡ ܕܡܣܠܝ ܡܢ ܢܡܘܣܐ. ܕܬܪܝܢܐ ܕܝܢ܆ ܟܕ ܢܗܘܐ ܪܫܐ ܕܝܘ̈ܠܦܢܐ ܘܕܣܘ̈ܟܠܐ ܕܓ̈ܠܐ܀

ܒܬܪܥܝܬܐ ܕܟ̣ܝܬܐ܆ ܫܡܝܐ ܢܗܝܪ ܚܙܬܐ ܡܬܛ̣ܒܥ ܘܐܬܪܐ ܐܪܘܝܚܐ. ܕܒܗ ܡܬܚܙܝܢ ܐܝܟܢܐ ܣܘ̈ܟܠܐ ܕܗܘܝ̈ܐ ܘܡܠܐܟ̈ܐ ܩܕܝ̈ܫܐ܇ ܠܘܬ ܐܝܠܝܢ ܕܫ̇ܘܝܢ ܡܬܩ̇ܪܒܝܢ. ܠܗܕܐ ܕܝܢ ܚܙܬܐ ܕܡܬܛ̣ܒܥܐ܆ ܐܟܬܐ ܥܡܘܛܐܝܬ ܡܚܘ̇ܝܐ. ܚܡ̣ܬܐ ܕܝܢ ܟܕ ܬܫܬܠܗܒ܆ ܡܠܝܐܝܬ ܡܚ̇ܒܠܐ ܠܗ̇܀

ܛܘܪܐ ܡܬܝܕܥܢܐ ܐܝܬܘܗܝ܆ ܬܐܘܪܝܐ ܪܘܚܢܝܬܐ܇ ܐܝܕܐ ܕܒܡܪܘܡܐ ܡܥܠܝܐ ܣ̣ܝܡܐ܇ ܕܥ̣ܣܩܐ ܠܡܬܩ̇ܪܒܘ ܠܗ. ܕܟܕ ܗܘܢܐ ܠܘܬܗ̇ ܢܡ̇ܢܥ܇ ܚܙ̇ܝܐ ܗ̇ܘܐ ܕܟܠܗܘܢ ܣܘ̈ܟܠܐ ܕܣܘܥܪ̈ܢܐ ܬܚܬܝ̈ܐ܀

ܐܝܢܐ ܕܥܠܡܐ ܡܬܝܕܥܢܐ ܡܠܝܐܝܬ ܒܢܦܫܗ ܛܒܝܥ܆ ܦܫ̣ ܠܗ ܡܢ ܟܠܗ̇ ܪܓܬܐ ܡܬܚܒܠܢܝܬܐ. ܒ̇ܗܬ ܕܝܢ ܡܟܝܠ ܒܐܝܠܝܢ ܕܡܢ ܩܕܝܡ ܡܬܢܝܚ ܗܘܐ܆ ܟܕ ܪܫ̇ܐ ܠܗ ܚܘܫܒܗ ܥܠ ܠܐ ܡܪܓܫܢܘܬܗ ܩܕܡܝܬܐ܀

ܥܠܡܐ ܗ̇ܘ ܕܒܬܪܥܝܬܐ ܡܬܒܢܐ܆ ܒܐܝܡܡܐ ܡ̇ܢ ܥ̣ܣܩ ܠܚܙܬܗ ܡܣ̣ܬܒܪ ܕܐܝܬܘܗܝ. ܒܕܡܬܢ̣ܬܦ ܗܘܢܐ ܡܢ ܡܪ̈ܓܫܢܘܬܐ ܘܡܢ ܢܘܗܪܐ ܡܬܪܓܫܢܐ ܕܡ̇ܢܗܪ. ܒܠܠܝܐ ܕܝܢ ܐܝܬ ܠܡܚܙܝܗ܆ ܟܕ ܒܥܕܢܐ ܕܨܠܘܬܐ ܢܗܝܪܐܝܬ ܡܬܛ̣ܒܥ܀

ܐܘܪܚܐ ܡܬܝܕܥܢܝܬܐ ܐܝܬܝܗ̇܆ ܬܩܢܘܬܐ ܕܢܦܫܐ ܡܠܝܠܬܐ. ܕܒܗ̇ ܗܘܢܐ ܟܕ ܢܪܕܐ܇ ܦ̇ܓܥ ܒܣܘܥܪ̈ܢܐ ܘܡܣ̇ܬܟܠ ܣܘ̈ܟܠܝܗܘܢ܀

ܐܢܗ̣ܘ ܕܚ̣ܡܬܐ ܕܬܢܝ̈ܢܐ ܚ̣ܡܪܐ ܗܘ: ܡܢ ܚ̣ܡܪܐ ܕܝܢ ܢܙܝܪ̈ܐ ܪ̈ܚܝܩܝܢ܆ ܡܕܝܢ ܕܠܐ ܚ̣ܡܬܐ ܦܩܝܕܝܢ ܢܙܝܪ̈ܐ ܠܡܗܘܐ܀

ܗܘܢܐ ܪܫܐ ܕܢܦܫܐ ܡܫܬܡܗ. ܡܝܬܪ̈ܬܐ ܕܝܢ ܢܝܫܐ ܕܣܥܪܐ ܐܝܬܝܗܝܢ܆

ܗܠܝܢ ܕܟܕ ܢܬܓܠܙ ܡܢܗܝܢ܇ ܢܙܝܪܐ ܡܢ ܝܕܥܬܐ ܡܬܦ̣ܪܫ. ܘܟܕ ܦܟܝܪ ܡܢ ܒܥܠܕܒܒ̈ܘܗܝ ܡܬܕܒ̣ܪ܀

ܪܒ ܟܘܡܪ̈ܐ ܐܝܬܘܗܝ܆ ܗ̇ܘ ܕܚܠܦ ܟܠܗ ܟܝܢܐ ܡܠܝܠܐ ܡܬܟ̇ܫܦ ܠܘܬ ܐܠܗܐ܇ ܘܠܡܢܗܘܢ ܡܢ ܒܝܫܘܬܐ ܦ̇ܪܫ ܘܠܡܢܗܘܢ ܡܢ ܠܐ ܝܕܥܬܐ܀

ܡܝ̇ܩܪܝܢܢ ܠܡܠܐܟ̈ܐ܆ ܠܘ ܡܛܠ ܟܝܢܗܘܢ. ܐܠܐ ܡܛܠ ܡܝܬܪܘܬܗܘܢ. ܘܡ̇ܨܚܝܢܢ ܠܫܐܕ̈ܐ܆ ܡܛܠ ܒܝܫܘܬܐ ܕܒܗܘܢ܀

ܒܠܚܘܕܘܗܝ ܡܢ ܟܠ ܓܘ̈ܫܡܝܢ܆ ܡܫܝܚܐ ܐܝܬܘܗܝ ܠܢ ܣܓܝܕܐ. ܡܛܠ ܕܗ̣ܘ ܒܠܚܘܕܘܗܝ ܐܝܬ ܠܗ ܒܗ ܡܠܬܐ ܐܠܗܐ܀

ܐܠܗܐ ܚܕܬܐ ܐܝܬܘܗܝ܆ ܗ̇ܘ ܕܢ̇ܟܝܢ ܡܕܡ ܠܐ ܡܫܟܚ. ܐܘ ܗ̇ܘ ܕܠܒܝܫܬܐ ܡܚܝܕ܀

ܬܠܝܬܝܘܬܐ ܩܕܝܫܬܐ܆ ܡܛܠܬܗ̇ ܒܠܚܘܕܝܗ̇ ܐܝܬܝܗ̇ ܣܓܝܕܬܐ. ܕܡܢܗ̇ ܒܚܪܬܐ ܟܝܢܐ ܠܐ ܡܓܫܡܐ ܘܡܓܫܡܐ܆ ܡܢ ܩܕܝܡ ܡܢ ܠܐ ܡܕܡ ܠܡܕܡ ܗ̣ܘܘ܀

ܗ̇ܘ ܕܡܢ ܫܘܝܘܬܐ ܕܗܘܝ̈ܐ ܚ̇ܙܐ ܠܒܪܘܝܐ܆ ܠܘ ܠܟܝܢܗ ܝ̇ܕܥ ܕܡ̇ܢܘ. ܐܠܐ ܠܚܟܡܬܗ ܝ̇ܕܥ܇ ܗ̇ܝ ܕܒܗ̇ ܥ̣ܒܕ ܟܠܡܕܡ. ܚܟܡܬܐ ܕܝܢ ܐܡ̇ܪ ܐܢܐ ܠܘ ܐܝܬܝܝܬܐ ܐܠܐ ܗ̇ܝ ܕܒܗܘܝ̈ܐ ܡܬܚܙܝܐ. ܗ̇ܝ ܕܬܐܘܪܝܐ ܟܝܢܝܬܐ ܡ̣ܥܕܝܢ ܩ̇ܪܝܢ܇ ܐܝܠܝܢ ܕܒܗܠܝܢ ܡܗܝܪܝܢ. ܘܐܢ ܗܕܐ ܗܟܢܐ ܗܝ܆ ܡܢܐ ܗܝ ܫܢܝܘܬܐ ܕܐܝܠܝܢ ܕܐܡ̇ܪܝܢ܇ ܕܟܝܢܗ ܕܐܠܗܐ ܝ̇ܕܥܝܢ܀

ܥܠ ܗܘܢܐ ܕܟ̣ܝܐ ܣܢܝܩܝܢ ܣܘ̈ܟܠܐ ܕܓܘ̈ܫܡܐ. ܥܠ ܕܕܟ̣ܐ ܕܝܢ ܝܬܝܪ ܣܘ̈ܟܠܐ ܕܠܐ ܡܓܫܡ̈ܐ. ܘܥܠ ܕܕܟ̣ܐ ܡܢ ܗܠܝܢ ܬܠܝܬܝܘܬܐ ܩܕܝܫܬܐ܀

ܕܒܚܬܐ ܪܘܚܢܝܬܐ ܐܝܬܝܗ̇܆ ܬܐܪܬܐ ܕܟ̣ܝܬܐ܇ ܐܝܕܐ ܕܥܠ ܬܩܢܘܬܗ ܕܗܘܢܐ ܐܝܟ ܕܥܠ ܡܕܒܚܐ ܣܝ̇ܡܐ܀

ܐܝܟܢܐ ܕܥܛܠܐ ܠܡܚܙܐ ܣܘ̈ܟܠܝܗܘܢ ܕܠܐ ܡܓܫܡ̈ܐ: ܡܢ ܗ̇ܝ ܕܒܝܕ ܡܪ̈ܓܫܢܘܬܐ ܢܬܩ̇ܪܒ ܠܣܘܥܪ̈ܢܐ܆ ܗܟܢܐ ܥܛܠܐ ܠܡܕܥ ܣܘ̈ܟܠܝܗܘܢ ܕܓܘ̈ܫܡܐ܇ ܡܢ ܗ̇ܝ ܕܢܚܙܐ ܠܗܘܢ ܠܓܘ̈ܫܡܐ܀

ܠܝܬܝܗ̇ ܬܠܝܬܝܘܬܐ ܩܕܝܫܬܐ. ܨܒܘܬܐ ܕܒܬܐܘܪܝܐ ܡܡܙܓ̣ܐ. ܗܕܐ ܓܝܪ ܠܒ̣ܪ̈ܝܐ ܒܠܚܘܕ ܓ̣ܕܫ̇ܬ. ܡܕܝܢ ܚܣܝܐܝܬ܆ ܝܕܥܬܐ ܐܝܬܝܝܬܐ ܐܢܫ ܠܗܕܐ ܢܫܡܗ܀

ܗ̇ܘ ܕܡܢ ܣܘܥܪ̈ܢܐ ܐܬܦ̣ܪܫ܆ ܠܐ ܗܘܐ ܦܢܛܘܣ ܐܦ ܡܢ ܬܐܘܪܝܐ ܕܥܠܝܗܘܢ ܢ̣ܦܠ. ܘܠܐ ܬܘܒ ܗ̇ܘ ܕܠܬܐܘܪܝܐ ܐܘܒܕ܆ ܗܢܐ ܠܒܪ ܡܢ ܣܘܥܪ̈ܢܐ ܐܝܬܘܗܝ. ܐܠܐ ܠܐ ܗܘܐ ܗܟܢܐ ܥܠ ܬܠܝܬܝܘܬܐ ܩܕܝܫܬܐ. ܗܝܡܢܢ ܓܝܪ ܕܝܕܥܬܐ ܐܝܬܝܝܬܐ ܒܠܚܘܕ ܐܝܬܝܗ̇܀

ܐܝܟܢܐ ܕܗܫܐ ܒܝܕ ܡܪ̈ܓܫܢܘܬܐ ܠܣܘܥܪ̈ܢܐ ܡܬܪ̈ܓܫܢܐ ܡܬܩ̇ܪܒܝܢܢ: ܠܚܪܬܐ ܕܝܢ ܡܐ ܕܐܬܕܟܝܢܢ ܘܠܣܘ̈ܟܠܝܗܘܢ ܝ̇ܕܥܝܢܢ܆ ܗܟܢܐ ܩܕܡܝܬ ܠܗܘܢ ܠܣܘܥܪ̈ܢܐ ܚܙ̇ܝܢܢ ܚܢܢ܇ ܘܡܐ ܕܝܬܝܪܐܝܬ ܐܬܕܟܝܢ܇ ܐܦ ܠܬܐܘܪܝܐ ܕܥܠܝܗܘܢ ܝ̇ܕܥܝܢܢ܇ ܕܒܬܪܗ̇ ܐܝܬ ܠܡܕܥ ܡܟܝܠ ܐܦ ܠܬܠܝܬܝܘܬܐ ܩܕܝܫܬܐ܀

ܗܘܢܐ ܡ̇ܢ ܠܐܪܓܫܬܐ ܠܘ ܐܝܟ ܕܠܡܬܪܓܫܢܐ ܦ̇ܪܫ: ܐܠܐ ܐܝܟ ܕܠܐܪܓܫܬܐ. ܪܓܫܬܐ ܕܝܢ ܠܡܬܪ̈ܓܫܢܝܬܐ܆ ܠܘ ܐܝܟ ܣܘܥܪ̈ܢܐ. ܐܠܐ ܐܝܟ ܕܠܣܘܥܪ̈ܢܐ ܡܬܪ̈ܓܫܢܐ ܦ̇ܪܫܐ܀

ܐܪܓܫܬܐ ܡ̇ܢ ܠܐܪܓܫܬܐ ܠܐ ܦ̇ܪܫܐ. ܦ̇ܪܫܐ ܕܝܢ ܒܠܚܘܕ ܥܪ̈ܓܫܐ܆ ܠܘ ܐܝܟ ܕܠܪ̈ܓܫܐ ܐܠܐ ܐܝܟ ܕܠܡܬܪ̈ܓܫܢܐ. ܗܘܢܐ ܕܝܢ ܠܐܪ̈ܓܫܬܐ ܐܝܟ ܕܠܐܪܓܫܬܐ܆ ܘܠܪ̈ܓܫܐ ܐܝܟ ܕܠܪ̈ܓܫܐ ܦ̇ܪܫ܀

ܐܚܪܝܢ ܗܘ ܚܝܠܗ ܕܗܘܢܐ ܕܚ̇ܙܐ ܟܝ̈ܢܐ ܪ̈ܘܚܢܐ. ܘܐܚܪܝܢ ܗܘ ܗ̇ܘ ܕܝ̇ܕܥ ܬܐܘܪܝܐ ܕܥܠܝܗܘܢ. ܚܕ ܗܘ ܕܝܢ ܚܝܠܗ܆ ܗ̇ܘ ܕܚܙ̇ܐ ܘܡܣ̇ܬܟܠ ܠܬܠܝܬܝܘܬܐ ܩܕܝܫܬܐ܀

ܟܡܐ ܙܒ̈ܢܝܢ ܐܡܬܝ ܕܒܗ̈ܘܠܣ ܚܝ̇ܪܝܢܢ܆ ܠܥܘܗܕܢܐ ܕܬܐܘܪܝܐ ܕܝܠܗܝܢ ܐܬ̇ܝܢܢ. ܘܡܢ ܕܩ̇ܒܠܢܢ ܬܐܘܪܝܐ܆ ܬܘܒ ܡ̇ܪܚܩܝܢܢ ܠܢ ܡܢ ܗ̈ܘܠܣ. ܐܠܐ ܠܘ ܗܕܐ ܓ̇ܕܫܐ ܠܢ ܥܠ ܬܠܝܬܝܘܬܐ ܩܕܝܫܬܐ. ܬܐܘܪܝܐ ܓܝܪ ܐܝܬܝܝܬܐ ܒܠܚܘܕ ܐܝܬܝܗ̇܀

ܠܐ ܡܬܝܕܥ ܟܝܢܐ ܕܬܠܝܬܝܘܬܐ ܒܡܣ̈ܩܬܐ ܘܡ̈ܚܬܬܐ. ܠܐ ܓܝܪ ܐܝܬ ܬܡܢ ܣܘܥܪ̈ܢܐ ܕܡܫܥܒܕܝܢ. ܘܟܝܢܗ̇ ܫܪܝܐ ܠܐ ܡܩ̇ܒܠ. ܡܛܠ ܕܗ̇ܘ ܕܫ̇ܪܐ ܠܟܝܢܐ ܕܓܘ̈ܫܡܐ܆ ܒܗܘܠܐ ܡ̇ܩܝܡ ܠܗ ܦܢܛܘܣ ܘܒܚܙܬܐ. ܠܟܝܢܐ ܕܝܢ ܠܐ ܡܓܫܡܐ ܐܢ ܐܢܫ ܢܫ̣ܪܐ܆ ܠܬܐܘܪܝܐ ܫܚܝܡܬܐ ܘܠܩܢܘܡܐ ܡܩܒܠܢܐ ܕܣܩܘܒܠܝܘܬܐ ܢ̇ܗܦܟ. ܠܘ ܕܝܢ ܗܟܢܐ ܐܝܬ ܠܡܕܥ ܠܟܝܢܐ ܕܬܠܝܬܝܘܬܐ ܩܕܝܫܬܐ܀

ܫܪܝܐ ܡ̇ܢ܆ ܠܒܪܫܝܬ ܕܣܘܥܪ̈ܢܐ ܡ̇ܣܩ ܠܢ. ܝܕܥܬܐ ܕܝܢ ܕܐܝܟ ܡܫܘܚܬܐ܆ ܚܟܡܬܗ ܕܒܪܘܝܐ ܡܚܘ̇ܝܐ. ܐܠܐ ܠܘ ܒܗܠܝܢ ܢܝ̈ܫܐ ܚܙ̇ܝܢ ܚܢܢ ܠܬܠܝܬܝܘܬܐ ܩܕܝܫܬܐ. ܠܝܬ ܠܗ̇ ܓܝܪ ܫܘܪܝܐ. ܘܠܐ ܬܘܒ ܚܟܡܬܐ ܕܒܗܠܝܢ ܣܘܥܪ̈ܢܐ܇ ܐܡ̇ܪܝܢ ܚܢܢ ܕܐܝܬܘܗܝ ܐܠܗܐ. ܐܢܗ̣ܘ ܕܗܠܝܢ ܫܘܪ̈ܝܐ ܫ̇ܠܡܝܢ ܒܡܠܥܐ ܕܟܝܢܐ܇ ܠܗܠܝܢ ܕܐܝܬܝܗܘܢ ܫܘܪ̈ܝܝܗܘܢ. ܚܟܡܬܐ ܓܝܪ ܕܕܐܝܟ ܗܕܐ܆ ܝܕܥܬܐ ܐܝܬܝܗ̇ ܕܠܐ ܩܢܘܡ. ܕܒܣܘܥܪ̈ܢܐ ܒܠܚܘܕ ܡܬܚܙܝܐ܀

ܐܝܟܢܐ ܕܡܚܙܝܬܐ ܕܠܐ ܛܘܢܦܐ ܡܟ̇ܬܪܐ ܡܢ ܕܡ̣ܘ̈ܬܐ ܕܡ̇ܕܝܩ̈ܢ ܒܗ̇܆ ܗܟܢܐ ܢܦܫܐ ܠܐ ܚܫܘܫܬܐ ܡܢ ܨܒܘ̈ܬܐ ܕܒܐܪܥܐ܀

ܦܠܘܚܐ ܐܝܬܘܗܝ܆ ܦܠܚܐ ܕܦܘܪܫܢܐ. ܝܕܘܥܬܢܐ ܕܝܢ ܡܥܕܪܢܐ ܕܚܟܡܬܐ܀

ܠܐ ܡܬܚܝ̇ܕ ܗܘܢܐ ܠܝܕܥܬܐ܇ ܩܕܡ ܕܢܚܝ̇ܕ ܡܢ̇ܬܐ ܚܫܘܫܬܐ ܕܢܦܫܗ ܠܡܝܬܪ̈ܘܬܐ ܕܩܢܘܡܗ܀

ܐܢܗ̣ܘ ܕܟܝ̈ܢܐ ܡܠܝ̈ܠܐ ܢܝܫܐ ܛܥܝܢܝܢ ܕܐܝ̈ܠܢܐ: ܗܠܝܢ ܕܝܢ ܒܡܝ̈ܐ ܡܬ̇ܪܒܝܢ܆ ܛܒܐܝܬ ܡܬܐܡܪܐ ܝܕܥܬܐ ܡܝ̈ܐ ܕܪܘܚ܇ ܕܪܕ̇ܝܢ ܡܢ ܡܥܝܢܐ ܕܚܝ̈ܐ܀

ܦܠܫܬܝܐ ܡܬܝܕܥܢܐ ܐܝܬܘܗܝ܆ ܗ̇ܘ ܕܩ̇ܐܡ ܠܘܩܒܠ ܐܝܠܝܢ ܕܥ̇ܐܠܝܢ ܠܡܐܪܬ ܐܪܥܐ ܕܡܘܠܟܢܐ܀

ܬܠܝܬܝܘܬܐ ܩܕܝܫܬܐ܆ ܢܝܫܐ ܐܝܬܝܗ̇ ܕܡܝ̈ܐ ܩܕܝ̈ܫܐ. ܘܐܝܠܢܐ ܕܚܝ̈ܐ ܡܫܝܚܐ ܗ̇ܘ ܕܡܢܗ̇ ܫ̇ܬܐ܀

ܐܝܟܢܐ ܕܦܓܪܢ ܒܕܘܟܬܐ ܡܬܐܡܪ ܕܐܝܬܘܗܝ܆ ܗܟܢܐ ܐܦ ܗܘܢܐ ܒܝܕܥܬܐ ܐܝܕܐ ܕܗ̣ܝ. ܡܛܠ ܗܢܐ ܝܕܥܬܐ ܠܚܡܐܝܬ ܡܬܐܡܪܐ ܕܘܟܬܗ܀

ܓܢܒܪܐ ܡܬܝܕܥܢܐ ܐܝܬܘܗܝ܆ ܗ̇ܘ ܕܠܐܝܠܝܢ ܕܥ̣ܠܘ ܠܐܪܥܐ ܕܡܘܠܟܢܐ܇ ܕܢ̇ܦܩ ܡܢܗ̇ ܡܬܚܪܐ܀

ܐܢܗ̣ܘ ܕܐܪܒܥܐ ܪ̈ܫܝܢ ܡܢ ܚܕ ܢܗܪܐ ܦ̣ܪܫܘ܆ ܢܐܡܪ ܐܢܫ ܥܠܡܐ ܗ̇ܘ ܕܒܗ ܚܕ ܗ̣ܘܐ ܢܗܪܐ. ܕܐܦ ܠܦܪܕܝܣܐ ܗ̇ܘ ܕܡܢܗ ܫ̇ܬܐ܆ ܓܘܫܡܐ ܢܣ̇ܬܟܠ܀

ܗܘܢܐ ܡܬܕܡ̇ܪ ܐܡܬܝ ܕܠܣܘܥܪ̈ܢܐ ܚܙ̇ܐ. ܘܒܬܐܘܪܝܐ ܕܝܠܗܘܢ ܠܐ ܡܫ̣ܬܓܫ. ܐܠܐ ܐܝܟ ܕܠܘܬ ܒܝ̈ܬܝܐ ܘܠܘܬ ܪ̈ܚ̇ܡܐ ܪܗ̇ܛ܀

ܡܕܝܢܬܐ ܡܬܝܕܥܢܝܬܐ ܐܝܬܝܗ̇܆ ܬܐܘܪܝܐ ܪܘܚܢܝܬܐ܆ ܕܡܣܝ̇ܟܐ ܟܝ̈ܢܐ ܪ̈ܘܚܢܐ܀

ܗܘܢܐ ܟܡܐ ܕܡܫ̇ܬܠܚ ܡܢ ܚܫ̈ܐ܆ ܗܟܢܐ ܝܬܝܪܐܝܬ ܡܬܩ̇ܪܒ ܠܘܬ ܣܘܥܪ̈ܢܐ. ܘܐܝܟ ܡܫܘܚܬܐ ܕܛܟܣܗ܆ ܐܦ ܝܕܥܬܐ ܡܩ̇ܒܠ. ܘܟܘܠ ܛܟܣܐ ܕܢܩܘܡ ܒܗ܆ ܠܬܐܘܪܝܐ ܕܝܠܗ ܐܝܟ ܕܠܕܝܠܗ ܝ̇ܕܥ܀

ܟܝ̈ܢܐ ܝܕ̈ܘܥܐ ܡܒ̇ܚܢܝܢ ܣܘܥܪ̈ܢܐ. ܘܝܕܥܬܐ ܕܣܘܥܪ̈ܢܐ ܡܕܟ̇ܝܐ ܠܝܕ̈ܘܥܐ܀

ܬܪ̈ܥܐ ܡܬܝ̈ܕܥܢܐ ܐܝܬܝܗܘܢ܆ ܡܝܬܪ̈ܬܐ ܕܢܦܫܐ ܡܠܝܠܬܐ ܘܦܠܘܚܬܐ܇ ܕܡܢ ܚܝܠܐ ܕܐܠܗܐ ܐܬܩܝ̇ܡ܀

ܠܐ ܪܒ̇ܝܢ ܘܠܐ ܡܬܒ̇ܨܪܝܢ ܓܘ̈ܫܡܐ ܕܫܐܕ̈ܐ. ܠܘ̣ܝܐ ܠܗܘܢ ܕܝܢ ܣܪܝܘܬܐ ܩܫܝܬܐ. ܗ̇ܝ ܕܒܗ̇ ܐܦ ܚܫܝ̈ܢ ܡ̇ܙܝܥܝܢ. ܘܕܠܝܠܐܝܬ ܡܬܝܕܥܝܢ ܡܢ ܐܝܠܝܢ ܕܚܝܠܐ ܡܢ ܡܪܝܐ ܩ̇ܒܠܘ ܕܢ̇ܪܓܫܘܢ ܒܪܝܚܐ ܗܢܐ܀

ܟܠܡܕܡ ܕܢ̇ܦܠ ܬܚܝܬ ܚܝܠܗ ܕܗܘܢܐ: ܗ̇ܘ ܕܚܙ̇ܐ ܠܠܐ ܡܓܫܡ̈ܐ܆ ܗܢܐ ܦܢܛܘܣ ܐܦ ܡܢܗ ܕܟܝܢܐ ܐܝܬܘܗܝ. ܡܕܡ ܕܝܢ ܕܠܐܚܪܢܐ ܡܬܚܙܐ܆ ܗܢܐ ܕܢܗܘܐ ܒܪ ܟܝܢܗ ܠܐ ܡܫܟܚ. ܐܢ ܗ̣ܘ ܟܕ ܗ̣ܘ ܚܝܠܐ ܢܕܥ ܣܘ̈ܟܠܐ ܕܠܐ ܡܓܫܡ̈ܐ܇ ܐܦ ܠܬܠܝܬܝܘܬܐ ܩܕܝܫܬܐ܀

ܡܘܟܠܐ ܡܬܝܕܥܢܐ ܐܝܬܘܗܝ܆ ܚܐܪܘܬܐ ܡܫܠܛܬܐ ܕܠܐ ܡܬܟܦܦܐ܇ ܡܛܠܬܗ̇ ܕܫܦܝܪܬܐ܀

ܐܡܬܝ ܕܗܘܢܐ ܢܩ̇ܒܠ ܝܕܥܬܐ ܐܝܬܝܝܬܐ܆ ܗܝܕܝܢ ܐܦ ܐܠܗܐ ܢܬܩܪܐ. ܒܕܡܫܟܚ ܐܦ ܥܠܡ̈ܐ ܡܫܚܠܦ̈ܐ ܢ̇ܬܩܢ܀

ܫܘܪܐ ܡܬܝܕܥܢܐ ܐܝܬܘܗܝ܆ ܠܐ ܚܫܘܫܘܬܗ̇ ܕܢܦܫܐ܇ ܐܝܕܐ ܕܫܐܕ̈ܐ ܠܘܬܗ̇ ܠܐ ܡܬܩ̇ܪܒܝܢ܀

ܟܠܗܝܢ ܓܙܘܪ̈ܬܐ܆ ܫܒܥ ܐܫܟܚܢܢ ܕܐܝܠܝܗܝܢ. ܐܪܒܥ ܡܢܗܝܢ ܕܝܘܡܐ ܫܬܝܬܝܐ܆ ܘܚܕܐ ܡܢܗܝܢ ܕܝܘܡܐ ܫܒܝܥܝܐ. ܕܫܪܟܐ ܕܝܘܡܐ ܬܡܝܢܝܐ܀

ܗܝܟܠܐ ܡܬܝܕܥܢܐ ܐܝܬܘܗܝ܆ ܗܘܢܐ ܕܟ̣ܝܐ܇ ܗ̇ܘ ܕܗܫܐ ܚܟܡܬܗ ܕܐܠܗܐ ܡ̣ܠܝܬ ܦܘܪ̈ܫܢܐ ܐܝܬ ܠܗ ܒܗ. ܗܝܟܠܐ ܕܝܢ ܕܐܠܗܐ܆ ܗ̇ܘ ܕܐܝܬܘܗܝ ܚ̇ܙܝܐ ܕܝܚܝܕܝܘܬܐ ܩܕܝܫܬܐ. ܘܡܕܒܚܐ ܕܐܠܗܐ ܐܝܬܘܗܝ܆ ܬܐܘܪܝܐ ܕܬܠܝܬܝܘܬܐ ܩܕܝܫܬܐ܀

ܟܝܢܐ ܩܕܡܝܐ ܡܛܠ ܚܕ. ܘܬܪܝܢܐ ܠܘܬ ܚܕ. ܘܗ̣ܘ ܟܕ ܗ̣ܘ ܒܚܕ܀

ܝܚܝܕܝܐ ܕܪܚ̇ܡ ܫܘܒܚܐ ܣܪܝܩܐ ܐܝܬܘܗܝ܆ ܗ̇ܘ ܕܩܕܡ ܠܐ ܚܫܘܫܘܬܐ ܒܥ̇ܐ ܕܢܫܬܒ̇ܚ ܡܢ ܒܢܝ̈ ܐܢܫܐ܇ ܒܐܝܠܝܢ ܕܠܐ ܗ̇ܘܝܢ ܡܛܘܠ ܠܐ ܚܫܘܫܘܬܐ ܘܡܛܠ ܝܕܥܬܐ ܕܐܠܗܐ܀

ܝܕܥܬܐ ܕܬܪ̈ܝܢܐ ܒܩܕܡܝܐ. ܘܕܩܕܡܝܐ ܒܗ. ܬܪܝܢܐ ܕܝܢ ܠܝܬܘܗܝ ܝܕܘܥܐ܀

ܨܗܝܘܢ ܢܝܫܐ ܗܝ ܕܝܕܥܬܐ ܩܕܡܝܬܐ. ܫܘܘܕܥܐ ܕܝܢ ܕܟܠܗ̇ ܒܝܫܘܬܐ ܡܨܪܝܢ. ܦܠܐܬܐ ܕܝܢ ܕܬܐܘܪܝܐ ܟܝܢܝܬܐ ܐܪܫܠܡ܆ ܗ̇ܝ ܕܒܗ̇ ܐܝܬܘܗܝ ܛܘܪܐ ܕܨܗܝܘܢ ܪܝܫ ܡܕܝܢܬܐ܀

ܐܝܟܢܐ ܕܠܚ̇ܒܠܐ ܕܥܠܡܐ ܐܚܪܝܐ: ܠܐ ܠܘ̣ܐ ܠܗ ܗܘܝܐ܆ ܗܟܢܐ ܠܗܘܝܗ ܕܥܠܡܐ ܩܕܡܝܐ ܠܐ ܩ̇ܕܝܡ ܚ̇ܒܠܐ܀

ܣܘܥܪ̈ܢܐ ܐܝܟ ܕܐܝܬܝܗܘܢ ܟܝܢܐܝܬ܆ ܐܘ ܗܘܢܐ ܕܟ̣ܝܐ ܚܙ̇ܐ܆ ܐܘ ܡܠܬܐ ܕܚܟܝ̈ܡܐ ܡ̇ܘܕܥܐ. ܗ̇ܘ ܕܝܢ ܕܓܠܝܙ ܡܢ ܬܪ̈ܬܝܗܝܢ܆ ܠܘܬ ܥܕܠܝܐ ܕܡܟܬܒܢܐ ܫ̇ܪܟ܀

ܕܡܢܐ ܗܝ ܬܐܘܪܝܐ ܕܗܘܝ̈ܐ܆ ܟܬܒܐ ܐܠܗܝܐ ܠܐ ܐܘܕܥ. ܕܐܝܟܢܐ ܕܝܢ ܐܢܫ ܡܬܩ̇ܪܒ ܠܗ̇ ܒܝܕ ܦܘܠܚܢܐ ܕܦܘ̈ܩܕܢܐ ܘܒܝܕ ܝܘ̈ܠܦܢܐ ܫܪܝܪ̈ܐ܆ ܓܠܝܐܝܬ ܐܠܦ܀

ܥܦܝܦܬܐ ܗܝ ܬܐܘܪܝܐ ܕܥܠܡܐ ܗܢܐ. ܚܕܐ ܓܠܝܬܐ ܘܥܒܝܬܐ܆ ܘܐܚܪܬܐ ܡܬܝܕܥܢܝܬܐ ܘܪܘܚܢܝܬܐ. ܘܠܘܬ ܬܐܘܪܝܐ ܩܕܡܝܬܐ ܡܬܩ̇ܪܒܝܢ ܐܢܫ̈ܐ ܥ̇ܘ̈ܠܐ ܘܫܐܕ̈ܐ. ܠܘܬ ܬܪܝܢܝܬܐ ܕܝܢ܆ ܐܢܫ̈ܐ ܙܕܝܩ̈ܐ ܘܡܠܐܟ̈ܐ ܕܐܠܗܐ. ܘܐܝܟܢܐ ܕܝܬܝܪ ܡܢ ܐܢܫ̈ܐ ܙܕܝܩ̈ܐ: ܡܠܐܟ̈ܐ ܝ̇ܕܥܝܢ ܬܐܘܪܝܐ ܪܘܚܢܝܬܐ܆ ܗܟܢܐ ܐܝܬܝܪ ܡܢ ܐܢܫ̈ܐ ܥ̇ܘ̈ܠܐ܇ ܫܐܕ̈ܐ ܝ̇ܕܥܝܢ ܠܬܐܘܪܝܐ ܥܒܝܬܐ. ܗ̇ܝ ܕܐܦ ܠܐܢܫܝ̈ܢ ܡܢ ܕܝܠܗܘܢ ܡܣܬܒ̣ܪܝܢ ܕܝ̇ܗܒܝܢ ܠܗ̇. ܝ̣ܠܦܢ ܚܢܢ ܕܝܢ ܡܢ ܟܬܒܐ ܐܠܗܝܐ܆ ܕܐܦ ܡܠܐܟ̈ܐ ܩܕܝ̈ܫܐ ܗ̣ܝ ܗܕܐ ܥ̇ܒܕܝܢ܀

ܥܡܡ̈ܐ ܡܬܪ̈ܓܫܢܐ ܒܕܘܟܝ̈ܬܐ ܡܬܦ̣ܪܫܝܢ ܡܢ ܚܕܕ̈ܐ܆ ܘܒܢܡܘ̈ܣܐ ܘܒܠܫ̈ܢܐ ܘܒܐܣܟܡ̈ܐ. ܐܝܬ ܕܝܢ ܐܡܬܝ ܕܐܦ ܒܡܘ̈ܙܓܐ. ܡܬܝ̈ܕܥܢܐ ܕܝܢ ܘܩܕܝ̈ܫܐ܆

ܒܥܠܡ̈ܐ ܘܒܓܘܫܡ̈ܐ ܘܒܝ̈ܕܥܬܐ. ܐܡ̇ܪܝܢ ܕܝܢ ܕܐܦ ܒܠܫ̈ܢܐ. ܘܐܒܐ ܡ̇ܢ ܕܩܕܡܝ̈ܐ ܐܕܡ. ܕܬܪ̈ܝܢܐ ܕܝܢ ܡܫܝܚܐ܇ ܗ̇ܘ ܕܐܝܬܘܗܝ ܛܘܦܣܗ ܐܕܡ܀

ܐܒܐ ܡܬܪܢܐ ܩܕܡ ܒܪܐ ܐܝܟ ܐܒܐ. ܩܕܡ ܕܝܢ ܪܘܚܐ ܕܩܘܕܫܐ ܐܝܟ ܪܫܝܬܐ. ܠܠܐ ܡܓܫܡ̈ܐ ܕܝܢ ܘܡܓܫܡ̈ܐ ܐܝܟ ܒܪܘܝܐ ܩ̇ܕܝܡ܀

ܠܐ ܒ̣ܪܝܐ ܐܝܬܘܗܝ܆ ܗ̇ܘ ܕܟܕ ܐܝܬܘܗܝ ܒܐܝܬܘܬܗ ܇ ܠܝܬ ܡܕܡ ܕܩ̇ܕܝܡ ܠܗ܀

ܐܝܟܢܐ ܕܠܝܗܘܕܝܐ ܡܬܪܓܫܢܐ ܣܝܦܐ ܓܙ̇ܪ܆ ܗܟܢܐ ܠܡܬܝܕܥܢܐ ܦܠܘܚܘܬܐ܇ ܗ̇ܝ ܕܦܠܐܬܢܐܝܬ ܡܫܝܚ̇ܐ ܚܪܒܐ ܫܡܗ ܕܐܪܡܝ ܒܥܠܡܐ܀

ܐܢܗ̣ܘ ܕܝܘܡܐ ܬܡܝܢܝܐ ܦܠܐܬܐ ܗܘ ܕܩܝ̣ܡܬܐ: ܩܝ̣ܡܬܐ ܕܝܢ ܐܝܬܘܗܝ ܡܫܝܚܐ܆ ܡܕܝܢ ܐܝܠܝܢ ܕܡܬܓܙܪܝܢ ܒܝܘܡܐ ܬܡܝܢܝܐ܇ ܒܡܫܝܚܐ ܡܬܓܙܪܝܢ܀

ܐܝܟܢܐ ܕܦܪܕܝܣܐ ܒܝܬ ܡܪܕܘܬܐ ܗܘ ܕܙܕܝܩ̈ܐ܆ ܗܟܢܐ ܐܦ ܫܝܘܠ ܡܫܢܩܢܝܬܐ ܗܝ ܕܥ̇ܩ̈ܠܐ܀

ܐܢ ܥܡ ܗܘܝܐ ܘܚ̇ܒܠܐ ܙܒܢܐ ܡܬܪܢܐ܆ ܕܠܐ ܙܒܢܐ ܡܕܝܢ ܐܝܬܘܗܝ ܗܘܝܐ ܕܠܐ ܡܓܫܡ̈ܐ. ܡܛܠ ܕܠܐ ܩ̇ܕܝܡ ܚܒ̇ܠܐ ܠܗܢܐ ܗܘܝܐ܀

ܠܝܬܝܗ̇ ܬܠܝܬܝܘܬܐ ܩܕܝܫܬܐ܇ ܐܝܟ ܐܪܒܝܥܝܘܬܐ ܘܚܡܝܫܝܘܬܐ ܘܫܬܝܬܝܘܬܐ. ܗܠܝܢ ܓܝܪ ܕܡܢܝܢܐ܆ ܕܡ̣ܘ̈ܬܐ ܕܠܐ ܩܢܘܡ ܐܝܬܝܗܝܢ. ܬܠܝܬܝܘܬܐ ܕܝܢ ܩܕܝܫܬܐ ܝܕܥܬܐ ܐܝܬܝܝܬܐ ܐܝܬܝܗ̇܀

ܠܬܠܝܬܝܘܬܐ ܕܡܢܝ̈ܢܐ ܠܘ̣ܝܐ ܪܒܝܥܝܘܬܐ. ܠܬܠܝܬܝܘܬܐ ܕܝܢ ܩܕܝܫܬܐ ܠܐ ܠܘ̣ܝܐ ܐܪܒܝܥܝܘܬܐ. ܠܝܬܝܗ̇ ܡܕܝܢ ܬܠܝܬܝܘܬܐ ܕܡܢܝ̈ܢܐ܀

ܠܬܠܝܬܝܘܬܐ ܕܡܢܝ̈ܢܐ܆ ܩ̇ܕܝܡܐ ܬܪܝܢܘܬܐ. ܠܬܠܝܬܝܘܬܐ ܕܝܢ ܩܕܝܫܬܐ܆ ܠܐ ܩ̇ܕܝܡܐ ܬܪܝܢܘܬܐ. ܠܝܬܝܗ̇ ܓܝܪ ܬܠܝܬܝܘܬܐ ܕܡܢܝ̈ܢܐ܀

ܬܠܝܬܝܘܬܐ ܕܡܢܝ̈ܢܐ܆ ܒܪܘܟܒܐ ܕܚܕ ܚܕ ܕܠܐ ܩܢܘܡ ܡܬܩܝ̇ܡܐ.

ܬܠܝܬܝܘܬܐ ܕܝܢ ܛܘܒܬܢܝܬܐ܆ ܠܘ ܒܪܘܟܒܐ ܕܝܚܝ̈ܕܝܐ ܕܕܐܝܟ ܗܠܝܢ ܡܬܩ̇ܝܡܐ. ܐܝܬܝܗ̇. ܡܕܝܢ ܬܠܝܬܝܘܬܐ ܕܒܡܢܝ̈ܢܐ܀

ܠܝܬܘܗܝ ܡܫܝܚܐ ܒܪ ܟܝܢܐ ܕܬܠܝܬܝܘܬܐ. ܐܦܠܐ ܓܝܪ ܝܕܥܬܐ ܐܝܬܝܝܬܐ ܐܝܬܘܗܝ. ܒܠܚܘܕܘܗܝ ܕܝܢ ܐܝܬ ܠܗ ܒܗ ܒܟܠܙܒܢ ܝܕܥܬܐ ܐܝܬܝܝܬܐ ܠܐ ܡܬܦܪܫܢܐܝܬ. ܡܫܝܚܐ ܕܝܢ ܐܡ̇ܪ ܐܢܐ܆ ܠܗ̇ܘ ܕܥܡ ܡܠܬܐ ܐܠܗܐ ܐܬ̣ܐ. ܒܪܘܚ ܕܝܢ ܗܘ ܡܪܝܐ܆ ܠܐ ܡܬܦܪܫܢܐ ܐܝܬܘܗܝ ܡܢ ܦܓܪܗ. ܘܒܚܕܝܘܬܐ ܒܪ ܟܝܢܐ ܗܘ ܕܐܒܘܗܝ. ܡܛܠ ܕܐܦ ܝܕܥܬܐ ܐܝܬܝܝܬܐ ܐܝܬܘܗܝ܀

ܪ̈ܓܠܘܗܝ ܕܡܫܝܚܐ ܦܘܠܚܢܐ ܘܬܐܘܪܝܐ. ܐܢ ܕܝܢ ܠܟܠܗܘܢ ܒܥܠܕܒܒ̈ܘܗܝ ܢܣܝܡ ܬܚܝܬ ܪ̈ܓܠܘܗܝ܆ ܟܠܗܘܢ ܡܕܝܢ ܢܕܥܘܢ ܠܦܘܠܚܢܐ ܘܬܐܘܪܝܐ܀

ܡܫܝܚܐ ܐܝܬܘܗܝ܆ ܗ̇ܘ ܕܡܢ ܝܕܥܬܐ ܐܝܬܝܝܬܐ܇ ܘܡܢ ܟܝܢܐ ܠܐ ܡܓܫܡܐ ܘܡܓܫܡܐ܇ ܕܢ̣ܚ ܠܢ. ܗ̇ܘ ܕܝܢ ܕܐܡ̇ܪ ܬܪ̈ܝܢ ܡܫܝ̈ܚܝܢ ܐܘ ܬܪ̈ܝܢ ܒܢܝ̈ܢ܆ ܕܡ̇ܐ ܠܗ̇ܘ ܕܩ̇ܪܐ ܠܚܟܝܡܐ ܘܠܚܟܡܬܗ܇ ܬܪ̈ܝܢ ܚܟܝ̈ܡܝܢ ܐܘ ܬܪ̈ܬܝܢ ܚܟܡ̈ܢ܀

ܚܝܠܐ ܩܕܝܫܐ ܐܝܬܘܗܝ܆ ܗ̇ܘ ܕܡܢ ܬܐܘܪܝܐ ܕܗܘܝ̈ܐ܇ ܘܡܢ ܟܝܢܐ ܠܐ ܡܓܫܡܐ ܘܡܓܫܡܐ ܐܬܩ̇ܝܡ܀

ܐܝܬ ܐܡܬܝ ܕܠܐ ܐܝܬ ܗܘܐ ܠܗ ܦܓܪܐ ܠܡܫܝܚܐ. ܠܝܬ ܕܝܢ ܐܡܬܝ ܕܠܘ ܒܗ ܗ̣ܘܐ ܡܠܬܐ ܐܠܗܐ. ܥܡ ܗܘܝܗ ܓܝܪ ܐܦ ܡܠܬܐ ܐܠܗܐ ܫ̣ܪܐ ܒܗ܀

ܦܘܢܝܐ ܐܝܬܘܗܝ܆ ܡܣܩܬܐ ܕܡܢ ܡܬܙܝܥܢܘܬܐ ܘܡܢ ܒܝܫܘܬܐ ܘܠܐ ܝܕܥܬܐ܇ ܠܘܬ ܝܕܥܬܐ ܕܬܠܝܬܝܘܬܐ ܩܕܝܫܬܐ܀

ܩܕܡ ܡܬܙܝܥܢܘܬܐ ܐܝܬܘܗܝ ܗܘܐ ܐܠܗܐ܆ ܛܒܐ ܘܚܝܠܬܢܐ. ܘܚܟܝܡܐ. ܘܒܪܘܝܐ ܕܠܐ ܡܓܫܡ̈ܐ. ܘܐܒܐ ܕܡܠܝ̈ܠܐ. ܘܐܚܝܕ ܟܠ. ܒܬܪ ܕܝܢ ܡܬܙܝܥܢܘܬܐ܆ ܗ̣ܘܐ ܒܪܘܝܐ ܕܓܘ̈ܫܡܐ. ܘܕܝ̇ܢܐ. ܘܡܕܒܪܢܐ. ܘܐܣܝܐ. ܘܪܥ̇ܝܐ. ܘܡܠܦܢܐ. ܘܡܪܚܡܢܐ. ܘܢܓܝܪ ܪܘܚܐ. ܘܬܘܒ ܬܪܥܐ ܘܐܘܪܚܐ. ܘܐܡܪܐ. ܘܪܒ ܟܘܡܪ̈ܐ. ܥܡ ܫܪܟܐ ܕܫܡܗ̈ܐ ܕܒܦܘܪ̈ܣܐ ܡܬܐܡܪܝܢ. ܐܒܐ ܕܝܢ ܘܪܫܝܬܐ܆ ܐܦ ܩܕܡ ܗܘܝܐ ܕܠܐ ܡܓܫܡ̈ܐ ܐܝܬܘܗܝ. ܐܒܐ ܡ̇ܢ ܕܡܫܝܚܐ. ܪܫܝܬܐ ܕܝܢ ܕܪܘܚܐ ܕܩܘܕܫܐ܀

ܡܝܬܪܘܬܐ ܐܝܬܝܗ̇܆ ܬܩܢܘܬܐ ܕܢܦܫܐ ܡܠܝܠܬܐ܇ ܕܒܗ̇ ܥܣܩܐܝܬ ܡܬܬܙܝܥܢܐ ܠܘܬ ܒܝܫܘܬܐ܀

ܐܢܗ̣ܘ ܕܡ̈ܠܐ ܡܬܪ̈ܓܫܢܝܬܐ: ܐܦ ܒܥܠܡܐ ܕܥܬܝܕ ܡ̇ܘܕܥ̈ܢ ܣܘܥܪ̈ܢܐ܆ ܝܕܝܥܐ ܗܝ ܕܐܦ ܚܟܝ̈ܡܘܗܝ ܕܥܠܡܐ ܗܢܐ ܢܩ̇ܒܠܘܢ ܡܠܟܘܬܐ ܕܫܡܝܐ. ܐܢ ܕܝܢ ܕܟܝܘܬܗ ܕܗܘܢܐ ܚܙ̇ܝܐ ܘܡܠܬܐ ܕܠܚ̇ܡܐ ܠܗ̇ ܡ̇ܘܕܥܐ܆ ܚܟܝ̈ܡܘܗܝ ܕܥܠܡܐ ܗܢܐ ܡ̣ܒ̈ܥܕܐ ܢܗܘܘܢ ܡܢ ܝܕܥܬܐ ܕܐܠܗܐ܀

ܐܝܟܢܐ ܕܡܠܬܐ ܗܕܐ ܥܠ ܣܘܥܪ̈ܢܘܗܝ ܒܥܠܡܐ ܗܢܐ ܡ̇ܘܕܥܐ܆ ܗܟܢܐ ܡܠܬܗ ܕܓܘܫܡܐ ܪܘܚܢܐ܇ ܣܘܥܪ̈ܢܘܗܝ ܕܥܠܡܐ ܕܥܬܝܕ ܡ̇ܘܕܥܐ܀

ܐܢܗ̣ܘ ܕܐܝܠܝܢ ܕܒܥܠܡܐ ܕܥܬܝܕ ܡܠܐܟ̈ܐ ܗ̇ܘܝܢ: ܘܥܠ ܚܡܫ ܘܥܠ ܥܣܪ ܡܕܝ̈ܢܢ ܡܫܬܠܛܝܢ܆ ܝܕܝܥܐ ܗܝ ܕܐܦ ܝܕܥܬܐ ܢܩܒ̇ܠܘܢ܇ ܐܝܕܐ ܕܡܫܟܚܐ ܕܠܢܦ̈ܫܬܐ ܡܠܝ̈ܠܬܐ ܡܢ ܒܝܫܘܬܐ ܠܘܬ ܡܝܬܪܘܬܐ܇ ܘܡܢ ܠܐ ܝܕܥܬܐ ܠܘܬ ܝܕܥܬܐ ܕܐܠܗܐ ܢܚ̇ܦܛ܀

ܡܐ ܕܠܐ ܐܫܟܚܘ ܕܝܘ̈ܐ: ܠܡܙܥܘ ܚܘܫܒ̈ܐ ܒܝ̈ܫܐ ܒܝܕܘܥܐ܆ ܗܝܕܝܢ ܐܚ̇ܕܝܢ ܥܝ̈ܢܘܗܝ ܒܩܪܝܪܘܬܐ ܣܓܝܐܬܐ܆ ܘܠܘܬ ܫܢܬܐ ܝܩܝܪܬܐ ܢ̇ܬܦܝܢ ܠܗܝܢ. ܩܪ̈ܝܪܝܢ ܓܝܪ ܣܓܝ ܓܘܫܡܝ̈ܗܘܢ ܕܫܐܕ̈ܐ ܒܕܡܘ̣ܬܐ ܕܐܓܠܝܕܐ܀

ܐܝܟܢܐ ܕܠܘ ܗ̣ܝ ܢܘܪܐ ܐܝܬ ܒܓܘܫܡܝ̈ܢ: ܐܠܐ ܡܘܙܓܗ̇ ܐܬܣܝܡ ܒܗܘܢ܆ ܗܟܢܐ ܒܓܘ̈ܫܡܐ ܕܫܐܕ̈ܐ܇ ܠܘ ܗ̣ܝ ܐܪܥܐ ܘܠܘ ܗ̣ܢܘܢ ܡܝ̈ܐ܇ ܐܠܐ ܡܘܙܓܗܘܢ ܙ̣ܪܥ ܒܗܘܢ ܒܪܘܝܐ܀

ܐܢ ܗ̣ܘ ܕܟܘܠܗܘܢ ܥܡܡ̈ܐ ܢܐܬܘܢ ܘܢܣ̣ܓܕܘܢ ܩܕܡ ܡܪܝܐ܆ ܝܕܝܥܐ ܗ̇ܝ ܕܐܦ ܥܡܡ̈ܐ ܕܨ̇ܒܝܢ ܩܪܒܐ ܢܐܬܘܢ. ܐܢ ܕܝܢ ܗܕܐ ܗܟܢܐ ܗܝ܆ ܟܠܗ ܟܝܢܐ ܕܡܠܝ̈ܠܐ ܢܣ̣ܓܕܘܢ ܠܫܡܗ ܕܡܪܝܐ܇ ܗ̇ܘ ܕܡ̇ܘܕܥ ܠܐܒܐ ܕܒܗ. ܗܢܘ ܓܝܪ ܫܡܐ ܕܡܝܬܪ ܡܢ ܟܠ ܫܡ̈ܗܝܢ܀

ܐܒܐ ܐܝܬܘܗܝ܆ ܝܠܘܕܐ ܕܝܕܥ̇ܬܐ ܐܝܬܝܝܬܐ܀

ܐܒܐ ܐܝܬܘܗܝ܆ ܗ̇ܘ ܕܐܝܬ ܠܗ ܟܝܢܐ ܡܠܝܠܐ܇ ܕܡܚܝܕ ܠܝܕܥܬܐ ܕܬܠܝܬܝܘܬܐ܀

ܐܒܐ ܐܝܬܘܗܝ܆ ܗ̇ܘ ܕܐܝܬ ܠܗ ܟܝܢܐ ܡܠܝܠܐ܇ ܕܡܚܝܕ ܠܬܐܘܪܝܐ ܕܗܘܝ̈ܐ܀

ܝܠܝܕܐ ܐܝܬܘܗܝ܆ ܗ̇ܘ ܕܡܢ ܡܕܡ ܐܝܟ ܕܡܢ ܐܒܐ ܐܬܝܠܕ܀

ܝܠܝܕܐ ܐܝܬܘܗܝ܆ ܗ̇ܘ ܕܡܢ ܡܕܡ ܐܝܟ ܕܡܢ ܒܪܘܝܐ ܝܠܝܕ܀

ܡܐ ܕܠܐ ܡܟܝܠ ܡܬܛܒ̇ܥ ܡܫܝܚܐ ܒܥܠܡ̈ܐ ܡܫ̈ܚܠܦܐ: ܘܒܫܡܗ̈ܐ ܕܦܘܪܣܐ܆ ܗܝܕܝܢ ܐܦ ܗ̣ܘ ܢܫܬܥܒܕ ܠܐܠܗܐ ܐܒܐ܇ ܘܡܢ ܝܕܥܬܗ ܕܝܠܗ ܒܠܚܘܕܘܗܝ ܢܬܒ̇ܣܡ. ܗ̇ܝ ܕܠܐ ܡܬܦ̣ܠܓܐ ܒܥܠܡ̈ܐ ܘܒܬܪ̈ܒܝܬܐ ܕܡܠܝ̈ܠܐ܀

ܒܥܠܡ̈ܐ ܡ̇ܢ ܢܚ̇ܠܦ ܐܠܗܐ ܦܓܪܐ ܕܡܘܟܟܢ܇ ܠܕܡ̣ܘܬܐ ܕܦܓܪܐ ܕܫܘܒܚܗ ܕܡܪܝܐ. ܒܬܪ ܕܝܢ ܟܠܗܘܢ ܥܠܡ̈ܐ܆ ܐܦ ܒܕܡ̣ܘܬܐ ܕܨܠܡܐ ܕܒܪܗ ܢܥ̣ܒܕ ܠܢ. ܐܢ ܗ̣ܘ ܕܨܠܡܗ ܕܒܪܐ܇ ܝܕܥܬܐ ܐܝܬܝܝܬܐ ܕܐܠܗܐ ܐܒܐ ܐܝܬܘܗܝ܀

ܒܣܘ̈ܟܠܐ ܕܡܪܬܝܢܘܬܐ܆ ܡܠܐܟ̈ܐ ܩܕܝ̈ܫܐ ܡܕܟ̇ܝܢ ܠܢ ܡܢ ܒܝܫܘܬܐ܇ ܘܠܐ ܚܫܘ̈ܫܐ ܥ̇ܒܕܝܢ ܠܢ. ܒܕܟܝܢܐ ܕܝܢ ܘܒܡ̈ܠܐ ܐܠܗܝ̈ܬܐ܆ ܡܢ ܠܐ ܝܕܥܬܐ ܡܚ̇ܪܪܝܢ ܠܢ܇ ܘܚܟܝ̈ܡܐ ܘܝܕܘ̈ܥܬܢܐ ܥ̇ܒܕܝܢ ܠܢ܀

ܗ̇ܘ ܕܐܬ̣ܒܪܝ ܠܡܬܓ̣ܚܟܘ ܡܢ ܡܠܐܟܘ̈ܗܝ ܕܐܠܗܐ܆ ܠܡܐ ܟܝ ܗ̣ܘܝܘ

ܗ̇ܘ ܕܫ̇ܪܝ ܒܡܬܙܝܥܢܘܬܐ܇ ܘܒܩܕܡܝܬ ܕܪ̣ܟ ܥܠ ܬܚܘܡ̈ܐ ܕܒܝܫܘܬܐ. ܘܡܛܠ ܗܕܐ ܐܬܩܪܝ ܪܝܫ ܒ̣ܪ̈ܝܬܗ ܕܡܪܝܐ܀

ܐܝܟܢܐ ܕܟܘܪ̈ܟܘܬܐ ܦ̇ܪܚܝܢ ܒܛܘܦܣܐ ܕܐܬܘ̈ܬܐ: ܟܕ ܐܬܘ̈ܬܐ ܠܐ ܝ̇ܕܥܝܢ܆ ܗܟܢܐ ܐܦ ܫܐܕ̈ܐ ܬܢ̇ܝܢ ܡ̈ܠܐ ܕܕܚܠܬ ܐܠܗܐ܇ ܟܕ ܕܚܠܬ ܐܠܗܐ ܠܐ ܝ̇ܕܥܝܢ܀

ܙܩܝܦܐ ܡܬܝܕܥܢܐ ܐܝܬܘܗܝ܆ ܡܝܬܘܬܐ ܕܦܓܪܐ ܕܒܨܒܝܢܐ܇ ܕܓ̇ܡܪܐ ܢܟܦܘܬܗ ܕܒܡܫܝܚܐ܀

ܝܠܝܕܘܬܗ ܕܡܫܝܚܐ܆ ܝܠܝܕܘܬܗ ܕܒܪܢܫܢ ܓܘܝܐ ܕܡܢ ܕܪܝܫ ܐܝܬܝܗ̇. ܗ̇ܘ ܕܡܫܝܚܐ ܐܝܟ ܒܢܝܐ ܛܒܐ܆ ܥܠ ܟܐܦܐ ܕܪܝܫ ܒܢܝܢܐ ܕܓܘܫܡܗ ܫܬܐܣ ܘܒ̣ܢܝܗܝ܀

ܨܠܝܒܘܬܗ ܕܡܫܝܚܐ ܐܝܬܝܗ̇܆ ܡܝܬܘܬܗ ܕܒܪܢܫܢ ܥܬܝܩܐ܇ ܘܫܪܝܗ ܕܓܙ̇ܪ ܕܝ̣ܢܐ ܕܥܠܝܢ܇ ܘܡܫܬܒܩܢܘܬܐ ܕܠܚܝ̈ܐ ܡ̇ܥܛܦܐ ܠܢ܀

ܡܪܚܩܢܘܬܐ ܓܡܝܪܬܐ܆ ܠܡ̇ܢܬܐ ܕܪܓܬܐ ܕܢܦܫܐ ܡܪܟ̇ܟܐ. ܠܕܚ̣ܡܬܐ ܕܝܢ܆ ܩܫܝܬܐ ܥ̇ܒܕܐ ܠܗ̇܀

ܡܘܬܗ ܕܡܫܝܚܐ ܐܝܬܘܗܝ܆ ܡܥܒܕܢܘܬܐ ܕܐܪܙܐ܇ ܕܠܐܝܠܝܢ ܕܣ̇ܒܪܘ ܒܗ ܒܗܠܝܢ ܚܝ̈ܐ܇ ܠܚܝ̈ܐ ܕܠܥܠܡ ܡ̇ܦܢܝܐ܀

ܒܛܝܠܘܬܗ ܕܐܠܗܐ܆ ܠܚܐܪܘܬܗ ܕܨܒܝܢܐ ܠ̣ܘܝܐ. ܕܝ̣ܢܗ ܕܝܢ ܒܛܟܣܐ ܕܡܠܝ̈ܠܐ ܚ̇ܐܪ܀

ܬܚܘܝܬܐ ܪܘܚܢܝܬܐ ܐܝܬܝܗ̇܆ ܫܘܡܠܝܐ ܕܐܝܠܝܢ ܕܒܪܘܚܐ ܕܩܘܕܫܐ܇ ܐܠܗܐܝܬ ܩ̇ܕܡ ܐܬܡܠܠ܀

ܘܠܘ ܚܕ ܡܢ ܥܠܡ̈ܐ ܗ̣ܘܐ ܕܡܝܬܪ ܡܢ ܥܠܡܐ ܩܕܡܝܐ. ܗܢܐ ܓܝܪ ܡܢ ܡܘܙܓܐ ܪܫܝܐ ܐܡ̇ܪܝܢ ܕܗ̣ܘܐ: ܘܕܒܗ ܡܫܬܡܠܝܢ ܟܠܗܘܢ ܥܠܡ̈ܐ܆ ܓܙܪܝܐ ܘܝܕܘܥܬܢܐ ܐܫܠܡ ܠܢ܀

ܩܝܬܪܐ ܐܝܬܘܗܝ܆ ܢܦܫܐ ܦܠܘܚܬܐ܇ ܕܡܬܬܙܝܥܐ ܡܢ ܦܘ̈ܩܕܢܘܗܝ ܕܡܫܝܚܐ܀

ܕܝ̣ܢܗ ܕܐܠܗܐ܆ ܠܟܠ ܕܢ̣ܩܦ ܠܝܫܘܥ܇ܠܐܪܥܐ ܕܡܘܠܟܢܐ ܡ̇ܥܠ. ܟܕ ܝ̇ܗܒ ܠܗ ܓܘܫܡܐ ܪܘܚܢܐ ܘܥܠܡܐ ܕܠܗ ܠܚ̇ܡ. ܠܐܝܠܝܢ ܕܝܢ ܕܡܛܠ ܣܓܝܐܘܬ ܩܢܝܢܗܘܢ ܠܐ ܐܫܟܚܘ ܕܢܩ̇ܒܠܘܢ܆ ܗܠܝܢ ܒܥܒܪܐ ܕܝܘܪܕܢܢ ܐܝܟ ܡܫܘܚܬܗܘܢ ܡܝ̇ܬܒ܀

ܟܢܪܐ ܐܝܬܘܗܝ܆ ܗܘܢܐ ܕܟ̣ܝܐ܇ ܕܡܢ ܝܕܥܬܐ ܕܪܘܚ ܡܬܙܝܥ܀

ܡܨܪܝܢ ܠܒܝܫܘܬܐ ܡ̇ܘܕܥܐ. ܠܦܘܠܚܢܐ ܕܝܢ ܡܕܒܪܐ. ܘܠܬܐܘܪܝܐ ܕܓܘ̈ܫܡܐ ܐܪܥܐ ܕܝܗܘܕ. ܠܗ̇ܝ ܕܝܢ ܕܠܐ ܡܓܫܡ̈ܐ ܐܪܫܠܡ. ܦܠܐܬܐ ܕܝܢ ܕܬܠܝܬܝܘܬܐ ܨܗܝܘܢ܀

ܟܠ ܕܡܢ̇ܬܐ ܗܘ ܡܢ ܥܠܡܐ ܗܢܐ܆ ܡܢ ܟܝܢܐ ܗܘ ܦܓܪܢܐ. ܘܟܠ ܕܡܢ ܟܝܢܐ ܗܘ ܦܓܪܢܐ܆ ܡ̇ܢܬܐ ܗܘ ܕܥܠܡܐ ܗܢܐ܀

ܐܢܗ̣ܘ ܕܝܬܝܪ ܡܢ ܟܠܗܘܢ ܚܝ̈ܠܐ ܕܢܦܫܐ: ܡܢ̇ܬܐ ܣܟܘܠܬܢܝܬܐ ܡܝܩܪܐ: ܡܛܠ ܕܗܕܐ ܒܠܚܘܕ ܡܬܚ̇ܝܕܐ ܠܚܟܡܬܐ܆ ܡܕܝܢ ܩܕܡܝܬܐ ܕܟܠܗܝܢ ܡܝܬܪ̈ܬܐ ܝܕܥܬܐ ܗܝ. ܠܗܕܐ ܓܝܪ ܐܦ ܪܘܚܐ ܕܣܝܡܬ ܒܢܝ̈ܐ ܩ̣ܪܐ ܡܠܦܢܢ ܚܟܝܡܐ܀

ܚܫ̈ܐ ܣܓܝ̈ܐܐ ܟ̣ܣܝܢ ܒܢܦ̈ܫܬܢ: ܗ̇ܢܘܢ ܕܟܕ ܛܥ̣ܝܢ ܠܢ܆ ܢܣܝܘ̈ܢܐ ܚܪ̈ܝܦܐ ܓ̇ܠܝܢ ܠܗܘܢ. ܘܙ̇ܕܩ ܕܒܟܠ ܙܘܗܪ ܢ̣ܛܪ ܠܒܢ܆ ܕܠܡܐ ܟܕ ܢܒ̣ܠܩ ܣܘܥܪܢܐ ܗ̇ܘ ܕܚܫܐ ܠܘܬܗ ܩܢ̇ܝܢ܇ ܢܬܚܛܦ ܡܢ ܫܠܝ ܡܢ ܫܐܕ̈ܐ܇ ܘܢܣܥܘܪ ܡܕܡ ܡܢ ܐܝܠܝܢ ܕܡܣܠܝܢ ܠܐܠܗܐ܀

ܓܐܪܐ ܡܬܝܕܥܢܐ ܐܝܬܘܗܝ܆ ܚܘܫܒܐ ܒܝܫܐ܇ ܕܡܢ ܡܢ̇ܬܐ ܚܫܘܫܬܐ ܕܢܦܫܐ ܡܬܩ̇ܝܡ܀

ܐܢܗ̣ܘ ܕܗܘܢܐ ܡ̈ܠܐ ܦ̇ܪܫ: ܫܡܗ̈ܐ ܕܝܢ ܘܡ̈ܠܐ ܡ̇ܘܕܥܝܢ ܣܘܥܪ̈ܢܐ܆ ܡܕܝܢ ܗܘܢܐ ܣܘܥܪ̈ܢܐ ܦ̇ܪܫ܀

ܗܘܢܐ ܗܝܕܝܢ ܡܬܩ̇ܪܒ ܠܡ̈ܬܝܕܥܢܝܬܐ܆ ܡܐ ܕܠܐ ܡܟܝܠ ܡܬܚܝ̇ܕ ܠܚܘܫܒܐ ܕܡܢ ܡܢ̇ܬܗ̇ ܚܫܘܫܬܐ ܕܢܦܫܐ܀

ܐܢܗ̣ܘ ܕܚܙܬܐ ܡܬܐܡܪܐ ܗܝ ܒܐܪܓܫܬܐ ܘܒܬܪܥܝܬܐ: ܗܟܢܐ ܕܝܢ ܢܐܬܐ ܡܫܝܚܐ ܐܝܟ ܡܐ ܕܚܙܐܘܗܝ ܬܠܡܝ̈ܕܐ ܕܣ̇ܠܩ ܠܫܡܝܐ܆ ܢܐܡܪ ܐܢܫ ܕܐܝܟܢ ܚܙܐܘܗܝ. ܒܪܡ ܕܝܢ ܢܕܥ܆ ܕܒܟܠܙܒܢ ܒܩܕܝ̈ܫܐ ܡ̣ܣܩ ܣ̇ܠܩ ܡܫܝܚܐ. ܐܦܢ ܠܘܬ ܐܚܪ̈ܢܐ ܡܣ̣ܬܒܪ ܕܢ̇ܚܬ܀

ܡܕܡ ܕܡܬܦܪܥ ܟܝܢܐ ܡܠܝܠܐ ܩܕܡ ܒܝܡ ܕܡܫܝܚܐ܆ ܓܘ̈ܫܡܐ ܐܢܘܢ ܪ̈ܘܚܢܐ ܐܘ ܚܫܝ̈ܟܐ. ܘܬܐܘܪܝܐ ܐܘ ܠܐ ܝܕܥܬܐ ܕܠܗܠܝܢ ܠܚ̇ܡ̈ܢ. ܘܡܛܠ ܗܕܐ ܡܫܝܚܐ ܗ̇ܘ ܕܡܣܟܝܢܢ ܠܗ܆ ܠܡܢܗܘܢ ܗܟܢ ܐܡ̇ܪܝܢ ܕܐܬ̇ܐ ܘܠܡܢܗܘܢ ܗܟܢ܀

ܡܢ ܓܘ̈ܫܡܐ ܐܝܠܝܢ ܕܡܢ ܚܘܠܦܐ ܐܬܩ̣ܒܥܘ܆ ܓܘ̈ܫܡܐ ܪ̈ܘܚܢܐ ܐܡ̇ܪܝܢ ܕܢ̇ܦܩܝܢ. ܐܢ ܕܝܢ ܡܢ ܗܘܠܐ ܐܘ ܡܢ ܐܪ̈ܓܢܐ ܕܗ̣ܘܘ ܠܚܪܬܐ ܗܕܐ ܬܓܕܫ܆ ܐܦ ܐܢܬ ܫܪܝܪܐܝܬ ܒ̇ܚܢ܀

ܥܦܝܦܬܐ ܗܝ ܒܛܝܠܘܬܗ ܕܐܠܗܐ. ܘܡܢܗ̇ ܐܡ̇ܪܝܢ ܕܠܩܘܝܡܐ ܕܓܘ̈ܫܡܐ ܘܕܠܐ ܓܫܘܡ ܢ̇ܛܪܐ܆ ܘܡܢܗ̇ ܠܡܠܝ̈ܠܐ ܡܢ ܒܝܫܘܬܐ ܘܠܐ ܝܕܥܬܐ܇ ܠܘܬ ܡܝܬܪܘܬܐ ܘܝܕܥܬܐ ܡܚܦܛܐ܀

ܥ̇ܩܪܐ ܐܝܬܘܗܝ܆ ܗܘܢܐ ܕܓܠܝܙ ܡܢ ܝܘܠܦܢܐ ܪܘܚܢܝܐ܇ ܐܘ ܕܚܣܝܪܝܢ ܠܗ ܙܪ̈ܥܐ ܕܡܙܕܪܥܝܢ ܒܪܘܚܐ ܕܩܘܕܫܐ܀

ܐܘ ܐܠܗܐ ܐܠܗܐ ܗܘ ܕܚܝ̈ܐ ܘܠܐ ܗܘܐ ܕܡܝ̈ܬܐ: ܐܝܟ ܡܠܬܗ ܕܝܢ ܕܡܘܫܐ ܩܕܝܫܐ: ܡ̇ܣܩܝܢ ܒܙܟܘܪ̈ܐ ܠܡܝ̈ܬܐ ܡܫ̇ܐܠܝܢ܆ ܡ̇ܣܩܬ ܒܙܟܘܪ̈ܐ܆ ܠܘ ܠܫܡܘܐܝܠ ܐܣܩ̇ܬ ܡܢ ܒܝܬ ܡܝ̈ܬܐ܇ ܐܢ ܗ̣ܘ ܕܠܘ ܡܝܬܐ ܗܘ ܐܠܐ ܚ̇ܝܐ܀

ܥ̇ܩܪܬܐ ܐܝܬܝܗ̇܆ ܢܦܫܐ ܡܠܝܠܬܐ܇ ܗ̇ܝ ܕܒܟܠܙܒܢ ܝ̇ܠܦܐ܇ ܘܠܡܐܬܐ ܠܘܬ ܝܕܥܬܐ ܕܫܪܪܐ ܠܐ ܡܫܟܚܐ܀

ܐܝܟܢܐ ܕܐܝܠܝܢ ܕܟܪܝܗ ܚ̣ܙܝܗܘܢ ܘܚ̇ܝܪܝܢ ܒܫܡܫܐ: ܡܢ ܕܡܥܝ̈ܗܘܢ ܡܬܥܘܟܝܢ: ܘܒܐܐܪ ܫܪܓܪ̈ܓܝܬܐ ܚ̇ܙܝܢ܆ ܗܟܢܐ ܐܦ ܗܘܢܐ ܕܟ̣ܝܐ܇ ܡܐ ܕܐܬܕ̇ܠܚ

ܡܢ ܪܘܓܙܐ܇ ܠܡܩ̇ܒܠܘ ܬܐܘܪܝܐ ܕܪܘܚ ܠܐ ܡ̣ܨܐ. ܐܠܐ ܐܝܟ ܥܪܦܠܐ ܚܙ̇ܐ ܕܫܟܝܢܐ ܥܠ ܣܘܥܪ̈ܢܐ܀

ܐܝܟܢܐ ܕܒܝܕ ܚܘܠܡܢܗ ܡܬܪܓܫܢܐ ܕܡ̣ܫܪܝܐ܆ ܥܠ ܚܘܠܡܢܐ ܡܬܝܕܥܢܐ ܒ̇ܕܩ ܠܢ ܦܪܘܩܢ: ܘܒܝܕ ܓܠ̣ܝܐ ܥܠ ܟ̣ܣܝܐ ܫ̇ܪܪ܆ ܗܟܝܐ ܒܝܕ ܡܦܩܬܐ ܡܬܪܓܫܢܝܬܐ ܕܒܢ̈ܝ ܐܝܣܪܐܝܠ܇ ܠܡܦܩܬܐ ܕܡܢ ܒܝܫܘܬܐ ܘܠܐ ܝܕܥܬܐ ܚܘܝ ܠܢ܀

ܐܪܙܐ ܐܝܬܘܗܝ܆ ܬܐܘܪܝܐ ܪܘܚܢܝܬܐ܇ ܗ̇ܝ ܕܠܘ ܠܟܠܢܫ ܡܬܕܪܟܐ܀

ܣܝܦܐ ܕܛܪܢܐ ܐܝܬܘܗܝ܆ ܝܘܠܦܢܗ ܕܡܫܝܚܐ ܦܪܘܩܢ܇ ܗ̇ܘ ܕܠܗܘܢܐ ܕܡܟܣܝ ܒܚܫ̈ܐ܇ ܒܝܕܥܬܐ ܓܙ̇ܪ܀

ܟܠ ܟܡܐ ܕܡܬܪܒܝܢ ܥܠܡ̈ܐ܆ ܗܟܢܐ ܐܝܬܝܪܐܝܬ ܐܦ ܫܡܗ̈ܐ ܘܣܘ̈ܟܠܐ ܕܠܚ̇ܡܝܢ ܠܗܘܢ܇ ܠܬܠܝܬܝܘܬܐ ܩܕܝܫܬܐ ܡ̇ܘܕܥܝܢ ܠܢ܀

ܫܘܥܒܕܐ ܐܝܬܘܗܝ܆ ܫܠܡܘܬ ܨܒܝܢܗ ܕܟܝܢܐ ܡܠܝܠܐ܇ ܕܠܘܬ ܝܕܥܬܐ ܕܐܠܗܐ܀

ܡܠܐܟ̈ܐ ܠܒܢܝ̈ ܐܢܫܐ ܚܙ̇ܝܢ ܘܠܫܐܕ̈ܐ. ܒܢܝ̈ ܐܢܫܐ ܕܝܢ ܡܢ ܚܙܬܐ ܕܡܠܐܟ̈ܐ ܘܕܫܐܕ̈ܐ ܓܠܝܙܝܢ ܐܢܘܢ. ܫܐܕ̈ܐ ܕܝܢ ܠܒܢܝ̈ܢܫܐ ܒܠܚܘܕ ܚܙ̇ܝܢ܀

ܫܘܥܒܕܐ ܐܝܬܘܗܝ܆ ܡܚܝܠܘܬܐ ܕܟܝܢܐ ܡܠܝܠܐ܇ ܗ̇ܝ ܕܠܐ ܡ̣ܨܝܐ ܬܥ̣ܒܪ ܬܚܘ̈ܡܐ ܕܡܫܘܚܬܗ̇. ܗܟܢܐ ܓܝܪ ܟܠܡܕܡ ܫܥܒܕ ܬܚܝܬ ܪ̈ܓܠܘܗܝ܆ ܐܝܟ ܡܠܬܗ ܕܦܘܠܘܣ܀

ܐܝܟܢܐ ܕܠܐܝܣܪܐܝܠ ܡܬܪܓܫܢܐ: ܣܩܘܒܠܝܝܢ ܥܡܡ̈ܐ ܡܬܪ̈ܓܫܢܐ܆ ܗܟܢܐ ܠܐܝܣܪܐܝܠ ܡܬܝܕܥܢܐ܇ ܣܩܘܒܠܝܝܢ ܥܡܡ̈ܐ ܡ̈ܬܝܕܥܢܐ܀

ܐܚܪܢܐ ܗܘ ܣܘܟܠܐ ܕܗܘܠܐ. ܘܐܚܪܢܐ ܗܘ ܕܡܘܙܓܐ ܡܘܕܥܢܗ. ܘܐܚܪܢܐ ܗܘ ܕܓܘܝܘܬܗܘܢ ܕܬܪ ܕܐܣ̈ܛܘܟܣܐ. ܘܐܚܪܢܐ ܗܘ ܕܐܣ̈ܛܘܟܣܐ ܡܬܪ̈ܓܫܢܐ. ܘܐܚܪܬܐ ܗܝ ܬܐܘܪܝܐ ܕܓܘܫܡܐ. ܘܐܚܪܬܐ ܗܝ ܕܐܪܓܢܘܢ ܐܢܫܝܐ܀

ܠܘ ܒܗ̇ܝ ܕܐܝܬܘܗܝ ܕܠܐ ܓܫܘܡ ܗܘܢܐ܇ ܐܝܬܘܗܝ ܕܡܝ̣ܘܬܐ ܕܐܠܗܐ. ܐܠܐ ܒܗ̇ܝ ܕܗ̣ܘܐ ܡܩܒܠܢܗ. ܐܢ ܕܝܢ ܒܗ̇ܝ ܕܐܝܬܘܗܝ ܕܠܐ ܓܫܘܡ: ܐܝܬܘܗܝ ܕܡ̣ܘܬܐ ܕܐܠܗܐ܆ ܝܕܥܬܐ ܐܝܬܝܝܬܐ ܡܕܝܢ ܐܝܬܘܗܝ܇ ܘܠܘ ܡܢ ܡܩܒܠܢܘܬܐ ܗ̣ܘܐ ܨܠܡܐ ܕܐܠܗܐ. ܒ̇ܚܢ ܕܝܢ ܐܢ ܗ̣ܝ ܟܕ ܗ̣ܝ ܐܝܬܝܗ̇ ܡܠܬܐ܇ ܗ̇ܝ ܕܢܗܘܐ ܕܠܐ

ܓܫܘܡ܇ ܘܗ̇ܝ ܕܐܝܬܘܗܝ ܡܩܒܠܢܐ ܕܝܕܥܬܐ. ܐܘ ܐܚܪܢܝܐܝܬ ܐܝܟ ܕܥܠ ܐܢܕܪܝܢܛܐ ܘܥܠ ܢܚܫܗ܀

ܢܐܬܐ ܡ̇ܢ ܡܫܝܚܐ ܩܕܡ ܕܝ̣ܢܐ܆ ܠܡܕܢ ܠܚܝ̈ܐ ܘܠܡܝ̈ܬܐ. ܢܬܝܕܥ ܕܝܢ ܒܬܪ ܕܝ̣ܢܐ. ܐܢܗ̣ܘ ܕܡܬܝܕܥ ܡܪܝܐ ܒܕܝ̣ܢܐ ܕܥ̇ܒܕ܀

ܝܕܥܬܐ ܩܕܡܝܬܐ ܕܒܡܠܝ̈ܠܐ܆ ܕܬܠܝܬܝܘܬܐ ܩܕܝܫܬܐ ܐܝܬܝܗ̇. ܒܬܪܟܢ ܗ̣ܘܬ ܡܬܙܝܥܢܘܬܐ ܕܚܐܪܘܬܐ. ܘܒܛܝܠܘܬܐ ܕܥܘܕܪܢܐ. ܘܠܐ ܫܒܝܩܘܬܐ. ܘܒܬܪܟܢ ܕܝ̣ܢܐ. ܘܬܘܒ ܡܬܙܝܥܢܘܬܐ ܕܚܐܪܘܬܐ. ܘܒܛܝܠܘܬܐ. ܘܕܝ̣ܢܐ. ܘܥܕܡܐ ܠܬܠܝܬܝܘܬܐ ܩܕܝܫܬܐ. ܗܟܢܐ ܡܬܡܨܥ ܕܝ̣ܢܐ ܡܢ ܡܬܙܝܥܢܘܬܐ ܕܚܐܪܘܬܐ ܘܒܛܝܠܘܬܐ ܕܐܠܗܐ܀

ܐܢܗ̣ܘ ܕܗ̇ܘ ܕܣ̣ܠܩ ܠܥܠ ܡܢ ܟܠܗܘܢ ܫܡܝܐ ܟܠ ܫܡܠܝ܆ ܝܕܝܥܐ ܗܝ ܕܟܠ ܚܕ ܡܢ ܬܓܡ̈ܐ ܕܚܝ̈ܠܘܬܐ ܫܡܝ̈ܢܐ ܫܪܝܪܐܝܬ ܝ̣ܠܦ ܣܘ̈ܟܠܐ ܕܥܠ ܒܛܝܠܘܬܐ. ܕܒܗܘܢ ܠܐܝܠܝܢ ܕܡܬܚܬܝܢ ܡܢܗܘܢ܆ ܩܠܝܠܐܝܬ ܠܘܬ ܡܝܬܪܘܬܐ ܘܠܘܬ ܝܕܥܬܐ ܕܐܠܗܐ ܡܚܦܛܝܢ܀

ܠܡܐ ܟܝ ܡܦܩܗ ܕܡܫܝܚܐ ܕܡܢ ܐܒܐ: ܓܒܪܝܐܝܠ ܠܡܪܝܡ ܣ̇ܒܪ܆ ܐܘ ܡܐܬܝܬܗ ܕܡܢ ܥܠܡܐ ܕܡܠܐܟ̈ܐ ܠܥܠܡܐ ܕܒܢܝ̈ ܐܢܫܐ. ܒܥܝ ܕܝܢ ܬܘܒ

ܘܥܠ ܬܠܡܝ̈ܕܐ ܕܐܬܗ̇ܦܟܘ ܥܡܗ ܒܦܓܪܢܘܬܗ: ܕܠܡܐ ܟܝ ܡܢ ܥܠܡܐ ܕܡܬܚܙܐ ܠܢ ܐܬܘ ܥܡܗ܆ ܐܘ ܡܢ ܐܚܪܢܐ ܐܘ ܡܢ ܐܚܪ̈ܢܐ. ܘܡܢܗܘܢ ܐܘ ܟܠܗܘܢ. ܘܐܘܣܦ ܬܘܒ ܘܒܥܝ܆ ܕܐܢ ܡܢ ܬܩܢܘܬܐ ܢܦܫܢܝܬܐ ܕܐܝܬ ܗܘܐ ܠܗܘܢ܇ ܓ̣ܕܫ̇ܬ ܘܗ̣ܘܘ ܬܠܡܝ̈ܕܐ ܠܡܫܝܚܐ܀

ܦܚ̣ܡܗ ܕܦܓܪܐ ܐܝܬܘܗܝ܆ ܗ̇ܘ ܕܫ̣ܘܐ ܠܗ ܒܡܘܙܓܐ܀

ܦܓܪܗ ܕܡܫܝܚܐ܆ ܒܪ ܟܝܢܗ ܗܘ ܕܦܓܪܢ. ܘܢܦܫܗ ܡܢ ܟܝܢܐ ܕܢܦ̈ܫܬܢ. ܡܠܬܐ ܕܝܢ ܕܒܗ ܐܝܬܝܐܝܬ ܒܪ ܐܝܬܘܬܐ ܗܘ ܕܐܒܐ܀

ܦ̣ܚܡܐ ܕܩܢܘܡܐ ܡܠܝܠܐ ܐܝܬܘܗܝ܆ ܗ̇ܘ ܕܫ̣ܘܐ ܠܗ ܒܝܕܥܬܐ܀

ܐܝܟܢܐ ܕܠܐ ܡ̣ܨܝܐ ܕܟܝܢܐ ܡܠܝܠܐ܆ ܥܡ ܦܓܪܐ ܣܛܪ ܡܢ ܥܠܡܐ ܠܡܗܘܐ܆ ܗܟܢܐ ܠܐ ܡ̣ܨܝܐ ܕܣܛܪ ܡܢ ܦܓܪܐ ܒܥܠܡܐ ܠܡܗܘܐ܀

ܒܟܝܢܐ ܦܓܪܢܐ ܡܬܐܡܪܐ ܕܐܝܬܘܗܝ ܐܠܗܐ܆ ܐܝܟ ܪܝܫ ܒܢ̇ܝ̈ܐ ܒܐܝܠܝܢ ܕܡܢܗ ܗ̣ܘܘ. ܘܐܟܘܬܗ ܡܬܐܡܪ ܕܐܝܬܘܗܝ܆ ܐܝܟ ܕܒܐܢܕܪܝܢܛܐ. ܐܢ ܬܓܕܫ ܘܢܥ̣ܒܕ ܠܗ ܐܢܕܪܝܢܛܐ ܕܩܝܣܐ܀

ܠܗܠܝܢ ܡܬܐܡܪ ܕܚ̇ܙܐ ܗܘܢܐ܆ ܠܐܝܠܝܢ ܕܝ̇ܕܥ. ܘܠܗܠܝܢ ܠܐ ܚ̇ܙܐ܆ ܠܐܝܠܝܢ ܕܠܐ ܝ̇ܕܥ. ܘܡܛܠ ܗܕܐ ܠܘ ܟܠܗܘܢ ܚܘܫܒ̈ܐ ܡܥܘܟܝܢ ܠܗ ܡܢ ܝܕܥܬܐ ܕܐܠܗܐ܆ ܐܠܐ ܐܝܠܝܢ ܕܡܢ ܚ̣ܡܬܐ ܘܪܓܬܐ ܕܠܒܪ ܡܢ ܟܝܢܐ ܣ̇ܒܟܝܢ ܥܠܘܗܝ܀

ܡܢ̇ܬܐ ܕܚ̣ܡܬܐ ܕܢܦܫܐ ܥܡ ܠܒܐ ܟܕܝܢܐ܆ ܐܝܟܐ ܕܐܦ ܣܟܘܠܬܢܘܬܗ̇ ܐܝܬܝܗ̇. ܡܢ̇ܬܐ ܕܝܢ ܕܪܓܬܗ܆ ܥܡ ܒ̣ܣܪܐ ܘܕܡ̣ܐ ܟܕܝܢܐ. ܐܢ ܗ̣ܘ ܕܠܡܪܚܩܘ ܚܡ̣ܬܐ ܡܢ ܠܒܐ ܙ̇ܕܩ ܠܢ ܘܒܝܫܘܬܐ ܡܢ ܒ̣ܣܪܐ܀

ܐܢܗ̣ܘ ܕܟܠܗܘܢ ܚܝ̈ܠܐ ܐܝܠܝܢ ܕܓܘܢܐܝܬ ܐܝܬ ܠܢ ܘܠܒܥܝܪܐ: ܕܟܝܢܐ ܦܓܪܢܐ ܐܝܬܝܗܘܢ܆ ܡܕܝܢ ܝܕܝܥܐ ܗܝ ܕܚ̣ܡܬܐ ܘܪܓܬܐ ܠܐ ܡܬܚܙܝܢ ܕܐܬ̣ܒܪܝ ܥܡ ܟܝܢܐ ܡܠܝܠܐ ܩܕܡ ܡܬܙܝܥܢܘܬܐ܀

ܡܠܐܟ̈ܐ ܩܕܝ̈ܫܐ܆ ܠܡܢܗܘܢ ܕܒܢܝ̈ܢܫܐ ܒܡܠܬܐ ܪܕ̇ܝܢ. ܠܡܢܗܘܢ ܕܝܢ ܒܝܕ ܚܠܡ̈ܐ ܡ̇ܦܢܝܢ. ܘܠܡܢܗܘܢ ܒܕܘ̈ܚܠܐ ܕܠܝܠܘ̈ܬܐ ܡܢ̇ܟܦܝܢ. ܘܠܐܚܪ̈ܢܐ ܒܡܚܘ̈ܬܐ ܠܘܬ ܡܝܬܪܘܬܐ ܡ̇ܥܛܦܝܢ܀

ܗܘܢܐ ܐܝܟ ܡܠܬܗ ܕܫܠܝܡܘܢ ܥܡ ܠܒܐ ܟܕܝܢ. ܢܘܗܪܐ ܕܝܢ ܕܕܢ̇ܚ ܠܗ܆ ܡܢ ܪܫܐ ܡܬܪܓܫܢܐ ܡܣ̣ܬܒܪ ܕܐܝܬܘܗܝ܀

ܠܘ ܡܠܐܟ̈ܐ ܩܕܝ̈ܫܐ ܒܠܚܘܕ ܥ̇ܡܠܝܢ ܥܡܢ ܠܦܘܪܩܢܢ܆ ܐܠܐ ܐܦ ܗ̣ܢܘܢ ܟܘܟܒ̈ܐ. ܐܢܗ̣ܘ ܕܒܝܘܡܝ̈ ܒܪܩ܆ ܡܢ ܫܡܝܐ ܥ̣ܒܕܘ ܩܪܒܐ ܥܡ ܣܝܣܪܐ܀

ܐܝܟܢܐ ܕܒܥܠܡܐ ܗܢܐ: ܗ̣ܘܐ ܡܪܢ ܒܘܟܪܐ ܡܢ ܒܝܬ ܡܝ̈ܬܐ܆ ܗܟܢܐ ܒܥܠܡܐ ܕܥܬܝܕ ܢܗܘܐ ܒܘܟܪܐ ܒܐܚ̈ܐ ܣܓܝ̈ܐܐ܀

ܟܠ ܐܝܢܐ ܕܐܫ̣ܬܘܝ ܠܝܕܥܬܐ ܪܘܚܢܝܬܐ܆ ܢܥܕܪ ܠܡܠܐܟ̈ܐ ܩܕܝܫ̈ܐ ܘܢܦ̈ܫܬܐ ܡܠܝ̈ܠܬܐ ܡܢ ܒܝܫܘܬܐ ܠܘܬ ܡܝܬܪܘܬܐ܆ ܘܡܢ ܠܐ ܝܕܥܬܐ ܠܘܬ ܝܕܥܬܐ ܢ̇ܗܦܟ܀