ܣ݁ܥܪ ܣܘܥܪ̈ܢܐ ܐܝܬܘܗܝ݂ ܗܘ݁ ܕܡܑܢܬܐ ܚܫܘܫܐ ܕܢܦܫܗ ܩܢ݂ܐ ܕܠܐ ܚܫܐ.܀

ܝܕܘܥܬܢܐ ܕܝܢ݁ ܐܝܬܘܗܝ݂܁ ܗ݁ܘ ܕܒܕܡܘܬ ܡܠܚܐ ܐܝܬܘܗܝ ܠܛܡ̈ܐܐ܆ ܘܐܝܟ ܢܘܗܪܐ ܠܕܟ̈ܝܐ.

ܝܕܥܬܐ ܕܡܢ ܠܒܪܓܕܫ݁ܐ ܠܢ܆ ܒܝܕ ܡ̈ܠܐ ܡܚܘܝܐ ܠܢ ܗܘ̈ܠܣ. ܗ݁ܝ ܕܝܢ ܕܡܢ ܛܝܒܘܬܐ ܐܠܗܐ ܗܘܝܐ ܒܢ܆ ܥܪܛܠܐܝܬ ܡܚܘܝܐ܆ ܠܗܘܢ ܠܣܘܥܪ̈ܢܐ ܠܬܪܥܝܬܐ܆ ܕܟܕ ܢܚܘܪ ܒܗܘܢ ܗܘܢܐ܆ ܣܘܟܠܝܗܘܢ ܡܩ݁ܒܠܢܐ ܣܩܘܒܠܝܐ ܕܝܢ ܠܩܕܡܝܬܐ܁ ܛܘܥܚ ܠܬܪܝܢܬܐ ܕܝܢ ܚܡܬܐ ܘܪܘܓܙܐ ܘܐܝܠܝܢ ܕܠܗܠܝܢ ܢܩܝܦܢ ܀

ܟܠܗܝܢ ܡܝܬܪ̈ܬܐ ܕܪܫܢ ܐܘܪܚܐ ܩܕܡ ܝܕܘܥܬܢܐ. ܝܬܝܪ ܕܝܢ ܡܢ ܟܘܠܗܝܢ ܕܠܐ ܢܣ݂ܩ ܪܘܓܙܗ܁ ܗ݁ܘ ܕܝܢ ܕܐܬܩܪܒ ܠܘܬ ܝܕܥܬܐ܆ ܘܕܠܝܠܐܝܬ ܡܬܬܙܝܥ ܡܢ ܪܘܓܙܐ܆ ܕܡ݁ܐ ܠܗ݁ܘ ܕܡܚܐ ܡܚܛܐ ܕܦܪܙܠܐ ܒ̈ܥܝܢܘܗ݁ܝ܀

ܢܙܕܗܪ ܝܕܘܥܬܢܐ ܒܡܬܢܚܬܢܘܬܗ܆ ܕܠܐ ܢܛܥܐ ܘܢܨܛܒܥ ܠܗ ܒܗ݁܁ ܘܢܬܚܦܛ ܕܟܠܗܝܢ ܡܝܬܪ̈ܬܐ ܫܘܝܐܝܬ ܢܓܡܘܪ܆ ܕܗ̈ܘܝ ܠܬ݁ܝܢ ܒܗ ܠܚ̈ܕܕܐ܆ ܡܛܠ ܕܡܟܢ ܗܘܢܐ ܕܢܫܬ݂ܠܡ ܡܢ ܗ݁ܝ ܕܡܬܒܨܪܐ. ܀

ܝܕܘܥܬܢܐ ܒܟܠܙܒܢ ܢܕܪܫ ܢܦܫܗ ܒܪ̈ܚ݂ܡܐ܁ ܐܢ ܕܝܢ ܥܠ ܟܣܦܐ ܣܢܝܩ܆ ܢܙܝܥ ܡܐ̈ܢܐ ܕܢܦܫܗ܁ ܟܠܗܘܢ ܓܝܪ ܡܟܢܝܢ ܠܡܥܒܕ ܪ̈ܚ݂ܡܐ܁ ܗܠܝܢ ܕܟܕ ܐܬܓܠܙ ܡܢܗܘܢ ܚܡܫ ܒ̈ܬܘܠܬܐ݂ ܕܥܟܘ ܠܡ̈ܦܕܝܗܝܢ܀

ܫܟܝܪܐ ܠܝܕܘܥܬܢܐ ܕܕܝܢܐ ܢܐܡܪ. ܐܢ ܡܬ݂ܛܠܡ܆ ܘܐܢ ܛܠܡ ܐܢ ܡܬܛܠܡ ܕܠܐ ܣܝܒܪ. ܘܐܢ ܛܠܡ ܡܛܠܬܗ ܕܛܠܘܡܘܬܐ܀

ܝܕܥܬܐ ܕܡܬܢܛܪܐ ܡܠܦܐ ܠܩܢܝܗ݁܆ ܕܐܝܟܢܐ ܢܬܢ݂ܛܪ ܘܠܩܕܡܘܗܝ ܢܫܬܘܫܛ.

ܐܢܗܘ ܕܡܚܪܪ ܝܕܘ݂ܥܬܢܐ ܒܙܒܢܐ ܕܦܘܫܩܐ܆ ܡܢ ܪܘܓܙܐ ܘܐܟܬܐ ܘܥܩܬܐ܆ ܘܟܘܪܗܢܐ ܕܦܓܪܐ ܘܨܦܬܐ݂ ܢ݁ܦܫܩ܀܀܀

ܩܕܡ ܡܝܬܪܘܬܐ ܓܡܝܪܬܐ܆ ܘܠܐ ܥܢܝܢܐ ܘܠܐ ܥܝܕܐ ܐܡ ܣ̈ܓܝܐܐ ܠܡܩܢܐ܁ ܕܠܡܐ ܢܡܠܐ ܗܘܢܢ ܗܓ̈ܓܐ܀

ܟܠܡܕܡ ܕܡܢ ܦܘܠܚ݁ܢܐ ܗ݁ܘ ܘܡܢ ܟܝܢܐ ܘܡܢ ܡ̈ܠܐ ܕܥܠ ܐܠܗܐ ܘܥܕܪ ܠܦܘܪܩܢܢ܆ ܗܠܝܢ ܠܡܐܡܪ ܘܠܡ݁ܣܥܪ ܙܕܩ݁ ܠܢ ܥܕܡܐ ܠܡܘܬܐ܁ ܐܢ ܕܝܢ ܡܢ ܡܨܥ̈ܝܬܐ܆ ܗܘ݂ ܠܐ ܠܡܐܡܪ ܘܠܐ ܠܡܥܒܕ ܐܠܨܐ܆ ܡܛܠ ܗܠܝܢ ܕܕܠܝܠܐܝܬ ܡܬܟ݂ܫܠܝܢ.܀

ܙܕܩ ܕܠܛ̈ܠܝܐ ܘܠܥܠܡ̈ܝܐ ܥܠ ـܥܒܕ̈ܐ ܕܡܝܬܪܘܬܐ ܠܡܡܠܠܘ ܘܥܠ ܝܘܠܦܢܐ ܕܟܝܢܐ ܘ ܡ̈ܠܐ ܕܥܠ ܐܠܗܐ ܩܠܝܠ ܡܢ ܣܓܝ ܠܡ݁ܦܫܩܘ܁ ܕܠܐ ܗܠܝܢ ܓܝܪ ܠܝܬ ܠܡܚܙܐ ܠܡܪܝܐ܀

ܠܟܗ̈ܢܐ ܒܠܚܘܕ ܦܢܐ ܦܬܓܡܐ ܡܐ ܕܡܫܐܠܝܢ ܠܟ ܘܝܬܝܪܐ ܠܐܝܠܝܢ ܕܕܡܝܬܪܝ ܒܗܘܢ ܕ ܡܢܐ ܐܢܝܢ ܦܠܐ̈ܬܐ ܕܡܫܬܡܫܢ ܡܢܗܘ݁ܢ܁ ܘܠܒܪܢܫܐ ܓܘܝܐ ܡ̈ܕܟܝܢ܁ ܘܡܐ̈ܢܐ ܕܡܩܒܠܝ݂ܢ܆ ܬܚܘܝܬܐ ܐܢܘܢ ܕܡܢܘܬܗ݁ ܚܫܘܫܬܐ ܕܢܦܫܐ ܘܕܡܠܝܠܘܬܗ݁܁ ܘܕܡܢܐ ܗܝ ܚܠܝܛܘܬܗܘܢ ܕܠܐ ܡܬܦܪܫܐ܇ ܘܐܘܚܕܢܐ ܕܚܕ ܚܕ ܡܢܗܘܢ܇ ܘܫܘܡܠܝܐ ܕܣܘܥܪ̈ܢܐ ܕܟܠ ܚܕ ܡܢܗܘܢ ܕܠܚܕ ܢܝܫܐ܁ ܘܐܡܪ ܠܗܘܢ ܬܘܒ ܕܐܪܙܐ ܕܡܢ ܐܝܬܘܗܝ ܗ݁ܘ ܕܗܠܝܢ ܥܒ݁ܕ܁ ܘ ܡ݁ܢ ܐܢܘܢ ܐܝܠܝܢ ܕܥ݂ܡܗ܆ ܕܪܕܦܝܢ ܠܐܠܝܢ ܕܟܠܝܢ ܒܕܘܒܪ̈ܐ ܕܟ݁ܝ̈ܐ܁ ܘܕܡܢܗܝܢ ܕܚܝ̈ܘܬܐ ܐܝܬ ܠܗܝܢ ܥܘܗܕܢܐ ܘܡܢܗܝܢ ܠܝܬ܀

ܐܣ݁ܬܟܠ ܡ̈ܠܐ ܘܢܡܘܣ̈ܐ܇ ܕܙ̈ܒܢܐ ܘܕܕܘܒܪ̈ܐ ܘܕܥ݁ܒ̈ܕܐ ܕܢܗܘܐ ܐܝܬ ܠܟ ܕܠܝܠܐܝܬ ܠܡܡܠܠܘ ܠܟܠ ܐܢܫ ܐܝܠܝܢ ܕܡܥܕܪ̈ܢ܀

ܘ݁ܠܐ ܕܗܘܐ ܐܝܬ ܠܟ ܡܠܘܐܐ ܠܦܘܫܩܐ ܕܐܝܠܝܢ ܕܡܬܐܡܪܢ ܕܢܣܦܩܢ ܠܢ ܟܠܗܝܢ ܨ̈ܒܘܬܐ܆ ܐܦܢ ܢܗܘܐ ܕܚܕܐ ܡܢ ܙܥܘܪܝܪ̈ܬܐ ܦܠܛܐ ܠܢ܆ ܕܡܠܐܟܐ ܗܝ ܓܝܪ ܕܠܐ ܬܛܥܝܘܗܝ ܚܕܐ ܡܢ ܗܘܠܝܢ ܕܒܐܪܥܐ܀

ܐܠܨܐ ܕܝܢ ܕܐܦ ܬܚܘܡ̈ܐ ܕܣܘܥ̈ܪܢܐ ܢܕܥ܁ ܝܬܝܪܐܝܬ ܕܡܝܬܪ̈ܘܬܐ ܘܕܒ̈ܝܫܘܬܐ. ܗܠܝܢ ܓܝܪ ܐܝܬܝܗܝܢ ܡܒܘܥܐ ܘܪ̈ܫܐ ܕܝܕܥܬܐ ܘܕܠܐ ܝܕܥܬܐ ܘܕܡܠܟܘܬܐ ܕܫܡܝܐ ܘܕܫܘܢܩܐ܀

ܘܠܐ ܠܢ ܕܢܣܬܟܠ ܐܦ ܡܬܠܢܝܐ ܘܦܠܐ̈ܬܢܝܐ ܘܦܫ̈ܝܛܬܢܝܐ ܕܐܢ ܥܠ ܕܘܒܪ̈ܐ ܕܡܝܬܪܘܬܐ ܐܘ ܕܟܝ̈ܢܐ ܐܘ ܥܠ ܡ̈ܠܐ ܕܥܠ ܐܠܗܐ ܐܝܬܝܗܘܢ. ܐܢ ܕܦܘܠܚܢܐ ܐܢܘܢ܆ ܢܣ݁ܬܟܠ ܐܢ ܥܠ ܚܡܬܐ ܘܥܠ ܗܠܝܢ ܕܓ݂ܕܫܢ ܡܢܗ݁ ܐܡܪܝܢ܇ ܐܘ ܥܠ ܪܓܬܐ ܘܐܝܠܝܢ ܕܠܘ݂ܝܢ ܠܗ݁܇ ܐܘ ܥܠ ܗܘܢܢ ܘܙܘܥ̈ܘܗܝ܁ ܘܐܢ ܕܟܝܢ݂ܐ ܐܝܬܝܗܘܢ܆ ܘܠ݁ܐ ܕܢܚܘܪ݂ ܕܠܡܐ ܡܕܡ ܡܢ ܝܘܠ݁ܦܢܐ ܕܟ݂ܝܢܐ ܡܘܕܥܝܢ. ܘܐܝܢܘ܁ ܗܢܐ܁ ܘܐܢ ܦܠܐܬܐ ܗܘ ܕܬܐܘܪܝܐ ܕܡ̈ܠܐ ܕܥܠ ܐܠܗܐ܆ ܟܡܐ ܕܐܝܬ ܒܚܝܠܢ ܠܡܒܨܐ܁ ܐܢ ܥܠ ܬܠܝܬܝܘܬܐ ܡܘܕܥ݂ ܘܐܢ ܦܫܝܛܐܝܬ. ܘܐܢ ܒܚܕܝܘܬܐ ܡܬܚܙܐ܁ ܐܢ ܕܝܢ ܘܠܐ ܚܕܐ ܡܢ ܗܠܝܢ܆ ܣܘܟܠܐ ܗܘ ܫܚܝܡܐ݂ ܐܘ ܢܒܝܘܬܐ ܡܘܕܥ.

ܫܦܝܪܐ ܗܝ ܕܐܦ ܥܝܕܐ ܕܟܬܒܐ ܐܠܗܝܐ ܠܡܕܥ. ܘܠܗܢܐ ܐܝܟ ܕܡܫܟܚܐ ܝܬܝܪܐܝܬ݂ ܒܝܕ ܣ̈ܗܕܘܬܐ ܢܫܪܪ. ܀

ܟܟ ܘܗܕܐ ܬܘܒ ܢܕ݁ܥ܆ ܕܠܘ ܦܬܓܡܐ ܕܡܪܬܝܢܘܬܐ܇ ܐܦ ܣܘܟܠܗ ܕܡܪܬܝܢܘܬܐ ܗܘ܁ ܐܦܠܐ ܕܟܝܢܐ ܣܘܟܠܗ ܕܟܝܢܐ ܗܘ܁ ܐܠܐ ܗ݁ܘ ܕܡܪܬܝܢܘܬܐ ܐܝܬ ܠܗ ܕܟܝܢܐ ܘܗܘ ܕܟܝܢܐ ܕܡܪܬܝܢܘܬܐ ܘܗܟܢܐ ܬܘܒ݂ ܐܦ ܥܠ ܡ̈ܠܐ ܕܥܠ ܐܠܗܘܬܐ ܗܘ ܓܝܪ ܕܐܡ݁ܪ ܥܠ ܙܢܝܘܬܐ ܘܓܝܪܘܬܐ ܕܐܘܪܫܠܡ܇ ܘܥܠ ܚ̈ܝܘܬܐ ܕܝܡܐ ܘܕܝܒܫܐ ܘܕܦܪܚܬܐ: ܘܕܕܟܝܢ ܘܕܠܐ ܕܟܝܢ: ܘܕܢܚ ܫܡܫܐ ܘܕܥܪܒ ܘܠܕܘܟܬܗ ܬܐܒ(Eccl. 1:5) ܘܗ݁ܘ ܘܕܬܠܝܬܝܐ ܡܘܕܥ݂ ܥܠ ܡ̈ܠܐ ܕܥܠ ܐܠܗܘܬܐ ܗܘ ܕܝܢ ܬܪܝܢܐ܆ ܡܩܪܒ ܕܠܘܬ ܣ̈ܘܟܠܐ ܕܡܪܬܝܢܘܬܐ܆ ܘܗܘ ܩܕ̈ܡܝܐ ܠܘܬ ܣ̈ܘܟܠܐ ܕܟܝܢܐ ܐܝܬܘܗܝ ܕܝܢ ܦܬܓܡܐ ܩܕܡܝܐ ܕܡܪܬܝܢܘܬܐ܁ ܗܠܝܢ ܕܝܢ ܬܪܬܝܢ ܐܚܪ̈ܢܝ݂ܢ ܕܟܝܢܐ. ܀

ܡ̈ܠܐ ܕܦܪ̈ܨܘܦܐ ܡܨܚ̈ܝܐ܆ ܠܐ ܬܣ݂ܒܪ ܕܐܝܬ ܒܗܝܢ ܐܪ̈ܙܐ܁ ܘܠܐ ܬܒܥܐ ܒܗܝܢ ܡܕܡ ܪܘܗܢܐ܇ ܐܠܐ ܐܢ ܕܠܡܐ ܒܡܕܒܪܢܘܬܐ ܣ݂ܥܪ ܐܠܗܐ܇ ܐܝܟ ܕܒܒܠܥܡ ܘܒܩܝܦܐ܁ ܕܚܕ ܡܢܗܘܢ ܩ݁ܕܡ ܐܡ݂ܪ ܥܠ ܝܠܕܗ ܕܦܪܘܩ݂ܢ. ܘܐܚܪܢܐ ܥܠ ܡܘܬܗ.

ܠܐ ܘ݁ܠܐ ܠܝܕܘܥܬܢܐ ܕܗ݂ܘܐ ܟܡܝܪ ܘܠܐ ܚܘܝܚ܇ ܨܝܕ ܗܠܝܢ ܕܩܪܒܝܢ ܨܐܕܘܗܝ ܚܕܐ݂ ܓܝܪ ܐܝܬܝܗ݁ ܕܡ݁ܢ ܕܠܐ ܡܦܣ ܒܣ̈ܘܟܠܐ ܕܐܝܠܝܢ ܕܗ̈ܘܝ݂ܢ܁ ܘܐܚܪܬܐ ܕܐܝܢܐ ܕܠܐ ܨܒ݁ܐ ܕܟܠܗܘܢ ܒ̈ܢܝܢܫܐ ܢܚܘܢ܇ ܘܢܐܬܘܢ ܠܝܕܥܬܐ ܕܫܪܪܐ. ܀

ܐܠܨܐ ܒܙܒܢ ܕܢܐܡܪ ܥܠ ܢܦܫܢ ܕܠܐ ܝܕܥܝܢܢ܆ ܡܛܠ ܗܠܝܢ ܕܡܫܐܠܝܢ ܕܠܐ ܫܘܝܢ ܕܢܫܡܥܘܢ ܡܫܪ ܐܢܬ ܓܝܪ܁ ܒܗ݁ܝ ܕܥܡ ܦܓ݂ܪܐ ܟܕܝܢ ܐܢܬ܁ ܘܠܝܬ ܠ݁ܟ݂ ܗܫܐ ܣܘܟܠܐ ܫܪܝܪܐ ܕܣܘܥܪ̈ܢܐ܀

ܚܘܪ ܒܩܢܘܡܟ܆ ܕܠܡܐ ܡܛܠ ܥܠܬܐ ܕܝܘܬܪܢܐ ܐܘ ܕܢܗܘܐ ܠܟ ܕܫܦܝܪ̈܁ ܐܘ ܡܛܠ ܫܘܒܚܐ ܥܒܘܪܐ ܬܐܡܪ ܡܕܡ ܡܢ ܟܣ̈ܝܬܐ݁ ܘܬܫܬܕܐ ܠܒܪ ܡܢ ܚܘܕܪ̈ܐ ܐ̈ܠܗܝܐ܇ ܐܝܟ ܗ݁ܘ ܕܡ݁ܙܒܢ ܗܘܐ ܒ̈ܢܝ ܝܘ̈ܢܐ ܒܗܝܟܠܐ ܀

ܠܐܝܠܝܢ ܕܒܠܐ ܝܕܥܬܐ ܡܬܚܪܝܢ܆ ܠܘ ܡܢ ܫܘܠܡܐ܁ ܐܠܐ ܡܢ ܫܘܪ̈ܝܐ. ܘܠ݁ܐ ܠܡܩܪܒܘ ܠܫܪܪܐ ܠܛܠܝ̈ܐ ܕܝܢ ܠܐ ܡܕܡ ܡܢ ܕܝܕܘ̈ܥܬܢܐ ܠܡܐܡܐܪ܆ ܐܦܠܐ ܠܟ̈ܬܒܐ ܕܐܝܟ ܗܠܝܢ ܘ݁ܠܐ ܠܡܫܒܩ ܠܡܩܪܒ. ܠܐ ܓܝܪ ܡܫܟܚܝܢ ܠܡܩܡ ܩܕܡ ܫܪ̈ܥܬܐ ܕܢܩܝܦܢ ܠܗܕܐ ܬܐܘܪܝܐ. ܡܛܠ ܗܕܐ ܠܗ݁ܢܘܢ ܕܟܬܝܫܝܢ ܡܢ ܚܫ̈ܐ܆ ܠܘ݁ ܡ̈ܠܐ ܕܫܝܢܐ ܙܕܩ݁ ܠܡܐܡܪ܁ ܐܠܐ ܕܐܝܟܢܐ ܢܬܢ݂ܩܡܘܢ ܡܢ ܒܥܠܕܒ̈ܒܝܗܘܢ܁ ܠܝܬ ܓܝܪ ܣܒܪܬܐ ܒܝܘܡܐ ܕܩܪܒ݂ܐ܁ ܐܝܟ ܕܐܡ݂ܪ ܩܘܗܠܬ. ܐܝܠܥܢ ܕܝܢ ܕܟܬܝܫܝܢ ܡܢ ܚܫ̈ܐ: ܘܡܥܩܒܝܢ ܥܠ ܡ̈ܠܐ ܕܠܐ ܡܓܫ̈ܡܐ ܘܡܓܫ̈ܡܐ܆ ܕܡ݁ܝ݂ܢ ܠܐܢܫܐ ܟܪ̈ܝܗܐ ܕܕܪܫܝܢ݁ ܥܠ ܚܘܠܡܢܐ܁ ܠܡ݂ܛܥܡ ܕܝܢ ܡܢ ܗܠܝܢ ܟܟܪ̈ܝܬܐ ܗܝܕܝܢ ܙܕܩ݁܇ ܐܡܬܝ ܕܥܣܩܐܝܬ ܢܦܫܐ ܠܘܬ ܚܫ̈ܐ ܡܬܙܝܢ܀

ܠܘ ܗܘ݂ ܟܕ ܗ݂ܘ ܙܒܢܐ ܐܝܬܘܗܝ ܕܕܪܫܐ ܘܕܦܘܫܩܐ܁ ܡܬܘܠ ܗܕܐ݂ ܕܢܟܐܐ ܘܠ݁ܐ ܠܢ܆ ܒܐܝܠܝܢ ܕܕܠܐ ܒܙܒܢܗܘܢ ܕܪܫܝܢ܁ ܕܗܪ̈ܣܝܘܛܐ ܓܝܪ ܘܕܚܪ̈ܝܝܐ ܐܝܬܘܗܝ ܗܢܐ ܥܝܕܐ܀܀

ܠܐ ܬܡܠܠ ܥܠ܁ ܐܠܗܐ ܕܠܐ ܒܘܚܢܐ܁ ܘܠܐ ܡܬܘܡ ܬܬ݂ܚܡ ܠܐܠܗܘܬܐ܁ ܕܡܪ̈ܟܒܐ ܓܝܪ ܘܕܗ̈ܘܝܐ ܐܝܬܝܗܘܢ ܬܘܚܡ̈ܐ܀

ܗܘܝܬ ܥܗܝܕ ܐܢܬ ܠܗܠܝܢ ܚܡܫܐ ܪ̈ܫܝܢ ܕܡܫܬ݁ܒܩܢܘܬܐ܁ ܕܬܫܟܚ ܠܡܬܪܨܘ ܠܙܥܘܪ̈ܝ ܢܦܫܐ܆ ܐܡܬܝ ܕܒܥܩ̈ܬܐ ܢܦܠܝܢ܇ ܡܝܬܪܘܬܐ ܓܝܪ ܕܡܛܫܝܐ ܒܝܕ ܡܫܬܒܩܢܘܬܐ ܡܬܓܠܐ܁ ܘܐܢ ܐܬܒܣܝܬ܆ ܒܡܣܡ ܒܪܫܐ ܥܛܦܐ ܘܥܠܬܐ ܕܦܘܪܩܢܐ ܗܘܝܐ ܠܐܚ݂ܪ̈ܢܐ܁ ܟܕ ܕܝܢ ܬܗܘܐ ܩܕܡܝܐ ܠܡܝܬܪܘܬܐ܁ ܡܟܝܟܘܬܐ ܡܠܦܐ ܠܩ̈ܢܝܗ݁܁ ܣ݁ܢܐ ܓܝܪ ܠܒܝܫܬܐ݂ ܗ݁ܘ ܕܢܣܝܗ݁܁ ܢܣܝܢܐ ܓܝܪ ܝܠܕܐ ܗܘ ܕܡܫܬܒܩܢܘܬܐ܁ ܡܫܬܒܩܢܘܬܐ ܕܝܢ܁ ܒܪܬܗ ܗܝ ܕܠܐ ܡܬܛܦܝܣܢܘ݁ܬܐ. 11v

ܗܠܝܢ ܕܝܠܦܝܢ ܡܢܟ܆ ܗܘ݂ܘ ܐܡܪܝܢ ܠܟ ܟܠܫܥ܆ܪܚܡܝ ܐܬܩ݁ܪܒ ܠܥܠ܁ ܫܟܝܪܐ ܗܝ ܓܝܪ ܕܡܐ ܕܣ݂ܠܩܬ ܠܥܠ܇ ܬܘܒ ܡܢ ܫ̈ܡܘܥܝܟ ܬܬܚܝܬ ܀

ܪܚ݁ܡ ܟܣܦܐ ܐܝܬܘܗܝ܆ ܠܘ ܗ݁ܘ ܕܐܝܬ ܠܗ ܟܣܦܐ. ܐܠܐ݂ ܗ݁ܘ ܕܪܓ݂ܝܓ ܠܡܩܢܝܗ܁ ܠܡܦܪܢܣܢܐ ܓܝܪ݂ ܟܝܣܐ ܡܠܝܠܐ ܩ݁ܪܝܢ ܀

ܠܣ̈ܒܐ ܐܦܝܣ ܕܢܠܒܟܘܢ݂ ܚܡܬܗܘܢ݁ ܘ̈ܠܛܠܝܐ݂ ܟܪܣܗܘܢ܁ ܥܡ ܣ̈ܒܐ ܓܝܪ݂ ܚܫ̈ܐ ܢܦܫ̈ܢܐ ܡܬܟܬܫܝܢ܁ ܘܥܡ ܛ̈ܠܝܐ ܐܝܟ ܕܒܣܘܓܐܐ݂ ܦܓܪ̈ܢܐ܁ ܀

ܒܠܘܡ ܦܘܡܐ ܕܐܝܠܝܢ ܕܡ݁ܪܝܢ ܒܐܕ݂̈ܢܝܟ܁ ܘܠܐ ܬܬܕܡܪ ܐܢ ܡܢ ܣ̈ܓܝܐܐ ܬܬܩܛܪܓ܁ ܗܢܐ ܓܝܪ ܢܣܝܘܢܐ ܡܢ ܫ̈ܐܕܐ ܗܘ܁ ܗ݁ܢܘܢ ܕܠܐ ܨܒ݁ܝܢ ܕܢܬܚܪܪ ܝܕܘܥܬܢܐ ܡܢ ܣܢܐܬܐ ܘܐܟܬܐ܁ ܀

ܛܥܝܐ ܠܗ ܕܠܢܦܫܗ ܡܐܣܐ܇ ܗ݁ܘ ܕܡܛܠ ܐܠܗܐ ܠܒ̈ܢܝܢܫܐ ܡܐܣܐ܁ ܣܡܐ ܓܝܪ ܕܡܩܪܒ ܝܕܘܥܬܢܐ ܠܩܪܝܒܗ܆ ܐܝܟ ܕܡܫܟܗܐ ܡܐܣܐ܁ ܠܢܦܫܗ ܕܝ݂ܢ ܐܠܨܐܝܬ ܀

ܠܘ ܟܠ ܡܕܡ ܕܟܕܝܢ ܥܡ ܦܠܐܬܐ ܬܦܫܩ ܪܘܚܢܐܝܬ܁ ܐܠܐ ܐܝܠܝܢ ܕܠܚܡܢ ܠܗ݁ ܠܨܒܘܬܐ܁ ܐܢ ܓܝܪ ܗܕܐ ܠܐ ܬܥܒܕ܆ ܙܒܢܐ ܣܓܝܐܐ ܬܦܩܩ ܥܠ ܐܠܦܗ ܕܝܘܢܢ܇ ܟܕ ܬܒܥܐ ܠܡܦܫܩܘ ܟܠ ܚܕ ܡܢ ܡܐ̈ܢܝܗ݁ ܘܓܘܚܟܐ ܝܬܝܪܐܝܬ ܬܥܒܕ ܒܫ̈ܡܘܥܐ ܘܠܐ ܝܘܬܪܢܐ܁ ܟܕ ܟܠܗܘܢ ܐܝܠܝܢ ܕܚܕܝܪܝܢ ܠܟ ܡܐ̈ܢܐ ܢܥܗܕܘܢ ܘܠܗ݁ܘ ܕܛܥ݁ܐ ܠܡܨܥܬܐ ܒܓܘܚܟܐ ܢܝܬܘܢ܀

ܐܦܝܣ ܠܝܚ̈ܝܕܝܐ ܐܝܠܝܢ ܕܐܬ݁ܝܢ ܠܘܬܟ܆ ܕܥܠ ܡܪܬܝܢܘܬܐ ܢܡܠܠܘܢ݂ ܘܠܐ ܥܠ ܝܘ̈ܠܦܢܐ܁ ܐܠܐ ܐܢ ܕܠܡܐ ܐܫܬܟܚ ܐܢܫ܇ ܕܒܡܠܘܐܐ ܕܐܝܟ ܗܢܐ ܡܫܟܚ ܠܡܬܒ݁ܩܝܘ ܀

ܗܘܬ ܡܚܦܝܐ ܡܢ ܥܠܡ̈ܝܐ ܘ̈ܛܠܝܐ܇ ܡܠܬܐ ܡܥܠܝܬܐ ܕܥܠ ܕܝܢ݂ܐ܁ ܡܛܠ ܕܕܠܝܠܐܝܬ ܡܘܠܕܐ ܪܦܝܘܬܐ܁ ܠܐ ܓܝܪ ܡܣܬܟܠܝܢ ܕܟܐܒܐ ܕܢܦܫܐ ܡܠܝܠܬܐ ܕܐܬܚܝ݂ܒܬ ܠܐ ܝܕܥܬܐ ܗܝ ܀

ܐܢ ܦܘܠܘܣ ܩܕܝܫܐ ܟܒ݁ܫ ܗܘܐ ܦܓܪܗ ܘܡܫܥܒܕ܆ ܠܐ ܬܗܡܐ ܒܣܝܒܪܬܟ ܒܚ̈ܝܝܟ܇ ܘܬܨܥܪ ܠܠܐ ܚܫܘܫܬܐ܇ ܘܒܦܓܪܐ ܥܒܝܐ ܬܡܟܟܝܗ݁܀

ܠܐ ܬܐܨܦ ܥܠ ܣܝܒܪܬܐ ܘܠܒܘܫܐ ܐܠܐ ܥܗܕ ܠܥܘܒܪ ܐܕܘܡ ܠܘܝܐ܇ ܗ݁ܘ ܕܩ݁ܒܠ ܩܒܘܬܗ݂ ܕܡܪܝܐ܇ ܘܗ݂ܘܐ ܥܬܝܪܐ ܡܢ ܡܣܟܢܐ܇ ܘܡܫܒܚܐ ܡܢ ܡܨܥܪܐ܀

ܡܩܛܪܓܢܐ ܡܪܝܪܐ ܕܝܕܘܥܬܢܐ ܬܐܪܬܗ ܗܝ ܁ ܘܠܝܬ ܠܡ݂ܛܥܝܘ ܡܕܡ ܡܢܗ݁܁ ܡܛܠ ܕܐܦ ܟܣ̈ܝܬܐ ܕܠܒܐ ܝܕܥܐ.܀

ܐܙܕ݂ܗܪ ܕܠܡܐ ܬܣ݂ܒܪ ܕܚܕ ܗܘ ܣܘܟܠܐ ܕܟܠ܆ ܚܕ ܚܕ ܡܢ{?} ܗ̈ܘ݁ܝܐ܁ ܐܠܐ݂ ܣ̈ܓܝܐܐ܁ ܘܐܝܟ ܡܫܘܚܬܐ ܕܣ݂ܘܟܠܗܘܢ ܕܚ̈ܝܠܘܬܐ ܕܩܕܝܫ̈ܐ ܡܬܩܪܒܝܢ ܠܣܘܥܪ̈ܢܐ܁ ܘܡܫܟܚܝܢ ܣ̈ܘܟܠܐ ܫܪܝܪ̈ܐ܁ ܠܘ ܕܝܢ ܠܗ݁ܢܘܢ ܪ̈ܫܐ܁ ܘܠܐ ܠܗ݁ܢܘܢ ܕܡܢ ܡܫܝܚܐ ܒܠܚܘܕ ܡܬܝܕܥ ܀

ܡܐ ܫܘܐܠܐ ܕܐܝܬ݂ ܥܠ ܓܢܣ̈ܐ ܡܫ̈ܚܠܦܐ ܡܘܕܥ܁ ܐܘ ܥܠ ܐܕܫ̈ܐ ܐܘ ܥܠ ܫܘܚܠܦܐ ܐܘ ܥܠ ܓܕ̈ܫܐ ܐܘ ܥܠ ܗܘ݁ ܕܡܢ ܗܠܝܢ ܡ݂ܪܟܒ܁ ܠܝܬ ܕܝܢ ܡܕܡ ܡܢ ܗܠܝܢ ܒܬܠܝܬܝܘܬܐ ܩܕܝܫܬܐ. ܡܕܝܢ ܒܫܬܩܐ ܢܣܬܓܕ ܗܘ ܕܠܐ ܡܬܡܠܠ܀

ܢܣܝܘܢܐ ܕܝܕܘܥܬܢܐ ܐܝܬܘ݂ܗܝ܆ ܡܣܒܪܢܘܬܐ ܕܓܠܬܐ ܕܗ݁ܘܝܐ ܒܗܘܢܐ܇ ܥܠ ܐܝܠܝܢ ܕܐܝܬܝܗܝܢ ܐܝܟ ܕܠܝܬ ܐܢܝܢ܇ ܘܐܝܠܝܢ ܕܠܝܬ܁ ܐܢܝܢ ܐܝܟ ܐܝܬܝܗܝܢ܁ ܘܐܝܠܝܢ ܕܐܝܬܝܗܝܢ ܕܠܘ ܗܟܢܐ ܐܢܝܢ ܐܝܟ ܕܗܘܝ. ܀

ܚܛܝܬܗ ܕܝܕܘܥܬܢܐ ܐܝܬܝܗ݁܆ ܝܕܥܬܐ ܕܓܠܬܐ ܕܝܠܗܘܢ ܕܣܘܥܪ̈ܢܐ ܐܘ ܕܬܐܘܪܝܐ ܕܝܠܗܘܢ܇ ܕܡܢ ܚܫ̈ܐ ܡܕܡ ܡܬܝܠܕܐ܁ ܐܘ ܕܠܘ ܡܛܠܬܗ݁ ܕܫܦܝܪܬܐ ܡܥܩܒ ܥܠ ܦܠܐܬܐ܀

ܐܪܒܥ ܡܝܬܪ̈ܬܐ ܕܝܠܗ ܕܬܐܘܪܝܐ܆ ܡܢ ܩܕܝܫܐ ܓܪܝܓܪܝܣ ܝܠܦܢܢ܁ ܕܐܝܬܝܗܝ݂ܢ܁ ܣܟܘܠܬܢܘܬܐ܁ ܚܝܠܬܢܘܬܐ܁ ܢܟܦܘܬܐ܁ ܟܐܢܘܬܐ܁ ܘܥܒܕܐ ܕܣܟܘܠܬܢܘܬܐ܁ ܐܡ݂ܪ ܕܐܝܬܘܗܝ݂܁ ܕܢܚܙܐ ܠܚܝܠܘܬܐ ܝܕܘ̈ܥܬܢܐ ܘܩܕܝܫ̈ܐ܁ ܣܛܪ ܡܢ ܣ̈ܘܟܠܝܗܘܢ܁ ܗܠܝܢ ܓܝܪ ܡܢ ܚ݁ܟܡܬܐ ܐܡܪ ܕܡܬܓܠܝܢ܁ ܕܚܝܠܬܢܘܬܐ ܕܝܢ ܕܡܚܡܣܢܢܘܬܐ ܕܒܫܪ̈ܝܪܬܐ܁ ܐܦ ܟܕ ܐܝܬ ܥܡܗ ܩܪܒܐ܁ ܘܕܠܐ ܗܘܝܢ ܒ݁ܨܝܢ ܠܗܠܝܢ ܠܐ ܐܝܬܝܗܝܢ ܥܒܕܐ ܕܝܢ ܕܢܟܦܘܬܐ ܐܝܬܘܗܝ܆ ܕܢܩܒܠ ܙܪܥܐ ܕܡܢ ܐܟܪܐ ܩܕܡܝܐ ܐܙܕܪܥ ܒܢ܇ ܘܢܕܚܘܩ ܡܢܢ ܠܙܪܘܥܐ ܬܪܝܢܐ܁ ܥܒܕܐ ܕܝܢ ܕܟܐܢܘܬܐ ܐܝܬܘܗ݂ܝ ܕܐܝܟ ܡܫܘܚܬܐ ܕܟܠ ܣܘ̈ܟܠܐ ܬܬܠ. ܘܠܡܢܗܘܢ ܥܡܘܛܐܝܬ ܡܚܘܝܐ ܘܡܢܗܘܢ ܒܪ̈ܡܙܐ ܡܘܕܥܐ܁ ܘ݁ܡܢܗܘܢ ܓܠܝܐ݂ ܠܢܘܬܪܢܐ ܕܦܫ̈ܝܛܐ.܀

ܥܡܘܕܐ ܕܫܪܪܐ ܒܣܝܠܝܣ ܩܦܘܕܩܝܐ ܥܡ݂ܪ ܗܘܐ܁ ܕܝܕܥܬܐ ܕܡܢ ܒܢ̈ܝ ܐܢܫܐ ܓܕܫܐ ܒܢ ܡܢ ܗܓܝܢܐ ܐܡܝܢܐ݂ ܘܡܢ ܗܪܓܐ ܬܟܝܒܐ ܡܬܚܝܠܐ܁ ܠܗ݁ܝ ܕܝܢ ܕܡܢ ܛܝܒܘܬܐ ܕܐܠܗܐ ܗ݁ܘܝܐ܁ ܟܐܢܘܬܐ ܘܒܗܝܠܘܬܐ ܘܪ̈ܚܡܐ܁ ܘܠܩܕܡܝܬܐ ܐܡ݂ܪ ܕܡܫܟܚܐ ܐܦ ܐܢܫܐ ܚܫ̈ܘܫܐ ܢܩܢܘ܁ ܠܬܪܝܥܬܐ ܐܠܐ ܠܐ ܚܫ̈ܘܫܐ ܒܠܚܘܕ ܗ݁ܢܘ ܕܒܙܒܢܐ ܕܨܠܘܬܐ ܨܡܚܐ ܕܢܘܗܪܐ ܕܗܘܢܗܘܢ ܚ݁ܙܝܢ ܕܕܢܚ ܥܠܝܗܘܢ ܀

ܟܘܟܒܐ ܩܕܝܫܐ ܕܡܨܪ̈ܝܢ ܐܬܢܣܝܣ ܐܡ݂ܪ ܗܘܐ܆ ܕܐܢ ܡܘܫܐ ܐܬܦܩ݁ܕ ܕܦܬܘܪܐ ܡܢ ܓܒܐ ܕܓܪܒܝܐ ܢܣܝܡ܆ ܘܠ݁ܐ ܠܝܕܘ̈ܥܬܢܐ ܕܢܥܣܬܟܠܘܢ܆ ܕܡܢ݂ܘ ܗ݁ܘ ܕܢܫ݁ܒ ܠܘܩܒܠܗܘܢ܁ ܘܚܝܠܬܢܐܝܬ ܟܘܠ ܢܣ̈ܝܘܢܝܢ ܠܡܣܝܒܪܘ܁ ܘܒܨܒܝܢܐ ܛܒܐ ܢܬܪܣܐ ܠܗܠܝܢ ܕܐ݁ܬܝܢ ܨܐܕܝܢ܀

ܐܡ݁ܪ ܗܘܐ ܡܠܐܟܐ ܕܥܕܬܐ ܕܬܡܘܪ ܣܪܦܝܘܢ܆ܕܗܘܢܐ ܕܐܫܬܝ ܝܕܥܬܐ ܪܘܚܢܝܬܐ܆ ܡܠܝܐܝܬ ܡܬܕܟܐ܁ ܚܘܒܐ ܕܝܢ ܬܙܝܙܘܬܐ ܕܡ̈ܢܘܬܐ ܕܚܡܬܐ ܡܐܣܐ܁ ܪܕܝܐ ܕܝܢ ܕܪ̈ܓܝܓܬܐ ܒܝܫ̈ܬܐ ܟܠܝܐ݂ ܥܢܘܝܘ݂ܬܐ ܀

ܠܡ̈ܠܐ ܕܥܠ ܒܛܝܠܘܬܐ ܘܕܝܢܐ܆ ܒܟܠܙܒܢ ܒ݁ܚܢ ܒܟ܁ ܐܡ݁ܪ ܗܘܐ݁ ܗ݁ܘ ܪܒܐ ܘܝܕܘܥܬܢܐ ܡܠܦܢܢ ܕܕܝܡܣ܁ ܘܡܠܐܗܝܢ ܕܗܠܝ݂ܢ ܒܥܘܗܕܢܟ ܩܢܝ܁ ܟܠܗܘܢ. ܓܝܪ ܒ̈ܢܝܢܫܐ ܐܝܟ ܕܣܘܓܐܐ݂ ܒܗܠܝܢ ܡܬܬܩܠܝܢ ܘ ܠܣ̈ܘܟܠܐ ܡ݁ܢ ܕܕܝܢܐ ܘܕܒܛܝܠܘܬܐ܁ ܒܫܘܚܠܦܐ ܕܓܘ̈ܫܡܐ ܘܕܥ̈ܠܡܐ ܐܬܫܟܚ. ܠܐܝܠܝܢ ܕܝܢ ܕܡܛܠ ܒܛܝܠܘܬܐ ܒܢܝܫ̈ܐ ܐܝܠܝܢ ܘܡܢ ܒܝܫܘܬܐ ܘܠܐ ܝܕܥܬܐ ܠܘܬ ܡܝܬܪܘܬܐ ܕܝܕܥܬܐ ܡܦܢܝܢ ܠܢ......

ܢܝܫܐ ܡ݁ܢ ܕܦܠܘܚܘܬܐ܁ܕܬܕܟܐ ܠܗܘܢܐ ܘܬܥܒܕܝܘܗܝ ܠܐ ܡܩܒܠܢܐ ܕܚܫ̈ܐ܁ ܕܟܝܢܐ ܕܝܢ܆ ܕܢܚܘܐ ܫܪܪܐ ܕܛܡܝܪ ܒܟܠܗܘܢ ܗ݁ܘܝܐ܁ ܗ݁ܝ ܕܝܢ ܕܢܪܚܩ ܗܘ݂ܢܐ ܡܢ ܗ̈ܘܠܐ܆ ܘܢܬܦܢܐ ܠܘ݂ܬ ܥܠܬܐ ܩܕܡܝܬܐ܆ ܡܘܗܩܬܐ ܗܝ ܡ݂̈ܠܐ ܕܥܠ ܐܠܗܐ.....

ܢܢ ܟܕ ܚܐܪ ܐܢܬ ܒܟܠܙܒܢ ܒܪܝܫ ܕܡܘ݂ܬܐ܆ ܐܬܚܦܛ ܕܬܨܘܪ ܨ̈ܠܡܐ ܘܠܐ ܬܫܒܘܩ ܡܕܡ ܡܢ ܐܝܠܝܢ ܕ-ܫ--ܝܢ ܕܬܐܬܪ ܠܗܝ ܕܢܦܠܬ.